TALATEESÜ saaʼin wayuu süpüshuaʼa. Wainmapejeʼe tü kasa alatakat maaʼulu süka sülüʼülüin sükalia süpüla sajaʼttüin kasakat süpüshuaʼa (2 Tim. 3:1). Wainma wayuu nnojoliikana talatüin aaʼin süka müliain naya atumawaa, ayuuishii naya, maʼyataainsalii naya jee outusü napüshi. Jaʼitakajeʼe na aʼyataashiikana nümüin Jeʼwaa, mojuwaisü naaʼin. Shiasaʼa sutuma tia, eeshii eekai nnojoluinnapain talatüin aaʼin. Sülatüle tia pümüin, ¿kasa paaʼinrajatka süpüla talatüinjatüin paaʼin püchikuaʼa?

Süpülapünaa wekirajaain sünain tia, anasü watüjaale saaʼu palajana kasain maʼin tü talataakalü aaʼin otta kasa naaʼinraka waneinnua wayuu süpüla talatüin naaʼin waneepia mayaapejeʼe sülatüin kasa mojusü namüin. Süchikijee tia, wekirajaajeerü anain tü waaʼinrajatkat süpüla talatüin waaʼin waneepia otta süpüla kooʼomüinjatüin tü talataakalü aaʼin wamüin.

Nnojotsü talatüin neʼe naaʼin wanee wayuu sutuma nüsirajüin. Jamüshijaʼa wanee wayuu eekai nipeʼrüin, eeshi nüsirajüle maʼin. Shiasaʼa sülatapa tü epeʼruwaakat nuulia, nnojotsü asirajeein naaʼin, süka jamüin, sotusü naaʼin wainmain tü kasa alatakat nümüin. Motsomüin neʼe talatüin naaʼin (Prov. 14:13).

Tü talataakalü aaʼin, nnojotsü motsomüin neʼe. Shia wanee talataa miyoʼu eeka suluʼu naaʼin wanee wayuu sutuma eein nümaʼana wanee kasa jee naʼatapajüle wanee kasa anashaatasü maʼin. Chi wayuu makai akuwaʼipa, talatüsü naaʼin waneepia jaʼitairü kasain alatüin nümüin (1 Tes. 1:6). Jaʼitairü müliain maʼin naaʼin atumawaa, ayatüshi talatüin aaʼin. Jamüshiijaʼa na aluwataaushiikana, aʼyaajünüshii naya sutuma naküjain tü pütchi nüchikikat Kürisüto. Talatapejeʼe maʼin naaʼin saashin tü Wiwüliakat süka «müliain maʼi naaʼin sünainjee tü aküjaakat nüchikü Jesús» (Aluw. 5:41). Nnojotsü talatüin naaʼin na aluwataaushiikana sutuma naʼyaajünüin, talatüsü naaʼin sutuma waneepiain naya nümaa Maleiwa.

Nnojoishi jaralüin eweeniraain sümaa eein tü talataakat suluʼu naaʼin jee nnojotsü akumajaain tia sümüiwaʼa, süka jamüin, talatüin naaʼin wanee wayuu sutuma jüüjüüin nia nümüin chi naaʼinkai Maleiwa. Anoutaasü wakuwaʼipa nutuma chi naaʼinkai Maleiwa otta akumajaasü tü talataakat suluʼu waaʼin nutuma (Éf. 4:24, TNM; Gal. 5:22). Talatüle waaʼin, mapüleejeerü wamüin eejirawaa sümaa tü eekai sülatüin wamüin.

Keeʼireetüjülia naaʼin Jeʼwaa anainjatüin süpüshuaʼa tü kasa eekat süpaʼa tü Mmakat, nnojotsü keeʼireein naaʼin sülatajatüin kasa mojusü. Ayatapejeʼe talatüin naaʼin Jeʼwaa, mayaapejeʼe eein wainma wayuu aaʼinraka kasa mojusü. Anuu sünüiki tü Wiwüliakat nüchiki Jeʼwaa: «Katsüinshi maʼin nia otta talatüsü naaʼin» (1 Crón. 16:27, TNM). Wanee kasa talataka atuma naaʼin Jeʼwaa shia sutuma tü kasa anasü naaʼinrakat na aʼyataashiikana nümüin (Prov. 27:11).

 Washateerü nukuwaʼipa Jeʼwaa nnojorüle shapaain maʼin waaʼin sutuma nnojoluin shikeraajüin wanee kasa waʼatapajaka. Shia jülüjeeka waaʼin tü kasa anasü eekat wamaʼana maaʼulu otta atüjainjana waya aʼatapajaa tü kasa anasü eeinjatkat mapeena. *

