1. Süchikijee kaainjalain Adán sümaa Eva, ¿kasa nüküjaka Jeʼwaa nüchiki chi waʼünüükai?

NÜTÜJAA aaʼulu Adán nnojoluin süpüla saashajaain wanee wüi. Wanaa sümaa saashajaain wanee wüi sümaa Eva, eesüjaʼa jülüjale naaʼin Adán niain wanee meʼrujusai chi aashajaakai sümaa (Gén. 3:1-6). Nnojotpejeʼe nütüjain aaʼu Adán sümaa Eva jaralin chia meʼrujusaikai. Mayaapejeʼe müin tia, oonooshi Adán nümaa chia eʼrüikai wayumüin jee nnojoishi nia oonooin nümaa chi Nüshi aipüraikai maʼin (1 Tim. 2:14). Süchikijeechon tia, nüküjain Jeʼwaa süchiki nukuwaʼipa chi nüʼünüü emeejakai Adán sümaa Eva otta müsia nüküjaleʼeinya Jeʼwaa najaʼttirajachin nia. Nüküjain Jeʼwaʼaya mülieenain na aikana apüla nia nutuma chia meʼrujusaikai (Gén. 3:15, TNM).

2, 3. ¿Jamüsü nnojotka wainmain kasa nüshajiraka Jeʼwaa nüchiki Satanaa otta süchiki tü kasa naaʼinrakat süpülapünaa nüntüin chi Mesíaskai?

² Nnojotsü nüküjain Jeʼwaa wamüin nünülia chi aapiee eʼrüijaakai wayumüin nümüin. * Sülatapa 2.500 juya süchikijee neʼrüliijaain  wayumüin Adán sümaa Eva chaa Edén, nüküjain Jeʼwaa jaralin chi shikiishikai tü eʼraakat wayumüin (Job 1:6). Satanaa münüshi chia aapiee eʼrüikai wayumüin süka «nüʼünüüin» nia Maleiwa. Ashajünüsü tü pütchikat Satanaa suluʼu apünüinsü neʼe karaloʼuta Ashajuushika süka Hebreo: 1 Crónicas, Job otta Zacarías. ¿Jamüsüche nnojotka nüküjain maʼin Jeʼwaa nüchiki chi nüʼünüükai süpülapünaa nüntüin chi Mesíaskai?

³ Suluʼu tü karaloʼuta Ashajuushikat süka Hebreo nnojotsü wainmain kasa nüshajiraka Jeʼwaa nüchiki Satanaa otta süchiki tü kasa naaʼinrakat. Nüshajirüin Jeʼwaa tia karaloʼutakat süpüla niyaawatünüin aaʼu chi Mesíaskai otta süpüla noushikajaain na wayuukana süchiirua nukuwaʼipa (Luc. 24:44; Gal. 3:24). Shiasaʼa nüntapa chi Mesíaskai, nüküjain Jeʼwaa wainma kasa nnojotka watüjaain aaʼu paala nüchiki Satanaa jee nachiki na aapiee nümaajanakana. Nüküjain tia Jeʼwaa nükajee chi Mesíaskai jee nakajee na nikirajüinkana. * Lotusü sukuwaʼipa tia nutuma Jeʼwaa süka niain Jesuu jee na anoujashiikana chainjanakana chaa iipünaa nüneekaka süpüla najaʼlajeʼerüin Satanaa jee na nümaajanakana (Roma 16:20, TNM; Alat. Map. 17:14; 20:10).

4. ¿Jamüshii nnojoluinjanaka mmoluin maʼin waya neema Satanaa?

⁴ Naashin chi aluwataaushikai Pedro, Satanaa müshi aka naaʼin wanee wasashi jashichikai maʼin otta naashin Juan, müshi aka naaʼin wanee «kayuushi» otta wanee «wüi» (1 Ped. 5:8, TNM; Alat. Map. 12:9). Sutuma müin nukuwaʼipa Satanaa, ¿mmoluinjanache maʼin waya neema? Nnojo. Nnojoishi waya mmoluinjanain neema süka nnojoluin pülain maʼin nia maʼaka naaʼin Maleiwa (paashajeʼera Santiago 4:7). Naaʼinmajüin waya Jeʼwaa, Jesuu otta na aapiee waneepiakana nümaa Jeʼwaa. Sutuma nakaaliinjain waya eeshii süpüla eejiraain waya sümaa tü kasa nuuʼulakakalü akajee waaʼin Satanaa. Choʼujaapejeʼe wasoutuin shiʼipajee apünüinsü asakiraa: ¿Pülashiche maʼin Satanaa? ¿Jamüsü shimeejia wayuu nutuma? ¿Kasa wayu isaka nüchiki chi Yolujaakai? Wekirajaa sünain tia süpüla watüjaain saaʼu tü waaʼinrajatkat.

