1. ¿Jamüsü waaʼin sutuma eein süpüla woʼuraajüin nümüin Jehová?

 ANASÜ nümüin chi Kakumalakai tü sirumatuʼukat jee tü Mmakat woʼuraajüle nümüin. Jaʼitashii jalain waya jee jaralüin tü anüikii waashajaakalü aka, eesü süpüla waküjain nümüin tü suluʼukat waaʼin. Naapeerü wanüiki chi Washi iipünaajachikai jaʼitashii woʼuraajüle suluʼu pitaat jee suluʼu kaatset. ¿Aashin kojutuin wamüin tü oʼuraajaakat?

2. ¿Jamüsü watüjaaka saaʼu kojutuin nümüin David nuʼuraajüin nümüin Jehová?

² Kojutusü maʼin nümüin David süka eein süpüla nuʼuraajüin nümüin Jehová. Müshi nia nümüin Jehová suluʼu wanee jayeechi nukumajaka: «Kasataalejeseʼe kamalain pümüin tanüiki toʼuraajapa maʼaka kamalain pümüin tü wunuʼu jemetakat eejuu aʼajünaka pümüin» (Sal. 141:1, 2). Nükalioʼu David, aʼajünapuʼusü wanee wunuʼu jemeta eejuu nümüin Jehová, nakumajachon tia palajana na sacerdotekana süpülapünaa naʼajüin shia (Éx. 30:34, 35). Wanaa sümaa «tü wunuʼu jemetakat eejuu aʼajünaka» nümüin David, shia nüküjeeka achiki nukumajüin palajana nünüiki süpülapünaa nuʼuraajüin nümüin chi Nüshi iipünaajachikai. Müshiʼiya wayakana, keeʼireesü waaʼin kamalainjatüin wanüiki nümüin Jehová woʼuraajapa nümüin.

3. (1) ¿Kasa jaʼyainjatka waaʼu woʼuraajapa nümüin Jehová? (2) ¿Jamüsü waaʼinrajatka tia?

³ Woʼuraajapa jaʼyainjatü waaʼu kojutuin wamüin Jehová. Jülüjataa waaʼin tü kasa niʼrakat Isaías, Ezequiel, Daniel otta Juan. Mayaainjeʼe naatayaa sümüin tü kasa neʼrakat, wanaawasü tü naküjakat süchiki niain Jehová wanee aluwataai pülashi maʼin. Jamüshijaʼa Isaías, niʼrüin Jehová joyotuin saaʼu wanee einasee chaa iipünaa (Is. 6:1-3). Otta Ezequiel niʼrüin joyotuin Jehová suluʼu neʼejena otta niʼrüin wanee kasüpolüin  nüʼütpünaa anaka maʼin ayolojo (Ezeq. 1:26-28). Jee niʼrüin Daniel kasuuin maʼin nüsheʼin «chi Laülaa Eetüjüikaʼaya nümaiwa» otta eejachire joyotuin nia chuwatüsü siki (Dan. 7:9, 10). Otta müshia Juan niʼrüin Jehová joyotuin saaʼu niinase sümaa niʼrüin «wane kaspolüin jorottüsü maʼi, müsü aka saaʼin tü kakuuna kanüliakat “esmeralda”» (Alat. Map. 4:2-4). Mayaainjeʼe pülashin maʼin Jehová nuuʼulaain waya süpüla woʼuraajüin nümüin. Kojutuinjachika nia wamüin waashajaapa nümaa. Anasü wekirajaale sünain kasain eein süpüla waashajaain achiki woʼuraajapa nümüin Jehová.

4. ¿Kasa watüjaka sünainjee tü palajatkat kasa wachuntajatka woʼuraajapa naashin Jesús? (Mateo 6:9, 10).

