1, 2. ¿Kasa waaʼinrajatka süpülapünaa woutiisain waya?

 SOʼUNNAA tü jaʼrai juya alatüitpakat alatüshii suulia wanee miyon wayuu woutiisaka. Wainma na ekirajünatüjüliikana tepichiiwaʼaya naya maʼaka naaʼin Timoteo (2 Tim. 3:14, 15). Eeshii na ekirajaakana nüchiki Jehová müleʼuyuupa naya otta laülaayuupa naya. Jamüsüjaʼa jekenainka woutiisasü wanee wayuu ekirajaaka sünain tü Bibliakat namaa na Aküjaliikana pütchi wanaa sümaa 97 suuyase.

² Pikirajaale sünain tü Bibliakat maaʼulu yaa jee pikirajaatüjüire jintüliiwaʼaya pia süka nanoujain na kachooinkana pia, eesüjaʼa jülüjairüle paaʼin woutiisain pia. Anasü tia, jülüjainjatpejeʼe paaʼin paapüinjatüin paaʼin nümüin Jehová süpülapünaa woutiisain pia. Sünain ekirajaayakat tüü, wekirajaajeerü anain kasain naaʼinrüin wanee wayuu wanaa sümaa naapüin naaʼin nümüin Maleiwa otta jamüin nnojotka wainmajüinjatüin waaʼin süpüla waapüin waaʼin nümüin Jehová jee woutiisain waya kettaale waya süpüla tia.

NAAʼINRAJATKA WANEE WAYUU SÜPÜLA NAAPÜIN NAAʼIN NÜMÜIN MALEIWA

3. Püküja nachiki waneinnua wayuu akataluushi nümüin Jehová ashajünakana achiki suluʼu tü Bibliakat.

³ Na wayuu nüneekakana Jehová ashajünakana achiki suluʼu tü Bibliakat, akataluushi naya süpüla naʼyataain waneepia nümüin Jehová. Nüneekajala Jehová na israelitakana süpüla naʼwaajüin nia. Eepejeʼe waneinnua israelita akataluushi süpüla wanee aʼyatawaa nümüin Jehová. Jamüshijaʼa Aarón aneekünüshi nutuma Jehová süpüla laülaashinjachin napüleerua na sacerdotekana, eesü wanee ekiaalaja sünain nikii kanainka  wanee kotse aainjuushika süka ooro. Shiyaawase tia nükataluushin süpüla aʼyatawaa nümüin Jehová (Lev. 8:9). Müshiʼiya na nazareokana, akataluushi naya nümüin Jehová. Jamüsüjaʼa tü pütchi nazareo makat, sünainjeejatü shia tü pütchi hebreo nazír makat. «Akataluushi», maluʼulu tia pütchikat. Suluʼu tü Pütchi Aapünakat nümüin Moisés, aküjünüsü süchiki waneirua kasa nnojoluinjatka naaʼinrüin na nazareokana (Núm. 6:2-8).

4. (1) ¿Kasa paaʼinrajatka paapapa paaʼin nümüin Maleiwa? (2) ¿Kasa niyoutuinjatka wanee wayuu naapapa naaʼin nümüin Maleiwa? (Piirakaa sümüin tü ayaakuaakat).

⁴ Tü waaʼinrajatkat waapapa waaʼin nümüin Maleiwa shia woushikajaain süchiirua nukuwaʼipa Jesús otta waaʼinmaain waaʼinrüin tü nüchekakat Maleiwa. Müshi Jesús: «Chi achekakai süchiki tekirajüin nia, nnojotsü naaʼinrüinjatüin tü nüchekakat neʼe nümüiwaʼa» (Mat. 16:24). Naapapa naaʼin wanee wayuu nümüin Jehová niyoutajatü süpüshuaʼaleeya tü kasa mojukat noʼuluʼu (2 Cor. 5:14, 15). Nnojotsü naaʼinrüinjatüin tü suchuntaakat niʼiruku maʼaka saaʼin aʼluwajirawaa akuwaʼipaa (Gal. 5:19-21; 1 Cor. 6:18). Wayouteerü waaʼinrüin tia aire wapüla Jehová otta wayaawatüle saaʼu shiain aneerüin atuma wakuwaʼipa tü nuluwataakalü anain (Sal. 119:97; Is. 48:17, 18). Anuu nünüiki wanee wawala Nicholas nünülia: «Saaʼin sümüin wayuu tü nuluwataakalü anain Jehová müsü aka saaʼin wanee kaatset süka nnojoluin naaʼinrüin tü keeʼireekat naaʼin. Eepejeʼe süpüla müin pümüin maʼaka saaʼin wanee reja suluʼuka wanee zoológico eere süttüin wanee león suulia jamajüin pia nutuma».

