1, 2. ¿Jamüsü süpüla wayaawatüin saaʼu jamüin naaʼin Jehová saalinjee tü alawaa aküjünakat nüchiki?

 JÜLÜJATAA PAAʼIN süküjünüle perulaa püchiki nutuma wanee wayuu aikai püpüla, sunoujayaa sümaka wayuu süchiki tü aküjünakat püchiki sümaa suʼwalakajünüin. ¿Aashin mojeerüin paaʼin sutuma mojuteechin pia atumawaa jee mojeerüin sünüiki wayuu püchiki? (Prov. 22:1).

² Wayaawata aaʼu jamüin naaʼin Jehová sutuma tü alawaa nüküjakat Satanás nüchiki otta sutuma niʼrüin na waneinnua nanoujain tia. Sunouja anainrü Eva tia alawaakat, müsüjeseʼe shiʼrülüin wayumüin nümüin Jehová. Akaʼaya Adán naaʼinrüin tia wanaa sümaa. Kaainjalaka napüshuaʼa na wayuukana, outuinnaka naya suluʼujee tia (Gén. 3:1-6; Roma 5:12). Eesü outaa, atkawaa jee müliaa sünainjee tü alawaa nüküjakat Satanás suluʼu tü apainkat Edén. Mojusü maʼin naaʼin Jehová saalinjee tü alawaa aküjünakat nüchiki jee tü eekat sünainjee. Mayaainjeʼe müin naaʼin, nnojoishi jashichikuʼu müin nia. Saashin tü Bibliakat nia «chi Maleiwa talatakai aaʼin» (1 Tim. 1:11).

3. ¿Kasa aʼyatawaa anaka maʼin süpüla waaʼinrüin?

³ Anasü maʼin süka eein süpüla waaʼinrüin tü sümakat Salmo 113:1, eere sümüin: «Jiʼraajira nünülia [Jehová] otta kojuta nia jümüin». Waaʼinrüin tia wanaa sümaa waküjain sümüin wayuu süchiki tü kasa anasü naaʼinrakat Jehová. ¿Jamüsü keeʼireeka waaʼin waaʼinrüin tia? Süpüla watüjaain saaʼu tia, wekirajaa süchiki apünüinsü kasa.

TALATÜSHI JEHOVÁ WATUMA

4. ¿Jamüsü talataka naaʼin Jehová wanaa sümaa waʼwaajüin nia? Püküja wanee shiyaawase (piirakaa sümüin tü ayaakuaakat).

⁴ Talatüsü naaʼin chi Washikai Jehová weʼraajirapa nünülia sümüin wayuu jee kojutule nia wamüin (Sal. 119:108).  Eesü choʼujaale nümüin wanee wayuu anain pütchi süchiki tü kasa naaʼinrakat süpüla anain naaʼin. ¿Müsüche nukuwaʼipa Jehová? ¿Choʼujaasüche nümüin nuʼwaajünüin sutuma wayuu süpüla anain naaʼin? Nnojo. Süpüla wayaawatüin saaʼu tia, jülüjataa waaʼin sukuwaʼipa wanee jintutchon nümaa chi süshikai. «Taata, talatüsü taaʼin pümaa», müsü shia nümüin sümaa sukoʼojooin nünain. Antüsü suluʼumüin naaʼin chia wayuukai tü sümakat tü nüchonkat nümüin jee talatüsü naaʼin. ¿Jamüsü talataka naaʼin? ¿Shiache sutuma choʼujaain süküjain tia nümüin süpüla nütüjaain saaʼu anain sukuwaʼipa shipijia nutuma? Nnojo. Talatüsü naaʼin sutuma niʼrüin alin nia süpüla tü nüchonkat jee kojutuin sümüin tü naaʼinrakat süpüleerua. Sutuma müin sukuwaʼipa tü nüchonkot, nütüjaa aaʼu aneerüin sukuwaʼipa miyoʼupa shia jee talateerüin saaʼin. Akaʼaya chi Washikai Jehová, talatüsü naaʼin wanaa sümaa waʼwaajüin nia.

5. ¿Kasa atüjaanaka aaʼu wanaa sümaa waʼwaajüin Jehová?

