1. ¿Kasapülajatü tü jayeechi weeʼirajawaikat?

NAASHIN wanee wayuu ashajüi muusika, nnojotsü neʼe kamalain wamüin aapajaa muusika, antüsü suluʼumüin waaʼin. Sükajee tü jayeechi weeʼirajakat nümüin chi Washikai Jeʼwaa, waʼwaajüin nia otta weeʼiyatüin alin maʼin nia wapüla. Akaʼaya waya, arütkaashii waya nünainmüin Jeʼwaa sutuma. Watüjaa aaʼu choʼujaain maʼin weeʼirajüin nümüin Jeʼwaa süpüla waʼwaajüinjachin nia wamüiwaʼa otta namaapa waya na wawalayuukana.

2, 3. (1) ¿Kamalainsü pümüin eeʼirajaa namaa na wawalayuukana sünain tü outkajawaakat? (2) ¿Kasa wekirajaainjatka anain sünain ekirajaayakat tüü?

² ¿Kamalainsü pümüin eeʼirajaa namaa na wawalayuukana sünain tü outkajawaakat? ¿Japüitaale neʼe pia sünain eeʼirajaa? Eeshii na japüikana sünain eeʼirajaa suʼupala wayuu. Nnojotpejeʼe anain müle nakuwaʼipa na wawalayuu tooloyuukana süka eein süpüla nashatüin tia na wane wawalayuukana nachiirua. Nnojotsü anain nnojolüyaale naaʼin na laülaashiikana sünain  eeʼirajaa jee nnojotsü anainya naatale tü naaʼinrakat neeʼirajapa na wawalayuukana sünain tü outkajawaakat (Sal. 30:12).

³ Tü jayeechi weeʼirajakat nümüin Jeʼwaa süpülajatü waʼwaajüin nia. Müshiijeseʼe nnojoluin wojuʼinajakuʼu wamüin suluʼujee tü outkajaaleekat weeʼirajüinjanapa. Wasakireʼera waaʼin sünain tüü: «¿Kojutusüche tamüin eeʼirajaa sünain tü outkajawaakat? ¿Kasa taaʼinrajatka süpüla nnojoluinjachin japülin taya sünain eeʼirajaa noʼupala na waneinnua? ¿Kasa taaʼinrajatka süpüla teeʼirajüin süka süpüshuaʼa taaʼin?». Wekirajaa sünain tia.

4, 5. ¿Jamüsü watüjaaka saaʼu neeʼirajapuʼuin na israeliitakana süpüla naʼwaajüin Jeʼwaa?

⁴ Kakaliaichi aʼwaajünüin Jeʼwaa sükajee muusika natuma na aʼyataashiikana nümüin. Wanaa sümaa nuʼwaajünapuʼuin Jeʼwaa natuma na israeliitakana, eeʼirajapuʼushii naya nümüin. Jamüsüjaʼa soʼu nukumajüin David sukuwaʼipa tü aʼyatawaakat suluʼu tü aʼwaajüleekat Jeʼwaa, nüneeküin 4.000 leviita süpüla neeʼirajüliinjanain. 288 na atüjakana maʼin eeʼirajaa naʼakajee naya leviitakana (1 Crón. 23:5; 25:7).

⁵ Kettaapa tü aʼwaajüleekat Jeʼwaa natuma na israeliitakana, eejatü muusika otta eeʼirajaa shikiira. Anuu sünüiki tü Wiwüliakat süchiki tia: «Naʼyalajitpa tü trompetakat jee neeʼirajapa na leviitakana süpüla naʼwaajüin Jeʼwaa otta naapüin analuʼut nümüin, emetutpa neeʼirain otta shiʼira tü trompetakat, tü címbalokat jee tü natalejakat [...] antüsü tü nüpülainkat Jeʼwaa suluʼumüin tü nipiakat». Akatsüinraakajasaʼa nanoula na israeliitakana sutuma tia (2 Crón. 5:13, 14, TNM; 7:6).

6. ¿Kasa naaʼinraka Nehemías soʼu laülaain nia saaʼu Jerusalén süpüla nuʼwaajünüin Jeʼwaa sükajee muusika?

⁶ Kettaapa süsepü Jerusalén nutuma Nehemías namaa na israeliita waneepiakana nümaa Jeʼwaa, eejatü muusika shikiira otta eejana na leviita eeʼirajakana. Talataleesia maʼin saaʼin wayuu sutuma saainjünüin tia. Piamasü neʼipapaʼa nutuma Nehemías na leviita eeʼirajakana sünain aapaa analuʼut nümüin Jeʼwaa. Oʼunushii naya saaʼupünaa süsepü Jerusalén sünain eeʼirajaa otta nantiraaka süʼütpaʼa tü aʼwaajüleekat Maleiwa. Aapünüsü neeʼiraain wattajee süka emetuluin shia natuma (Neh. 12:27, 28, 31, 38, 40, 43). Talatakajasaʼa naaʼin Jeʼwaa süka neeʼirajüin na israeliitakana nümüin süka süpüshuaʼa naaʼin.

