1. (1) ¿Kasa tü nnojoluinjatkat waaʼinrüin saashin Filipos 2:3? (2) ¿Kasa anasü weʼreetka sünainjee tia?

JÜÜJÜÜSHII waya nümüin Jeʼwaa süka wayaawatüin saaʼu niain neʼe atüjaain saaʼu tü anainjatkalü atuma wakuwaʼipa (Éf. 4:22-24). Nnojorüle yaletüin waaʼin, waaʼinreerü tü keeʼireekat naaʼin Jeʼwaa suulialeʼeya tü keeʼireekat waaʼin otta jülüjeerü waaʼin nayain alanaʼaleein akuwaʼipa na waneinnua woulia. Müleʼe shia watuma, aneerü wakuwaʼipa nümaa Jeʼwaa jee namaa na wawalayuukana (paashajeʼera Filipos 2:3).

2. (1) ¿Kasa nütüjaaka aaʼu chi aluwataaushikai Pablo? (2) ¿Kasa wekirajaainjatka anain sünain ekirajaayakat tüü?

² Nnojorüle eejüin waaʼin, wanaaweerü wakuwaʼipa namaa na wayuu yaletakana aaʼin otta na kapülakana aaʼin nakuwaʼipa neʼe namüiwaʼa. * Alatüsü tia namüin na anoujashii namaiwajanakana. Anuujeseʼe tü nümakat Pablo namüin na anoujashii kepiakana Roma: «Tamüshii paala jia jüpüshua: ‹Nnojo juʼwaataain suluʼu jukuaippa. Shia anaka aluʼu müleka jiyaawatüle naaʼu Maleiwa sünain niain juuntüin atüma jaaʼinrüin tü nüchekakat jüpüleerua›» (Roma 12:3). Nütüjaa aaʼu Pablo choʼujaain kojutuinjanain waya wamüinjiraa. Pansaajeetpejeʼe tü jülüjakat waaʼin wachikijiraa nnojorüle yaletüin waaʼin. Sünain ekirajaayakat tüü, wekirajaajeerü anain apünüinsü kasa nnojoluinjatka yaletüin aluʼu wakuwaʼipa. Tü palajatkat, sünain sukuwaʼipa kaʼwayuusee. Tü piamakat, sünain tü waʼyataainkat nümüin Jeʼwaa otta tü apünüinkat, sükajee tü weʼitaakat suluʼu redes sociales.

3. (1) ¿Kasa eeka süpüla mojujiraain anainjee wanee wayuu sümaa nuʼwayuuse? (2) ¿Kasa naaʼinraka waneinnua wayuu mojujiraale naya sümaa naʼwayuuse?

³ Niʼitaain Jeʼwaa sukuwaʼipa kaʼwayuusee süpüla talatüinjatüin naaʼin wanee wayuu sümaa nuʼwayuuse. Eejeetpejeʼe tü kasa mojujiraajeetkalü aaʼujee naya süka naleʼeruʼuin tü kaainjalakat. Naashin Pablo kooʼomüinjeerü tü müliaa niʼreetkat wanee wayuu kaʼwayuusere nia (1 Cor. 7:28). Eeshii na wawalayuu aʼülüjiraakana waneepia sümaa naʼwayuuse jee jülüjasü naaʼin anainjee nakuwaʼipa nnojorüle kasaalüin naya. Wanaawale tü jülüjakat naaʼin namaa na manoujainsaliikana, jülüjeerü naaʼin shiain anain aluʼu nooʼulaajiraale. Kapülasü naaʼin nakuwaʼipa neʼe namüiwaʼa.

4. ¿Kasa nnojoluinjatka jülüjain naaʼin na wayuu kaʼwayuuseekana?

