1. ¿Jamüsü anaka weʼraajüle süchiki nakuwaʼipa na aapieekana?

KEEʼIREESÜ naaʼin Jeʼwaa weʼraajüinjatüin nakuwaʼipa na aapieekana süka naʼakain naya na nüpüshikana. Süküjain tü Wiwüliakat nüchonniin naya Maleiwa (Job 38:7). ¿Kasa naʼyataaka anain na aapieekana? ¿Kasa naaʼinraka süpüla nakaaliijain na wayuu namaiwajanakana? ¿Eeshiiche süpüla nakaaliijain waya maaʼulu? (Paashajeʼera noota 8).

2. (1) ¿Jarai chi kakumalakai na aapieekana? (2) ¿Jeʼrashii napüshuaʼa na aapieekana?

² Wekirajaa palajana sünain jaralin kakumalain na aapieekana. Saashin tü Wiwüliakat akumajünüshi palajana Jesuu nutuma Jeʼwaa otta süchikijee nukumajüin tü wane kasakalüirua, maʼaka saaʼin tü kasa chakalü iipünaa otta tü kasa yaakat mmapaʼa (Colosas 1:16). Saʼaka tü wane kasakalüirua nukumajaka Jeʼwaa, eejana na aapieekana. ¿Jeʼrashii na aapiee nukumajakana Jeʼwaa? Süküjain tü Wiwüliakat wattashaatain maʼin naalii (Salmo 103:20; Alateetkat Mapeena [Apocalipsis] 5:11).

3. ¿Kasa süküjaka Job 38:4-7 nachiki na aapieekana?

³ Süküjain tü Wiwüliakat nukumajüin Maleiwa na aapieekana süpülapünaa nukumajüin tü Mmakat. ¿Jamüsü naaʼin na aapieekana wanaa sümaa nukumajüin Jeʼwaa tü Mmakat? Süküjain tü karaloʼutakat Job talatashaatain naya. Paaʼinwapuʼushii napüshuaʼa na aapieekana sünain aʼyatawaa nümüin Jeʼwaa (Job 38:4-7).

4. ¿Jamüsü watüjaaka saaʼu kapülain waya naaʼin na aapieekana?

⁴ Kapülashii na wayuukana naaʼin na aapieekana. Jülüjasü  naaʼin na aapieekana tü keeʼireekat naaʼin Jeʼwaa süpüleerua wayuu otta tü naaʼinrajatkat Jeʼwaa mapeena saaʼu tü Mmakat (Proverbios 8:30, 31; 1 Pedro 1:11, 12). Süka kapülain na wayuukana naaʼin na aapieekana, mojushaatasü naaʼin wanaa sümaa niʼrüijaain wayumüin Adán sümaa Eva. Akaʼaya maaʼulu, mojushaatasü naaʼin sutuma neʼrüin wattain maʼin saalii wayuu moonooinka sümaa nünüiki Maleiwa. Talatapejeʼe maʼin naaʼin nuuʼulaale  wanee wayuu suulia naainjala süpüla nüleʼejüin nüchikuaʼa nümaʼanamüin Maleiwa (Lucas 15:10). Naaʼinmajüin na aapieekana na aʼyataakana nümüin Maleiwa, aluwataanüshii naya nutuma Jeʼwaa süpüla nakaaliijain jee naaʼinmajüin na aʼyataakana nümüin (Hebreokana 1:7, 14). Wekirajaa süchiki tü naaʼinrakat na aapieekana.

5. ¿Kasa naaʼinraka na aapieekana süpüla nakaaliijain na aʼyataapuʼukana nümüin Maleiwa?

⁵ Nuluwataain Jeʼwaa piamashii aapiee süpüla nakaaliijain Lot sümaa nüpüshi süpülapünaa sajaʼttinnüin tü pueulokot Sodoma otta Gomorra (Génesis 19:15, 16). Kakalia mapa süchikijee tia, ojutunushi Daniel suluʼu wanee ishi eejatüle wasashi. Nnojoipejeʼe jamajüin Daniel süka nuluwataain Maleiwa wanee aapiee süpüla nüsürülüin «saanükü tü wasashikalüirua» (Daniel 6:22). Soʼu nakalia na nikirajüinkana Jesuu nuluwataain Maleiwa wanee aapiee süpüla nujuʼitirüin Pedro suluʼujee tü kaatsetkat (Aluwataaushikana [Hechos] 12:6-11). Akaʼaya Jesuu, akaaliijünüshi natuma na aapieekana wanaa sümaa yaajachin nia mmapaʼa. Jamüshijaʼa wanaa sümaa woutiisain nia, akaaliijünüshi natuma waneinnua aapiee (Marcos 1:13). Jee atütüleʼennüsü naaʼin Jesuu nutuma wanee aapiee sülüʼütpa sükalia süpüla nuʼutunüin aaʼin (Lucas 22:43, 44).