5, 6. ¿Jamüsü isaka nachiki na sülaülashiikana mma nanouteʼerüin sukuwaʼipa tü mmapaʼakat?

⁵ Watta naalii na aapiee wanaawakana aaʼin nümaa Satanaa. Süpülapünaa tü Juya miyoʼukat maʼin nimeejüin waneinnua aapiee süpüla namaʼüjiraain nakuwaʼipa sümaa jieyuu. Saashin tü Wiwüliakat, müshi nia maʼaka naaʼin wanee kayuushi, nipitüin süseʼeruʼuweematapünaa tü jolotsükalüirua chajee iipünaajee süka nüsi (Gén. 6:1-4, TNM; Jud. 6; Alat. Map. 12:3, 4, TNM). Soʼu neʼrüliijaain wayumüin naya aapieekana, naneeküin Satanaa süpüla niain laülaain naaʼu. Nnojotpejeʼe jülüjainjatüin waaʼin katataawain naya sünain aaʼinraa kasa, süka jamüin, nukumajüin Satanaa sukuwaʼipa tü nuluwataayakat süpüla meematüinjatüin aka saaʼin Nuluwataaya Maleiwa. Nia shikiipüʼüjanakana  tia aluwataayakat otta aluwataasü nutuma tü yolujaakalüirua sainküin mmakat sümaa naapüin laülawaa namüin (Éf. 6:12).

⁶ Sükajee tü nuluwataayakat Satanaa naainjirüin na sülaülashiikana mma tü keeʼireekat naaʼin. Watüjaa aaʼu tia sutuma tü nümakat nümüin Jesuu wanaa sümaa niiʼiyatüin nümüin tü suumainkalüirua wayuu sümaa tü suwashirüinkat sünain nümüin nümüin: «Tü mmakat süpüshua, aapünüsü tamüin süpüla tasülajüinjatüin shia nümüin chi wayuu eekai tacheküin süpüleerua» (Luc. 4:5, 6). Mayaapejeʼe müin tia, eeshii na sülaülashiikana mma aaʼinraka kasa anasü napüleerua na naluwataakana aaʼu otta eeshii eekai nakaaliinjeein na wayuukana. Nnojoipejeʼe eein wanee sülaülashi mma eekai nüinküin nunouteʼerüin sukuwaʼipa tü mmapaʼakat (Sal. 146:3, 4; Alat. Map. 12:12).

7. ¿Jamüsü shimeejia wayuu nutuma Satanaa sükajee tü iküleesia nnojotkat shiimain jee sükajee sukuwaʼipa oikawaa jee ayaʼlajaa kasa? (Piirakaa sümüin tü ayaakuaa suluʼukat süpana 15).

⁷ Nnojotsü neʼe emeejünüin wayuu sainküin mma nutuma Satanaa otta tü yolujaakalüirua nakajee na sülaülashiikana mma. Emeejünüsü natumaya sükajee tü iküleesia nnojotkat shiimain otta sükajee sukuwaʼipa oikawaa jee ayaʼlajaa kasa (Alat. Map. 12:9). Sükajee tü iküleesia nnojotkat shiimain, aküjashi maʼin naʼalain Satanaa nüchiki Jeʼwaa otta nüchajaain sukuwaʼipa süpüla nnojoluinjatüin sotuin aaʼinyüü tü nünüliakat Maleiwa (Jer. 23:26, 27). Shiasaʼa sutuma tia, watta naalii na wayuu aʼwaajayaakana Maleiwa naaʼinruʼu, shiakajasaʼa neʼe naʼwaajüin tü yolujaakalüirua (1 Cor. 10:20; 2 Cor. 11:13-15). Nimeejüin wayuu Satanaa sükajee sukuwaʼipa oikaa jee ayaʼlajaa kasa. Jamüshijaʼa nia, nunoujirüin wayuu sünain talateerüin maʼin naaʼin washirüle naya otta wainmale kasa namaʼana (Prov. 18:11). Na wayuu anoujakana tia alawaakat, shia kachiiruaka naaʼin tü washirüükat suulialeʼeya aʼyatawaa nümüin Jeʼwaa (Mat. 6:24). Eemiajaajeerü tü naalinkat Maleiwa napüla süka shiain jülüjain maʼin naaʼin kamaʼanaa wainma korolo (Mat. 13:22; 1 Juan 2:15, 16).