5. (1) ¿Kasa naaʼinrajatka wanee wayuu süpüla naapüin naaʼin nümüin Jehová? (2) ¿Kasa naataka aluʼu tü naaʼinrakat wanee wayuu naapapa naaʼin nümüin Jehová suulia woutiisapa nia? (Piirakaa sümüin tü ayaakuaakat).

⁵ Süpüla naapüin naaʼin wanee wayuu nümüin Jehová nüküjainjatü nümüin niainjachin nuʼwaajüin nümüiwaʼa otta naaʼinreerüin waneepia tü nüchekakat nüpüleerua.  Nüküjain nümüin Jehová alinjachin nia nüpüla süka süpüshuaʼa naaʼin, süka süpüshuaʼa nukuwaʼipa, süka süpüshuaʼa nütchin otta jülüjainjachi nia naaʼin waneepia (Mar. 12:30). Paapapa paaʼin nümüin Jehová, nnojoishi jaralüin eʼrüin pia. Aluʼujasaʼa woutiisapa pia neʼraja akuarü tia na waneinnua. Sükajee tia, natüjaa aaʼu paapüitpain paaʼin nümüin Jehová. Kojutuinjatü pümüin paapüin paaʼin nümüin Jehová, keeʼireesü naaʼin pikeraajüin pünüiki (Ecl. 5:4, 5).

PAAPÜINJATKA AAʼUJEE PAAʼIN NÜMÜIN JEHOVÁ

6. ¿Kasa naapüinjatka aaʼujee naaʼin wanee wayuu nümüin Jehová?

⁶ Tü paapüinjatkalü aaʼujee paaʼin nümüin Jehová shia süka alin nia püpüla. Akooʼomüinraasü shiʼipaʼaya tü naalinkat Jehová püpüla süka pikirajaain süchiki nukuwaʼipa otta tü naaʼinrajatkat mapeena (Col. 1:9). Sutuma pikirajaain sünain tü Bibliakat piyaawata aaʼulu shiimain eein Jehová, nüshajirüin tü Bibliakat süka tü nüpülainkat otta nüneeküin waneinnua wayuu süpüla naaʼinrüin nakajee tü nüchekakat.

7. ¿Kasa naaʼinrajatka wanee wayuu süpülapünaa naapüin naaʼin nümüin Jehová?

⁷ Süpülapünaa naapüin naaʼin wanee wayuu nümüin Jehová nütüjaainjatü aaʼu tü kasa nütüjaainjatkalü aaʼu wanee wayuu palajana nüchiki Maleiwa. Naaʼinrajatü süpüshuaʼa tü nuluwataakalü anain Maleiwa otta nüküjainjatü süchiki tü nunoujakalü anain namüin na waneinnua wanaapünaa sümaa nukuwaʼipa (Mat. 28:19, 20). Alinjachi maʼin Jehová nüpüla otta nuʼwaajüinjachi nia süka süpüshuaʼa naaʼin. ¿Müsüche pukuwaʼipa mayaa? Airejeʼeya püpüla Jehová, paapeerü paaʼin nümüin  jee woutiiseechi pia. Nnojoleerü paaʼinrüin tia shiiʼiree talatüin naaʼin na ekirajakana pia sünain tü Bibliakat. Jimaʼaire pia jee majayürüle pia, nnojoleerü paaʼinrüin tia shiiʼiree talatüin pümaa na kachooinkana pia otta süka naaʼinrüin shia na paʼaleewainyuukana.

