¿AʼYATAWEESÜCHE waaʼin suluʼu tü outkajaaleekat sümaa kapüleein shia wamüin? Eeshiijaʼa waʼyataweere sünain tü niʼyataakalü anain wanee wawala jee shiale sünain tü waʼyataapuʼukalü anain wamaiwa. Eesüjaʼa kapüleere wamüin aʼyatawaa nümüin Jeʼwaa sükajee laülaain waya, ayuulin waya, maʼletsein waya jee shiale sünainjee waʼyataainjanain süpüleerua tü choʼujaakat sümüin wapüshi. Eesüjaʼa wooʼulaale suulia wanee waʼyataain kakaliainnakana anain waya sünainjee wainma kasa eeʼirataka akuwaʼipa suluʼu nupueulose Jeʼwaa. Müle wakuwaʼipa, eesüjaʼa jülüjale waaʼin nnojoluin waʼyataain maʼin nümüin Jeʼwaa maʼaka keeʼireein shia waaʼin. Eesü mojule waaʼin saalinjee tia. ¿Kasakaʼa waaʼinrajatüin mojule maʼin waaʼin jee üttüle waaʼin? ¿Kasa waaʼinrajatka süpüla talatüin waaʼin waneepia?

Anashaatasü tü watüjakat sünainjee nukuwaʼipa Juan chi Awoutisaajüikai. Anasü maʼin tü aʼyatawaa naapakat Jeʼwaa nümüin, nnojotpejeʼe antapünaain suluʼu nikii kakaliainjachin nia püreesain. Motsoʼo neʼe sümaa nüküjain pütchi nüchiki Jesuu. Mayaainjeʼe müin nukuwaʼipa, talatüshi nia waneepia. ¿Kasache naaʼinraka süpüla talatüin naaʼin waneepia? ¿Kasa waaʼinrajatka süpüla talatüin waaʼin mayaainjeʼe wainmain tü alatakat wamüin?

Aaʼuriiroʼu soʼu juyakat 29, oʼttüshi Juan sünain aapiraa na wayuukana süchiki nüntajachin chi Mesíaskai. «Jiyaawajaa jumaala suulia jaainjala süka sülüʼülüin nükalia chi Maleiwakai süpüla aluwatawaa jaaʼu», müshi nia (Mat. 3:2; Luc. 1:12-17). Wainma na wayuu jaa makana sümüin nünüiki. Antüsü wayuu wattajee nünainmüin Juan süpüla saapajüin tü nüküjakat nüchiki Jesuu otta wainma na ayaawajaakana suulia naainjala jee woutiisaka. Nüküjain Juan namüin na fariseokana tü alatajatkat namüin nnojorüle neeʼiratüin nakuwaʼipa, jama wayuuin eʼrülii wayumüin naya (Mat. 3:5-12). Alanaʼaleepejeʼe maʼin tü naaʼinrakat Juan wanaa sümaa nuwoutisaajüin Jesuu oʼutuupüroʼu soʼu juyakat 29. Suluʼujee tia, nüküjain namüin na wayuukana noʼunuinjanain nümaa Jesuu, chi Mesías aküjünakai achiki paala (Juan 1:32-37).

Anasü maʼin tü aʼyatawaa naapakat Jeʼwaa nümüin Juan, anuujeseʼe tü nümakat Jesuu nüchiki: «Yaa saʼaka wayuu maaʼulu yaa, alanaʼaleeshia maʼi Juan sünain kojutüin nütüma Maleiwa suulia tü wayuukolüirua süpüshua» (Mat. 11:11). Talatakajasaʼa maʼin naaʼin Juan sutuma tü niʼyataakalü anain nümüin Jeʼwaa  jee sutuma tü kasa anasü niʼrakat sünainjee. Wainma na wawalayuu eʼrakana kasa anasü nutuma Jeʼwaa sükajee naʼyataain nümüin süka süpüshuaʼa naaʼin maʼaka naaʼinrüin shia Juan. Müsü nukuwaʼipa Terry sümaa Sandra, tü nuʼwayuusekat. Alatüinna suulia 50 juya sünain aʼyatawaa waneepia nümüin Jeʼwaa. Anuu nünüiki Terry: «Wainma tü kasa taʼyataakalü anain nümüin Jeʼwaa, pürekutsootshi rekulaat taya, weteliitashi taya, pürekutsootshi pesiaat taya, alapalaaishi taya naaʼu na wawalayuukana jee nekiipüʼüshi taya na alapalaakana naaʼu. Shiasaʼa maaʼulu pürekutsootshi pesiaat taya tachikuaʼa». Shiimain talatüin waaʼin sünain aʼyatawaa nümüin Jeʼwaa. Nnojotpejeʼe shiain neʼe talatüin atuma waaʼin tü waʼyataainkat, wachajaainjatü sukuwaʼipa süpüla ayatüin talatüin waaʼin.