7. ¿Kasa naaʼinraka Jesuu süpüla natüjaainjatüin saaʼu na nikirajüinkana naʼwaajüinjachin Maleiwa sükajee jayeechi?

⁷ Nükalioʼu Jesuu, ayatüshia eeʼirajünüin amüin Maleiwa süpüla nuʼwaajünüin. Jamüshijaʼa Jesuu süchikijee nüikaleʼerüin sukuwaʼipa tü Ekawaa aipaʼajatkat, eeʼirajüshi nia jayeechi süpüla nuʼwaajüin Maleiwa (paashajeʼera Mateo 26:30).

8. ¿Kasa washatüinjatka nanainjee na nikirajüinkana Jesuu namaiwajannuukana?

⁸ Na nikirajüinkana Jesuu namaiwajannuukana, naʼwaajapuʼuin Maleiwa sükajee neeʼirajüin jayeechi nümüin. Nnojoishii naya oʼunuin suluʼumüin tü aʼwaajüleekat sünain aaʼinraa tia, akotchiraapuʼushii naya nepialuʼu na nawalayuukana sünain aʼwaajaa Maleiwa. Eeʼirajapejeʼe naya süka süpüshuaʼa naaʼin. Nüküjainjeseʼe Pablo namüin ayatüinjanain naya sünain nekirajiraain, nachiaajiraain jee neeʼirajüin jayeechi nümüin Maleiwa süpüla naʼwaajüin nia otta naapüin analuʼut nümüin süka salmos (Col. 3:16). Müinjatü watuma weeʼirajapa nümüin Jeʼwaa suluʼujee tü karaloʼuta  jayeechimaajatü wamaʼanakat. Tia jayeechikalüirua süpüshi tü nikirajakalü aka waya Maleiwa nükajee chi achepchieekai (Mat. 24:45, TNM).

9. (1) ¿Jamüshii eeka wawalayuu japüikana sünain eeʼirajaa sünain tü outkajawaakat jee sünain tü outkajawaakat miyoʼu? (2) ¿Kasa waaʼinrajatka süpüla anainjatüin wamüraluʼu sünain eeʼirajaa? ¿Jaralii na eʼitaainjanaka shikii tia? (Piirakaa sümüin tü ayaakuaa suluʼukat süpana 3).

⁹ Eeshii müle japüikai waaʼin sünain eeʼirajaa süka nnojoluin kiʼrain waya sünain tia jee süka nnojoluin sukuwaʼipain wayuu tia woumainpaʼa. Eeshiijaʼa japüire waya süka nnojoluin anain maʼin wamüraluʼu maʼaka naaʼin na waapajakana eeʼirain suluʼu raawia jee suluʼu telewisoot. Ayatüinjanapajaʼa waya eeʼirajüin waneepia nümüin Jeʼwaa. Aneerü wamüraluʼu yaletüle watuma tü karaloʼuta jayeechimaajatkat, wayalerüle wekii otta weeʼirajüle süka süpüshuaʼa waaʼin (Esd. 3:11; paashajeʼera Salmo 147:1). * Wainma Piichi Outkajaalee maaʼulu eere shiʼitaanüin tü jayeechi weeʼirajüinjatkat sünain wanee pantaaya. Anaʼleesia eeʼirajaa sutuma. Eetaasü joo wane kasaya anashaatasü maʼin, eeʼirajünüsü jayeechi sünain tü Ekirajawaa napülajatkat na Laülaashiikana otta na Aʼyataakana neʼipajee. Sutuma tia, nayainjana na laülaashiikana eʼitaakana shikii tü eeʼirajaakat sünain tü outkajawaakat.

10. ¿Kasa soteeka waaʼin japüire waya seema emetuluin weeʼirain?

¹⁰ Eeshii wawalayuu japüikana seema emetuluin neeʼirain suulia nayain neʼe aapünüin eeʼirain jee shiale sutuma nnojoluin anain namüraluʼu naashin. Jülüjataa waaʼin tüü motsomüin: waashajaapa, eeshii  woʼtchejaʼawaire sümaa tü wanüikikat, nnojoliipejeʼe waya ooʼulaain suulia aashajawaa sutuma tia (Sant. 3:2). Müsia neʼe sukuwaʼipa weeʼirajapa nümüin Jeʼwaa, nnojoishii waya ooʼulaainjanain suulia eeʼirajaa nümüin sutuma nnojoluin anain maʼin wamüraluʼu.