⁴ (Paashajeʼera Mateo 6:9, 10, TNM). Soʼunnaa chajachin Jesús namaa na nikirajüinkana saaʼu wanee namüna, nüküjain namüin jamüinjatüin nanüiki nachuntapa nümüin Maleiwa. Süchikijee «müinjatü jünüiki juʼuraajapa» nümüin Jesús, nüküjain tü palajanainjatkat wachuntuin, tü keeʼireetüjütkalia naaʼin Jehová. Tia shia kojutuinjachin nia sümüin wayuu, nuluwataainjachin süpüla najaʼttirüinjanain na nüʼünüükana otta saainjünüinjatüin tü keeʼireekat naaʼin yaa mmapaʼa otta süpüleerua wayuu. Wachuntule tia woʼuraajapa, jaʼyeerü waaʼu waaʼinmaain maʼin tü keeʼireekat naaʼin Jehová.

5. ¿Jamüsü watüjaaka saaʼu nnojoluin mojuin nümüin Jehová wachuntule waneirua kasa keeʼireeka waaʼin?

⁵ Sünain tü wane kasa wachuntajatkat woʼuraajapa naashin Jesús, watüjaa aaʼu nnojoluin mojuin wachuntule waneirua kasa keeʼireeka waaʼin. Eesü süpüla wachuntuin nümüin Jehová naapaiwa tü weküinjatkat, motoiwa naaʼin tü waainjalakat, naaʼinmajaiwa waya suulia suuʼulakünüin waaʼin otta naaʼinmajaiwa waya nuulia chi Yolujaakai (Mat. 6:11-13). Wachuntule tia, jaʼyeerü waaʼu choʼujaain wamüin Jehová otta talateein nia watuma.

6. ¿Kasa amaa eeka süpüla wachuntuin nümüin Maleiwa?

⁶ Nnojotsü keeʼireein naaʼin Jesús wanaawashaatainjatüin nanüiki na nikirajüinkana sümaa tü nikirajakalü anain süchiki tü oʼuraajaakat. Eesü nüküjawaire Jesús waneirua kasa shapaaka atuma naaʼin (Mat. 26:39, 42; Juan 17:1-26, TNM). Müshiʼiya wayakana, eesü süpüla waküjain nümüin Jehová süchiki  tü kasa shapaakalü atuma waaʼin. Jamüsüjaʼa waneeküinjatüle wanee kasa, eesü süpüla wachuntuin kekiwaa nümüin süpüla wayaawatüin saaʼu tü waaʼinrajatkat (Sal. 119:33, 34). Saapünüle wamüin wanee aʼyatawaa kapüleeka saaʼin wamüin, eesü süpüla wachuntuin nümüin Jehová kekiwaa süpüla watüjain süpüleerua (Prov. 2:6). Na wayuu kachonshiikana, eeshii süpüla nachuntuin naaʼu nachonnii, akaʼaya na tepichikana eeshii süpüla nachuntuin naaʼu na kachooinkana naya. Müshiʼiya wayakana, eeshii süpüla wachuntuin naaʼu na wekirajüinkana sünain tü Bibliakat otta naaʼu na wayuu waküjakana amüin pütchi. Nnojoliipejeʼe neʼe oʼuraajüin waya süpüla wachuntuin kaalinwaa nümüin Maleiwa.

7. ¿Jamüshi waʼwaajüinjachikai Jehová woʼuraajapa nümüin?

⁷ Wanee kasa waaʼinrajatka woʼuraajapa shia waʼwaajüinjachin Jehová. Nia neʼe nümüiwaʼa waʼwaajüinjachikai. Anuu nünüiki wanee wayuu ashajakai Salmo: «Anamia maʼin pia Jehová jee motusü paaʼin naainjala wanee wayuu». Anuu sooʼomüin nünüiki: «Maleiwakai Jehová, amüliajüi maʼin pia, anamia maʼin pia, matüjainsai pia jashichijawaa maalü, aipürai maʼin pia otta lotusü maʼin tü pukuwaʼipakat» (Sal. 86:5, 15). Wainma kasa waʼwaajüinjachikai aaʼujee Jehová, anasü maʼin nukuwaʼipa otta süpüshuaʼa tü kasa naaʼinrakat.

8. ¿Jeʼtsü waneirua kasa eeka süpüla waapüin analuʼut nümüin Jehová woʼuraajapa nümüin? (Salmo 104:12-15, 24).

