EKIRAJAAYA 06
¿Jamakuwaʼipat tü kasakalüirua?
«Nünain Maleiwakai, katoʼuchii waya, waraittüshii waya otta wayuushii waya» (Aluwataaushikana [Hechos] 17:28). ¿Punoujainche sünain müinya tia? Eeshii na wayuu makana akumajaasüin neʼe sümüiwaʼa tü kasakalüirua, nnojotsü jaralüin kakumajalain shia naashin. Müleka wakumajaashiire wamüiwaʼa nnojotsüjeʼe watüjaain saaʼu kasapülajanain eeka waya. Müleka nukumajaraleje waya Jehová, eesüjaʼa tü nukumajakalü apüla waya ¿aashi müin? a Pikirajaale sünain tü sümakat tü Bibliakat süchiki sukuwaʼipa tü kasakalüirua suʼttaiwaʼaya, pütüjaajeerü aaʼu shiimain wakumajuushin.
1. ¿Jamakuwaʼipat tü kasakalüirua?
Saashin tü Bibliakat nukumajala Maleiwa kasa süpüshuaʼa chaa iipünaa ooʼulaka yaa mmoluʼu (Génesis 1:1). Naashin waneinnua wayuu ekirajaakana sünain jamüin sukuwaʼipa tü Mmakat, akumajuushi paala sümaiwa tü kasakalüirua. ¿Jamüsü sukuwaʼipa nutuma Maleiwa süpüla nukumajüin shia? Nukumajüin Maleiwa tü kasakalüirua, tü chakat iipünaa, tü jolotsükalüirua otta waneirua kasa sükajee tü nüpülainkat (Génesis 1:2).
2. ¿Kasapülajatü nukumajaka Maleiwa tü Mmakat?
«Nnojotsü nukumajaʼalüin neʼe [Jehová tü mmakat], nukumajüin süpüla kepiainjatüin wayuu suluʼu» (Isaías 45:18). Nukumajüin Maleiwa tü Mmakat süpüla anainjatüin maʼin shia jee süpüla kepiainjanain na wayuukana suluʼu (paashajeʼera Isaías 40:28 otta 42:5). Anasü maʼin sukuwaʼipa tü mmakat naashin na cientiificokana. Shia neʼe sümüiwaʼa eeka süpüla kepiain aluʼu wayuu.
3. ¿Jamüsü naataka sukuwaʼipa wayuu suulia sukuwaʼipa mürüt?
Süchikijee nukumajüin Jehová tü Mmakat, nukumajüin tü kasa katakalü oʼu yaa saaʼu tü Mmakat. Nukumajüin tü wunuʼuliakalüirua otta tü mürütkalüirua. Süchikijee tia, nukumajüin chi Maleiwakai na wayuukana sünain müin aka nukuwaʼipa wanaa nümaa (paashajeʼera Génesis 1:27). ¿Jamüsü naataka wakuwaʼipa suulia sukuwaʼipa mürüt? Nukumajüin waya Maleiwa sünain müin aka wakuwaʼipa wanaa nümaa. Eesü süpüla washatüin tü nukuwaʼipakat, aipüraliin waya jee anain wamüin tü kasa anasükat. Nukumajüinya waya süpüla watüjainjanain süpüleerua waneirua anüikii, talatüinjatüin waaʼin sutuma wanee kasa jee sutuma waapajüin muusika. Wane kasa naataka aluʼu wakuwaʼipa suulia mürüt shia süka eein süpüla waʼwaajüin Maleiwa, chi Kakumajalakai waya.
WEKIRAJAA SOOʼOMÜIN
Wekirajaa sünain waneirua kasa wayaawateetka anainjee nukumajalain Maleiwa süpüshuaʼa tü kasa katakalü oʼu otta jamüin shiimainka tia saashin tü Bibliakat. Jee müsia wekirajaa sünain tü watüjakat nüchiki Maleiwa sünainjee tü wakuwaʼipakat.
4. Eeshi chi Kakumajalakai süpüshuaʼa tü kasa katakalü oʼu
«Atüjashi maʼin», münüshi wanee wayuu nukumajüle wanee kasa sünainjee sukuwaʼipa wüchii, jime otta mürüt. Nnojotpejeʼe müin pütchi nüchiki chi Kakumajalakai kasa süpüshuaʼa. Jünaja tü VIDEOKOT otta yooto jia süchiki tüü:
-
¿Kasa ashatünaka sünainjee sukuwaʼipa wunuʼulia jee sukuwaʼipa mürüt?
Süpüshuaʼa tü kasa weʼrakat, eeshi chi kakumajalakai shia. ¿Jaraikaʼa kakumajalain süpüshuaʼa tü kasakalüirua maʼaka saaʼin wunuʼulia otta mürüt? Jaashajeʼera Hebreokana 3:4, TNM otta yooto jia süchiki tüü:
-
¿Kasa ponoko paaʼin sünainjee sukuwaʼipa tü wunuʼuliakalüirua jee tü mürütkalüirua?
-
¿Shiimainchejeʼe eein chi kakumajalakai süpüshuaʼa tü kasakalüirua? ¿Jamüsü shiimainka tia saaʼin pümüin?