⁵ Atüjaaneerü aaʼu alawaain tü nüküjakat Satanás wachiki waʼwaajüle chi Washi iipünaajachikai. Naashin Satanás, nnojoleechi eein wanee wayuu kojutuka atuma Maleiwa jee waneepiakai nümaa soʼunnaa niʼrüin müliaa. Naashin ooʼulaayaa meerü wayuu suulia aʼyatawaa nümüin Jehová neʼrüle anain nakuwaʼipa (Job 1:9-11; 2:4). Atüjaanapejeʼe saaʼu naʼalain tia Satanás sünainjee tü naaʼinrakat Job. Wanaa sümaa waʼwaajüin Jehová atüjaana aaʼu alaain Satanás. Kojutusü maʼin wamüin waneʼewai wakua kojutuin watuma Jehová jee waneepiain waya nümaa. Waaʼinrüle tia, talateechi nia watuma (Prov. 27:11).

6. ¿Kasa waaʼinrajatka süpüla washatüin nukuwaʼipa David otta na levitakana? (Nehemías 9:5).

⁶ Na aikana apüla Jehová, neʼraajirüin nünülia sümüin wayuu. Naaʼinrüin tia süka süpüshuaʼa naaʼin. Müshi David: «Taʼwaajüin Jehová süka süpüshuaʼa taaʼin. Kasataalejeseʼe kojutuin pia tamüin sümaa teʼraajirüin pünülia sümüin wayuu» (Sal. 103:1). Nütüjaa aaʼu David nuʼwaajüin Jehová wanaa sümaa niʼraajirüin nünülia. Weʼraajirapa nünülia Jehová, waküjain namüin na waneinnua anain maʼin nukuwaʼipa, anain maʼin tü naaʼinrakat jee tü nukumalakat. Nuʼwaajeein nia David süka süpüshuaʼa naaʼin. Müsia tü naaʼinrakat na levitakana, naʼwaajüin Jehová süka süpüshuaʼa naaʼin. Nayaawata aaʼu isain nachiki naküjain süpüshuaʼa tü naaʼinrakat Jehová aʼwaajünüinjachika anainjee nia (paashajeʼera Nehemías 9:5). Talatakajasaʼa naaʼin Jehová niʼrapa tü naaʼinrakat süpüla naʼwaajüin nia.

7. ¿Kasa waaʼinrajatka süpüla waʼwaajüin Jehová waküjapa pütchi otta sükajee tü waaʼinrawaikat soʼukaiwai?

 ⁷ Waʼwaajüin Jehová waküjapa namüin na waneinnua kojutuin wamüin tü naaʼinrakat wapüleerua otta jamüin aika nia wapüla. Tü keeʼireekat waaʼin waküjapa pütchi shia sürütkaainjatüin wayuu nünainmüin Jehová jee alinjachin nia napüla maʼaka alin nia wapüla (Sant. 4:8). Kamalainsü wamüin weeʼiyatüin sümüin wayuu suluʼujee tü Bibliakat aipüralin nia, lotuin nukuwaʼipa, kekiin nia jee pülashin nia. Wanee sukuwaʼipa süpüla waʼwaajüin Jehová jee talatüin nia watuma shia washatüle nukuwaʼipa (Éf. 5:1). Waaʼinrüle tia, neʼreerü na wayuukana waneejatüin wakuwaʼipa otta keeʼireejeerü naaʼin natüjaain saaʼu jamüin maka wakuwaʼipa (Mat. 5:14-16). Yootopa waya namaa, eeshiijaʼa nasakirüle waya süchiki wanee kasa. Wajayata tia süpüla wekirajüin naya nüchiki Jehová. Waaʼinrüle tia, arütkaajeena na wayuu anamiakana nünainmüin Jehová. Waaʼinrüle tü aküjünakat achiki yaʼaya süpüla waʼwaajüin Jehová, talateechi nia watuma (1 Tim. 2:3, 4).

TALATÜSHI JESÚS WATUMA

8. ¿Kasa naaʼinraka Jesús süpüla niʼraajirüin nünülia Jehová sümüin wayuu?

⁸ Nnojoishi eein wanee wayuu eʼraajakai maʼin nukuwaʼipa Jehová nuulialeʼeya Jesús (Mat. 11:27). Aishi maʼin nüpüla chi Nüshikai, aʼyataashi maʼin nia süchiirua niʼraajirüin nünülia sümüin wayuu jee kojutuin nia sümüin (Juan 14:31). Nüküjain Jesús wanee kasa naaʼinraka süpüla nikeraajüin tü niʼyataainkat nümüin Jehová yaa mmapaʼa. Anuu nünüiki nümüin Jehová wanee ai süpülapünaa nuʼutunüin aaʼin: «Teʼraajirüinnapa naya tü pünüliakat» (Juan 17:26). ¿Jamüsü sukuwaʼipa nutuma?