Talatüsü naaʼin Juan chi Awoutisaajüikai süka kojutuin nümüin niʼyataain nümüin Jeʼwaa. Woutiisapa Jesuu, apaliʼirajüshii na nikirajüinkana Juan, akojuyalaapejeʼe na nikirajüinkana Jesuu. Shapaasü naaʼin na nikirajüinkana Juan sutuma tia, müshiijeseʼe namüin nümüin: «chi püküjakai achiki waneepia wamüin, owoutisaajüshi nia jooluʼu wayuu, je oʼunüsü wayuu watta saalin pümaʼanajee süpüla oʼunaa nünainmüin» (Juan 3:26). Nümaka Juan namüin: «Soto jaaʼin sukuaippa wane miʼiraa shikiira kaʼwayuusee. Nütünajut chi kaʼwayuuseshikai, talatüsü neʼe naaʼin wanaa sümaa niʼrüin chi kaʼwayuuseshikai, sünain saapünüin najapuluʼu tü jietkat. Akaajaa tayakai, talatüsü taaʼin jooluʼu wanaa sümaa teʼrüin Jesús sünain antaa wayuu wainma nünainmüin» (Juan 3:29). Nnojotsü achunjain naaʼin Juan saaʼujee tü naaʼinrakat Jesuu otta nnojotsü jülüjain naaʼin mojutuin tü niʼyataainkat sükajee anain maʼin tü niʼyataainkat Jesuu. Ayatsia talatüin naaʼin Juan süka kojutuin nümüin nütünajutuin nia Jesuu.

Anasü tü jülüjakat naaʼin Juan, talatüshijeseʼe nia sünain aʼyatawaa nümüin Jeʼwaa mayaainjeʼe kapüleein shia nümüin. Nnojoishi asüin wiino süka wayuuin nazareo nia (Luc. 1:15). Wainma tü kasa apülajünakat nuulia. Naashin Jesuu, nnojoishi Juan sünainpünaain miʼiraa jee nnojoishi asüin nia wiino. Naatajatü nukuwaʼipa nuulia Jesuu otta noulia na nikirajüinkana, süka jamüin, wainmain tü kasa apülajünakat nuulia Juan (Mat. 11:18, 19). Nnojoishi aaʼinrüin Juan kasa pülasü maʼaka naaʼin Jesuu, nütüjaapejeʼe saaʼu eein süpüla naaʼinrüin tia na nikirajüinkana Jesuu, jaʼitakajeʼe na nümaapuʼukana, eesü süpüla nountuin tia (Mat. 10:1; Juan 10:41). Nnojotsü nuʼwanaajireʼerakuʼu nümüin nukuwaʼipa Juan sümaa nukuwaʼipa Jesuu. Shia neʼe naaʼinmaaka tü aʼyatawaa niʼitaakalü Jeʼwaa najapuluʼu.

Talateerü waaʼin sünain aʼyatawaa nümüin Jeʼwaa kojutule wamüin tü waʼyataakalü anain nümüin maaʼulu. «Taaʼinmaain waneʼewai sukua tü aʼyatawaa aapünakat tamüin», müshi Terry, chi wayuu wachuntayüikai anülia. «Nnojoishi amülain neʼe taya sünain aʼyatawaa, wainma tü kasa anasü teʼrakat sünainjee», müshi nia süchiki niʼyataain waneepia nümüin Jeʼwaa.

Talateerü waaʼin jülüjale waaʼin kojutuin tü waʼyataakalü anain süka niain Jeʼwaa waʼyataajiraain amaa (1 Cor. 3:9, TNM). Jülüjataa paaʼin eere wanee korolo kojutukat pümaʼana. Nnojoleerü amojujaain shia süka paaʼinmajüin jee piisattüin shia. Kojutule wamüin aʼyatawaa nümüin Jeʼwaa, waaʼinmajeerü shia maʼaka waaʼinmajüin tü korolo kojutukat wamüin, müle shia watuma, nnojoleerü mojuin waaʼin sünain aʼyatawaa nümüin. Nnojo waʼwanaajireʼerüin tü waʼyataainkat sümaa naʼyataain na waneinnua. Nnojo jülüjain waaʼin anaʼleein tü aʼyatawaa aapünakat namüin na waneinnua woulialeʼeya (Gal. 6:4).

Eesüjaʼa nütüjaale saaʼu Juan motsoʼoinjatüin neʼe sümaa nüküjain pütchi nüchiki Jesuu. Eepejeʼe süpüla nnojoluin nütüjaain saaʼu püreesalaʼa nümüinjachin (Juan 3:30). Püreesaka Juan nutuma Herodes soʼu juyakat 30. Aipirua kashi süchikijee woutiisain Jesuu nutuma Juan. Nüchajaapejeʼe Juan sukuwaʼipa süpüla nüküjain pütchi nüchiki Jesuu (Mar. 6:17-20). ¿Jamüsü ayataka talatüin naaʼin Juan mayaainjeʼe wainmain tü kasa alatakat nümüin? Ayatüsia talatüin naaʼin süka shiain naaʼinmaain tü niʼyataainkat nümüin Jeʼwaa. 