6. (1) ¿Jamüsü watüjaaka saaʼu naaʼinmajüin na aapieekana maaʼulu na aʼyataakana nümüin Maleiwa? (2) ¿Jarat tü pütchiirua wekirajaainjatkalü anain?

⁶ Nnojoishii eeʼiyataain na aapieekana sümüin wayuu maaʼulu. Ayatapejeʼe nuluwataain naya Maleiwa süpüla nakaaliijain na aʼyataakana nümüin. ¿Jamüsü watüjaaka saaʼu tia? Müsü tü Wiwüliakat: «Chi aapiee nümaʼanajeejachikai Jeʼwaa pejeshi nia nanain napüshuaʼa na mmoluwaakana neema Jeʼwaa süpüla nuʼtteʼerüin naya» (Salmo 34:7). Choʼujaashii waaʼinmajünüin süka pülashiin na waʼünüükana otta naainjeein kasa mojusü wamüin. ¿Jaralii na waʼünüükana? ¿Jamakuwaʼipalii süpüla eeinjanain naya? ¿Kasa nooʼulakaka aka waaʼin? Süpüla watüjaain saaʼu tia, wekirajaa palajana sünain tü alatakat süchikijeechon nukumajünüin Adán sümaa Eva.

7. ¿Kasa naaʼinraka watta naalii wayuu sutuma nemeejünüin nutuma Satanaa?

⁷ Wekirajaaitpa anain suluʼu ekirajaaya 3 niʼrüijaain wayumüin wanee aapiee nümüin Maleiwa jee nülaülaajaweein saaʼu tü wayuukalüirua. «Chi Yolujaakai» otta «Satanaa» münüshi nia suluʼu tü Wiwüliakat (Alateetkat Mapeena 12:9). Keeʼireesü naaʼin Satanaa shiʼrüin wayumüin wayuu nümüin Maleiwa. Nimeejüin Eva jee wattainna naalii na wayuu nimeejaka. Eepejeʼe wayuu waneepiaka nümaa Jeʼwaa, maʼaka naaʼin Abel, Enoc otta Noé (Hebreokana 11:4, 5, 7).

8. (1) ¿Jamakuwaʼipalii süpüla yolujaainjanain waneinnua aapiee? (2) ¿Kasa naaʼinraka na yolujaakana suulia wüinsirüin naya?

⁸ Nükalioʼu Noé eejana waneinnua aapiee eʼrüliijaakana wayumüin jee ashakatüshii iipünaajee süpüla wayuuinjanain naya yaa Mmapaʼa. ¿Jamüsü naaʼinraka tia? Shia süka kaʼwayuuseein naya saashin tü Wiwüliakat (paashajeʼera Génesis 6:1, 2). Mojusü maʼin tü naaʼinrakat naya aapieekana süka nnojoluin nakumajuushin süpüla tia (Judas 6). Mojulaasü maʼin tü wayuukalüirua eejatka nükalioʼu Noé maʼaka naaʼin naya aapieekana. Süka mojulaain maʼin tü wayuukalüirua najaʼttirüin naya Maleiwa sükajee tü Juya miyoʼushaatakat epirajaka atuma tü Mmakat. Nuʼtteʼerapejeʼe Jeʼwaa waneinnua wayuu waneepiakana nümaa (Génesis 7:17, 23). Soʼunnaa tü Juya miyoʼushaatakat, oʼunushii iipünaamüin na aapiee eʼrüliijaakana wayumüin suulia wüinsirüin naya. «Yolujaa» münüshii naya suluʼu tü Wiwüliakat. Nümaashii naya Satanaa, niaka laülaain naaʼu (Mateo 9:34).

9. (1) ¿Kasa naaʼinraka Jeʼwaa naleʼejapa nachikuaʼa na yolujaakana iipünaamüin? (2) ¿Kasa wekirajaainjatka anain?