⁸ Wane kasa waaʼinrajatka woʼuraajapa shia waapüinjatüin analuʼut nümüin Jehová saaʼujee tü kasa anashaatasü naapakat wamüin, maʼaka saaʼin tü süsiikalüirua wunuʼu, saaʼujee eein wainma eküülü jemetaka maʼin jee sutuma eein waʼaleewainyuu. Naapüin tia chi Washikai süka keeʼireein naaʼin talatüin waaʼin (paashajeʼera Salmo 104:12-15, 24). Otta müsia, waapüin maʼin analuʼut nümüin saaʼujee tü kasa naapakat wamüin süpüla katchinjatüin wanoula otta saaʼujee tü kasa anasü eejeetkat mapeena.

9. ¿Kasa waaʼinrajatka suulia motojuin waaʼin waapüin analuʼut nümüin Jehová? (1 Tesalónica 5:17, 18).

⁹ Eesü motowaire waaʼin waapüin analuʼut nümüin Jehová saaʼujee tü naaʼinrakat wapüleerua. ¿Kasa waaʼinrajatka suulia motojuin  shia waaʼin? Anasü washajüle tü kasa wachuntakat nümüin jee wanaʼlawai sümüin süpüla waapüin analuʼut nümüin saaʼujee nusoutuin wamüin (paashajeʼera 1 Tesalónica 5:17, 18). ¿Aashin talatüin waaʼin saapünüle analuʼut wamüin saaʼujee wanee kasa waaʼinraka? Müshia Jehová, talatüsü naaʼin waapüle analuʼut nümüin saaʼujee nusoutuin wamüin shiʼipajee tü wachuntakat nümüin (Col. 3:15). Eepejeʼe wane kasa waapüinjatka aaʼujee analuʼut nümüin Jehová. ¿Jarat shia?

10. ¿Jamüsü waapüinjatka analuʼut nümüin Jehová saaʼujee naapüin chi Nüchonkai waaʼu? (1 Pedro 2:21).

¹⁰ (Paashajeʼera 1 Pedro 2:21). Waapüinjatü analuʼut nümüin Jehová saaʼujee nuluwataain chi Nüchon aikai maʼin nüpüla süpüla nikirajüin waya. Wanaa sümaa wekirajaain süchiki nukuwaʼipa Jesús, wainma kasa watüjaka süchiki nukuwaʼipa Jehová jee tü waaʼinrajatkat süpüla talatüin nia wamaa. Wanoujale sünain naapajiraain nikii Cristo waaʼu, eeshii süpüla aleewain maʼin waya nümaa Jehová jee anajiraain waya nümaa (Roma 5:1).

11. ¿Jamüshii woʼuraajüinjanaka saaʼu nünülia Jesús?

¹¹ Waapüin analuʼut nümüin Jehová saaʼujee eein süpüla woʼuraajüin nümüin sükajee nünülia chi Nüchonkai. Naapüin Jehová wamüin tü wachuntakat nümüin nükajee Jesús. Anuu nünüiki Jesús: «Jaʼitasü kasain juchuntuin saaʼu tanülia, taainjeeriaʼaya süpüla kojutuinjachin atumawaa chi Tashikai tanainjee tayakai chi Nüchonkai» (Juan 14:13, 14, TNM).

12. ¿Jarat wanee kasa waapüinjatka aaʼujee analuʼut nümüin Jehová saaʼujee naapüin chi Nüchonkai waaʼu?

