1. (1) ¿Kasa watüjaka nüchiki David sükajee tü nümakat nümüin Jeʼwaa? (2) ¿Kasa naaʼinraka David süka alin maʼin nüpüla Jeʼwaa?

ANUU nünüiki chi aluwataaikai David: «Miyoʼu maʼin Jeʼwaa, aʼwaajünüinjachi nia» (Sal. 145:3). Süka alin maʼin Jeʼwaa nüpüla David, nuʼwaajeein nia wanaa namaa na nuwalayuukana (Sal. 22:22; 40:5). Müshiʼiya wayakana, aishi maʼin wapüla Jeʼwaa, müsüjeseʼe wanaawain waaʼin nümaa David sünain maa: «Jeʼwaakalee, anataʼaleeshijaʼa pia süka piain chi Nümaleiwasekai chi washikai Israel, shiimain eejeechin pia süpüla kaʼikat süpüshuaʼa» (1 Crón. 29:10-13).

2. (1) Püküja wanee sukuwaʼipa süpüla waʼwaajüin Jeʼwaa maaʼulu. (2) ¿Kasa nnojotka naaʼinrüin waneinnua wawalayuu sutuma mmoluin naya? (3) ¿Kasa wekirajaainjatka anain palajana?

² Wanee sukuwaʼipa süpüla waʼwaajüin Jeʼwaa maaʼulu shia müleka wayalerüle wajapü süpüla wasoutuin shiʼipajee tü asakinnakalü anain sünain tü outkajawaakat. Wainmapejeʼe wawalayuu kapüleeka amüin tia. Mayaainjeʼe nayalereein najapü, eeshii mmorüle naya. ¿Kasa naaʼinrajatka süpüla nnojoluin mmoluin naya? ¿Kasa akaalinjeenaka waya süpüla watütüleʼerüin naaʼin na wawalayuukana sükajee wanüiki? Süpülapünaa wasoutuin shiʼipajee tia, wekirajaa sünain pienchisü kasa wayaleraka anainjee wajapü sünain tü outkajawaakat.

3-5. (1) Saashin Hebreokana 13:15, ¿jamüshii wayaleraka wajapü süpüla wasoutuin sünain tü outkajawaakat? (2) Püküja jamüin nnojotka nuchuntuin Jeʼwaa wamüin wanaawainjatüin sukuwaʼipa wanüiki wapüshuaʼa sünain aʼwaajaa nia.

³ Anashiisü nümüin Jeʼwaa waʼwaajüin nia (Sal. 119:108). Sükajee tü wamakat sünain tü outkajawaakat, waʼwaajüin Maleiwa otta waaʼinrajatü tia waneʼewai wakua (paashajeʼera Hebreokana 13:15, TNM). Nnojotsü nuchuntuin Jeʼwaa wamüin wanaawainjatüin sukuwaʼipa wanüiki wayalerapa wajapü sünain tü outkajawaakat.

 ⁴ Nütüjaa aaʼu Jeʼwaa tü kasa wountakat jee tü kasa kapüleekat wamüin. Kojutusü nümüin tü kasa waaʼinrakat süpüla waʼwaajüin nia. Kojutusü nümüin Jeʼwaa tü kasa nasülajakat na israeliitakana nümüin. Jamüshiijaʼa na kaʼletseshiikana, eeshii nasülajüle anneerü jee kaaʼula nümüin Jeʼwaa. Na maʼletsekana eeshii süpüla nasülajüin piamashii wawaachi. Isaleerejeʼe nüchiki wanee wayuu nüsülajüin piamashii wüchiichein nümüin Jeʼwaa, eeshi süpüla nüsülajüin palitchon jaliina eekai anain maʼin (Lev. 5:7, 11). Mayaainjeʼe jayain maʼin tü jaliinakat, nnojotsü aapünajatüin nümüin Jeʼwaa jaliina eekai eein, shiainjatü aapünaka eekai anain maʼin.

⁵ Ayatüsia kojutuin maʼin nümüin Jeʼwaa tü kasa wasülajakat nümüin maaʼulu. Wanaa sümaa wayalerüin wajapü süpüla wasoutuin sünain tü outkajawaakat, kojutusü nümüin tü wamakat, jaʼitaina nnojoluin watüjain maʼin aashajawaa maʼaka naaʼin Apolos jee nnojoluin kemeʼeriain maʼin wanüiki maʼaka naaʼin Pablo (Aluw. 18:24; 19:8). Tü nuchuntakat Jeʼwaa shia waküjainjatüin shia süka süpüshuaʼa waaʼin. Soto waaʼin tü wayuu outa aʼwayuusetkat ejitaka piamasü nneerü kachueerachen neʼe. Talatüshi maʼin Jeʼwaa sümaa tü süsülajakat süka süsülajüin süpüshuaʼa tü eejatkat sümaʼana (Luc. 21:1-4).