⁴ Nnojotsü jülüjainjatüin naaʼin na kaʼwayuuseshiikana nooʼulaainjanain suulia naʼwayuuse. Saashin tü Wiwüliakat, shia neʼe eeka süpüla nuuʼulaajiraain anainjee wanee wayuu sümaa nuʼwayuuse tü amaʼüjirawaakalü akuwaʼipaa (Mat. 5:32). Shiʼrapa müliaa wanee wayuu maʼaka nüküjain shia Pablo, nnojotsü müinjatüin sünüiki: «Anainjatiaa taya nutuma taaʼinruʼu, alinjatiaa taya nüpüla taaʼinruʼu. ¿Aneetche takuwaʼipa tachajaale wane naata?». Jülüjale saaʼin tia, shia kapülaka saaʼin sukuwaʼipa neʼe sümüiwaʼa, nnojotsü jülüjain saaʼin jamüin naaʼin chi suʼwayuusekai. Eesü nameerüle na wayuukana pümüin: «Shia paaʼinra tü talatakalü atuma paaʼin». Eesüjaʼa naküjale tia pümüin süka mojutuin namüin sukuwaʼipa kaʼwayuusee. Naatapejeʼe tü nümakat Jeʼwaa pümüin. Anuu nünüiki: «Kapüla jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa» (Filip. 2:4, 5). Nnojotsü anain nümüin Jeʼwaa nooʼulaajiraale na kaʼwayuusekana, shia anaka nümüin waneepiainjanain naya (Mat. 19:6). Nücheka achikit Jeʼwaa jülüjain waaʼin tü nümakat, nnojotsü shiainjatüin tü keeʼireekat waaʼin.

5. Sünainjee tü sümakat Éfeso 5:33, ¿kasa naaʼinrüinjatka wanee wayuu eekai kaʼwayuusein otta kasa saaʼinrüinjatka tü wayuu eekat kaʼwayuusein?

 ⁵ Aijiraainjachi jee kojutujiraainjachi wanee wayuu sümaa nuʼwayuuse (paashajeʼera Éfeso 5:33). Saashin tü Wiwüliakat «anakuwaʼipaireʼeya chi wayuu aapakai nuulia chi aapünakai amüin» (Aluw. 20:35). ¿Jamüinjatche nukuwaʼipa wanee wayuu sümaa nuʼwayuuse süpüla aijiraain jee kojutujiraain naya? Nnojotsü yaletüinjatüin naaʼin, nnojotsü kapülainjatüin naaʼin nakuwaʼipa neʼe namüiwaʼa, kapülainjatü naaʼin sukuwaʼipa naʼwayuuse (1 Cor. 10:24).

6. ¿Kasa watüjaka sünainjee tü nümakat Steven otta tü sümakat Stephanie?

⁶ Wainma na wawalayuu talatajiraakana aaʼin sümaa naʼwayuuse sutuma nnojoluin yaletüin naaʼin. Anuu tü nümakat Steven: «Paaʼinwajiraale jia, jukumajeerü sukuwaʼipa wanee mojujirawaa. Jaaʼinrüle tia: ‹¿Kasache aneetka atuma takuwaʼipa?›, nnojoleena müin jia. ‹¿Kasache aneetka atuma wakuwaʼipa?›, meena jia». Müsia tü jülüjakat saaʼin Stephanie, tü nuʼwayuusekat. Anuu sünüiki: «Nnojotsü jaralüin acheküin süchiki kepiajiraain shia nümaa wanee shiʼipolo. Mojujiraale waya, wachajaain kasain müin anainjee waya. Oʼuraajüshii waya, ekirajaashii waya otta yootushii waya süchiki tia. Wakumaja wamüsia sukuwaʼipa tia mojujirawaakat. ‹Pia kasitka›, nnojoishii majiraain waya». Aneerü nukuwaʼipa wanee wayuu sümaa nuʼwayuuse nnojorüle kapülain naaʼin nukuwaʼipa neʼe nümüiwaʼa.

7. ¿Kasa tü nnojoluinjatkat jülüjain naaʼin wanee wawala aapünakai amüin wanee aʼyatawaa suluʼu nupueulose Jeʼwaa?

⁷ Kojutusü wamüin waʼyataain nümüin Jeʼwaa jaʼitasü kasain waʼyataain anain nümüin (Sal. 27:4; 84:10). Anasü maʼin nukooʼomüinreere niʼyataain wanee wawala nümüin Jeʼwaa. Anuujeseʼe tü sümakat tü Wiwüliakat süchiki tia: «Chi wayuu eekai keeʼireein naaʼin laülawaa napüleerua na anoujashiikana suluʼu tü outkajaaleekat, anashaatasü maʼi tü nüchekakat nüpüleerua» (1 Tim. 3:1). Saapünapa tia aʼyatawaakat nümüin, nnojotsü jülüjainjatüin naaʼin niain alanaʼaleeichipain akuwaʼipa (Luc. 17:7-10). Jülüjainjatü naaʼin nükaalinjainjanain na waneinnua (2 Cor. 12:15).