9. ¿Kasa nüküjaka achiki Jesús süpüla nayaawatüin saaʼu na wayuukana tü nukuwaʼipakat Jehová?

⁹ Natüjaa aaʼu na judíokana kasaichin nünülia Maleiwa. Nnojotsü neʼe niʼraajirüin Jesús nünülia Maleiwa, nüküjainña jamüin nukuwaʼipa (Juan 1:17, 18). Jamüsüjaʼa suluʼu tü Pütchi Ashajuushikat suluʼu hebreo, aküjünüsü niain Jehová wanee Maleiwa amüliajüi wayuu (Éx. 34:5-7). Sükajee tü nümakat Jesús süchiki tü naaʼinrakat wanee wayuu nüpüleerua chi nüchon emüliee maaʼinsaikai, nayaawata aaʼu na wayuukana sümülialaain naaʼin Jehová saalin wayuu. Niʼrapa chia wayuukai kaʼyatajee chi nüchonkai, awataashi nia nüpanapajee. Akoʼojooshi nia nünain jee nülatirüin sooʼopünaa naaʼin naainjala. Mapüleesüjeseʼe namüin na wayuukana nayaawatüin saaʼu nümüliajülin Jehová (Luc. 15:11-32). Nükaalinjain naya Jesús süpüla nayaawatüin saaʼu tü nukuwaʼipakat Jehová.

10. (1) ¿Jamüsü watüjaaka saaʼu nuchuntuin Jesús nünülia chi Nüshikai otta keeʼireein naaʼin naaʼinrüin tia na waneinnua? (Marcos 5:19; piirakaa sümüin tü ayaakuaakat). (2) ¿Kasa keeʼireeka naaʼin Jesús waaʼinrüin?

¹⁰ Nücheka achikit Jesús neʼraajirüin na waneinnua nünülia chi Nüshikai. Noʼutku nekiipüʼü na judíokana, nanoujapuʼu anainrü mojuteechin atumawaa Maleiwa suchuntunule nünülia. Saashin tü Pütchi Ashajuushikat, nnojotsü mojuin suchuntunule nünülia Maleiwa. Nnojoishijeseʼe oonooin Jesús sümaa tü münakat. Niʼraajirüin nünülia chi Nüshikai sümüin wayuu. Jülüja waaʼin tü naaʼinrakat nüntapa noumainpaʼamüin na kanüliakana gerasenos. Niyuʼluin watta saalii yolujaa nüleʼeruʼujee wanee wayuu jee müshiʼiya na wayuu kepiakana yala nachuntuin maʼin nümüin Jesús nuʼunajachin noumainpaʼajee süka mmoluin naya (Mar. 5:16, 17). «Püküja süchiki süpüshuaʼaleeya tü kasa naaʼinrakat Jehová püpüleerua», müshi Jesús  nüpütaapa nuulia chi wayuu anakai nutuma. Naaʼinrüin tia süka keeʼireein naaʼin shiʼraajüin wayuu nünülia Jehová suulialeʼeya niʼraajünüin niakai (paashajeʼera Marcos 5:19). a Tü keeʼireekat naaʼin Jesús shia weʼraajirüin nünülia Jehová sümüin wayuu süpüshuaʼa (Mat. 24:14; 28:19, 20). Waaʼinrüle tia, talateechi Jesús watuma, chi Aluwataainjachikai waaʼu.

11. (1) ¿Kasa nüküjaka Jesús namüin na nikirajüinkana süpüla nachuntuin nümüin Maleiwa? (2) ¿Jamüsü choʼujaaka naaʼinrüin tia? (Ezequiel 36:23).