11, 12. ¿Kasa waaʼinrajatka süpüla anaʼleeinjatüin wamüraluʼu weeʼirajapa?

¹¹ Eeshiijaʼa japüire waya sünain eeʼirajaa süka nnojoluin watüjaain saaʼu tü waaʼinrajatkat süpüla anain wamüraluʼu. Wekirajaa sünain waneirua kasa aneetka atuma pümüraluʼu sünain eeʼirajaa. *

¹² Süpüla emetuluinjatüin weeʼirain, choʼujaasü anainjatüin süsanalia waaʼin. Maʼaka anain suchuwala wanee jooko sutuma tü korientekat, aneerü wamüraluʼu süpüla eeʼirajaa otta emetuleerü shia anale süsanalia waaʼin. Emeturuleeinjatü weeʼirain suulia wanüiki waashajaapa (paashajeʼera tü karaloʼutakat Benefíciese de la Escuela del Ministerio Teocrático, süpana 181 sünainmüin 184 eere sümüin «Control del volumen de aire»). Süküjainya tü Wiwüliakat talatüinjatüin waaʼin sümaa emetuluin weeʼirain nümüin Jeʼwaa (Sal. 33:1-3).

13. Püküja tü waaʼinrajatkat süpüla emetuluin weeʼirain watuma.

¹³ Anuu wanee kasa anaka süpüla paaʼinrüin puʼwaajapa Maleiwa sümaa püpüshi jee pümüiwaʼa: püneeka wanee jayeechi kamalainka maʼin pümüin suluʼujee tü karaloʼuta jayeechimaajatkat, paashajeʼera shia sümaa emetuluin pünüiki jee nnojo japülin pia; süchikijee, püsanala paaʼin jee püküja shia sümaa kajaalapüin putuma. Ayatüinjatü emetuluin pünüiki paaʼinrapa tia. Süchikijee tia, piiʼirajüinjatü tü pütchi paashajeʼerakat sümaa emetuluin shia putuma (Isa. 24:14). Paaʼinrüle tia, emetuleerü maʼin piiʼirain. Anashaatasü tia. Nnojo japülin pia sünain eeʼirajaa.

14. (1) ¿Jamüsü weeruluinjatka maʼin waanükü weeʼirajapa? (Paashajeʼera tü pütchikat «Paaʼinrajatka süpüla anainjatüin pümüraluʼu sünain eeʼirajaa»). (2) Püküja tü waaʼinrajatkat süpüla anainjatüin wamüraluʼu weeʼirajapa.

¹⁴ Wanee kasa waaʼinrajatka süpüla emetuluin weeʼirain shia weeruluinjatüin maʼin waanükü weeʼirajapa. ¿Kasaka waaʼinrüinjatüin nnojorüle anain wamüraluʼu jee pasanuale maʼin shia? Aküjünüsü tü anakat süpüla waaʼinrüin suluʼu Benefíciese de la Escuela del Ministerio Teocrático, süpana 184 sünain tü pütchikat «Cómo superar problemas específicos».

15. (1) ¿Kasa aküjünaka soʼu 2016 sünain tü outkajawaa aainjünakat juyawai? (2) ¿Jamüsü sunoutünaka tü karaloʼuta jayeechimaajatkat?

¹⁵ Soʼu 2016, sünain tü outkajawaa aainjünawaikat juyawai sutuma Watch Tower Bible and Tract Society of Pennsylvania aküjünüsü wanee kasa anashaatasü maʼin. Nüküjain chi wawalakai Stephen Lett eein wanee jeketü karaloʼuta jayeechimaajatü Talata waaʼin sünain eeʼirajaa nümüin Jeʼwaa sünülia. Naashin chi wawalakai Lett, anoutunusü tü jayeechiirua eejatkat wamaʼana paala süpüla pansaainjatüin shia sümaa sünüiki tü Wiwüliakat Traducción del Nuevo Mundo de las Santas Escrituras ojuʼitaka soʼu 2013 suluʼu inkülee. Nnojoluitpa ashajünüin sünain tia jayeechikalüirua tü pütchi aʼwanajaanakat sünain tü Wiwülia jeketkat. Akaʼaya shia, akooʼomüinjünüsü tü jayeechikalüirua, eesü eekai saashajaain süchiki aküjaa pütchi otta süchiki aapaa analuʼut nümüin Jeʼwaa saaʼu naapüin chi Nüchonkai waaʼu. Sutuma kojutuin maʼin wamüin eeʼirajaa süpüla waʼwaajüin Jeʼwaa, anashaatasü tü karaloʼuta jayeechimaajatkat natuma na Laülaashii Jülüjakana Aaʼin na Aküjaliikana Pütchi. Meematüsü aka saaʼin shiyolojo tü Wiwülia ojuʼitakat soʼu 2013 suluʼu inkülee.

