Majayütpa taya, amalajaasü tanoula nünain Jeʼwaa. Müshii teʼrakai naaʼin talatüin na koleejiajiraakana tamaa süka naaʼinrüin tü keeʼireekat naaʼin namüiwaʼa. Meekalaka takuwaʼipa maʼaka naaʼin nayakana. Müsü kapükai saaʼin takuwaʼipa sutuma taaʼinreein tü nachuntakat tamüin na kachooinkana taya jee sutuma taaʼinreein tü sümakat tü Wiwüliakat. Iseerü tachiki tekeraajüin tü taʼyataainkat nümüin Maleiwa taaʼinruʼu. Mayaainjeʼe tatüjaain saaʼu eein Jeʼwaa müsü wattaluʼukai taaʼin nuulia.

Nnojotpejeʼe taya ooʼulaain suulia aʼyatawaa nümüin Maleiwa. Ojuʼitawaisü taya sünain aküjaa pütchi soʼu wanee kaʼi suulia jamüin nanüiki tamüin na wawalayuukana. Nnojotpuʼusü yapain tatuma tü tanüikinjatkat sünain aküjaa pütchi. Müsüjeseʼe kapüleein tamüin yooto sümaa wayuu süchiki tü Wiwüliakat. Sünainjee tia, nnojotsü eein wanee wayuu touyantüinjatka amaʼanamüin jee nnojotsü tekirajüin wayuu sünain tü Wiwüliakat. Mamalainreesia tamüin aküjaa pütchi. «¿Jamüsüche süpüla talatüinjatüin naaʼin wanee wayuu nüküjawaire pütchi neʼe?», maʼwaisü taya.

 Shiasaʼa 17 touyase, oʼuneesü taaʼin namaʼanajee na kachooinkana taya. Müsüjeseʼe takolojooin Australiamüin. Mayaainjeʼe shapaain naaʼin taaʼu na wayuu kachooinkana taya, ayateeria taya aʼyataain nümüin Maleiwa naaʼinruʼu.

Chapa taya Australia, amalajaasü maʼin tanoula. Nnojotsü taya waneepiain sünain tü outkajawaakat otta aleewajaasü taya namaa waneinnua wawalayuu jimaʼalii jee majayünnüü wanaawaka aaʼin tamaa. Kamalainsü namüin asawaa jee ayonnojoo neʼe. Tayaawataka saaʼu piamain taaʼin sünain aʼyatawaa nümüin Maleiwa.

Shiasaʼa piama juya mapa, teʼraajaka wanee wawala ayaawatiraka saaʼu choʼujaain tanouteʼerüinjatüin takuwaʼipa. Kepiasü taya sümaa jaʼraisü wawalayuu maʼwayuusekana. Soʼu wanee kaʼi wounejaain süpüla makatüin wamaa wanee semaana wepialuʼu chi wawala alapalaakai waaʼu sümaa tü nuʼwayuusekat, Tamara sünülia. Sümaʼinruʼu chajachin nia kupaain sünain tü niʼyataainkat napüleerua na wawalayuukana, yalajatü yootuin wamaa Tamara jee kashalirat maʼin shia. Ponusü maʼin taaʼin süka müin sukuwaʼipa mayaainjeʼe laülaain saaʼin sünain anoujaa.

Kojutusü maʼin sümüin Tamara tü shikirajakat tü Wiwüliakat otta tü shiʼyataainkat nümüin Jeʼwaa. Süka weʼrüin talatüin maʼin shia meesü wakuwaʼipa maʼaka saaʼin. Talatüsü maʼin saaʼin süka shiʼyataain waneepia nümüin Jeʼwaa, akaajasaʼa tayakat nnojotsü talatüin taaʼin süka nnojoluin taʼyataain maʼin nümüin Maleiwa. Sotusü taaʼin waneepia sukuwaʼipa Tamara. Eesü wanee kasa tatüjaka sünainjee sukuwaʼipa, shia keeʼireein naaʼin Jeʼwaa waʼyataain nümüin sümaa talatüin maʼin waaʼin (Sal. 100:2).