8. ¿Kasa watüjaka sünainjee tü aküjünakat nüchiki Diótrefes, Uzías otta Absalón?

⁸ Aküjünüsü suluʼu tü Wiwüliakat nachiki waneinnua wayuu alanaweekana ojutu noulia na waneinnua. Jamüshijaʼa Diótrefes, alanaweesü nujutu noulialeʼeya na wane anoujashiikana (3 Juan 9). Akaatajaʼa Uzías, naaʼinrüin wanee kasa nnojotka niʼitaain Jeʼwaa nüpüleerua (2 Crón. 26:16-21). Müshia Absalón, aiyaasü wayuu nüpüla shiiʼiree nüneekünüin süpüla aluwatawaa (2 Sam. 15:2-6). Sünainjee tia, wayaawata aaʼu mojuin nümüin Jeʼwaa nakuwaʼipa na wayuu alanaweekana ojutu noulia na waneinnua (Prov. 25:27). Na wayuu yaletakana aaʼin jee na alanaweekana ojutu noulia na waneinnua, eʼreena neʼe müliaa mapa (Prov. 16:18).

9. ¿Kasa niʼitaaka ekii Jesuu wapüleerua?

⁹ Naatapejeʼe nukuwaʼipa Jesuu noulia naya wayuukana. «Mayaainje wanaawain nukuaippa [...] nümaa Maleiwa, nnojotsü kachiiruain naaʼin laülawaa wanaa nümaa» (Filip. 2:6). Mayaainjeʼe pülain Jesuu, nnojotsü jülüjain naaʼin sülanaʼaleeinjatüin nukuwaʼipa nuulia Jeʼwaa. Anuu nünüiki namüin na nikirajüinkana: «Chi wayuu eekai kamaneein sümüin wayuu süpüshua, nieechi laulaashikaʼaya jaʼakajee» (Luc. 9:48). Anasü maʼin aʼyanaajirawaa namaa na wawalayuu pürekutsootkana, na laülaashiikana, na aʼyataakana neʼipajee na laülaashiikana otta müsia nümaa chi wawala alapalaakai waaʼu, süka jamüin, nnojoluin yaletüin naaʼin wawalayuukana naainnua maʼaka nnojoluin yaletüin naaʼin Jesuu. Nnojorüle yaletüin waaʼin, ayaawatüneerü aaʼu aijiraain waya (Juan 13:35).

10. ¿Kasache waaʼinrajatka sülatüle wanee kasa suluʼu tü outkajaaleekat otta müle nnojotkai sunoutunamaatüin akuwaʼipa saaʼin wamüin?

¹⁰ ¿Kasache waaʼinreetka sülatüle wanee kasa  suluʼu tü outkajaaleekat otta müle nnojotkai sunoutunamaatüin akuwaʼipa saaʼin wamüin? Shia anaka aluʼu jüüjüüle waya namüin na laülaashiikana suulia waʼyounalaain (Heb. 13:17). Süpüla waaʼinrüin tia, wasakira waaʼin sünain tüü: «¿Mojusüchejeʼeya maʼin tia alatakat süpüla sunoutunamaatüin? ¿Choʼujaasüchejeʼeya sunoutunamaatüin maalü? ¿Wayache anaka süpüla anoutaa sukuwaʼipa tia? ¿Keeʼireesüche waaʼin kojutuinjanain waya atumawaa? ¿Shiataapa keeʼireein waaʼin paaʼinwajiraain na wawalayuukana?».

11. Sünainjee tü sümakat Éfeso 4:2, 3, ¿kasa anasü weʼreetka nnojorüle yaletayaain waaʼin sünain aʼyatawaa nümüin Jeʼwaa?