6. (1) Saashin Hebreokana 10:24, 25, ¿jamüsü waaʼin waapapa nanüiki na wawalayuukana sünain tü outkajawaakat? (2) ¿Kasa paaʼinrajatka süpüla kojutuin pümüin nanüiki na wawalayuukana?

⁶ Wachecherüin waaʼin sünain anoujaa (paashajeʼera Hebreokana 10:24, 25). Kamalainsü wamüin aapajaa nanüiki na wawalayuukana sünain tü outkajawaakat. Kamalainsü wamüin aapajaa nünüiki wanee jintüi süka mapüleechoin shia nutuma. Talatüsü waaʼin waapapa nünüiki wanee wawala aküjaka wanee pütchi nnojotpuʼuka nütüjaain aaʼu. Kojutusü wamüin nasoutuin na wawalayuu japüleʼekana jee nayale na isayüliikana achiki aashajawaa suluʼu wanüiki (1 Tes. 2:2). ¿Kasa waaʼinrajatka süpüla kojutuin wamüin tü naaʼinrakat? Eesü süpüla waapüin analuʼut namüin süka sütütüleʼerüin waaʼin nanüiki. Jee wane shia wanaa sümaa wayalerüin wajapü süpüla wasoutuin sünain tü outkajawaakat. Waaʼinrüle tia, watütüleʼerajiraweerü waaʼin (Roma 1:11, 12).

7. ¿Kasa waaʼinreetka müleka wasoutule sünain tü outkajawaakat?

⁷ Eʼrüshii waya kasa anasü sünainjee (Is. 48:17). ¿kasa waaʼinreetka müleka wasoutule sünain tü outkajawaakat? Palajana, yapeerü watuma tü wekirajaainjatkalü anain sünain tü outkajawaakat. Sutuma tia, watüjaweerü maʼin aaʼu tü sümakat tü Wiwüliakat otta weʼitaajeerü shia suluʼu wakuwaʼipa. Tü wane kasa weʼreetkat, shia kamalainjeerüin maʼin wamüin tü outkajawaakat süka yapatüjüliin waya süpüla. Otta tü apünüinkat kasa, shia makateerüin suluʼu wekii tü waküjakat süka wekirajaain maʼin sünain.

8, 9. (1) Saashin Malaquías 3:16, ¿jamüsü nnojotka amülain neʼe wayalerüin wajapü sünain tü outkajawaakat? (2) Mayaainjeʼe müin shia, ¿jamüshii nnojoliika nayalerüin najapü waneinnua wawalayuu?

⁸ Talatüsü naaʼin Jeʼwaa sutuma waküjain süchiki tü wanoulakat. Watüjaa aaʼu naapüin  Jeʼwaa wanüiki sünain tü outkajawaakat. Nnojotsü amülain neʼe wayalerüin wajapü, kojutusü maʼin nümüin tü waaʼinrakat süpüla wasoutuinjanain (paashajeʼera Malaquías 3:16). Süka kojutuin maʼin nümüin Jeʼwaa tü waaʼinrakat süpüla talatüin nia watuma, wainma kasa anasü naapaka wamüin (Mal. 3:10).

⁹ Wainma kasa wasoutuinjanaka anainjee sünain tü outkajawaakat. Mayaainjeʼe müin shia, eeyüliʼiya wawalayuu mmotkana sünain ayaleraa najapü süpüla nasoutuin sünain tü outkajawaakat, mülejeʼe pukuwaʼipa mayaa, nnojo piyüülajaain. Süpüla wayalerüinjatüin wajapü sünain tü outkajawaakat, wekirajaa sünain tü sümakat tü Wiwüliakat süchiki tia otta wekirajaa nachiki waneinnua anoujashii namaiwajana.

10. (1) ¿Jamüsü naaʼin watta naalii wawalayuu nasoutuinjanale sünain tü outkajawaakat? (2) ¿Jamüsü nnojotka mojuin mmorüle waya sünain ayaleraa wajapü?

