EKIRAJAAYA 20
JAYEECHI 67 Waküja maa tü pütchikat
¿Kasa waküjaka aaʼujee tü pütchi anakat maʼin?
«Aküjünüinjatü palajana sainküin mma tü pütchi anasükat» (MAR. 13:10).
TÜ WATÜJEETKAT
Aküjeena waya tü pütchi anakat maʼin süka süpüshuaʼa waaʼin kojutule wamüin tü pütchi waküjakat, aire wapüla wayuu otta Jehová.
1. ¿Kasa aküjünaka wamüin sünain tü outkajawaa aainjünawaikat juyawai soʼujatka 2023?
APANSAAJÜNÜSÜ waneirua pütchi sünain tü outkajawaa aainjünawaikat juyawai soʼujatka 2023. a Otta müsia aküjünüsü süchiki waneirua kasa anoutunaka sünain tü waʼyataainkat sünain aküjaa pütchi. Aküjünüsü wamüin eein süpüla naneeküin waneinnua wayuu naʼyataain nümüin Jehová wanaa wamaa süchikijee sajaʼttinnüin Babilonia tü kojutukalü atumawaa. Aküjünüsiaʼaya wamüin nnojoluitpain choʼujaain washajüin süpüshuaʼa tü sümaajatkat waʼyataain sünain aküjaa pütchi, waaʼinrajatü tia soʼujee nowienpüroʼu 1, 2023. Mayaainjeʼe müin tia ayatüinjatü waaʼinmaain tü aküjaakat pütchi.
2. ¿Jamüsü waaʼinmaainjatkaʼa tü aküjaakat pütchi maaʼutpünaa? (Marcos 13:10).
2 Waküjainjatü maʼin tü pütchi anakat maʼin süka sülüʼülüin süpüla sajaʼttinnüin tü kasa eekai mojuin. Jülüja waaʼin tü nümatüjütkalia Jesús süchiki tü aküjaakat pütchi suluʼu Marcos 13:10 (paashajeʼera). Suluʼu tü karaloʼutakat Mateo nüküjain Jesús süküjüneerüin sainküin mma tü pütchi anakat maʼin. «Kettaapa tia, anteerü sükalia süpüla sajaʼlajaainjatüin tü kasa alatakat sainküin mma» (Mat. 24:14). Tü ajaʼttinneetkat shia tü kasa nuluwataakalü aaʼu Satanás. Nüneeküitpa Jehová tü kaʼi jee tü oora naaʼinrajatkalü oʼu tia (Mat. 24:36; 25:13; Aluw. 1:7). Alüʼütsü maʼin sükalia tia (Roma 13:11). Ayataʼaya waaʼinmaain tü aküjaakat pütchi sümaʼainruʼu waʼatapajüin süntüin kaʼikat tia.
3. ¿Kasa waküjaka aaʼujee tü pütchi anakat maʼin?
3 Anuu wanee pütchi jülüjainjatka waaʼin wapüshuaʼa: ¿Kasa waküjaka aaʼujee tü pütchi anakat maʼin? Waaʼinrüin tia süka kojutuin wamüin tü pütchi waküjakat, alin wapüla wayuu, alin wapüla Jehová otta keeʼireein waaʼin kojutuin nia atumawaa. Wekirajaa sünain tia.
KOJUTUSÜ WAMÜIN TÜ PÜTCHI WAKÜJAKAT
4. ¿Jamüsü waaʼin süküjünapa wamüin wanee pütchi anasü?
4 Talatakajasaʼa paaʼin süküjünapa pümüin wanee pütchi anasü, maʼaka saaʼin jemeyulüinjatüin wanee püpüshi jee saapünüinjatüle pümüin wanee aʼyatawaa walaaka. ¿Aashin püküjeein tia namüin na waneinnua? Müsia neʼe waaʼin watüjaapa saaʼu nuluwataainjachin Maleiwa mapeena, waküjeein maʼin sümüin wayuu süchiki tia pütchi anakat maʼin.