Aküjünüsü suluʼu tü Wiwüliakat nachiki kojuyashii wayuu talatakana aaʼin waneepia suʼunnaa tü alatakat namüin. Noʼutku naya wayuukana nia Abraham, ayatshi nia talatüin aaʼin mayaapejeʼe kojuyatuain najachijuuin otta sünainpünaain nia kasachiki natuma waneinnua wayuu (Gén. 12:10-20; 14:8-16; 16:4, 5; 20:1-18; 21:8, 9). ¿Jamüsü ayataka talatüin naaʼin Abraham suʼunnaa tia alatakat nümüin? Shia süka jülüjain naaʼin waneepia kepiainjachin nia suluʼu tü mma anasükat nuluwataapa chi Mesíaskai (Gén. 22:15-18; Heb. 11:9, 10). Anuujeseʼe nünüiki Jesuu: «Chi jutuushikai Abraham, talatüshinka maʼi süka nütüjaain sünain tantajachin soʼuweena wane kaʼi» (Juan 8:56). Talateerü waaʼin maʼaka naaʼin Abraham jülüjale waaʼin tü kasa anashaatasü naapeetkat Jeʼwaa wamüin mapeena (Roma 8:21).

Akaʼaya Pablo nümaa Silas, shia jülüjaka naaʼin tü kasa anasü naaʼinrajatkat Maleiwa. Sutuma tia, katsüinsü nanoula otta talatüsü naaʼin suʼunnaa neʼrüin müliaa. Jamüshiijaʼa naya soʼu wanee kaʼi, aʼyaajünüshii otta apüreesajinnüshii naya «je süseʼeruʼu aikat, Pablo nümaa Silas, aashajaashii nümaa Maleiwakai sümaa neeʼirajüin nümüin» (Aluw. 16:23-25). Nachecherüin naaʼin soʼu tia süka jülüjain naaʼin tü naaʼinrajatkat Maleiwa mapeena. Jee talatüshii naya süka neʼrüin namüliala sutuma noushikajaain süchiirua nukuwaʼipa Jesuu. Süpüla washatüin nukuwaʼipa Pablo otta Silas, jülüjeesü maʼin waaʼin tü kasa anasü eejeetkat sutuma waneepiain waya nümaa Jeʼwaa (Filip. 1:12-14).

Eeshii wawalayuu maaʼulu eekai talatüin naaʼin waneepia suʼunnaa tü alatakat namüin. Anasü maʼin washatüle tü nakuwaʼipakat. Jamüsüjaʼa chaa Filipinas, alatüsü wanee wawai keemashaatasü maʼin nowienpüroʼu soʼu 2013, Haiyan sünülia tia wawaikat. Alatüshii suulia 1.000 wawalayuu sümaa napüshi ajaʼttaleekana epia soʼu tia. Noʼutku naya wawalayuukana nia George, chejeʼewai nia suluʼujee tü pueulokot Tacloban. Anuu nünüiki: «Talatüshii na wawalayuukana mayaapejeʼe wainmain tü alatakat namüin. Isasü tachiki taküjain tü talataa eekat suluʼu waaʼin». Jülüjale waaʼin tü naaʼinrüitkat Jeʼwaa wapüleerua otta kojutule tia wamüin, talateena waya waneepia jaʼitairü kasain alatüin wamüin. ¿Kasa maa naapaka Jeʼwaa wamüin süpüla talatüinjatüin waaʼin?

Wanee kasa talataka maʼin atuma waaʼin shia tü aleewaakat nümaa Jeʼwaa. Weʼraajüin nukuwaʼipa chi Aluwataakai saaʼu kasakat süpüshuaʼa. Washi nia, Wamaleiwase otta Waʼaleewain nia (Sal. 71:17, 18).

Talatüsü waaʼinya saaʼu katüin woʼu nutuma Jeʼwaa otta wainmain kasa eeka süpüla waaʼinrüin (Ecl. 3:12, 13). Sutuma nüntirüin waya Jeʼwaa nünainmüin, wayaawata aaʼu tü keeʼireekat naaʼin wapüleerua otta wayaawata aaʼu tü waaʼinrajatkat (Col. 1:9, 10). Watüjaaitpa aaʼu kasapülajanain nukumajaka waya Jeʼwaa. Nnojotpejeʼe shiyaawatüin aaʼu tia wayuu süpüshuaʼa. Anuu nünüiki Pablo süchiki tia: «‹Tü kasa anasü yapatüjütkat nütüma chi Maleiwakai napüla na aikana apüla nia, nnojotsü aküjünüin achiki paala sümüin wayuu, je nnojotsü eʼnnüin sümaa sütüjaanüin aaʼu sütüma wayuu›. Otta jooluʼu, eeʼiyatünüsü shia wamüin nütüma chi Maleiwakai nükajee chi Naaʼinkai» (1 Cor. 2:9, 10). Talatüshii maʼin waya süka wayaawatüin saaʼu tü keeʼireekat naaʼin otta tü naaʼinrajatkat.