16, 17. ¿Kasa anoutunaka sünain tü karaloʼuta jayeechimaajatkat?

¹⁶ Mapüleesalü achajawaa wanee jayeechi suluʼu tü jeketkat karaloʼuta jayeechimaajatka. Jamüsüjaʼa tü 12 jayeechi ashajünaka palajana, aashajaasü süchiki nukuwaʼipa  Jeʼwaa, shiasaʼa tü 8 jayeechi ashajünakat süchikijee, aashajaasü nüchiki Jesuu otta tü aakajiraakat. Suʼttiajee tü karaloʼutakat, ashajünüsü tü saashajaakalü achiki tü jayeechikalüirua. Anashaatasü tia süka mapüleejeerüin namüin na wawalayuu ekirajüinjanakana sünain wanee pütchi süpülajatka wayuu süpüshuaʼa anta sünain wanee jayeechi pansaaka sümaa tü nikirajüinjatkalü anain.

¹⁷ Mapüleesalü ayaawataa saaʼu sünüiki waneirua jayeechi süpüla weeʼirajüin shia süka süpüshuaʼa waaʼin. Jamüsüjaʼa tü jayeechikat «Acción de gracias», eeʼiratünüsü süka «Una oración para dar gracias a Dios». Nnojoluitpa ashajünüin sünain tia jayeechikalüirua waneirua pütchi nnojoluitpaka ayaawatünüin maʼin aaʼu maʼaka saaʼin «por doquier». Akaʼaya tü jayeechi «Protege tu corazón» makat, anoutunusü otta eeʼiratünüsü tü sünüliakat süka «Cuidemos nuestro corazón». Makaʼa saainjünüin tia shia suulia mojuin naaʼin na wawalayuu jieyuukana, na jimaʼaliikana jee na majayünnüükana otta na jekennuukana süka müin naküjakai sümüin wayuu tü saaʼinrajatkat.

18. ¿Jamüshii watüjainjanaka süpüleerua tü jayeechi jekennuukat? (Paashajeʼera tü nootakat).

¹⁸ Suluʼu tü karaloʼutakat Talata waaʼin sünain eeʼirajaa nümüin Jeʼwaa, wainma jayeechi makalü aka saaʼin nünüiki wanee wayuu eekai nuʼuraajüin. Müsü waküjakai saaʼin nümüin Jeʼwaa tü suluʼukat waaʼin weeʼirajapa tia jayeechikalüirua. Eesü waneirua jayeechi anaka süpüla watütüleʼerajiraain waaʼin namaa na wawalayuukana, waaʼinrüin kasa anasü otta aijiraain waya (Heb. 10:24). Müsüjeseʼe anain jülüjale waaʼin shiʼira tü jayeechikalüirua otta watüjale süpüleerua weeʼirajüin shia. Süpüla wountuin waaʼinrüin tia, waapajeein tü jayeechi suluʼukat jw.org tü kanainkat coro otta orquesta. Wekirajaale sünain tü jayeechikalüirua chaa wepialuʼu, atüjeena waya süpüleerua emetuluin weeʼirain otta eeʼirajeena waya süka süpüshuaʼa waaʼin. *

19. ¿Kasa eeka süpüla waaʼinrüin wayakana wapüshuaʼa süpüla waʼwaajüin Jeʼwaa?

¹⁹ Nnojo motuin jaaʼin choʼujaain maʼin weeʼirajüinjanain nümüin Jeʼwaa süpüla waʼwaajüin nia. Tia shia wanee sukuwaʼipa süpüla weeʼiyatüin sünain alin wapüla Jeʼwaa otta waapüin analuʼut nümüin (paashajeʼera Isaías 12:5). * Weeʼirajüle süka süpüshuaʼa waaʼin, nashateerü tia wanainjee na waneinnua. Wayakana wapüshuaʼa eeshii süpüla waʼwaajüin Jeʼwaa sükajee weeʼirajüin nümüin, jaʼitainna jimaʼaliin, laülaayuuin otta jekenale waya sünain anoujaa. Weeʼiraja nümüin Jeʼwaa süka süpüshuaʼa waaʼin. Waaʼinra tü nümakat chi salmistakai: «Jiiʼiraja nümüin Jeʼwaa», müshi. Talata waaʼin sünain eeʼirajaa nümüin Jeʼwaa (Sal. 96:1).