¿Pütüjaa aaʼu tüü?
Suluʼu jw.org pünteerü anain waneirua pütchi otta video aashajaaka süchiki tü yootokalü achiki waya. Pünaʼla shia suluʼu tü kanüliakat «¿Akumajaasüche kasa sümüiwaʼa? ¿Eetaapa chi kakumajalakai shia?» otta «Tü münakat süchiki jamakuwaʼipalüin kasakalüirua süpüshuaʼa».
«Süpüla eeinjatüin wanee piichi eeshi chi kakumalakai shia. Jee chi Kakumalakai tü kasakalüirua süpüshuaʼa nia Maleiwa».
5. Pansaasü tü sümakat tü Bibliakat süchiki sukumajuushin tü kasakalüirua
Süküjain tü Bibliakat suluʼu Génesis kapiitulo 1 sukumajuushin tü Mmakat otta süpüshuaʼa tü kasa eekat suluʼu. ¿Shiimainchejeʼe tia?, ¿kuentataapa neʼe? Jünaja tü VIDEOKOT otta yooto jia süchiki tüü:
-
¿Süküjainche tü Bibliakat akumajuushin soʼu 6 kaʼi tü Mmakat otta süpüshuaʼa tü kasa eekat suluʼu?
-
¿Shiimainchejeʼe tü sümakat tü Bibliakat süchiki sukumajuushin tü kasakalüirua? ¿Jamüsü shiimainka tia?
Jaashajeʼera Génesis 1:1 otta yooto jia süchiki tüü:
-
Akumajuushi tü kasakalüirua naashin noʼutku na ekirajaakana sünain jamüin sukuwaʼipa tü Mmakat. ¿Pansaasüche tia sümaa tü paashajeʼerüitpakat suluʼujee tü Bibliakat?
Eeshii na wayuu atüjaweekana saaʼu nukumajarale Maleiwa tü kasakalüirua jee shiiʼiranajaasüle sukuwaʼipa mapa. Jaashajeʼera Génesis 1:21, 25, 27 otta yooto jia süchiki tüü:
-
¿Süküjainche tü Bibliakat nukumajüin Maleiwa kasa eekai katüin soʼu jee shiiʼiranajaain sukuwaʼipa mapa süpüla jimeinjatüin, mürüʼlüinjatüin jee wayuuinjatüin shia? ¿Shiataapaʼa nukumajüin tü kasakalüirua katataawaa sukuwaʼipa waneʼewai sukua?
6. Naatajatü wakuwaʼipa suulia sukuwaʼipa tü wane kasairua nukumajalakat Maleiwa
Naatajatü wakuwaʼipa suulia sukuwaʼipa mürüt. Jaashajeʼera Génesis 1:26 otta yooto jia süchiki tüü:
-
Aipüralii waya wayuu otta amülialaasü waaʼin naalin, süka jamüin, nukumajalain waya Maleiwa sünain müin wakuwaʼipa maʼaka saaʼin nukuwaʼipapala. Süka müin wakuwaʼipa, ¿kasa wayaawataka aaʼu süchiki nukuwaʼipa Maleiwa?
EESHII WAYUU EEKAI NAMÜIN: «Kuenta neʼe tü sümakat tü Bibliakat süchiki sukumajuushin tü kasakalüirua».
-
¿Jamüsüjaʼa pünüiki süchiki tia?
WATÜJAAITPAKA AAʼU
Nukumajala Jehová süpüshuaʼa tü kasakalüirua otta süpüshuaʼa tü kasa eekai katüin soʼu.
Pusouta shiʼipajee
-
¿Jamüsü sünüiki tü Bibliakat süchiki sukumajuushin tü kasakalüirua?
-
¿Nukumajalache Maleiwa tü kasakalüirua süpüla shiiʼiranajaainjatüin sukuwaʼipa mapa? ¿Nukumajataapa shia sümaa katataawain sukuwaʼipa waneʼewai sukua?
-
¿Jamüsü naatajatka wakuwaʼipa suulia sukuwaʼipa mürüt?
PÜNAʼLA SOOʼOMÜIN
Anuu wanee sukuwaʼipa süpüla watüjaainjatüin saaʼu eein chi kakumajalakai tü kasakalüirua süpüshuaʼa.
Pünaja tü naaʼinrakat wanee wayuu aküjakai nümüin nüchon nukumajalain Maleiwa tü kasakalüirua.
Jülüja paaʼin pansaale tü sümakat tü Bibliakat sümaa shiiʼiranajaain sukuwaʼipa tü kasakalüirua.
Süpüla piyaawatüin saaʼu sukumajuushire tü kasakalüirua jee sukumajaasüle neʼe sümüiwaʼa, jülüja paaʼin tü aküjünakat süchiki tü shiipüse mürüt ousütünakat jee waneirua kasa naaʼinraka na cientiificokana.
Jaʼraisü kasa watüjaainjatka aaʼu süchiki jamakuwaʼipalüin tü kasakalüirua (Poyeeto)
a Suluʼu ekirajaaya 25 aküjünüsü kasapülajanain nukumajaka waya Maleiwa.
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