¹¹ Nütüjaa aaʼu Jesús keeʼireein naaʼin Jehová sütüjaanüin aaʼu alawaain tü nüküjakat Satanás nüchiki. Suluʼujee tia, kojuteechi nia atumawaa. Müsüjeseʼe müin nünüiki Jesús namüin na nikirajüinkana: «Müinjatü jünüiki juʼuraajapa: ‹Washikai iipünaajachikai kasataalejeseʼe shiʼraajüin wayuu pünülia otta kojutuin pia sümüin›» (Mat. 6:9). Niyaawata aaʼu Jesús shiainjatüin waaʼinmaain maʼin tia (paashajeʼera Ezequiel 36:23). Nnojoishi eein wanee wayuu aaʼinrakai tü naaʼinrakat Jesús süpüla shiʼraajüin wayuu nünülia Jehová jee kojutuin nia sümüin. Süpüla nütaʼünüin Jesús naküjain na nüʼünüükana mojutuin Maleiwa nutuma. Mojushaatasü maʼin nümüin Jesús mojutule Maleiwa nutuma wanee wayuu. Nnojoluiwaʼaya nütaʼünüin Jesús, mojushaatasü naaʼin sutuma nütüjaain saaʼu süküjüneerüin süchiki naaʼinrüin tia jee nuʼutuneechin aaʼin saaʼujee tia. Eesüjaʼa shiale shapaain maʼin atuma naaʼin süpülapünaa nütaʼünüin (Luc. 22:41-44).

12. ¿Kasa naaʼinraka Jesús süpüla kojutuinjachin atumawaa chi Nüshikai?

¹² Süpüla kojutuin atumawaa Jehová, nüchecherüin naaʼin Jesús wanaa sümaa niʼyaajünüin, airuʼuluin pütchi nümüin jee süküjünüin perulaa nüchiki. Nnojotsü jamajatüin nümüin niʼrüin japülii, jama noonooin nümaa chi Nüshikai (Heb. 12:2). Wanaapünaa sümaa tia, nütüjaa aaʼu Jesús niain Satanás shikiishin tü aainjünakat nüka (Luc. 22:2-4; 23:33, 34). Isasü nüchiki Satanás nuuʼuleʼerüin Jesús suulia aʼyatawaa nümüin Jehová. Sütüjaanaka aaʼu sünainjee tü naaʼinrakat Jesús alawaain tü nüküjakat Satanás nachiki na aʼyataashiikana nümüin Jehová. Eeshii süpüla  waneepiain waya nümaa Jehová, jaʼitairü kasain maʼin alatüin wamüin.

13. ¿Kasa waaʼinrajatka süpüla talatüin watuma chi Aluwataainjachikai waaʼu?

¹³ ¿Kasa paaʼinrajatka süpüla talatüin Jesucristo putuma, chi Aluwataainjachikai waaʼu? Ayataʼaya piʼraajirüin nünülia Jehová sümüin wayuu süpüla kojutuin nia atumawaa. Paashajaa namaa süchiki tü nukuwaʼipakat jee tü naaʼinrakat. Mayaa, püshateerü nukuwaʼipa Jesús (1 Ped. 2:21). Talateechikalaka Jehová putuma jee atüjaaneerü aaʼu alaain Satanás sümaa mojulaain maʼin nia.

WAKAALINJA NA WANEINNUA SÜPÜLA NOʼTTAAIN

14, 15. ¿Kasa eeka sünainjee wekirajüin wayuu nüchiki Jehová?

¹⁴ Weʼraajirapa nünülia Jehová namüin na wayuukana wakaalinjain naya süpüla noʼttaain. Na wayuu manoujainkana müsü süsürünnakai aaʼin nekii nutuma chi Yolujaakai (2 Cor. 4:4). Müsüjeseʼe wainmain wayuu oonookana sümaa naʼalain Satanás. Nanouja anainrü nnojolin eein Maleiwa, wattaluʼuin nia woulia, maalin waya nüpüla, mojulaain nia jee müliain waneepia nutuma na kaainjaraliikana. Tü alawaa nüküjakat Satanás süpülajatü mojutuin atumawaa Jehová, mojuinjatüin sünüiki wayuu nüchiki jee nnojoluinjatüin sürütkaain wayuu nünainmüin. Waküjapa pütchi jee wekirajapa tü shiimainkat nüchiki chi Washikai Jehová, waʼwaajüin nia jee wakaalinjain na waneinnua suulia nanoujain sünain tü alawaa nüküjakat Satanás.