¹¹ Anaʼleesia maʼin nümüin Jeʼwaa nnojorüle yaletüin naaʼin wanee wayuu suulialeʼeya nütüjain süpüleerua wainma kasa otta paaʼinwajiraale nia namaa na wawalayuukana suulialeʼeya tütüin maʼin nia sünain aaʼinraa wanee kasa. Müsüjeseʼe anain maʼin waʼyataale nümüin Jeʼwaa sümaa nnojoluin yaletüin waaʼin. Müle shia watuma, paaʼinwajiraajeena waya namaa na wawalayuukana (paashajeʼera Éfeso 4:2, 3). Aküjainjana maʼin waya pütchi, wakaalinjainjana na waneinnua, kapülainjatü waaʼin nakuwaʼipa napüshuaʼa na wawalayuukana jaʼitashii na nnojoliikana aapünüin amüin wanee aʼyatawaa suluʼu nupueulose Jeʼwaa (Mat. 6:1-4; Luc. 14:12-14). Waʼyataajiraale namaa na wawalayuukana, nnojoleerü neʼrüin watüjain neʼe ekirajaa, nayaawateerü aaʼu nnojoluin yaletüin waaʼin.

12. Püküja tü sümakat tü Wiwüliakat süchiki kaʼaleewainjanain waya.

¹² Niʼitaala Jeʼwaa sukuwaʼipa süpüla talatüinjatüin naaʼin wanee wayuu sümaa nüpüshi jee naʼaleewainyuu (Sal. 133:1). Anasü maʼin nakuwaʼipa na wayuu naʼaleewajaakana amaa Jesuu (Juan 15:15). Süküjain tü Wiwüliakat tü kasa anasü  weʼreetkalü anale nakuwaʼipa na wayuu waʼaleewajaakana amaa (Prov. 17:17; 18:24). Jee süküjainya nnojoleerüin anain wakuwaʼipa wakayalaale noulia na waneinnua (Prov. 18:1). Eeshii na waneepiakana sünain redes sociales süpüla wainmainjanain na naʼaleewainkana jee süpüla nnojoliinjanain namüiwaʼain naya. Eejüinjatpejeʼe waaʼin sünain tü kasa weʼitaakat suluʼupünaa redes sociales.

13. ¿Kasa mojuka atuma naaʼin waneinnua wayuu waneepiakana sünain redes sociales?

¹³ Naashin na wayuu ekirajaakana süchiirua nakuwaʼipa na wayuu waneepiakana sünain redes sociales, eesüjaʼa mojeerüle naaʼin mapa. ¿Jamüsüche mojeetka naaʼin? Shia süka naashajeʼerawalin jee nanajawalin tü ayaakuaa neʼitaakat na waneinnua. Eeshii na eʼitaakana saʼanasia nayaakua, shiyaakua tü kasa naaʼinrakat, nayaakua naʼaleewainyuu otta shiyaakua tü mma eepünaale naya. Na wayuu anajakana tia, eesüjaʼa mojule naaʼin sutuma naʼwanaajireʼerüin nakuwaʼipa namaa na waneinnua. Anuu tü sümakat wanee wawala 19 suuyase: «Mojupuʼusü maʼin taaʼin wanaa sümaa teʼrüin tü ayaakuaa neʼitaakat na waneinnua, teʼrüin talatüin maʼin naaʼin sünain aaʼinraa waneirua kasa otta tayakat joyooin müsü neʼe tepialuʼu».

14. ¿Kasa sükaalinjaka anain waya tü sümakat 1 Pedro 3:8 süpüla anain watuma tü waaʼinrakat suluʼupünaa redes sociales?

¹⁴ Wainma tü kasa anakalü apüla redes sociales maʼaka saaʼin yootuin waya namaa na wapüshikana jee na waʼaleewainyuukana. Eepejeʼe na ashajakana, na eʼitaakana nayaakua jee video suluʼupünaa redes sociales süpüla naʼwaataainjanain suluʼu nakuwaʼipa. «Piirakaa tamüin», müshii namakai aaʼin sükajee tia naaʼinrakat. Eeshii na ashajakana kasa yarüttüsü sünain tü ayaakuaa neʼitaakat otta sünain tü ayaakuaa neʼitaakat na waneinnua. Nnojotsü yaletüinjatüin waaʼin waya anoujashiikana, amülialaainjatü waaʼin naalin na waneinnua. Nnojoliinjana waya aʼwaataain sükajee tü kasa weʼitaakat suluʼupünaa redes sociales (paashajeʼera 1 Pedro 3:8).

15. ¿Kasa waaʼinrajatka saashin tü Wiwüliakat süpüla nnojoluin waʼwaataain suluʼu wakuwaʼipa?