Eepejeʼe sooʼomüin kasa naaʼinraka Jeʼwaa wapüleerua. Nukumajüin sukuwaʼipa süpüla motuinjatüin naaʼin tü waainjalakat (1 Juan 2:12). Waʼatapajüin nutuma katüinjatüin woʼu waneepia suluʼu tü mma jeketkat otta alüʼütshaanasü tia (Roma 12:12). Maaʼulu yaa, wainma maʼin na wawalayuukana nutuma Jeʼwaa otta kottushii waya namaa sünain aʼwaajaa nia (Sal. 133:1). Jee müsia naaʼinmajüin waya Jeʼwaa nuulia Satanaa otta tü yolujaakalüirua (Sal. 91:11). Jülüjale waaʼin süpüshuaʼa tia naaʼinrakat Jeʼwaa wapüleerua, miyoʼujeerü maʼin tü talataa eekat suluʼu waaʼin (Filip. 4:4).

¿Eesüche süpüla talataleein maʼin waaʼin? Anuu nünüiki Jesuu: «Taküjain jümüin tüü süpüla talatashaatainjatüin maʼi waneepia jaaʼin tanainjee» (Juan 15:11). Sutuma pütchikat tüü wayaawata aaʼu eein süpüla talataleein maʼin waaʼin. Tia müsü aka saaʼin wanee siki chuwatüsü, süpüla jerottuinjatüin maʼin shia, weʼitaainjatü sooʼomüin siki saaʼu. Akaataajaʼa neʼe tü talataakat aaʼin, akoomüinraasü maʼin nükajee chi naaʼinkai Maleiwa. Müshiijeseʼe wachuntuinjanain waneepia nümüin Jeʼwaa süpüla naapüin wamüin chi naaʼinkai. Otta müsia, wasakireʼerüinjatü waaʼin sünain tü waashajeʼerakat suluʼujee tü Wiwüliakat süka naapajalain shia wamüin Jeʼwaa nükajee chi naaʼinkai (Sal. 1:1, 2; Luc. 11:13).

Wanee kasa talateetka maʼin atuma waaʼin shia waaʼinrüle tü anakat noʼuluʼu Jeʼwaa (Sal. 35:27; 112:1). Nukumajala waya süpüla waaʼinrüin tia, anuujeseʼe sünüiki tü Wiwüliakat: «Mmoluwaa pia neema chi Maleiwa shiimainshikai otta paaʼinra tü nuluwataakalü anain pia. Süka jamüin, shiainjatüin naaʼinrüin wanee wayuu tia» (Ecl. 12:13, TNM). Sutuma nukumajüin waya Maleiwa süpüla waaʼinrüin tü keeʼireekat naaʼin, talatüsü maʼin waaʼin waʼyataale nümüin. *

Eesü waneirua kasa anasü weʼreetka sutuma talatüin maʼin tü waaʼinkat. Jamüsüjaʼa talatüle maʼin waaʼin sünain aʼyatawaa nümüin Jeʼwaa suʼunnaa weʼrüin wamüliala, talateechi maʼin nia wamaa (Deut. 16:15; 1 Tes. 5:16-18). Talatüle maʼin waaʼin, nnojoleerü kachiiruain waaʼin kamaʼanaa wainma korolo otta shieerü kojutkat maʼin wamüin waʼyataain sümüin Nuluwataaya Maleiwa suulialeʼeya tü kasa keeʼireekat waaʼin (Mat. 13:44). Shiasaʼa weʼrapa tü kasa anasü eekat sutuma waaʼinrüin tia, talateerü maʼin waaʼin, aneerü waaʼin otta keeʼireejeerü waaʼin talatüinjatüin wayuu watuma (Aluw. 20:35; Filip. 1:3-5).

Nnojoleena waya ayuuleʼein maʼin müleka talatüle maʼin waaʼin waneepia. «Talatüle naaʼin wanee wayuu, aneechi nia», müsü tü Wiwüliakat (Prov. 17:22, TNM, noota). Tü nümakat wanee tottoot aʼyataakai suluʼu tü eʼikülee kanüliakat Universidad de Nebraska (Estados Unidos), meematüsü aka saaʼin tü sümakat tü Wiwüliakat. Müshi nia: «Talatüle pia maaʼulu sümaa anain paaʼin sutuma tü paaʼinrakat, eeshi nnojoleechire ayuuleʼein maʼin pia mapa».

Wekirajaaitpa anain eein süpüla talatüin maʼin waaʼin mayaapejeʼe sülatüin maʼin kasa mojusü maaʼulu. Süpüla wountuin tia, choʼujaasü wachuntuin nümüin Maleiwa chi naaʼinkai, wekirajaainjatü anain tü Wiwüliakat sümaa wasakireʼerüin waaʼin sünain. Jee müsia süpüla kooʼomüin tü talataa eekat suluʼu waaʼin, jülüjainjatü waaʼin waneepia tü kasa anasü naapakat Jeʼwaa wamüin, washatüinjatü sukuwaʼipa nanoula na aʼyataashiikana nümüin otta waaʼinrüinjatü tü keeʼireekat naaʼin Jeʼwaa. Waaʼinrüle tia, weʼreerü shiimain tü sümakat Salmo 64:10 (TNM): «Chi wayuu lotokoi akuwaʼipa talateechi maʼin nutuma Jeʼwaa otta shiimainshaana maʼin nuunjulaayeechin nia».