Suluʼu tü kaatsetkat, naapa achikit Juan süpüshuaʼa tü kasa naaʼinrakat Jesuu sünain aküjaa tü pütchi anasükat (Mat. 11:2; Luc. 7:18). Nütüjaa aaʼu Juan niain Jesuu chi Mesíaskai. Nütüjaweepejeʼe saaʼu nikeraajeerüle süpüshuaʼa tü aküjünakat nüchiki suluʼu tü Ashajuushikat. Nütüjaa aaʼu Juan nuluwataainjachin Jesuu, eepejeʼe süpüla nümüin suluʼu naaʼin: «¿Aluwataajeeiche  nia maalü? ¿Nujuʼitireeiche taya yaajee?». Nütüjawee aaʼu Juan sooʼomüin süchiki tü naaʼinrajatkat Jesuu, nuluwataainjeseʼe piamashii nikirajüin süpüla nasakirüin süchiki tia. Namaka nümüin Jesuu: «¿Shiimüʼinya piain chi aluwataaushikai nütüma Maleiwa süpüla puʼtteʼerüinjachin wayuu? ¿Nnojottaapa shiimüin?» (Luc. 7:19). Jülüjakajasaʼa naaʼin Juan tü namakat na nikirajüinkana naleʼejapa nümaʼanajee Jesuu, naküjain nümüin süchiki tü kasa pülasü naaʼinrakat Jesuu jee süchiki tü pütchi nüküjitkat nümüin Juan. Anuu tü nümakat Jesuu namüin: «Tü wayuu eekai moʼuin, koʼusü. Tü eekai masaʼain, kasaʼasü. Tü eekai sajaʼttüin süta, ashatüsü tü sütakat. Tü eekai macheʼein, kacheʼesü. Tü eekai ouktüin, osoiraasü saaʼin. Je tü eekai müliain, aküjüna amüinrü tachiki tayakai chi oʼtteʼerüikai» (Luc. 7:20-22).

Akatchinraakajasaʼa naaʼin Juan naapapa tia natuma na nikirajüinkana. Niyaawata aaʼu nikeraajüin Jesuu süpüshuaʼa tü aküjünakat nüchiki paala. Mayaainjeʼe nnojoluin niyuʼnnüin nutuma Jesuu suulia püreesaa, nütüjaa aaʼu nnojoluin amülain neʼe tü niʼyataainkat nümüin Jeʼwaa. Talatüsü naaʼin Juan mayaainjeʼe wainmain kasa alataka nümüin.

Talateerü waaʼin jee nnojoleerü shapaain waaʼin sünain aʼyatawaa nümüin Jeʼwaa, waaʼinmaale tü waʼyataainkat nümüin maʼaka naaʼinmaain shia Juan (Col. 1:9-11). Wounteerü tia waashajeʼerüle tü Wiwüliakat jee wasakireʼerüle suluʼu waaʼin sünain tü sümakat. Saashin tü Wiwüliakat nnojotsü amülain neʼe tü waʼyataainkat nümüin Jeʼwaa (1 Cor. 15:58). Anuu tü sümakat Sandra, tü wayuu waküjayütkalü achiki: «Sutuma taashajeʼerawalin wanee kapiitulo suluʼujee tü Wiwüliakat, arütkaasü maʼin taya nünainmüin Jeʼwaa jee nia kapülaka taaʼin suulialeʼeya takuwaʼipa». Jülüjale waaʼin tü kasa anasü eekat sünainjee naʼyataain na wawalayuukana sainküin mmakat, nnojoleerü jülüjakuʼu müin waaʼin tü alatakat wamüin, jülüjeerü waaʼin tü kasa nuuntakat Jeʼwaa. Müsü Sandra süchiki tia: «Sutuma tü ojuʼitawaikat kashiwai suluʼu JW Broadcasting^®, paaʼinwashii waya namaa na wawalayuukana otta talatüsü waaʼin sünain aʼyatawaa nümüin Jeʼwaa».

Aküjashi pütchi Juan nüchiki Jesuu süka katsüin naaʼin nutuma chi naaʼinkai Maleiwa maʼaka katsüin naaʼin Elías. Juan nümaa Elías wayuʼuya naya maʼaka waaʼin wayakana (Luc. 1:17; Sant. 5:17). Kojutule wamüin tü waʼyataainkat nümüin Jeʼwaa jee waaʼinmaale shia maʼaka naaʼinmaain shia Juan, ayateeria talatüin waaʼin jaʼitasü kasain alatüin wamüin.