⁹ Wanaa sümaa naleʼejüin nachikuaʼa na yolujaakana iipünaamüin nnojoliinnapa nüchooin naya Maleiwa (2 Pedro 2:4, TNM). Nnojoliinnapa süpüla wayuujaain naya nachikuaʼa, ayatapejeʼe neʼikeʼerüin watta saalii «wayuu sainküin mmakat süpüshua» (Alateetkat Mapeena 12:9; 1 Juan 5:19). Wekirajaajeerü anain tü naaʼinrakat süpüla nemeejüin watta saalii wayuu (paashajeʼera 2 Corinto 2:11, TNM).

10. ¿Kasa naaʼinraka na yolujaakana süpüla nemeejüin wayuu?

¹⁰ Emeejünüsü watta saalii wayuu natuma na yolujaakana. Eesü wayuu sünainpünaaka nakuwaʼipa na yolujaakana nükajee wanee ouutshi, wanee piachi jee niale wanee ooʼulaküi. Sükajee tia naaʼinrakat naya wayuukana, arütkaashii naya nanainmüin na yolujaakana. Nuchuntuin Jeʼwaa wamüin nnojoliinjanain sünainpünaain waya nakuwaʼipa na yolujaakana (Galacia 5:19-21). Tü naaʼinrakat na yolujaakana süpüla nemeejüin wayuu müsü aka saaʼin tü naaʼinrakat wanee olojui jime, wainma shimeeya nutuma.

11. (1) ¿Kasa naaʼinraka na ooʼulaküliikana? (2) ¿Jamüsü wayoutajatka tü naaʼinrakat?

¹¹ Wanee kasa nemeejaka aka wayuu na yolujaakana shia sükajee tü ooʼulakiraakat. Ooʼulakitsü wayuu shiiʼiree sütüjaweein saaʼu tü kasa alatajatkat mapeena. Eeshii wayuu ooʼulakaka süka waraaja, süka jolotsü, süka sajapü wayuu, süka iita asia kepein, süka yüi otta ayaawataa saaʼu jamaluʼuluin wanee lapü. Eeshii na wayuu jülüjakana aaʼin nnojoluin mojuin tia. Süküjapejeʼe tü Wiwüliakat naʼyataain sümaa yolujaa na ooʼulaküliikana. Jamüsüjaʼa suluʼu Aluwataaushikana 16:16-18 aküjünüsü süchiki wanee wayuu piuuna kaseyuusü. Wanaa sümaa nujuʼitirüin Pablo süseyuu tia wayuukot, nnojoluitpa pülain shia sutuma tü yolujaakat.

12. (1) ¿Jamüsü mojuka wachajaale sukuwaʼipa süpüla waashajaain namaa na outushiikana? (2) ¿Jamüsü wayoutajatka süpüshuaʼa tü kasa sünainpünaakat nakuwaʼipa na yolujaakana?

¹² Tü wane kasa nemeejakalü aka wayuu na yolujaakana shia nanoujireein naya sünain eein süpüla naashajaain nümaa wanee outushi. Anasü namüin na yolujaakana wanoujain sünain sujuʼitüin naaʼin wanee wayuu outapa nia. Nanoujireein waya eein süpüla waashajaain nümaa chi outushikai otta eein süpüla nükaaliijain waya jee naainjain kasa mojusü wamüin. Jamüshijaʼa outule nüpüshi wanee wayuu jee niale wanee naʼaleewain, eesü anale nümüin nüsakirüin wanee ouutshi süpüla yootuin nia nümaa chi nüpüshi outakai. Eesüjaʼa nüküjale chi ouutshikai wanee kasa  nüchiki müliashii jee ayatüle nümüraluʼu nutuma. Eesüjaʼa nunoujale chi wayuukai naashajaain müliashii nümaa. Nnojotpejeʼe müin tia, naya na yolujaakana aashajaakana nümaa (1 Samuel 28:3-19). Wainma tü kasa aainjünakat nekiira na outushiikana süka sunoujain anain wayuu ayatayülüin katüin soʼu tü naaʼinkat. Eesü natuma tü kanüliakat nueve noches, ekeraajaa kashi, ekeraajaa juya, epejawaa, alüʼüjaa wanee kasa namüin na outushiikana jee waneirua kasa sünainpünaaka nakuwaʼipa na yolujaakana. Sutuma nnojoluin naaʼinrüin tia na anoujashiikana, mojushiisü namüin na napüshikana jee na wayuukana otta eeshii jashichire naya namüin. Natüjaapejeʼe saaʼu na anoujashiikana nnojoluin ojuʼitüin naaʼin wanee wayuu outapa nia. Nnojoishii süpüla waashajaain namaa na outushiikana, nnojoishii süpüla nakaaliijain waya jee nnojotsü süpüla naainjain kasa mojusü wamüin (Salmo 115:17). Nnojo püchajaain sukuwaʼipa süpüla paashajaain namaa na outushiikana jee namaa na yolujaakana. Piyouta süpüshuaʼa tü kasa sünainpünaakat nakuwaʼipa na yolujaakana. ¡Jalia pia suulia tia! (paashajeʼera Deuteronomio 18:10, 11; Isaías 8:19). (Paashajeʼera noota 25).