8. ¿Jamüsü paapeetka paaʼin nümüin Jehová jülüjale paaʼin tü naaʼinrakat püpüleerua? (Sal. 116:12-14).

⁸ Keeʼireejeerü paaʼin paapüin paaʼin nümüin Jehová jülüjale paaʼin süpüshuaʼa tü naaʼinrakat püpüleerua (paashajeʼera Salmo 116:12-14). Müsü tü Bibliakat: «Süpüshuaʼa tü kasa eekai anain jee eekai lotuin akuwaʼipa naapajala shia Maleiwa wamüin» (Sant. 1:17). Wanee kasa naaʼinraka Jehová wapüleerua shia nuuʼulaain outuin Jesús waaʼu. Sünainjee tia eeshii süpüla aleewain waya nümaa otta katüin woʼu süpüla kaʼikat süpüshuaʼa (1 Juan 4:9, 10, 19). Paapüle paaʼin nümüin Jehová, jaʼyeerü paaʼu kojutuin pümüin tü naaʼinrakat püpüleerua (Deut. 16:17; 2 Cor. 5:15). Aküjünüsü süchiki tia suluʼu tü karaloʼutakat Anainjatka atuma pukuwaʼipa waneepia, ekirajaaya 46, pütchi 4, pünaja yala tü videokot Tü eekat süpüla waapüin nümüin Maleiwa.

¿KETTAASHICHE PIA?

9. ¿Jamüshi nnojolinjachikai nüshapajaain aaʼin wanee wayuu süpüla naapüin naaʼin nümüin Jehová?

⁹ Eesüjaʼa jülüjale paaʼin nnojoluin kettaain pia süpüla paapüin paaʼin nümüin Jehová jee woutiisain pia. Eesüjaʼa piyaawatüle saaʼu punoutuinjatüin waneirua kasa sünain pukuwaʼipa süpüla poonooin nümaa Jehová otta choʼujaale pümüin pükatsüinrüin punoula (Col. 2:6, 7). Jülüja paaʼin nnojoluin sükatsüinramaatüin wanaawa nanoula na ekirajaakana sünain tü Bibliakat. Jaʼitakajeʼe na jimaʼaliikana jee na majayünnüükana nnojotsü wanaawain nakuwaʼipa sünain laülaamaatüin naaʼin sünain anoujaa. Jülüja paaʼin tü pukuwaʼipakat choʼujaale punoutuin wanee kasa otta nnojo piyoujireʼerüin tü pukuwaʼipakat namaa na waneinnua (Gal. 6:4, 5).

10. ¿Kasa paaʼinrajatka piyaawatüle saaʼu nnojoluin kettaain pia süpüla paapüin paaʼin nümüin Jehová jee woutiisain pia? (Paashajeʼera tü pütchikat « Naküjaliire pütchi na kachooinkana pia»).

¹⁰ Piyaawatüle saaʼu nnojoluin kettaain pia süpüla paapüin paaʼin nümüin Jehová, püchajaa sukuwaʼipa süpüla puuntuin tia. Puchunta nümüin Jehová nükaalinjai pia süpüla punoutuin tü choʼujaakat sünain pukuwaʼipa (Filip. 2:13; 3:16). Naapajeerü Jehová pünüiki jee naaʼinreerü püpüleerua tü puchuntakat nümüin (1 Juan 5:14).

TÜ WAINMAJAKALÜ ATUMA NAAʼIN WANEINNUA WAYUU

11. ¿Kasa naaʼinraka Jehová wapüleerua süpüla waneepiain waya nümaa?