¹² Nülatirüin Jehová sooʼopünaa naaʼin waainjala sükajee naapajiraain nikii Jesús waaʼu. Saashin tü Bibliakat, nia Jesús «chi sacerdote müloʼushikai» jee joyotushi nia nikialuʼujee chi Maleiwa pülashikai (Heb. 8:1). Otta süküjain nuchuntuin Jesucristo wooʼopünaa nümüin chi Nüshikai (1 Juan 2:1). Talatüshii maʼin waya saaʼujee naapüin Jehová wamüin wanee sacerdote müloʼushikai amüliajakai waya, ayaawatakai saaʼu wakuwaʼipa otta achuntaka nümüin Maleiwa waaʼu (Roma 8:34; Heb. 4:15). Nnojoire naapajiraain nikii Jesús waaʼu, nnojoishiije süpüla woʼuraajüin nümüin Jehová, jama kaainjalain waya. Nnojotsü eein wanee kasa wawalaajüinjatka aaʼujee nümüin Jehová sünainjee naapüin nikii chi Nüchonkai waaʼu.

13. ¿Kasa naaʼinraka Jesús süka alin nüpüla na nikirajüinkana?

¹³ Wanee ai süpülapünaa nuʼutunüin naaʼin Jesús, kamaʼashi maʼin nia sünain oʼuraajaa naaʼu na nikirajüinkana. Nuchuntuin nümüin chi Nüshikai naaʼinmajüinjanain naya nuulia chi Yolujaakai (Juan 17:15). ¡Aitaʼaleeshiijaʼa maʼin naya nüpüla! Mayaainjeʼe niʼrüinjachin müliaa, ayatüshia achuntuin nia naaʼu na aluwataaushikana.

14. ¿Kasa waaʼinrajatka süpüla jaʼyain waaʼu alin wapüla na wawalayuukana?

¹⁴ Nnojoishii neʼe achuntajanain waya saaʼu tü kasa choʼujaakat wamüin, achuntajanaʼaya waya naaʼu na wawalayuukana maʼaka naaʼinrüin shia Jesús. Waaʼinrüle tia, jüüjüüshii waya sümüin tü nuluwataakalü anain waya Jesús sünain aijiraainjanain waya otta niʼreerü Jehová alin wapüla na wawalayuukana (Juan 13:34). Watüjaa aaʼu nnojoluin amülain wachuntule naaʼu na aʼyataashiikana nümüin Jehová. Saashin tü Bibliakat naapeerü «chi Maleiwakai nanüiki na wayuu anajiraakana nümaa» (Sant. 5:16).

15. ¿Jamüsü choʼujaaka wachuntuin naaʼu na wawalayuukana?

¹⁵ Süka wainmain tü kasa alatawaikat  namüin na wawalayuukana, choʼujaasü wachuntuin naaʼu. Eesü süpüla wachuntuin nümüin Jehová süpüla nüchecherüin naaʼin chi wawala eekai ayuulin, chi eʼrakai müliaa sutuma sukutkujaain mma jee shiale süsetüin wüin eere kepiain nia. Eesü süpüla wachuntuin naaʼu na wawalayuu kepiakana suluʼu mma eere eein kasachiki otta naaʼu na apüleeruaanakana aaʼin saaʼujee nanoujain. Eesü süpüla wachuntuin naaʼu na wawalayuu akaalinjakana na wawalayuu alatakana amüin kasa mojusü. Piʼraajüle wanee wawala eekai alatüin amüin tia, ¿eeshiche süpüla puchuntuin naaʼu? Wachuntule nümüin Jehová süpüla nükaalinjain na wawalayuukana soʼunnaa tü alatakat namüin, jaʼyeerü waaʼu alin naya wapüla.

16. ¿Jamüshii wachuntajanaka naaʼu na wawalayuu laülaakana wapüleerua?

¹⁶ Kojutusü namüin na wawalayuu laülaakana wapüleerua wachuntule naaʼu, shiimainña sütütüleʼerüin naaʼin. Kojutusü nümüin Pablo suchuntunuin naaʼu, anuu nünüiki: «Juchunta taaʼu tayakaʼiya süpüla nnojolinjachin mmolüin taya sünain aküjaa sümüin wayuu nüchiki chi Oʼtteʼerüikai» (Éf. 6:19). Maaʼulu yaa, wainma na wawalayuu aʼyataakana wapüleerua. Wachuntule nümüin Jehová süpüla anakuwaʼipalüin tü kasa naaʼinrakat, jaʼyeerü waaʼu alin naya wapüla.