Talateesü maʼin taaʼin maʼaka saaʼin Tamara. Tanouteʼerüinjeseʼe takuwaʼipa süpüla tia. Nnojotsü tanoutuin takuwaʼipa uwatuwoʼushi. Tü taaʼinrakat palajana shia yapain tatuma tü tanüikinjatkat süpüla taküjain pütchi otta pürekutsootsü aaʼusiliaat taya maʼaka jeʼra kashi. Sutuma taaʼinrüin tia, nnojotsü mmoluwaain taya sünain aküjaa pütchi. Talatüsü maʼin taaʼin süka taashajeʼerawalin tü  Wiwüliakat sümüin wayuu taküjapa pütchi. Mapa, pürekutsootka taya aaʼusiliaat waneepia.

Aleewajaasü taya namaa waneinnua wawalayuu anakana anoula jee talatakana aaʼin sünain aʼyatawaa nümüin Jeʼwaa. Naʼakajee naya taʼaleewainkana, eeshii tepichi, jimaʼalii, majayünnüü otta laülaayuu. Sünainjee nakuwaʼipa naya wawalayuukana, tayaawatüitpa aaʼu tü kasa taaʼinmaainjatkat jee taashajeʼerüinjatüin tü Wiwüliakat weinshi. Kamalain kamalain müsü tamüin süchikuaʼa tü aküjaakat pütchi. Mapa, pürekutsootsü rekulaat taya. Aluʼuinjaʼa jooluʼu talatüsü maʼin taaʼin jee anasü taaʼin namaa na wawalayuukana.

Wanee juya mapa, teʼraajaka wanee wawala kanüliakai Alex. Kamaneeshi nia, aishi nüpüla Jeʼwaa jee kamalainsü nümüin aküjaa pütchi. Aʼyataashi nia neʼipajee na laülaashiikana jee aipiruaichi nia juya sünain pürekutsoolin. Chajachi nia aküjain pütchi Malaui maʼaka jeʼra kashi eere palitchoin na wawalayuukana. Chayaa, aleewajaashi nia namaa waneinnua misioneero jee atütüleʼennüsü naaʼin natuma süpüla naaʼinmaainjatüin tü niʼyataainkat nümüin Maleiwa.

Kasaatsü taya nümaa Alex soʼu 2003. Ayatüshii waya aʼyataain waneepia nümüin Maleiwa. Wainma kasa watüjaka jee wainmairü kasa anasü weʼraka nutuma Jeʼwaa.

Soʼu 2009, aneekünüshii waya süpüla misioneeroinjanain chayaa Timor Oriental, wanee mma joʼuuchon pejeka sünain Indonesia. Ponoshaatasü waaʼin tia, talatüsü waaʼin jee wainmajüsü waaʼin. Shiasaʼa jaʼrai kashi süchikijee tia, antüshii waya suluʼumüin tü pueulokot Dili, chajatka Timor Oriental.

Ekiʼralaainjana waya sünain nakuwaʼipa na wayuu chakana Timor Oriental, sünain nanüikipala otta sünain neküinpala. Wanaa sümaa waküjain pütchi, weʼrüin wainmain na wayuu maʼletsekana, na nnojoliikana koleejiain jee na müliakana maʼin. Wainma na weʼraajakana eeka kasipalain naya jee  mojuka naaʼin sünainjee tü kasachiki eejatkat paala. *

Anasü maʼin aküjaa pütchi chayaa. Soʼu wanee kaʼi taküjain pütchi sümüin wanee jintut María sünülia, 13 suuyase otta mojusü maʼin saaʼin. * Eetaasüjaʼa maʼaka jeʼra juya süchikijee sünaajaain tü shiikat otta kakaliawaisü süpüla shiʼrüin chi süshikai. Isasü süchiki tü sukuwaʼipainjatkat maʼaka naaʼin na wane tepichikana. Soʼu wanee kaʼi süküjain tamüin tü alatakat sümüin sümaa shiʼyalajüin. Nnojotpejeʼe tayaawatüin saaʼu tü süküjeekat tamüin süka isain tachiki tia anüikiikat. Tachuntaka kaalinwaa nümüin Jeʼwaa süpüla tatütüleʼerüinjatüin saaʼin. Taashajeʼeraka sümüin waneirua wetsiikulo amülialaka saaʼin. Shiasaʼa maʼaka jeʼra juya süchikijee tia, teʼrüin sunoutaain sukuwaʼipa María sutuma shikirajaain anain tü Wiwüliakat. Woutiisasü shia jee ekirajüsü wayuu sünain tü Wiwüliakat. Nnojoluitpa sümüiwaʼain, wainmainnapa na wawalayuu saʼaleewainkana jee aisü shia napüla.

