Anuu tü mekietsatkalü akuwaʼipaa süküjaka wetsiikulokot tüü: aijirawaa, talataa aaʼin, jimataa aaʼin, atüjaa aʼatapajaa, aaʼinraa kasa anasü, kamanewaa, anoujaa, anamiaa, achecheraa aaʼin. Tia, süpüshi neʼe tü akuwaʼipaa eekat nutuma chi naaʼinkai Maleiwa.

Anuu wanee pütchi nüküjaka Pablo süpülapünaa tia: «Chi eekai kaleʼeruʼuin süchiki [kaainjalaa,] naaʼinrüin tü mojusükat: maa aka aʼluwajirawaa akuaippaa sümaa wayuu jierü otta wane jierü nümaa wane toolo, maa aka kamaleiwaseyaain nia, maa aka eeʼirajiraa ouutsü, maa aka kanainwaa aaʼin wayuu, maa aka aʼülüjaajirawaa, maa aka achumujaa aaʼin, maa aka ülüʼüttaa aaʼin, maa aka yaletayaa aaʼin suʼupala wayuu, maa aka akatajirawaa, je maa aka eperuwawaa. [Otta] kasa eekai müin aka tia» (Gal. 5:19-21). «Kasa eekai müin aka tia», müsü nünüiki Pablo suluʼu tia pütchikat. Sükajee müin nünüiki, wayaawata aaʼu nüküjain süpüshi neʼe tü akuwaʼipaa mojusükat maʼaka saaʼin tü nüküjakat suluʼu Colosas 3:5. Akaataajaʼa soʼu nüküjain tü mekietsatkalü akuwaʼipaa eekat nutuma chi naaʼinkai Maleiwa, nüküjain neʼe süpüshi.

Wayaawata aaʼu tia sünainjee tü nümakat Pablo namüin na anoujashii chajanakana Éfeso. Anuu nünüiki: «Müleka waraittüle jia saʼakapünaa nuwarala chi Maleiwakai, jaaʼinreerü tü anasükat sümüin wayuu, tü nuluwataakat anain, je jüküjeerü waneepia tü shiimainkat» (Éf. 5:8, 9). Aaʼinraa kasa anasü, aaʼinraa tü nuluwataakalü anain Maleiwa otta aküjaa tü shiimainkat, süpüshi neʼe nukuwaʼipa chi wayuu waraittakai saʼakapünaa nuwarala chi Maleiwakai otta süpüshi tü akuwaʼipaa eekat nutuma chi naaʼinkai Maleiwa.

Nüküjain Pablo nümüin Timoteo naaʼinrüinjatüin aipiruasü kasa. «Maa aka paaʼinrüin tü nuluwataakat anain Maleiwa, maa aka keisalain pia sümüin pukuaippa nuʼupala Maleiwa, maa aka paaʼinmajüin tü pünoulakat, maa aka alin püpüla wayuu, maa aka püchecherüin paaʼin sünain anoujaa, je maa aka kamaneein pia sümüin wayuu», müshi nia nümüin (1 Tim. 6:11). Saʼakajee tia aipiruasükat kasa, apünüinsü neʼe tü nüküjakat Pablo nümüin Timoteo süchiki tü akuwaʼipaa eekat nutuma chi naaʼinkai Maleiwa: kanoulaa, alii apüla wayuu otta kamanewaa. Choʼujaapejeʼe nümüin Timoteo nükaalinjünüin nutuma chi naaʼinkai Maleiwa süpüla naaʼinrüin tü nuluwataakalü anain, süpüla keisalain nia sümüin nukuwaʼipa otta nüchecherüin naaʼin sünain anouja (anasü paashajeʼerüle Colosas 3:12; 2 Pedro 1:5-7).

Nnojotpejeʼe aküjünüin suluʼu Galacia 5:22, 23 süpüshuaʼa tü nukuwaʼipainjatkat wanee anoujashi. Mekietsat neʼe tü aashajaanakalü achiki yala. Eepejeʼe waneirua akuwaʼipaa jaʼyeetka waaʼu laülaapa waaʼin sünain anoujaa otta shiiʼiranajaapa wakuwaʼipa. Anakajaʼa waaʼinrüle waneepia tü nüchekakat Maleiwa wapüleerua süpüla waaʼinrüin tü anasükat (Éf. 4:24).