8, 9. (1) ¿Jarat tü piamasükat kasa watüjaka sünainjee tü naaʼinrakalü Adán, Eva otta na aapiee eʼrüliikana wayumüin? (2) ¿Jamüsü anaka watüjaale saaʼu tü nuluwataakalü aaʼu Satanaa?

⁸ Waashajaa jooluʼu süchiki piamasü kasa watüjaka sünainjee tü naaʼinrakalü Adán, Eva otta na aapiee eʼrüliikana wayumüin. Tü palajatkat kasa watüjaka shia waneeshinjachin neʼe chi kamaakai waya, niale Jeʼwaa jee niale chi Yolujaakai (Mat. 7:13). Tü wane kasa watüjakat shia nnojoluin wainmain tü kasa neʼrakat na wayuu aneekakana nümawaa Satanaa. Jamüshijaʼa Adán sümaa Eva, naneeküin neʼe tü anakat jee tü mojukat süpüla naaʼinrüin. Jee müsia tü yolujaakalüirua, nnojotsü aluwataaleein shiairua naaʼu na sülaülashiikana mma (Gén. 3:22). Mojusü waneepia tü kasa niʼrakat chi eekai nüneeküin nümawaa Satanaa jee nnojoleechi eʼrüin kasa anasü sünainjee tia (Job 21:7-17; Gal. 6:7, 8, TNM).

⁹ ¿Jamüsü anaka watüjaale saaʼu tü nuluwataakalü aaʼu Satanaa? Sükaaliinjain waya tia süpüla pansaain tü jülüjakat waaʼin nachiki na sülaülashiikana mma jee atütülaasü waaʼin sutuma süpüla waküjain tü pütchi anasükat. Watüjaa aaʼu keeʼireein naaʼin Jeʼwaa kojutuin wamüin na sülaülashiikana mma (1 Ped. 2:17). Naashin Jeʼwaa, oonooinjana waya sümaa tü naluwataakalü anain waya nnojorüle shia mojushiin  noʼuluʼu (Roma 13:1-4). Nnojoliinjanapajaʼa waya sünainpünaain poliitika jee nnojoishii waya nümaainjanain wanee poliitiko (Juan 17:15, 16; 18:36). Nüchajaain sukuwaʼipa Satanaa süpüla nnojoluinjatüin jaralüin sotuin aaʼin nünülia Jeʼwaa otta aküjashi nia alawaa nüchiki, sutuma watüjaain saaʼu tia, wachajaain maʼin sukuwaʼipa süpüla waküjain sümüin wayuu tü shiimainkat nüchiki chi Wamaleiwasekai. Talatüshii maʼin waya süka weʼnnaajünüin süka nünülia Maleiwa otta watüjaa aaʼu anaʼleejeerüin wakuwaʼipa aire wapüla nia suulialeʼeya kachiiruain waaʼin washirüü jee kamaʼanaa wainma korolo (Isa. 43:10; 1 Tim. 6:6-10).

10-12. (1) ¿Kasa nimeejaka akajee Satanaa waneinnua aapiee? (2) ¿Kasa watüjaka sünainjee tü alatakat namüin naya aapieekana?

¹⁰ Wainma sukuwaʼipa nutuma Satanaa süpüla naainjirüin wayuu tü keeʼireekat naaʼin. Eesü nimeejüle wayuu sükajee wanee kasa jee nüpüleeruale saaʼin.

¹¹ Wekirajaa sünain tü palajatkat. Wainma na aapiee nimeejakana Satanaa. Kakaliakajasaʼa nia sünain jülüjain naaʼin nakuwaʼipa naya aapieekana süpüla nimeejüin naya jee süpüla nümaainjanain naya. Eeshii na aapiee oonookana nümaa otta amaʼüjiraashii naya nakuwaʼipa sümaa tü jieyuukalüirua. Miyoʼusenuu nachonnii sümaa mojulaain maʼin naya (Gén. 6:1-4). Nnojotpejeʼe shiain nimeejüin neʼe akajee Satanaa tia na aapieekana, eesüjaʼa nümüle namüin naluwataainjanain naaʼu na wayuukana. Eesüjaʼa shiale keeʼireein naaʼin Satanaa nnojoluinjatüin shikeraajüin tü nümakat Jeʼwaa nüchiki «suuʼuliwoʼu tü jietkat» (Gén. 3:15). Nnojotpejeʼe nuulain Jeʼwaa sülatüin tia, müsüjeseʼe niʼitirüin tü Juya miyoʼukat maʼin süpüla sümalajaainjatüin tü naaʼinreekalü amüin Satanaa otta tü yolujaakalüirua.