5. ¿Jamüsü paaʼin pütüjaapa saaʼu tü sümakat tü Bibliakat? (Piirakaa sümüin tü ayaakuaakat).
5 ¿Jamüsü paaʼin pütüjaapa saaʼu tü sümakat tü Bibliakat? Talatakajasaʼa paaʼin pütüjaapa saaʼu alin pia nüpüla chi Washi iipünaajachikai, anain nümüin pürütkaale nanainmüin na wayuu aʼwaajakana nia jee pütüjaapa saaʼu najaʼttireerüin tü kasa müliakalü atuma saaʼin wayuu. Talatüsü paaʼin pütüjaapa saaʼu piʼreenain suluʼu tü Paʼaraiisükat na püpüshi outuinnapakana (Mar. 10:29, 30; Juan 5:28, 29; Roma 8:38, 39; Apoc. 21:3, 4). Sütanalüin paaʼin pütüjaapa saaʼu tia pütchikat (Luc. 24:32). Kojutusü maʼin shia pümüin otta püküjeein shia sümüin wayuu (anasü paashajeʼerüle Jeremías 20:9).
Watüjaapa saaʼu tü sümakat tü Bibliakat waküjeein maʼin shia sümüin wayuu süpüshuaʼa. (Paashajeʼera tü pütchikat 5).
6. ¿Kasa pütüjaka sünainjee nukuwaʼipa Ernest sümaa Rose?
6 Jülüja waaʼin nukuwaʼipa wanee wawala Ernest nünülia, b poloo nuuyase wanaa sümaa nünaajaain chi nüshikai. Anuu nünüiki: «‹¿Chashiche chi tashikai nümaa Maleiwa? ¿Jalataapa nia?›, maʼwaishi taya suluʼu taaʼin. Mojuwaisü taaʼin teʼrapa talatüin naaʼin na wane tepichikana namaa nashi». Oʼunawaishi nia eere niʼitaanüin chi nüshikai. Müshi nuʼuraajapa sümaa nüsapainkain: «Maleiwa püküja maa tamüin jalain tashi». Sülatapa 17 juya süchikijee outuin chi nüshikai ekirajünüshi Ernest sünain tü Bibliakat. Talatüsü naaʼin nütüjaapa saaʼu nasoʼiraajeenain aaʼin na outushiikana otta nnojoluin kasain natüjaain saaʼu, müin natunkakai aaʼin (Ecl. 9:5, 10; Aluw. 24:15). Anasü naaʼin Ernest süka nütüjaaitpain saaʼu tü nütüjaweetüjütkalia aaʼu. Rose sünülia nuʼwayuuse, ekirajaasü shia sünain tü Bibliakat. Kojutusü namüin tü nekirajaakalü anain. Woutiisashii naya soʼu 1978. Naküjain tü pütchi anakat maʼin namüin naʼaleewainyuu, napüshi otta sümüin wayuu. Naaʼinrüin tia sümaa talatüin naaʼin. Alatüshii suulia 70 wayuu nakaalinjaka süpüla woutiisain naya.
7. ¿Kasa waainjeeka amüin sütanalapa waaʼin tü pütchi wekirajaakalü anain suluʼujee tü Bibliakat? (Lucas 6:45).
7 Sütanalapa waaʼin tü pütchi wekirajaakalü anain suluʼujee tü Bibliakat waküjeein maʼin shia namüin na waneinnua (paashajeʼera Lucas 6:45). Müsü waaʼin maʼaka naaʼin na nikirajüinkana Jesús wanaa sümaa namüin mayaa: «Eekajasaʼa wayakana nnojoliireejaʼa süpüla wooʼulaainjanain suulia aashajawaa süchiki tü kasa weʼrakat otta tü waapakalü achiki» (Aluw. 4:20). Süka kojutuin wamüin tü pütchi waküjakat wachajaain maʼin sukuwaʼipa süpüla waküjain shia sümüin wayuu eekai eein.
AISÜ WAPÜLA WAYUU
8. ¿Jamüsü kachiiruakaʼa waaʼin waküjain tü pütchi anakat maʼin sümüin wayuu eekai eein? (Paashajeʼera tü pütchikat « Ai wapüla wayuu: wekiraja wayuu»; piirakaa sümüin tü ayaakuaakat).