17, 18. (1) ¿Kasa eeka süpüla suchuntunawalin wamüin? (2) ¿Kasa jülüjainjatka waaʼin waaʼinrapa tia?

¹⁷ Eesü suchuntunawaire wamüin woʼuraajüinjanain suʼupala wayuu. Eesüjaʼa suchuntule wanee wawala sümüin tü wawala sümaakat süpüla suchuntajatüin süpüleerua tü shikirajüinkat. Süka nnojoluin shiʼraajüin shia, eesüjaʼa süpüla süküjain eein süpüla suʼuraajüin sajaʼttapa tü ekirajawaakat. Mayaa, sütüjaweerü aaʼu tü wawala sümaakat tü eekat süpüla suchuntuin süpüleerua tü shikirajüinkat.

¹⁸ ¿Jama suchuntunule nümüin wanee wawala nuʼuraajüinjachin sünain tü outkajawaa süpülajatkat aküjaa pütchi jee shiale sünain tü outkajawaakat? Na oʼuraajüinjanakana naaʼu na wawalayuukana, jülüjainjatü naaʼin kasapülajatüin tia outkajawaakat. Nnojoishii oʼuraajüinjanain naya süpüla nachiaain na wawalayuukana jee shiale süpüla naküjain wanee kasa namüin. Süpüla tü outkajawaakat eʼitaanüsü jaʼrai minuuto süpüla shiiʼirajünüin tü jayeechikat  otta süpüla suchuntunuin naaʼu na wawalayuukana. Müsüjeseʼe palirüinjatüin nünüiki wanee wawala nuchuntapa naaʼu na wawalayuukana, shialeekajaʼa nuʼuraajüinjachire suʼttianainjee tü outkajawaakat (Mat. 6:7).

19. ¿Kasa waaʼinrajatka süpüla yapain waya süpüla tü kaʼi kasalajanainjatkalü oʼu saainjala wayuu nutuma Jehová?

¹⁹ Süka sülüʼülaain tü kaʼi kasalajanainjatkalü oʼu saainjala wayuu nutuma Jehová, choʼujaasü maʼin wamüin woʼuraajüin. Anuu nünüiki Jesús süchiki tia: «Anakaja müleka jülüjüle jaaʼin tü takaliakat waneepia, sümaa jüchuntüin nümüin Maleiwa süpüla süchechennajatüin jaaʼin sünain tü jünoulakat suʼunnaa tü kasa mojusü alateetkat» (Luc. 21:36). Woʼuraajüle weinshi, eejeerü waaʼin sünain tü wanoulakat otta yapeena waya süpüla tü nükaliakat Jehová.

20. ¿Kasa waaʼinrajatka süpüla kamalain nümüin Jehová tü wanüikikat sünain oʼuraajaa maʼaka kamalain nümüin tü wunuʼu jemetakat eejuu aʼajünaka nümüin?

²⁰ ¿Kasa wekirajaaitpaka anain sünain ekirajaayakat tüü? Wekirajaaitpa anain kojutuinjatüin wamüin eein süpüla woʼuraajüin nümüin Jehová. Tü alanaʼaleeinjatkat sünain wachuntuin nümüin Jehová shia tü keeʼireetüjütkalia naaʼin. Eeshii süpüla woʼuraajüin nümüin Jehová süpüla waapüin analuʼut nümüin naaʼu chi Nüchonkai otta saaʼu nuluwataainjachin niakai. Eeshii süpüla wachuntuin naaʼu na wawalayuukana otta eesü süpüla wachuntuin nümüin Jehová tü choʼujaakat wamüin otta tü choʼujaakat sümüin wanoula. Jülüjale waaʼin tü wanüikinjatkat sünain oʼuraajaa, jaʼyeerü waaʼu kojutuin wamüin waashajaain nümaa Jehová. Kamalainjeerü nümüin Jehová tü wanüikikat woʼuraajapa nümüin maʼaka kamalain nümüin tü wunuʼu jemetakat eejuu aʼajünaka nümüin (Prov. 15:8).