Soʼu tü ekawaa aipaʼajatkat nutuma Jesús, müshi nia namüin na aluwataaushikana: «Oʼuneena jia jüpüshuaʼa tamaʼanajee soʼu aikat tüü». Nusoutaka Pedro nümüin: «Mayaashiijeʼe napüteechin pia na waneinnua, nnojoireejaʼa tapütüinjachin pia pümüiwaʼa». «Süpülapünaa niʼyalajüin wanee kaliina soʼu aikat tüü, apünüintueechi taya puunjulajüin achiki sünain piʼraajüin taya», nümaka Jesús nümüin.

Wanaa sümaa nümaanüin Jesús natuma na surulaatkana nipialuʼumüin Caifás, aʼwalakajaashii na aluwataaushikana. Piamashii neʼe na apütaakana, noʼunaka süchiirua tü wayuukalüirua. Wane nia Pedro. Ekerotushi Pedro süpaatiaseruʼu nipia Caifás jee nürütkaaka sünainmüin wanee siki süpüla naatulajüin. Süka chuwatüin tü sikikat, niyaawatünaka Pedro sutuma wanee achepchiee. «Teʼraajüin pia. Pia wanee wayuu nümaapuʼukai Jesús», sümaka nümüin.

Nusoutaka Pedro sümüin: «Paʼalain neʼe, nnojoishi teʼraajüin chi pümakai tamüin». Nukoyotka Pedro sünainmüin tü puettoʼukot. Shiasaʼa mapa, shiirakaaka wanee jiet aʼyataat nümüin chi laülaashikai. «Aashin piayaain wanee nütünajut chi wayuu ataʼünnakai», sümaka nümüin Pedro. Nusoutaka Pedro shiʼipajee: «Nnojo, nnojoishi teʼraajüin chi wayuu püküjakai achiki tamüin». Nümaka joo wane wayuu nümüinña: «Piaʼaya wanee nümaapuʼukai chira wayuukai. Wayaawatüin pia sünainjee tü pünüikikat, süka saashajaayain wayuu Galileajeejatü tia». Nümaka Pedro namüin. «Nnojottaa, nnojoishi teʼraajüin chira wayuukai».

Akootoleʼeraja müshijaʼa joo wanee kaliina. Niasaʼa Jesús nujununtaaka sünain eirakawaa nümüin Pedro, sotoka naaʼin Pedro tü nümakat Jesús paala nümüin. Nujuʼitaaka Pedro yalejee yala sünain mojuin maʼin naaʼin sünain niʼyalajashaanain.

Jee yaa paülüʼü suluʼu nipia Caifás, outkajaashii na laülaashiikana suluʼu tü kanüliakat Sanedrín süpüla naashajaajiraain süchiki tü naaʼinrajatkat nüka Jesús. Süka noʼuteein maʼin naaʼin Jesús, nachajaa achikit sukuwaʼipa süpüla süküjünüinjatüin alawaa nüchiki Jesús. Isapejeʼe nachiki tia, nnojotsü nantüin anain wanee kasa noʼutirüinjachikai anainjee Jesús. Nüsakinnaka Jesús mapa nutuma Caifás: «¿Shiimainjasaʼa piain chi Nüchonkai Maleiwa?», nümaka nümüin. Nusoutaka Jesús niʼipajee: «Aa, tayaʼaya». «Nnojoluitpa choʼujaain wayuu wamüin aküjainjatkat nüchiki. Eʼrüi maʼin nia wayumüin süka müin nünüiki nümüin Maleiwa», nümaka Caifás. Nayasaʼa napüshuaʼa na laülaashii jutkatakana, paaʼinwaasü naaʼin sünain maa: «Anakajaʼa suʼutinnüle aaʼin». Shiʼyaatünaka  nuwalapaʼa Jesús, ejetüna oʼuutajeechi nia, akoʼoyojoonusü nuʼupünaa süka kuluulu sümaa nüsheʼetünüin. «Müleka pialeje chi Cristo Nüneekajalakai Maleiwa, püshantanaja saaʼu jaralin asheʼetüin pia», namaka nümüin.

Shiasaʼa jaʼyuupa, outkajaashii nachikuaʼa na laülaashiikana suluʼu tü kanüliakat Sanedrín süpüla nasakirüin Jesús nachikuaʼa sünain maa: «¿Shiimainsaʼa piain chi Nüchonkai Maleiwa?». Nusoutaka Jesús neʼipajee: «Aa, shiimain sünain tayain maʼaka tü jüküjakat tamüin». «Aküjashi alawaa nüchiki Maleiwa. Juʼunira nia nünainmüin Pilato chi Romajeʼewaikai sülaülashikai mma», namaka na laülaashiikana. ¿Kasakaʼa joo alatüin mapa? Wekirajaweerü anain tia sünain tü wane ekirajaayakat.