8 Aishii wapüla na wayuukana maʼaka alin naya nüpüla Jehová otta Jesús (Prov. 8:31; Juan 3:16). Amülialaasü waaʼin naalin süka nnojoluin kasain naʼatapajüin, jama nnojolin neʼraajüin chi Maleiwakai (Éf. 2:12). Müshii wüinsireekai aaʼin naya sutuma tü kasa shapaakalü atuma naaʼin, shiasaʼa waküjapa namüin tü pütchi anakat maʼin süchiki nuluwataainjachin Maleiwa müsü wojutakai saaʼin namüin wanee chaleco salvavidas süpüla noʼttaainjanain. Süka alin naya wapüla jee sümülialaain waaʼin naalin wachajaain sukuwaʼipa süpüla wekirajüin naya sünain tü sümakat tü Bibliakat. Natüjaapa saaʼu tü sümakat tü Bibliakat, eesü süpüla naʼatapajüin tü kasa anasü eejeetkat mapeena, aneerü nakuwaʼipa maaʼulu otta achecheraajeena naya süchiirua «katüinjatüin noʼu nutuma Maleiwa» (1 Tim. 6:19).
Süka alin wapüla na wayuukana otta sümülialaain waaʼin naalin wachajaain maʼin sukuwaʼipa süpüla waküjain namüin tü pütchi anakat maʼin. (Paashajeʼera tü pütchikat 8).
9. (1) ¿Kasa waapiraka anain na wayuukana? (2) ¿Jamüsü waaʼinrakaʼa tia? (Ezequiel 33:7, 8).
9 Süka alin wapüla na wayuukana waapirüin naya süchiki sajaʼttinnüinjatüin tü kasa mojusükat (paashajeʼera Ezequiel 33:7, 8). Amülialaasü waaʼin naalin na wayuu kepiakana pejepünaa wanain otta naalin na wapüshi manoujainkana. Nnojotsü eejüin naaʼin süpüla tü alatajatkat. Müsü sünüiki Mateo 24:21: «Eʼreerü maʼin wayuu müliaa. Nnojotsü eeirüin wanee müliaa makalü aka saaʼin tia soʼujee sukumajünüin wayuu sünainmüinreʼeya maaʼutpünaa otta nnojoleerü eein süchikuaʼa wanee müliaa makalü aka saaʼin tia». Waküjeein namüin süchiki sajaʼttinnüinjatüin soʼu Armagedón süpüshuaʼa tü iküleesia ekirajakalü alawaa otta tü kasa nuluwataakalü aaʼu Satanás (Apoc. 16:14, 16; 17:16, 17; 19:11, 19, 20). Kasataalejeseʼe naapaain amaa tü pütchi wamakat namüin otta naʼwaajaiwa Maleiwa wanaa wamaa. ¿Jameetka nakuwaʼipa na wayuu nnojoliikana jaa namüin sümüin tü pütchi waapirakalü anain naya jaʼitainna wapüshin naya?
10. ¿Jamüsü wachajaainjatkaʼa maʼin sukuwaʼipa süpüla waapirüin na wayuukana maaʼutpünaa?
10 Wekirajaaitpa anain sünain ekirajaaya 19 eeshiijaʼa nuʼtteʼerüle Jehová na wayuu aʼwanajaakana akuwaʼipa sutuma neʼrüin sajaʼttinnüin Babilonia tü kojutukalü atumawaa. Müsüjeseʼe wachajaainjatüin maʼin sukuwaʼipa süpüla waapirüin na wayuukana. Waapirüle naya süchiki tü alatüinjatkat eesüjaʼa süpüla sotuin naaʼin tü wamakat namüin neʼrapa shikeraajüin tia (anasü paashajeʼerüle Ezequiel 33:33). Sotule naaʼin tia arütkaweena naya nünainmüin Jehová süpüla naʼwaajüin nia wanaa wamaa. Jülüja waaʼin nukuwaʼipa chi kaatsetpüʼü chajachikai Filipos. Naapaain amaa tü anoujaakat süchikijee sukutkujaʼalaa sümüin tü mmakat. Eeshiijaʼa eejeenale waneinnua wayuu aapaajeenakana amaa tü anoujaakat neʼrapa sajaʼttinnüin Babilonia tü kojutukalü atumawaa (Aluw. 16:25-34).
