¿Jamüsüche keeʼireeka saaʼin wayuu katüin soʼu waneepia? Saashin tü Wiwüliakat, niʼitaain Maleiwa suluʼu saaʼin wayuu kateein soʼu waneepia (Eclesiastés 3:11). Otta süküjain «aipürai maʼin wayuu Maleiwa» (1 Juan 4:8, TNM). Nnojotsüjeʼe niʼitaain Maleiwa suluʼu waaʼin kateein woʼu waneepia, nnojoluinjatüle müin wakuwaʼipa nutuma, jama aipüraliin nia wayuu.

Nnojoishi eein wanee wayuu eekai outeein. Saashin tü Wiwüliakat tü outaakat müsü aka saaʼin wanee waʼünüü (1 Corinto 15:24-26). Eeshii wayuu outakana tepichijaiwaʼaya naya, eeshii na outakana laülaapa naya, outusü wayuu maʼleekalia, nnojotsü jaralüin isajüin suulia. Eeshii wayuu ayoutakana aashajawaa süchiki tü outaakat. ¿Eejeetche wanee kaʼi nnojoleetka outuin oʼu wayuu?

Paapüirü süchiki nnojoluin akumajuushin na wayuukana nutuma Maleiwa süpüla outajanain naya. Aküjünüsü süchiki tia suluʼu tü Wiwüliakat, suluʼu Génesis. Anashaatasü maʼin sukumajia tü Mmakat nutuma Jeʼwaa *. Nukumajüin chi palajachikai wayuu, Adán nünülia, niʼitaain nia suluʼu wanee mma anachonsü maʼin kanüliaka Edén. «Nünanajakalaka joo chi Maleiwakai süpüshuaʼale  tü nükumalakat sünain anashaatain maʼi shia niʼrüin» (Génesis 1:26, 31).

Wanaa sümaa nukumajünüin Adán, müshi aka nukuwaʼipa Maleiwa. Mamojulasai Adán nukumajünaiwaʼaya (Deuteronomio 32:4). Akaʼaya Eva, nnojotsü eein mojuluʼulu shikiiruʼu jee mamojulasat shia. Anuu tü nümakat Jeʼwaa: «Anakaja kachonniire jia, joulüiwa na juuʼuliwoʼukana sainküin mmakat süpüshua süpüla laülaainjanain jia saaʼu tü kasa shirokujatkat palaa, saaʼu tü kasa waawatakat iipünaapünaa je saaʼu tü kasa mmapaʼajatkat süpüshuaʼale» (Génesis 1:28).

Alatajatü wainma juya süpüla jouluinjanain na nuuʼuliwoʼukana Adán sainküin mmakat. Süpüla shikeraajüinjatüin tia, kachoinjachi Adán sümüin Eva otta wainmainjana na naikeyuukana (Isaías 45:18). Sünainjee tü nuluwataakalü anain naya Jeʼwaa watüjaa aaʼu keeʼireetüjüliain naaʼin katüinjatüin waneepia noʼu Adán sümaa Eva, müshiijeseʼe nuluwataain naya sünain jouluinjanain na nooʼuliwoʼukana sainküin mmakat.

Laülaashi Adán saaʼu tü mürütkalüirua, müsüjeseʼe kanüliayaa müin shiairua nutuma, kakaliainjachi nia sünain tia aʼyatawaakat (Génesis 2:19). Süpüla naaʼinmajüinjatüin süpüshuaʼa tü mürütkalüirua akatalüinjachi nia kaʼi süpüla niʼraajüinjatüin maʼin sukuwaʼipa waneʼewai sukua.

Watüjaa aaʼu nukumajuushin Adán sümaa Eva süpüla kakaliainjatüin katüin noʼu. Arülayaai tü aʼyatawaa aapünakat namüin nutuma Jeʼwaa: laülaainjana naya saaʼu tü mürütkalüirua otta jouluinjana na nooʼuliwoʼukana sainküin mmakat. Kakalia maʼin katüin noʼu Adán.

Saashin tü Wiwüliakat, kakaliapuʼusü katüin soʼu wayuu süpülapünaa tü Juya miyoʼushaatakat maʼin. Anuu tü sümakat: «Ouktüshi Adán 930 nuuyase». Süküjainya tü Wiwüliakat nachiki aipiruashii wayuu alanaʼaleeka suulia 900 juya katüin noʼu, maʼaka naaʼin Set, Enós, Quenán, Jared, Matusalén otta Noé. Jamüshijaʼa Noé, 600 nuuyase wanaa sümaa tü Juya miyoʼushaatakat maʼin (Génesis 5:5-27; 7:6; 9:29). ¿Jamüshii kakaliaka maʼin naya wayuukana?

Kakaliakaʼa katüin noʼu naya wayuukana shia süka eejanain naya maʼaka jeʼra juya süchikijee sumojujaain nukuwaʼipa Adán noʼuluʼu Jeʼwaa. ¿Jamüshii kakaliakana maʼin na wayuu pejekana sünain nükalia Adán? ¿Jameetche sukuwaʼipa süpüla nnojoluinjatüin outuin wayuu? Süpülapünaa wasoutuin shiʼipajee tia, anasü wekirajaale sünain kasanainjeein laülaaka jee outaka wayuu.