¹⁰ ¿Tüntüsüche maʼin paaʼin piyalerüinjachire pajapü süpüla pusoutuin sünain tü outkajawaakat? Mülejeʼe pukuwaʼipa mayaa, nnojoishi piain neʼe alatüin amüin tia, maʼleesia nakuwaʼipa watta naalii wawalayuu. Isale püchiki pusoutuin sutuma mmoluin pia, anasü jülüjale paaʼin kasain mmoluin atuma pia. ¿Shiache sutuma nnojoluin pansaain pünüiki jee isale püchiki tü pünüikinjatkat? ¿Shiataapa sutuma nnojoleerüin kemeʼeriain pünüiki maʼaka nanüiki na waneinnua? Nnojotsiaajeʼe mojuin tia, eesüjaʼa jülüjale paaʼin tia süka nnojoluin yaletüin paaʼin jee nnojoluin jülüjain paaʼin nayain alanaʼaleein na waneinnua puulia. Anasü maʼin nümüin Jeʼwaa nakuwaʼipa na wayuu nnojoliikana yaletüin aaʼin (Sal. 138:6; Filip. 2:3). Niainjachipejeʼe waʼwaajüin Jeʼwaa sünain tü outkajawaakat otta watütüleʼerüinjatü naaʼin na wawalayuukana süka wanüiki (1 Tes. 5:11). Aishi maʼin pia nüpüla Jeʼwaa otta meimmoluinjeerü paaʼin nutuma.

11. Püküja waneirua wetsiikulo akaaliijaka waya süpüla wasoutuin sünain tü outkajawaakat.

¹¹ Wekirajaa sünain waneirua pütchi sümaka tü Wiwüliakat. Süküjain tü Wiwüliakat wainmain wayuu oʼtchejaaka sümaa tü nanüikinjatkat (Sant. 3:2). Nütüjaa aaʼu Jeʼwaa wainmain tü kasa isakat wachiki, akaajaa na wawalayuukana natüjaa  aaʼu tia (Sal. 103:12-14). Süka wapüshinnapain na wawalayuu anoujiraakana wanaa wamaa, aishii waya napüla (Mar. 10:29, 30; Juan 13:35). Nnojoleena asirajüin na wawalayuukana mojule suchuntia watuma tü pütchikat wayalerapa wajapü.

12, 13. ¿Kasa watüjaka sünainjee nukuwaʼipa Nehemías otta Jonás?

¹² Eeshiijaʼa süpüla meimmoluin waya sünain asoutaa sünain tü outkajawaakat jülüjale waaʼin nakuwaʼipa piamashii wayuu namaiwajana. Wekirajaa nüchiki Nehemías chi aʼyataapuʼukai nümüin wanee aluwataai eʼnnaajünakai maʼin. Mojusü maʼin naaʼin Nehemías naapapa süchiki mashawaleʼennüin tü süsepükat Jerusalén otta ayatayülüin makumajuuin süchikuaʼa tü soʼukalüirua (Neh. 1:1-4). Eeshijaʼa mmorüle Nehemías wanaa sümaa nüsakinnüin nutuma chi aluwataashikai kasain mojuin atuma naaʼin. Süpülapünaa nusoutuin Nehemías nümüin chi aluwataashikai, oʼuraajüshi nia motsomüin suluʼu naaʼin nümüin Jeʼwaa. Sutuma tü naaʼinrakat Nehemías, wainma kasa naainjaka chi aluwataashikai süpüleerua tü nupueulosekat Jeʼwaa (Neh. 2:1-8). Tü watüjakat sünainjee tü naaʼinrakat Nehemías, shia wachuntajanain nümüin Jeʼwaa süpülapünaa wasoutuin shiʼipajee wanee kasa. Jülüja waaʼin jooluʼu nukuwaʼipa Jonás. Wanaa sümaa nüjütünüin nutuma Jeʼwaa süpüla nüküjainjatüin wanee pütchi namüin na wayuu chajanakana Nínive, mmotshaatashi nia, müshijeseʼe nuʼluwataain suluʼumüin wanee mma wattaka maʼin (Jon. 1:1-3). Nükaaliijapejeʼe nia Jeʼwaa süpüla nikeraajüinjatüin tü nuluwataakalü anain, sükajee tü naaʼinrakat Jonás oʼttaashii na wayuu chajanakana Nínive (Jon. 3:5-10). Sünainjee tü kasa alatakat nümüin Jonás, wayaawata aaʼu nükaaliijeenain waya Jeʼwaa süpüla waʼyataainjanain nümüin, jaʼitaina mmoluin waya. Wainkeeria asoutaa sünain tü outkajawaakat, nnojoishii mmoluin waya neema na wawalayuukana maʼaka mmoluin Jonás neema na níniviitakana, ¿aashimüin?

¹³ ¿Kasa waaʼinrajatka süpüla watütüleʼerüin naaʼin na wawalayuukana wasoutapa sünain tü outkajawaakat? Wekirajaa sünain süpüshi tü kasa waaʼinrajatkat.