¹¹ Eeshii na wainmajakana aaʼin süpüla naapüin naaʼin nümüin Jehová jee woutiisain naya mayaainjeʼe kettaain naya süpüla tia. Eeshii na mmotkana suulia nojuʼitinnüin naʼakajee na wawalayuukana saaʼujee naaʼinrüin wanee kasa mojusü. Anasü sotule jaaʼin nükaalinjeenain jia Jehová «süpüla laülaainjatüin jaaʼin wanaapünaa sümaa tü nüchekakat [...]. Talateechikalaka nia jümaa sünainjee süpüshuaʼa tü kasa jaaʼinrakat» (Col. 1:10). Naapeerü Jehová jümüin sütsüin jaaʼin suulia jaaʼinrüin kasa mojusü maʼaka naaʼinrüirüin shia napüleerua waneinnua wayuu (1 Cor. 10:13). Palit neʼe na wayuu ojuʼitinnakana naʼakajee na wawalayuukana. Eeshii süpüla waneepiain waya nümaa Jehová süka nükaalinjain na aʼyataashiikana nümüin.

12. ¿Kasa waaʼinrajatka suulia kaainjalain waya?

¹² Eesü suchuntaale waaʼin waaʼinrüin wanee kasa mojusü süka waleʼeruʼuin süchiki kaainjalaa (Sant. 1:14). Pia neʼe aneeküinjachika tü paaʼinrajatkat suchuntaapa paaʼin paaʼinrüin  wanee kasa mojusü. Wainma wayuu jülüjakana aaʼin isain nüchiki wanee wayuu nüchecherüin naaʼin suulia naaʼinrüin kasa mojusü. Alawaapejeʼe tia, eesü süpüla wachecherüin waaʼin. Süpüla wountuin tia, woʼuraaja waneepia nümüin Jehová, wakatala kaʼi süpüla wekirajaain wamüiwaʼa sünain tü Bibliakat, waneepia waya sünain tü outkajawaakat otta sünain aküjaa pütchi. Waaʼinmaale tia, katsüinjeerü waaʼin süpüla wekeraajüin wanüiki nümüin Jehová. Nükaalinjeena waya Jehová, nnojoleena nüpütüin waya wamüiwaʼa (Gal. 5:16).

13. ¿Jamüsü anaka maʼin nukuwaʼipa José wapüleerua?

¹³ Waneepieena waya nümaa Jehová jülüjale waaʼin tü waaʼinrajatkat süpülapünaa wooʼulakünüin aaʼin shiiʼiree waaʼinrüin kasa mojusü. Shia tü naaʼinrakat waneinnua wayuu aküjünakana achiki suluʼu tü Bibliakat. Müshii naya maʼaka waaʼin wayakana, naleʼeruʼusü süchiki kaainjalaa. Jamüshijaʼa José süpüleerua aaʼinchi nia tü nuʼwayuusekat Potifar shiiʼiree nüinkaain sümaa. Nütüjaatüjülia aaʼu tü naaʼinrajatkat. Müsü tü Bibliakat süchiki tü nümakat sümüin: «¿Jamataalainjachikalaka taya süpüla taaʼinrüinjatüin wane kasa eekai mojuin maʼi, wane kaainjalaa nuʼupalapünaa Maleiwakai?» (Gén. 39:8-10). Sükajee tia wayaawata aaʼulu nütüjaain aaʼu tü naaʼinrajatkat süpülapünaa nuuʼulakünüin aaʼin sutuma tü nuʼwayuusekat Potifar. Müsüjeseʼe niyoutuin nüinkaain sümaa.

14. ¿Kasa waaʼinrajatka suulia waaʼinrüin kasa mojusü?

¹⁴ ¿Kasa waaʼinrajatka süpüla washatüin nukuwaʼipa José otta süpüla waneepiain waya nümaa Jehová? Anasü jülüjale waaʼin tü waaʼinrajatkat süpülapünaa suuʼulakünüin waaʼin. Wayoutamaatüinjatü uwatuwoʼushi süpüshuaʼa tü kasa nülerajakat Jehová jee nnojotsü jülüjakuʼu müinjatüin shia waaʼin (Sal. 97:10; 119:165). Waaʼinrüle tia nnojoleena kaainjalain waya. Wooʼulakünapa aaʼin watüjaajeerü aaʼu tü waaʼinrajatkat.

15. ¿Kasa paaʼinrajatka süpüla jaʼyain paaʼu püchajaain maʼin nüchiki Jehová? (Hebreokana 11:6).

