¿PÜTÜJAA aaʼu tü alatakat? Chi jintüikai nuʼuta aaʼinchi chi jeesükai süka niküinjachin chi anneetchonkai. Soʼu wanee kaʼi nuʼuta aaʼinchi wanee wasashi süka niküinjatüin wanee anneerü. ¿Meimmoluinsai saaʼin pümüin chi jintüikai? ¿Pütüjaa aaʼu jarai nia?

Nia David, kepiashi Belén. Chi nutuushikai nia Obed, chi nüchonkai Booz otta Rut. ¿Sotushii paaʼin naya? Chi nüshikai David nia Jesé. Arüleejüi David naʼanneetse chi nüshikai. Jemeishi David 10 juya süchikijee nüneeküin Jeʼwaa Saúl süpüla aluwatawaa.

Mapa nümaka Jeʼwaa nümüin Samuel: ‹Paapaa wanee seita otta puʼuna nipialuʼumüin Jesé chaaʼaya Belén. Taneeküin wanee nüchon süpüla aluwatawaa›. Niʼrapa Samuel Eliab, chi niʼirumakai Jesé, nümaka: ‹Nia chii›. Nümaka Jeʼwaa nümüin Samuel: ‹Nnojo kanain paaʼin miyoʼusenuuin otta anashichoin nia, nnojoishi taneeküin süpüla aluwatawaa›.

Neenajaka Jesé Abinadab. Niʼikajaaka nia eemüin Samuel, nümaka Samuel: ‹Nnojoishi nüneeküin Jeʼwaa chii›. Mapa nüntiraka Jesé Samah. Nümaka Samuel: ‹Nnojoishi nüneeküin Jeʼwaa chii›. Nüntirüin Jesé 7 nüchonnii, nnojoishii nüneeküin Jeʼwaa. Nüsakitka Samuel: ‹¿Naya napüshuaʼa na tepichikana naainnua?›

Nümaka Jesé: ‹Nnojoishi chi emülieekai, ichaa arüleejüin anneerü›. Nüntinnapa David eemüin Samuel niʼrüin anashichoin nia. Nümaka Jeʼwaa: ‹Nia chii, piʼyoto seita saaʼu nikii›. Naainjaka shia Samuel. Mapa niaka David aluwataain naaʼu na israeliitakana.