14. (1) ¿Jamüsü yapainjatka watuma tü ekirajaanajatkat sünain tü outkajawaakat? (2) ¿Jouja anashiika süpüla wekeraajüin tü wekirajaainjatkalü anain sünain tü outkajawaakat?

¹⁴ Yapa watuma tü ekirajaanajatkat sünain tü outkajawaakat. Nnojoleena mmoluin waya sünain asoutaa shiʼipajee tü asakinnakalü anain müleka wekirajaale wepialuʼujee (Prov. 21:5). Nnojotpejeʼe wanaawain tü kasa waaʼinrakat waneʼewai wakua. Jülüja waaʼin tü saaʼinrakat wanee wawala outa aʼwayuuset, Eloise sünülia, alatüirü suulia 80 suuyase. Ekirajaʼawaisü shia sünain Aapiria Wayuu suʼttiajee tü semaanakat. Anuu sünüiki Eloise: «Talataleesia maʼin taaʼin sünain tü outkajawaakat tekirajaale sünain palajana». Eesü wanee wawala Joy sünülia, aʼyataʼawaisü shia waneepia. Saashin Joy, shikirajaa anainrü Aapiria Wayuu wanee kaʼi süpülapünaa tü outkajawaakat suulia motomaatüin saaʼin tü shikirajaakalü anain. Anuu nünüiki Ike, wainma niʼyataain süka laülaashin jee pürekutsoolin nia: «Anasü tamüin tekirajaʼawalin shiʼipaʼaya tü ekirajaanajatkat sünain tü  outkajawaakat suulia tekirajaain süpüshuaʼa soʼuleʼeya wanee kaʼi».

15. ¿Kasa waaʼinrajatka süpüla yapain watuma tü ekirajaanajatkat sünain tü outkajawaakat?

¹⁵ ¿Kasa waaʼinrajatka süpüla yapain watuma tü ekirajaanajatkat sünain tü outkajawaakat? Wachuntajachi chi naaʼinkai Maleiwa palajana (Luc. 11:13; 1 Juan 5:14). Süchikijee tia, waashajeʼera motsomüin tü ekirajaanajatkalü anain. Waashajeʼera sünülia tü ekirajaayakat, sünülia pütchikalüirua, weirakaa sümüin tü ayaakuaakalüirua otta waashajeʼera tü pütchi süttakat. Kettaapa tia watuma, wekirajaa sünain tü pütchikat otta tü wetsiikulo eekat suluʼu. Wasakireʼera waaʼin sünain tü wekirajaakalü anain otta jülüja waaʼin jaralüin tü pütchi kamalainkat wamüin süpüla waküjain shia sünain tü outkajawaakat. Wekirajaale maʼin sünain tü ekirajaanajatkat sünain tü outkajawaakat, eʼreena waya kasa anasü sünainjee otta mapüleejeerü wamüin asoutaa shiʼipajee tü asakinnakalü anain (2 Cor. 9:6).

16. (1) ¿Kasa tü eʼitaanakat süpüla pikirajaain aka? (2) ¿Kasa paaʼinraka süpüla pikirajaain süka?

¹⁶ Wekirajaa süka tü kasa eʼitaanakat suluʼu Internet. Wainma tü kasa naapakat wamüin Jeʼwaa sükajee tü nupueulosekat süpüla watüjain ekirajawaa. Sükajee JW Library^®, eesü süpüla wadescargaajüin karaloʼutairua suluʼu serulaat jee tableta. Mayaa, eesü süpüla wekirajaain sünain tü wekirajaainjatkalü anain, waashajeʼerüin otta waapajüin shia. Eeshii na ekirajaakana sükajee JW Library neemeraapa naʼyataaleruʼu, koleejialuʼu jee shiale wanaa sümaa noʼunajaain. Jee müsia, mapüleesat ekirajawaa sünain wanee pütchi süka Watchtower Library otta PÜTCHIPÜLEE SULUʼUKA INTERNET sutuma Watchtower^™.

17. (1) ¿Jamüsü anaka yapale watuma kojuyasü pütchi? (2) ¿Kasa pütüjaka sünainjee tü videokot Aleewa pia nümaa Jeʼwaa: Yapa putuma pünüikinjatka?

