Tü Paraiisükat [Mma anasükat] nnojoleerü müin aka saaʼin tü mma eekat maaʼulu. Nnojottüjülia nücheküin Maleiwa eeinjatüin müliaa, mojuu aaʼin ooʼulaka kasa mojusü saaʼu tü mmakat. Paraiisüinjatü mapeena nutuma Maleiwa tü Mmakat. ¿Jamüinjateerü tia? Wekirajaa sünain tü sümakat tü Wiwüliakat.

Wayuu anashii. Na naʼaleewainkana Maleiwa suluʼujeena tü Paraiisükat. Aainjeena kasa anasü namüinjiraa ooʼulaka pansaweerü nakuwaʼipa sümaa tü nuluwataakat anain naya Jeowa (Proverbios 2:21).

Watteerü saalii eküülü. Wainmeerü eküülü suluʼu tü Paraiisükat. Müsü tü Wiwüliakat: «Wainmeerü soʼu süchon wunuʼu ekünaajuui saaʼu tü mmakat» (Salmo 72:16, NM).

Aneerü shipia ooʼulaka shiʼyataain wayuu. Suluʼu tü Paraiisükat, napüshuaʼa na wayuukana eejeerü piichi namaʼana ooʼulaka talateena süka tü naʼyataainkat. (Isaías 65:21-23).

 Nnojoleerü atkawaa. Nnojorüleenjatia ekajiraain ooʼulaka ouktuin wayuu sünain atkawaa. Müsü tü Wiwüliakat: «najaʼlajeʼereerü [Maleiwa] tü atkawaakat» (Salmo 46:8, 9, NM).

Nnojoleerü Ayuulii. Müsü tü Wiwüliakat: «Nnojoleechi eein wanee wayuu eeka kepiain chaaʼaya [suluʼu tü Paraiisükat] süpüla nümüin: ‹Ayuuishi taya›» (Isaías 33:24, NM). Aneena na masaʼasaliikana, moʼusaliikana, macheʼesaliikana ooʼulaka na manüisaliikana (Isaías 35:5, 6).

Nnojoleerü müliaa aaʼin, mojuu aaʼin ooʼulaka ouktaa. Müsü tü Wiwüliakat: «Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia» (Alateetkat Mapeena 21:4).

Nnojoleerü wayuu mojulaasü. Müshi Jeowa: «Ooʼulaka na mojulaashiikana, ajaʼlajeʼennüinjana saaʼujee tü mmakat; ooʼulaka na emeejüliikana, asünneʼennüinjana saaʼujee» (Proverbios 2:22, NM).

Aijiraajeena ooʼulaka kojutujiraainjana na wayuukana. Nnojoleerü aainjünüin kasa mojusü, müliain atumawaa na waneeinnua, keeʼireewaa aaʼin kamaʼana wainma kasa ooʼulaka aʼürülaa. Paaʼinwajiraajeena ooʼulaka pansaweerü nakuwaʼipa na wayuukana sümaa tü nuluwataakat anain Maleiwa (Isaías 26:9).