¹⁵ Eeʼiratüsü sukuwaʼipa wayuu sutuma tü Nünüikikat Maleiwa. Anasü maʼin tü eekat sünainjee wekirajüin wayuu nüchiki Jehová jee süchiki tü nukuwaʼipakat. Nnojotpa müin süsürünnakai aaʼin nekii nutuma chi Yolujaakai, nayaawata aaʼu anain maʼin nukuwaʼipa chi Washikai Maleiwa maʼaka wayaawatüin saaʼu tia. Ponusü maʼin naaʼin süka pülashaatain nia (Is. 40:26). Anasü naaʼin süka lotuin nukuwaʼipa (Deut. 32:4). Ponusü naaʼin sutuma kekiin maʼin nia (Is. 55:9; Roma 11:33). Sümülialüin naaʼin süka natüjaain saaʼu aipüralin nia (1 Juan 4:8). Sümaʼainruʼu aleewain naya nümaa Jehová, nayaawata aaʼu eein süpüla katüin noʼu süpüla kaʼikat süpüshuaʼa jee nüchooinjanain naya mapa. Nnojotsü eein wanee  aʼyatawaa eekai anain maʼin suulia akaalinjaa wayuu sünain arütkawaa nünainmüin chi Washi iipünaajachikai. Aʼyanaajiiraashii waya nümaa Jehová waaʼinrüle tia (1 Cor. 3:5, 9).

16. ¿Jamüsü sukuwaʼipa wayuu sütüjaapa saaʼu kasaichin nünülia Maleiwa? Püküja wanee sukuwaʼipa.

¹⁶ Waküjapa pütchi sümüin wayuu, eesüjaʼa waküjale palajana namüin kasaichin nünülia Maleiwa. Anamiale wanee wayuu, eesüjaʼa süpüla süntüin suluʼumüin naaʼin tia. Jülüja waaʼin sukuwaʼipa wanee majayülü kanüliasü Alía. b Suluʼujatü wanee iküleesia eere nnojoluin shikirajünüin sünain tü Bibliakat, nnojotsü anain saaʼin süka nnojoluin aleewain shia nümaa Maleiwa jee nnojotsü anain saaʼin sümaa tü iküleesia kalujutkat shia. Aʼwanajaapejeʼe sukuwaʼipa suʼttapa sünain ekirajawaa sünain tü Bibliakat namaa na Aküjaliikana pütchi. Ponusü saaʼin sütüjaapa saaʼu nünülia Maleiwa jee mojusü saaʼin sutuma süsünneʼennüin nünülia suluʼujee waneirua Biblia jee «Señot» nümünüin. «Tatüjaaitpa aaʼu kasaichin nünülia chi taʼaleewainkai», müsü shia sümaa talatüin saaʼin. Anasü maʼin saaʼin saashin sutuma sütüjaaitpain saaʼu nünülia Maleiwa, kojutusü maʼin tia sümüin. Jülüjataa waaʼin nukuwaʼipa Steve, músico nia, judío na nüpüshikana otta kojutusü maʼin namüin tü nakuwaʼipakat. Nnojotsü jamajatüin nümüin tü anoujaakat sutuma niʼrüin piamain noʼupünaa na wayuu sulujunakana tü iküleesiakat. Soʼu wanee kaʼi, yalajachi nia sünain aapajaa tü ekirajünakalü anain wanee wayuu sünain tü Bibliakat nutuma wanee aküjai pütchi nüchiki Jehová. Naaʼinrüin tia sünainjee nünaajaain wanee nüpüshi, antüsü suluʼumüin naaʼin nütüjaapa saaʼu kasaichin nünülia Maleiwa. Müshi nia: «Nnojotpuʼusü tatüjaain aaʼu kasaichin nünülia Maleiwa. Tayaawatüitpa aaʼu eein süpüla yootuin taya nümaa Maleiwa maʼaka yootuin wanee wayuu nümaa wanee naʼaleewain».

17. ¿Jamüsü kachiirueeka paaʼin kojutuin Jehová putuma? (Piirakaa sümüin tü ayaakuaakat).

¹⁷ Waküjapa pütchi otta wekirajapa wayuu, ¿waküjainche kasaichin nünülia Maleiwa otta jamüin nukuwaʼipa? Waaʼinrüle tia, kojuteechi watuma Jehová. Kachiirua paaʼin pükaalinjain na waneinnua süpüla neʼraajüin Jehová. Puʼwaajeechikalaka nia sünainjee tia. Paaʼinrüle tia, oʼttaajeena na waneinnua, püshateerü nukuwaʼipa Jesucristo, chi Aluwataakai waaʼu otta talateerü naaʼin chi Washikai Jehová, chi aipüraikai wayuu. Kasataalejeseʼe müin wanüiki maʼaka saaʼin tü sümakat Salmo 145:2: «Kojuteechi pia tatuma süpüla kaʼikat süpüshuaʼa».