¹⁷ Kettaaja watuma kojuyasü pütchi. ¿Jamüsü choʼujaaka waaʼinrüin tia? Eeshii süpüla nayalerüin najapü na wawalayuukana wanaa pümaa jee nnojoire nüneeküin pia chi wawala oʼunirakai sukuwaʼipa tü ekirajawaakat, süka jamüin, nüneeküin palitchon wawalayuu süpüla nasoutuin shiʼipajee tü asakinnakalü anain suulia sülataleein tü minuuto eʼitaanakat nüpüla. Nnojoliire waneekünüin soʼu tü palajatkalüirua pütchi wanaa sümaa wayalerüin wajapü, nnojo jashichin waya otta nnojo wayüülajaain. Yapale watuma kojuyasü pütchi süpüla wasoutuin sünain tü outkajawaakat, eeshii süpüla wayalerüin wajapü kojuyatua otta waneekünüin. Eesü süpüla wayalerüin wajapü süpüla waashajeʼerüin wanee wetsiikulo jee shiale süpüla wasoutuin shiʼipajee tü asakinnakalü anain. *

18. ¿Jamüsü anaka motsoʼole sümaʼa wanüiki wasoutapa shiʼipajee tü asakinnakalü anain sünain tü outkajawaakat?

¹⁸ Motsoʼo sümaa wanüiki. Watütüleʼereerü naaʼin na wawalayuukana nnojorüle kamaʼain wanüiki wasoutapa jee mapüleere shia watuma. Nnojotsü alanaʼaleeinjatüin wanüiki suulia 30 sekunto  (Prov. 10:19; 15:23). Naaʼinrüinjatü tia na wawalayuu kakaliainakana sünain anoujaa. Jamüsüjaʼa kamaʼale nanüiki sünain asoutaa shiʼipajee tü asakinnakalü anain jee kapüleere shia natuma, nnojoleerü nayalerüin najapü na waneinnua süka iseerüin shia nachiki naaʼinruʼu. Shiasaʼa motsoʼole sümaa wanüiki, wainmeena na wawalayuu asoutakana shiʼipajee tü asakinnakalü anain. Waneekünüle palajana süpüla wasoutuin shiʼipajee wanee pütchi, anasü pansaale wanüiki sümaa motsoʼoin shia otta nnojo waküjain süpüshuaʼa tü aküjünakat suluʼu tü pütchikat. Nusoutule wanee wawala shiʼipajee tü asakinnakalü anain sümaa pansaain shia nutuma, eeshii süpüla waküjain waneirua pütchi sünainpünaaka tü wekirajaakalü anain (paashajeʼera tü pütchikat « ¿Kasa eeka süpüla püküjain piyalerapa pajapü?»).

19. (1) ¿Jamüinjatü wanüiki nümüin chi wawala ekirajüinjachikai? (2) ¿Kasa waaʼinrajatka süsakinnapa anain tü pütchi waneekakat?

¹⁹ Wama nümüin chi wawala ekirajakai wasouteein sünain wanee pütchi. Waaʼinrüinjatüle tia, waküja shia nümüin chi wawalakai süpülapünaa suʼttüin tü outkajawaakat. Süsakinnapa anain tü pütchi waneekakat, wayaleramaata wajapü süpüla niʼrüinjanain waya.

20. ¿Jamüsü wanaawaka tü outkajawaakat sümaa wanee ekawaa eere jutkatüin wanee wayuu namaa naʼaleewainyuu?

²⁰ Tü outkajawaakat müsü aka saaʼin wanee ekawaa eere jutkatüin wanee wayuu namaa naʼaleewainyuu. Nounejaale waya waneinnua wawalayuu sünain ekawaa jee wakolojuinjanale, ¿kaseerü wakolojoko? Eesüjaʼa nnojorüle watüjaain saaʼu kasainjatüin walüʼüjain, wachajaweetpejeʼe sukuwaʼipa süpüla wakolojuin wanee kasa eekai kamalain namüin na oʼunajanakana sünain. Jamüshijaʼa Jeʼwaa nuunejaain waya sünain tü outkajawaakat jee wainma kasa anasü yapaka nutuma wapüla (Sal. 23:5; Mat. 24:45, TNM). Talatüsü naaʼin Jeʼwaa walüʼüjale kasa anasü namüin na oʼunajanakana sünain tü outkajawaakat, shialeekajaʼa waaʼinrüle shia süka süpüshuaʼa waaʼin. Wachajaa sukuwaʼipa süpüla wekirajaain sünain tü ekirajaanajatkat sünain tü outkajawaakat otta wasoutuin shiʼipajee tü asakinnakalü anain. Waaʼinrüle tia, katsüinjeerü wanoula sutuma tü naapakat Jeʼwaa wamüin otta katsüinjeerü nanoula na wawalayuukana sükajee wanüiki.