Anasü maʼin nutuma Jeʼwaa tü naʼyataainkat na wawalayuukana chaa Timor Oriental. Naʼakajee na woutiisainnakana soʼunnaa tü polookat juya alatüitpaka, wainma na pürekutsootkana, wainma na laülaashiikana jee na aʼyataakana neʼipajee. Eeshii noʼutku na aʼyataakana suluʼu Oficina Remota de Traducción jee akaalinjaka sünain akumajaa karaloʼuta suluʼu tü anüikii aashajaanakat suluʼu tia mmakat. Talatüsü maʼin taaʼin wanaa sümaa teʼrapuʼuin naya sünain eeʼirajaa nümüin Jeʼwaa sünain tü outkajawaakat. Jaʼyapuʼusü naaʼu talatüin naya jee aleewain maʼin naya nümaa Jeʼwaa.

Mayaainjeʼe waneejatüin nakuwaʼipa na wayuu chajanakana Timor Oriental noulia na yaajanakana Australia, talatüsia maʼin taaʼin sünain aʼyatawaa nümüin Maleiwa chayaa. Eeshii woʼunapuʼule suluʼu wuusü wotoka sümaa wayuu eekai ayaʼlajüshin jime awayajuushi otta eküülü metkaaraluʼujee. Eeshii wekirajapuʼule nepialuʼu na wayuukana sümaa alin walatshi, joʼuuchon nepia sümaa mepiisoin shia. Weʼrapuʼuin turüttaʼalüin kaliina. Mayaainjeʼe müin tia «anashaatasü yaʼayaa», maʼwaisü taya.

Wanaa sümaa jülüjain taaʼin tü takuwaʼipapuʼukat paala, kojutushaatasü tamüin tü naaʼinrakat tapüleerua na wayuu kachoinkana taya. Nekirajüin taya nüchiki Jeʼwaa jee nnojotsü akulajaain naaʼin tamaa. Mayaainjeʼe müin nnojotka anain takuwaʼipa majayülüiwaʼaya taya, ayatüsia taya nakaalinjain. Teʼrüin shikeraajüin sünain takuwaʼipa tü sümakat Proverbios 22:6. Talatüsü teikat otta talatüshi tashikai nümaa Alex, talatüshiʼiya naya tamaa. Talatashaatashii naya sutuma waʼyataain nümüin Jeʼwaa. Soʼujee 2016, alapalaashii waya naaʼu na wawalayuu jülüjakana saaʼin tü Weteet yaakat Australasia.

Kamalaitpa maʼin tamüin aküjaa pütchi, nnojotpuʼusü maajüin takuwaʼipa paala. Tayaawatüitpa saaʼu shiimain talatüin naaʼin wanee wayuu niʼyataale nümüin Maleiwa süka süpüshuaʼa naaʼin, jaʼitairü kasain alatüin nümüin. Eetaainajaʼa waya maʼaka 18 juya sünain aʼyatawaa nümüin Jeʼwaa. Talatüsü maʼin taaʼin nümaa Alex sutuma waaʼinrüin tia. Shiimainshaata tü nümakat David nümüin Jeʼwaa soʼu nümüin: «Talateena napüshuaʼa na achekakana pia süpüla nounjulaayain, talateena naya süpüla kaʼikat süpüshuaʼa [...] jee na kojutukana amüin tü pünüliakat, talateena naya putuma» (Sal. 5:11).