¹⁵ Püshajapa jee piʼitaapa kasa suluʼupünaa redes sociales, püsakira paaʼin sünain tüü: «‹Aʼwaataakaiche maʼin suluʼu nukuwaʼipa›, ¿meetche wayuu süchiki tü tashajakat, tü ayaakuaa jee tü video teʼitaakat? ¿Achunjeetche naaʼin na waneinnua sutuma tia taaʼinrakat?». Anuu tü sümakat tü Wiwüliakat: «Tü nakuaippakat na manoujainsaliikana, nnojotsü niʼikalain chi Maleiwakai namüin.  Tü kasa mojusü naaʼinrakat, keejiasü namüin süka kaainjaraliin naya. Keeʼireesü naaʼin kaainjalaa. Nachuntüin naaʼin tü neirakaakat amüin je aʼwaatawaa suluʼu nawashirüin ooʼulaka suluʼu tü naaʼinrakat» (1 Juan 2:16). Nnojoishii waya aʼwaataainjanain suluʼu wakuwaʼipa, shia waaʼinrüinjatka tü sümakat tü Wiwüliakat: «Anakaja nnojorule alaayaain waaʼin suulia wayuu sünain kasakaaraliin wooʼomüin aʼülüjawaa je sünain wachunjiraain saaʼu eekai eein» (Gal. 5:26). Nnojorüle yaletüin waaʼin, nnojoleena waya aʼwaataain suluʼu wakuwaʼipa maʼaka naaʼin na manoujainsaliikana.

16. ¿Jamüsü nnojoluinjatka yaletüin waaʼin?

¹⁶ Nnojorüle yaletüin waaʼin, wayaawateerü aaʼu niain Jeʼwaa wountuin atuma waaʼinrüin tü nüchekakat wapüleerua (Roma 12:3). Na wayuu yaletakana aaʼin, kasakaralii wayuu nooʼomüin otta kapülasü naaʼin nakuwaʼipa neʼe namüiwaʼa. Sutuma tü jülüjakat naaʼin jee tü kasa naaʼinrakat, eesü mojule naaʼin na waneinnua natuma otta eesü mojule naaʼin nayakana sünainjee tia. Nnojorüle neeʼiratüin nakuwaʼipa, ayateenaʼaya naya müin süsürünnakai saaʼin nekii nutuma Satanaa süpüla nnojoliinjanain jüüjüüin naya nümüin Jeʼwaa (2 Cor. 4:3, 4; 11:3). Akaajasaʼa chi wayuu nnojoikai yaletüin aaʼin, niyaawata aaʼu niain Jeʼwaa nuuntuin atuma naaʼinrüin wanee kasa, pansaasü tü jülüjakat naaʼin nüchikijiraa otta niyaawata aaʼu nayain alanaʼaleein akuwaʼipa na waneinnua (Filip. 2:3). Nütüjaa aaʼulu naashichijaain «Maleiwa namüin na eekai yaletayaain naaʼin suluʼu nakuaippa namüiwa, otta kamaneeshi nia namüin eekai nnojolüin pülain naaʼin suulia wayuu» (1 Ped. 5:5). Nnojoishii waya peʼipoloojiraweein nümaa Jeʼwaa.

17. ¿Kasa waaʼinrajatka süpüla nnojoluin yaletüin waaʼin?

¹⁷ Nnojoleerü yaletüin waaʼin, wooʼulaale suulia tü kasa mojusü keejiapuʼukat wamüin. Anuu sünüiki tü Wiwüliakat: «Anakaja jaashajiraale pütchi shiimüin, süka shiiʼiranajaaitpain jukuaippa nütüma Maleiwa». Nnojotpejeʼe mapüleein tia. Müsüjeseʼe wekirajaainjanain nüchiki Jesuu süpüla washatüinjatüin nukuwaʼipa (Col. 3:9, 10; 1 Ped. 2:21). Waaʼinrüle tia, eʼreena waya kasa anasü sünainjee. Nnojorüle yaletüin waaʼin, talatajiraajeerü waaʼin sümaa wapüshi, paaʼinweena waya namaa na wawalayuukana otta aneerü sukuwaʼipa watuma tü kasa waaʼinrakat suluʼupünaa redes sociales. Aneetpejeʼe maʼin wakuwaʼipa nümaa Jeʼwaa otta eʼreena waya kasa anasü nutuma.