Eejeerü kasa eeka sülatalaʼa sümüin nnojoleetka talatüin atuma paaʼin sümaa püpüshi (Eclesiastés 9:11). Kaaliinpejeʼe waya nutuma Maleiwa kasale alatüin wamüin. Aneerüleʼe pukuwaʼipa sümaa puʼwayuuse otta namaa püchonnii sutuma sünüiki tü Wiwüliakat jaʼitairü kasain maʼin alatüin jümüin.

TÜ SÜMAKAT TÜ WIWÜLIAKAT: «Saaʼu jütüjaaichipain naaʼu Maleiwa sünain nuuntüin naaʼinmajüin jia, jüküja jümaala nümüin süpüshualeʼeya tü ashapataakat atüma jaaʼin» (1 Pedro 5:7). Nnojoishi niain Maleiwa kasirüin tü kasa alatakat sümüin püpüshi (Santiago 1:13). Nükaaliinjeechi pia pürütkaale nünainmüin (Isaías 41:10). «Waküja nümüin süpüshuaʼa tü jülüjakat waaʼin.» (Salmo 62:8, TNM.)

Aneerü paaʼin paashajeʼerüle otta pikirajaale sünain tü Wiwüliakat weinshi. Müle shia putuma, pütüjaweerü aaʼu niain Jeʼwaa «amüliajaka waya» (2 Corinto 1:3, 4; Roma 15:4). Naapeerü wanee anaa pümüin (Filipos 4:6, 7, 13).

TÜ EEKAT SÜPÜLA PAAINJÜIN:

• Puchunta nümüin Jeʼwaa süpüla nnojoluinjatüin shapaain paaʼin otta pütüjaainjatüin saaʼu tü paaʼinrajatkat

• Jülüja paaʼin süpüshuaʼa tü anakat nümüin chi ayuuishikai, püneekeetka tü jalouikat nümüin

TÜ SÜMAKAT TÜ WIWÜLIAKAT: «Kekiire wanee wayuu, nikirajaa achiiruat wanee kasa palajana otta jülüjüsü naaʼin wanee pütchi süpüla nütüjüin sünainjee» (Proverbios 18:15, TNM). ¿Kasa akaaliinjüneeka anain jia waneʼewai jukua? Püsakira püchonnii sümaa puʼwayuuse süchiki tia. Paapaja nanüiki paashajaapa namaa (Proverbios 20:5).

¿Jama nünaajaale wanee püpüshi? Nnojo japülin pia sünain aʼyalajaa. Jamüshijaʼa Jesuu, aʼyalajüshi (Juan 11:35; Eclesiastés 3:4). Shia anaka putunküle paala (Eclesiastés 4:6). Puuʼulaküle tia, pütüjeerü apüleerua tü paaʼinrüinjatkat.

TÜ EEKAT SÜPÜLA PAAINJÜIN:

• Yootojiraa pia namaa püpüshi, nnojoleenaka japülin naya sünain aashajawaa pümaa sülatapa wanee kasachiki namüin

• Paashajaa namaa na alatakana amüin tü alatakat pümüin süpüla pütüjüin pukuwaʼipa nanainjee

TÜ SÜMAKAT TÜ WIWÜLIAKAT: «Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin» (Proverbios 17:17, TNM). Püküja namüin paʼaleewainyuu tü eekat süpüla nakaaliinjüin anain pia. Nakaaliinjeein pia, shia neʼe nnojoluin natüjaain aaʼu kasain naainjüinjatüin (Proverbios 12:25). Puchunta kaaliinwaa namüin na ayaawatakana saaʼu tü sümakat tü Wiwüliakat, pütüjeʼereerü paaʼin sünainjee tü namakat pümüin (Santiago 5:14).

Aleewawaire pia namaa na wayuu kanoulashiikana, na eʼitaakana naaʼin nünain Maleiwa, aneerü punoula. Pükaaliinja na wayuu matchinkana aaʼin, paashajaa namaa süchiki tü punoulakat, süchiki tü naainjüinjatkat Jeʼwaa mapeena. Keʼepülüinjatü paaʼin sünain akaaliinjaa wayuu eeka eein, namaa pia waneepia na aikana apüla pia otta na akaaliinjeekana pia (Proverbios 18:1; 1 Corinto 15:58).

TÜ EEKAT SÜPÜLA PAAINJÜIN:

• Püküja nümüin wanee paʼaleewain tü alatakat pümüin, pücheka süchiki tü nümakat pümüin

• Lotoleʼeya pünüiki süchiki kasain maʼin tü choʼujaain pümüin