13. ¿Jamüsü nakuwaʼipa maaʼulu wainma wayuu mmotpuʼukana neema na yolujaakana?

¹³ Nnojotsü nemeejüin neʼe wayuu na yolujaakana, neimmolojuin nayaʼaya. Süka nütüjaain aaʼu Satanaa namaa na yolujaakana sülüʼülüin nakalia süpüla nataʼünnüin nutuma Maleiwa, aainjashii maʼin kasa mojusü yaa mmapaʼa. Mojulaashii maʼin naya jee üttüsü maʼin naaʼin (Alateetkat Mapeena 12:12, 17). Wainmapejeʼe maʼin na wayuu mmotpuʼukana neema na yolujaakana namaiwa, shiasaʼa maaʼulu, nnojoliinnapa mmoluin naya neema. ¿Kasa naaʼinraka süpüla nountuin tia?

14. ¿Kasa waaʼinrajatka süpüla waʼleejüin na yolujaakana maʼaka naaʼinrüin shia na anoujashii namaiwajanakana?

¹⁴ Süküjain wamüin tü Wiwüliakat tü waaʼinrajatkat süpüla waʼleejüin na yolujaakana. Jamüsüjaʼa nakalioʼu na  nikirajüinkana Jesuu eejana waneinnua wayuu chajanakana Éfeso, sünainpünaapuʼushii naya sukuwaʼipa yolujaa süpülapünaa nanoujain. ¿Kasa naaʼinraka süpüla naʼleejüin na yolujaakana? Anuu sünüiki tü Wiwüliakat: «Je kojuyataajaʼa na eekai naʼyataapüʼüin sünain outsüü, nantirüin tü nakaralouktase sükuaippamaajatkat tü outsüükat. Nantirüin shia süpüla naʼajüinjatüin yala suʼupala süpüshuaʼa tü wayuukalüirua» (Aluwataaushikana 19:19). Süka nekeroteein sünain anoujaa naya wayuukana, naʼajüin süpüshuaʼa tü nakaraloʼuse sukuwaʼipamaajatkat ouutsü. Shiainjatü waaʼinraka tia maaʼulu. Süpüla waʼyataainjanain nümüin Jeʼwaa waʼajüinjatü süpüshuaʼa tü kasa sukuwaʼipamaajatkat ouutsü eeka wamaʼana, maʼaka saaʼin karaloʼuta, rewiisüta, horóscopos, peliikula, muusika, miʼirooui, ayaakuaa jee waneirua kasa. Wayoutajatüin tia kasakalüirua, jaʼitairü kamalain jee anain shia sümüin wayuu. Wane kasa sukuwaʼipamaajatka yolujaa shia tü sümaʼanakat wayuu süpüla nnojoluinjatüin sülatüin kasa mojusü namüin naashin, maʼaka saaʼin lania (1 Corinto 10:21, TNM).

15. ¿Kasa maa waaʼinrajatka süpüla waʼleejüin Satanaa otta na yolujaakana?