¹⁵ Eesüjaʼa piyaawatüle saaʼu shiimain tü pikirajaakalü anain namaa na Aküjaliikana pütchi jee piʼyataweein nümüin Jehová süka süpüshuaʼa paaʼin. ¿Eesüche wanee kasa ataʼülaka pukuwaʼipa suulia paapüin paaʼin nümüin Jehová jee woutiisain pia? Puchunta kaalinwaa nümüin Jehová maʼaka naaʼinrüin David chi aluwataashikai. Anuu nünüiki: «Maleiwakalee, pünaʼla sümüin süpüshuaʼa tü takuwaʼipakat otta piʼrajaa kasain suluʼuin taaʼin. Pünaʼlaa sümüin tü kasa shapaakalü atuma  taaʼin otta piyaawata saaʼu kamaʼa mojeerüle takuwaʼipa sutuma tü taainjakat otta puʼunira taya suluʼu tü wopu süpülajatka kaʼikat süpüshuaʼa» (Sal. 139:23, 24). Püchajaale maʼin sukuwaʼipa süpüla paapüin paaʼin nümüin Jehová jee woutiisain pia, jaʼyeerü paaʼu püchajaain maʼin nüchiki Jehová. Saashin tü Bibliakat anakuwaʼipaliijeena nutuma Jehová na aaʼinrakana tia (paashajeʼera Hebreokana 11:6).

AYATA PÜRÜTKAAIN NÜNAINMÜIN JEHOVÁ

16, 17. ¿Kasa naaʼinraka Jehová napüleerua na jimaʼalii jee na majayünnüü ekirajünakana sünain tü Bibliakat natuma na kachooinkana naya? (Juan 6:44).

¹⁶ Naashin Jesús nia Jehová arütkeʼeraka wanee wayuu naʼakamüin na wayuu aʼwaajakana nia (paashajeʼera Juan 6:44). Anataʼaleesüjaʼa maʼin tü nüküjakat Jesús. Niʼrüin Jehová tü kasa anasü eekat suluʼu naaʼin wanee wayuu nürütkeʼeraka naʼakamüin na wayuu aʼwaajakana nia. Müshijeseʼe nürütkeʼerüin pia nünainmüin. Kojutushii maʼin nümüin Jehová waneʼewai nakua na aʼyataashiikana nümüin (Deut. 7:6, noota).

¹⁷ Piale wanee jimaʼai jee piale wanee majayülü, nayale ekirajüin na kachooinkana pia sünain tü Bibliakat, eesüjaʼa jülüjale paaʼin nnojolin niain Jehová arütkeʼerüin pia nünainmüin. Anuupejeʼe tü sümakat tü Bibliakat: «Jürütkaa nünainmüin Maleiwa, nürütkaajeechika jünainmüin» (Sant. 4:8; 1 Crón. 28:9). Tü aküjüneekalü achiki sükajee tia pütchikat shia pürütkaale nünainmüin Jehová palajana arütkaajeechi nia pünainmüin. Napüshuaʼa na anoujashiikana nürütkeʼerala naya Jehová nünainmüin waneʼewai nakua. Jaʼitakajeʼe na jimaʼalii jee na majayünnüü ekirajünakana natuma na kachooinkana naya, nnojoishii yalashin neʼe nümüin Jehová. Nürütkaale palajana wanee wayuu nünainmüin Jehová arütkaajeechi nia nünainmüin maʼaka süküjain Santiago 4:8 (anasü paashajeʼerüle 2 Tesalónica 2:13).

18. ¿Kasa wekirajaainjatka anain sünain tü wane ekirajaayakat? (Salmo 40:8).

¹⁸ Woutiisapa Jesús nüküjain nümüin chi Nüshikai kettaain nia süpüla naaʼinrüin tü nuluwataakalü anain (paashajeʼera Salmo 40:8; Heb. 10:7). Püshateerü tü naaʼinrakat Jesús paapapa paaʼin nümüin Jehová jee woutiisapa pia. Sünain tü wane ekirajaayakat wekirajaajeerü süchiki tü paaʼinrajatkat süpüla ayatüin piʼyataain waneepia nümüin Jehová süchikijee woutiisain pia.