Soʼu 2024 sünain tü kanüliakat Juegos Olímpicos, eeshii maʼaka saaʼin 5.000 millones na wayuu eʼrajüinjanaka na ashaitüinjanakana suluʼujeejana 206 mma. «Sutuma tü aainjünakat yaa paaʼinwashii na wayuukana sainküin mmakat», müshi Thomas Bach, shikiipüʼükai Comité Olimpico Internacional. «Anasü maʼin tü aainjünakat sünain Juegos Olímpicos süka paaʼinwain jee jimatüin naaʼin na wayuukana jaʼitairü naatain nakuwaʼipa».

 ¿Eesüche süpüla suuntuin tia tü kanüliakat Juegos Olímpicos? ¿Eesüche süpüla suuntuin paaʼinwain jee jimatüin saaʼin wayuu?

 Wainma tü kasa alatakat sünain Juegos Olímpicos. Jayasü sünain sukuwaʼipa wayuu naatain nakuwaʼipa, nnojoishii kojutujiraain naya, nnojoishii paaʼinwain sutuma política, alerajünüsü wayuu, alerajünüsü wayuu saaʼujee sunoula.

 Wainma na wayuu jülüjakana aaʼin anain naaʼin sutuma nanajüin Juegos Olímpicos. Naatapejeʼe neʼe tü kasa naaʼinrakat jee tü jülüjakat naaʼin sutuma. Nnojotsü nanouteʼereein tü jülüjakat naaʼin jee nnojoishi naya anajiraain namaa na waneinnua.

 Süküjatüjülia tü Bibliakat müinjatüin nakuwaʼipa na wayuukana (2 Timoteo 3:1-5). Süpüla pütüjain sooʼomüin süchiki tü sümatüjütkalia tü Bibliakat süchiki tia, paashajeʼera tü pütchi makalü anülia: «¿Predijo la Biblia cómo sería la gente en nuestros días?».

 Süküjain tü Bibliakat süchiki wanee kasa anakat maʼin, shia paaʼinweenain na wayuukana sainküin mmakat. Paaʼinweena naya nuluwataapa Maleiwa saaʼu tü mmakat (Lucas 4:43; Mateo 6:10).

 Nieechi Jesucristo, chi aluwataainjachikai nutuma Maleiwa, eejeechikai atuma jimataa aaʼin saaʼu tü mmakat. Müsü sünüiki tü Bibliakat:

•   «Wainmeena na lotokana akuwaʼipaa otta eejeerü jimataa aaʼin waneepia» (Salmo 72:7).

•   «Nükaalinjeechi chi wayuu müliashi achuntakai kaalinwaa […]. Nükaalinjeena naya suulia müliaa jee napüleeruaanüin aaʼin» (Salmo 72:12, 14).

 Maaʼulu yaa, wainma wayuu paaʼinwajiraakana sutuma tü nikirajakalü anain Jesús suluʼujeejana naya 239 mma. Na aküjaliikana pütchi nüchiki Jehová nnojotsü üttüin naaʼin sümüin wayuu jee anajiraashii naya. Süpüla pütüjain sooʼomüin süchiki tia, paashajeʼera tü pütchi suluʼukat Aapiria Wayuu «Wasünneʼera suluʼujee waaʼin tü üttaakalü aaʼin».