¹² ¿Kasa watüjaka sünainjee tia? Sünain nimeejüin wayuu Satanaa sükajee tü amaʼüjirawaakalü akuwaʼipa jee sükajee tü aʼwaatawaakat suluʼu akuwaʼipa. Jamüshijaʼa na aapiee oonookana nümaa Satanaa, kakalia maʼin naya aʼyataain nümüin Maleiwa chaa iipünaa. Mayaapejeʼe müin tia nooʼulaain sukumajaain suluʼu naaʼin kasa mojusü. Soteesü waaʼin waneepia eein süpüla sukumajaain tü kasa mojusükat suluʼu waaʼin jaʼitainna kakaliainnain waya sünain aʼyatawaa nümüin Jeʼwaa (1 Cor. 10:12). Choʼujaasü jülüjawalin waaʼin tü suluʼukat waaʼin süpüla wasünneʼerüin tü kasa mojusü eekat suluʼu otta tü  yaletaakalü aaʼin (Gal. 5:26; paashajeʼera Colosas 3:5).

13. (1) ¿Jarat tü wanee kasa nimeejakalü aka waya Satanaa? (2) ¿Kasa waaʼinrüinjatka süpüla nnojoluin nimeejüin waya Satanaa sükajee tia?

¹³ Wanee kasa nimeejaka aka wayuu Satanaa shia sükajee tü sünainpünaakat yolujaa. Nüchajaain maʼin sukuwaʼipa süpüla kamalainjatüin sümüin wayuu tü sünainpünaakat yolujaa, nnojotpejeʼe naaʼinrüin neʼe tia sükajee tü iküleesia nnojotkat shiimain, naaʼinrüin tia sükajee muusika, peliikula, videojuegos otta waneirua ashaitaa eeka maaʼulu. Keeʼireesü naaʼin Satanaa anajüin sümüin wayuu tü sünainpünaakat yolujaa. ¿Kasaka waaʼinrüinjatüin süpüla nnojoluin nimeejüin waya Satanaa sükajee tia? Nnojotsü waʼatapajüinjatüin süküjain wamüin tü nupueulosekat Maleiwa tü anakat jee tü mojukat süpüla wanajüin, waapajüin otta washaittüin. Atüjainjana waya aneekaa tü anakat süpüla waaʼinrüin wanaapünaa sümaa tü keeʼireekat naaʼin Jeʼwaa wapüleerua (Heb. 5:14). Aneerü maʼin tü kasa waneekakat müleka shiimainre alin wapüla Maleiwa (Roma 12:9). Anashii wasakireʼerüle waaʼin sünain tüü: «Niʼrüle tü kasa tanajakat, tü taapajakat otta tü tashaitakat wanee tekirajüin jee niale wanee wayuu touyantakai epialuʼumüin, ¿niʼreetche shiain taaʼinrüin tü tekirajakalü anain nia?». Waaʼinrüle tü wekirajakalü anain wayuu suluʼujee tü Wiwüliakat, mapüleejeerü wamüin ayoutaa tü kasa nimeejeekalü aka waya Satanaa (1 Juan 3:18).

14. (1) ¿Kasa naaʼinraka Satanaa süpüla nüpüleeruaain waaʼin? (2) ¿Kasa waaʼinrüinjatka süpüla eejiraain waya sümaa tü nüpüleeruaakalü aka waaʼin Satanaa?

¹⁴ Nüpüleeruasü waaʼin Satanaa süpüla nnojoluin waneepiain waya nümaa Jeʼwaa. Wanee sukuwaʼipa shia sükajee süpülajünüin woulia tü aküjakat pütchi natuma na sülaülashiikana mma. Eeshii nemeeʼerainparale waya na aʼyanaajiraakana wamaa jee na koleejiashiikana wamaa süka waainjain tü sümakat tü Wiwüliakat (1 Ped. 4:4). Eesü nüpüleeruale waaʼin Satanaa nakajee na wapüshikana süpüla nnojoluin woʼunuin sünain tü outkajawaakat. Naainjain tia na wapüshikana süka aneein wakuwaʼipa naashin (Mat. 10:36). ¿Kasa waaʼinrüinjatka süpüla eejiraain waya sümaa tü nüpüleeruakalü aka waaʼin Satanaa? Soteesü waaʼin sülatüin tia wamüin süka nütkaain Satanaa wamaa (Alat. Map. 2:10; 12:17). Otta müsia naashin Satanaa, aʼyataashii neʼe waya nümüin Jeʼwaa süka naapüin kasa anasü wamüin jee akatalaajeena waya nuulia  Jeʼwaa weʼrüle wamüliala naashin (Job 1:9-11; 2:4, 5). Wane kasa waaʼinrüinjatka shia wachuntüinjanain nümüin Jeʼwaa nükatsüinrüin waaʼin. Soto waaʼin nnojoleenain nüpütüin waya Jeʼwaa wamüiwaʼa (Heb. 13:5).