AISHI WAPÜLA JEHOVÁ OTTA WEʼREEIN KOJUTUIN NIA ATUMAWAA
11. (1) ¿Kasa waaʼinraka süpüla waʼwaajüin Maleiwa otta kojutuin nia watuma? (Apocalipsis 4:11). (2) ¿Kasa waaʼinraka süpüla müin waapakai saaʼin watchin nümüin Jehová? (Piirakaa sümüin tü ayaakuaakat).
11 Tü waküjakat maʼin aaʼujee pütchi shia süka alin wapüla Jehová otta süka weʼreein kojutuin nia atumawaa. Waʼwaajüin chi Maleiwa aikai wapüla waküjapa tü pütchi anakat maʼin (paashajeʼera Apocalipsis 4:11). Niainjachi Jehová aʼwaajünaka, niainjachi kojutuka atumawaa otta niainjachi pülaka maʼin. Waʼwaajüin Jehová jee kojutushi nia watuma waküjapa namüin na waneinnua niain kakumalain kasa süpüshuaʼa otta katüin woʼu nünainjee. Waaʼinrüin tia wakatarüle kaʼi süpüla waküjain pütchi otta waapüle tü kasa wamaʼanakat, müsü waapakai saaʼin watchin nümüin Jehová sükajee tia (Mat. 6:33; Luc. 13:24; Col. 3:23). Kamalainsü maʼin wamüin waashajaain nüchiki chi Maleiwa aikai wapüla otta müsia waküjeein sümüin wayuu kasaichin nünülia, jamaluʼuluin nünülia otta kojutuinjachin nia atumawaa.
Müsü waapakai saaʼin watchin nümüin Jehová wakatarüle kaʼi jee waapüle tü kasa wamaʼanakat süpüla waküjain tü pütchi anakat maʼin wanaapünaa sümaa wakuwaʼipa. (Paashajeʼera tü pütchikat 11).
12. ¿Kasa waaʼinraka süpüla kojutuin atumawaa Jehová?
12 Süka alin wapüla Jehová wachajaain maʼin sukuwaʼipa süpüla kojutuin nia atumawaa (Mat. 6:9). Waküjeein namüin na waneinnua alawaain tü nüküjakat Satanás nüchiki Jehová (Gén. 3:1-5; Job 2:4; Juan 8:44). Waküjapa pütchi, asoutushii waya naaʼu chi Wamaleiwasekai süpüla waküjain tü shiimainkat nüchiki. Waküjeein namüin na waneinnua aipüralin maʼin Jehová, lotuin nukuwaʼipa sünain aluwatawaa, najaʼttireerüin tü müliaakat, naapeerüin jimataa aaʼin sümüin wayuu otta talataa aaʼin nuluwataapeena waaʼu (Sal. 37:10, 11, 29; 1 Juan 4:8). Wasoutapa naaʼu Jehová kojutushi nia watuma otta kojutusü wamüin süka nünüliamaajanain waya.
13. ¿Jamüsü kojutukaʼa maʼin wamüin nüneekajalain waya Jehová süpüla nünüliamaainjanain waya? (Isaías 43:10-12).