¹⁵ Maʼaka jeʼra juya süchikijee naʼajüin na anoujashii chajanakana Éfeso tü nakaraloʼuse sukuwaʼipamaajatkat ouutsü, nüküjain Pablo namüin ayatayüliin naya atkaain «sümaa tü yolujaa mojulaasükalüirua» (Éfeso 6:12). Mayaainjeʼe naʼajüin na anoujashiikana tü nakaraloʼuse sukuwaʼipamaajatkat ouutsü, ayatüshii na yolujaakana nachajaain sukuwaʼipa süpüla naainjain kasa mojusü namüin. Eesü wane kasa naaʼinrajatka naya anoujashiikana süpüla nayoutuin tü kasa mojusü naainjeekat Satanaa namüin. Müshi Pablo namüin: «Maa aka wane taapüla najapuluʼukat wane surulaat suulia sülanüin najatü na nüʼünüükana nünainmüin, anakaja müleka jüchecherüle jaaʼin sünain anoujaa» (Éfeso 6:16). Maʼaka saaʼinmajüin wanee surulaat tü taapüla najapuluʼukat, akaʼaya wayakana saaʼinmajeena waya tü wanoulakat noulia na yolujaakana. Weʼitaale maʼin waaʼin sünain naaʼinmajeenain waya Jeʼwaa, wachechereerü waaʼin suulia tü kasa mojusü naainjeekat wamüin Satanaa namaa na yolujaakana (Mateo 17:20).

16. ¿Kasa waaʼinrajatka süpüla icheinjatüin wanoula nünain Jeʼwaa?

 ¹⁶ ¿Kasa waaʼinrajatka süpüla icheinjatüin wanoula nünain Jeʼwaa? Waashajeʼerüinjatü waneepia tü Wiwüliakat otta weʼitaainjatü waaʼin sünain naaʼinmajüinjanain waya Jeʼwaa. Ichere maʼin wanoula nünain Jeʼwaa, nnojoleerü naainjain kasa mojusü wamüin Satanaa otta na yolujaakana (1 Juan 5:5).

17. ¿Kasa maa waaʼinrajatka süpüla waʼleejüin na yolujaakana?

¹⁷ Eesü waneʼeya kasa naaʼinrajatka na anoujashii chajanakana Éfeso. Süka saʼakain naya wayuu sünainpünaakana sukuwaʼipa yolujaa, nüküjain Pablo namüin nachuntajanain waneepia nümüin chi Maleiwakai (Éfeso 6:18). Achuntajana naya nümüin Jeʼwaa süpüla naaʼinmajüinjanain naya. Akaʼaya wayakana, saʼakashii wayuu sünainpünaaka sukuwaʼipa yolujaa, müshiijeseʼe wachuntajanain nümüin Jeʼwaa süpüla naaʼinmajüin waya otta wachuntajatü nünülia woʼuraajapa (paashajeʼera Proverbios 18:10). Wachuntule waneepia nümüin Jeʼwaa süpüla naaʼinmajüin waya nuulia Satanaa, nükaaliijeena waya (Salmo 145:19; Mateo 6:13).

18, 19. (1) ¿Kasa waaʼinrajatka süpüla waʼleejüin Satanaa otta na yolujaakana? (2) ¿Jarat tü pütchi wekirajaainjatkalü anain sünain tü wane ekirajaayakat?

¹⁸ Weʼitaale maʼin waaʼin sünain naaʼinmajeenain waya Jeʼwaa otta wayoutule süpüshuaʼa tü kasa sukuwaʼipamaajatkat yolujaa, nnojoleena jamajüin waya nutuma Satanaa otta na yolujaakana. Nnojoluinjana waya mmoluin neema (paashajeʼera Santiago 4:7, 8). Pülashaatashi maʼin Jeʼwaa suulia tü yolujaakalüirua. Süsalashii naainjala na yolujaakana nutuma Jeʼwaa nükalioʼu Noé, otta watüjaa aaʼulu najaʼttireenain naya Jeʼwaa mapeena (Judas 6). Nnojoishii waya wamüiwaʼain sünain atkawaa namaa na yolujaakana, naaʼinmajüin waya Jeʼwaa nakajee na aapieekana (2 Reyes 6:15-17). Süka nükaaliijain waya Jeʼwaa waʼleejeechi Satanaa otta na yolujaakana (1 Pedro 5:6, 7; 2 Pedro 2:9).

¹⁹ Wekirajaaitpa anain wainmain tü kasa mojusü naaʼinrakat Satanaa otta na yolujaakana sümüin wayuu. Eesüjaʼa jülüjale waaʼin tüü: «¿Jamüshii nnojoyüliikana najaʼttirüin naya Maleiwa?». Wekirajaajeerü anain tia sünain tü wane ekirajaayakat.