15. ¿Jamüshii nnojoliika süpüla naainjirüin waya Satanaa wanee kasa nnojotka keeʼireein waaʼin?

¹⁵ Nnojoishii süpüla naainjirüin waya Satanaa wanee kasa nnojotka keeʼireein waaʼin (Sant. 1:14). Watta naalii wayuu nnojoliikana ayaawatüin saaʼu nümaain naya Satanaa. Shiasaʼa nekirajaapa sünain tü shiimainkat, naneeküinjachi jaralinjachin kamaain naya, niale Jeʼwaa jee niale Satanaa (Aluw. 3:17; 17:30). Weʼitaale suluʼu waaʼin woonooinjanain waneepia nümaa Jeʼwaa, nnojoleena kasakain waya nutuma Satanaa (Job 2:3; 27:5).

16, 17. (1) ¿Kasa maa isaka nüchiki Satanaa jee tü yolujaakalüirua? (2) ¿Jamüshii nnojoliinjanaka mmoluin waya seema emetuluin wanüiki woʼuraajapa?

¹⁶ Eesü waneirua kasa isakat nüchiki Satanaa jee tü yolujaakalüirua. Jamüshiijaʼa naya, nnojotsü süpüla natüjaain saaʼu tü eekat suluʼu wekii jee suluʼu waaʼin. Nnojotsü süküjain tü Wiwüliakat eein süpüla naaʼinrüin tia. Saashin tü Wiwüliakat, niaʼala neʼe Jeʼwaa otta Jesuu atüjakana saaʼu tü suluʼukat saaʼin jee shikii wayuu (1 Sam. 16:7; Mar. 2:8). ¿Jama yootule waya süchiki wanee kasa jee shiale emetuluin wanüiki woʼuraajapa? ¿Mmoluinjanache waya seema saapünüin wanüiki nutuma Satanaa jee sutuma tü yolujaakalüirua? ¿Mmoluinjanache waya sükajee eein süpüla naaʼinrüin kasa mojusü wamüin sutuma naapüin wanüiki? Nnojo. Maʼaka nnojoluin mmoluwaain waya sünain aʼyatawaa nümüin Jeʼwaa sutuma niʼrüin waya Satanaa, nnojoluinjanaʼaya waya mmoluin woʼuraajapa sutuma naapüin wanüiki. Aküjünüsü suluʼu tü Wiwüliakat nachiki watta naalii wayuu aʼyataapuʼukana nümüin Jeʼwaa emetutkana anüiki noʼuraajapa nümüin. Nnojotpejeʼe aküjünüin mmoluwaain naya wayuukana seema aapünaa anüiki nutuma Satanaa (1 Rey. 8:22, 23; Juan 11:41, 42; Aluw. 4:23, 24). Waʼyataale maʼin süchiirua woʼunirüin wakuwaʼipa wanaapünaa sümaa tü keeʼireekat naaʼin Jeʼwaa, nunouteʼereerü Jeʼwaa süpüshuaʼa tü eekai naaʼinrüin chi Yolujaakai wamüin, jaʼitakajeʼe neʼe outule waya nutuma, nüsoʼireʼereerü waaʼin Jeʼwaa (paashajeʼera Salmo 34:7).

¹⁷ Choʼujaasü watüjaain maʼin naaʼu chi waʼünüükai, nnojoliipejeʼe mmoluinjanain waya neema. Mayaapejeʼe nnojoluin lotuin maʼin wakuwaʼipa, eeshii süpüla eejiraain waya nümaa chi waʼünüükai nükaaliinjale waya Jeʼwaa (1 Juan 2:14). Müleka waʼleejüle chi Yolujaakai, oʼunamaateechi nia woulia (Sant. 4:7; 1 Ped. 5:9). Nayapajaʼa nuuʼulaküin maʼin aaʼin Satanaa na jimaʼaliikana jee na majayünnüükana. ¿Kasache eeka süpüla naaʼinrüin na jimaʼaliikana jee na majayünnüükana süpüla eejiraain naya sümaa tü nuuʼulakakalü akajee naaʼin Satanaa? Wekirajaajeerü anain tia sünain tü wane ekirajaayakat.