13 Nüneekajala waya Jehová süpüla waküjaliin pütchi nüchiki (paashajeʼera Isaías 43:10-12). Anuu wanee pütchi kakaliaitka nashajüin na Laülaashii Jülüjakana Aaʼin na Aküjaliikana pütchi: «Kojutusü maʼin wamüin nüneekajalain waya Jehová süpüla nünüliamaainjanain waya». c Jamüshijaʼa püliʼrajünüle saaʼu wanee kasa, püchajaweechi nüchiki wanee wayuu asouteechikai paaʼu süpüla nüküjain alawaain tü aküjünakat püchiki. ¿Aashin püneekeechin wanee wayuu piʼraajakai akuwaʼipa, kaawainkai anüiki otta kojutukai atumawaa? Sükajee tia wayaawata aaʼu jamüin nüneekaka waya Jehová süpüla nünüliamaainjanain waya. Niʼraajüin wakuwaʼipa otta nütüjaa aaʼu wounteerüin waküjain namüin na waneinnua niain chi Maleiwa shiimainshikai. Süka kojutuin maʼin wamüin nüneekajalain waya Jehová süpüla nünüliamaainjanain waya, wachajaainjatü maʼin sukuwaʼipa süpüla shiʼraajüinjatüin wayuu nünülia, kojutuinjachin nia sutuma otta sütüjaainjatüin aaʼu alawaain tü aküjünakat nüchiki (Sal. 83:18; Roma 10:13-15).
WAKÜJA PÜTCHI WANEʼEREEYA SAJAʼTTÜIN TÜ KASA EEKAI MOJUIN
14. ¿Kasa alatüinjatka mapeena?
14 Anasü maʼin tü kasa alatüinjatkat mapeena. Kasataalejeseʼe wainmain na wayuu aapaakana sümaa tü anoujaakat nnojoluiwaʼaya süntüin tü kaʼi shiʼreetkat maʼin oʼu wayuu müliaa. Talatüsü maʼin waaʼin süka eejeenain waneinnua wayuu ooʼulaajeenakana suulia naaʼinrüin tü kasa mojusü naaʼinrakat Satanás otta süka naʼwaajeenain Jehová wanaa wamaa soʼu kaʼikat tia (Aluw. 13:48).
15, 16. (1) ¿Kasa ayatüinjatka waaʼinrüin? (2) ¿Joujeena wojoʼlooka suulia aküjaa pütchi?
15 Ayataʼaya waaʼinmaain tü aküjaakat pütchi sümaʼainruʼu waʼatapajüin süntüin tia kaʼikat. Waküja namüin na waneinnua süchiki nuluwataainjachin Maleiwa saaʼu tü mmakat mapeena otta sülüʼülüin maʼin tü kaʼi sajaʼttinnüinjatkalü oʼu tü kasa mojusükat. Süntapeena nükalia Maleiwa nayaawateerü aaʼu na wayuukana shiimain nümaʼanajeejatüin Jehová tü pütchi waküjakat namüin (Ezeq. 38:23).
16 Ayataʼaya waküjain tü pütchi anakat maʼin, jama kojutuin wamüin tü pütchi waküjakat, alin wapüla wayuu, alin wapüla Jehová otta süka keeʼireein waaʼin kojutuin nia atumawaa. Ayataʼaya waaʼinrüin tia waneʼereeya «kettaasü yaapünaa» nümapa Jehová wamüin.
JAYEECHI 54 «Shiaʼaya wopukot tüü»
a Aainjünüsü tü outkajawaa aainjünawaikat juyawai oʼutuupüroʼu 7 soʼu 2023. Aainjünüsü suluʼu Piichi Noutkajaale na Aküjaliikana Pütchi nüchiki Jehová süpülajatka outkajawaa miyoʼu tü chakat Newburgh, Nueva York (Estados Unidos). Eʼitaanüsü tia programakat suluʼu JW Broadcasting. Piamasü shiʼipapaʼa, tü palajatkat weʼrajüin shia nowienpüroʼu soʼu 2023 otta tü wane weʼrajüin shia eneeroʼu soʼu 2024.
b Paashajeʼera tü pütchikat «La Biblia les cambió la vida: Me impresionaron las respuestas claras y lógicas de la Biblia» ojuʼitaka suluʼu Aapiria Wayuu peʼureeroʼu 1 soʼu 2015 (alijunaikiruʼusü).
c Paashajeʼera tü karaloʼutakat Anuario de los testigos de Jehová 2007 süpana 3 (alijunaikiruʼusü).
