Alüʼütshii süpüla suluʼuinjanain waya wanee mma jeketü
Nukumajüin Maleiwa tü Mmakat süpüla eeinjanain waneepia na wayuu oonookana sümaa nünüiki (Salmo 37:29). Müshijeseʼe niʼitaain Adán sümaa Eva suluʼu tü apainkat Edén. Naapüin Maleiwa tü Mmakat namüin süpüla naʼyataain suluʼu jee naaʼinmajüin shia. Akaʼaya na nooʼuliwoʼukana naaʼinrüinjatü tia (Génesis 1:28; 2:15).
Nnojotsü müin sukuwaʼipa tü Mmakat maaʼulu maʼaka tü keeʼireetüjütkalia naaʼin Maleiwa paala. Ayatayütpejeʼe keeʼireein naaʼin tia. ¿Kasa naaʼinreetka Maleiwa süpüla paʼaraiisüinjatüin tü Mmakat nutuma? Maʼaka waashajeʼerüitpain nnojoleerü najaʼttirüin tü Mmakat jee naapeerü shia namüin na wayuu oonookana waneepia sümaa nünüiki. ¿Jameerü sukuwaʼipa tü Mmakat nikeraajapa Maleiwa tü nümakat?
Wanee aluwataainjachikai saaʼu mmakat süpüshuaʼa
Nüneeküin Maleiwa Jesuu süpüla nuluwataainjachin yaa mmapaʼa. Aluwataainjachi nia chejee iipünaajee. Shiasaʼa nuluwataapeena Jesuu yaa saaʼu mmakat, talateerü wayuu, aneerü sukuwaʼipa otta talateena naya sünain aʼyatawaa. Naata nukuwaʼipa Jesuu noulia na sülaülashiikana mma. Keeʼireesü naaʼin anainjatüin sukuwaʼipa wayuu. Niainjachi wanee aluwataai aipüralinjachikai wayuu, lotuinjachikai atuma sukuwaʼipa kasa otta amüliajüinjachikai wayuu (Isaías 11:4).
Paaʼinwajiraweerü wayuu süpüshuaʼa
Nnojoleerü jaralüin alataʼatüin ojutu, süka jamüin, paaʼinwajiraweerü wayuu süpüshuaʼa (Alateetkat Mapeena 7:9, 10). Napüshuaʼa na wayuu kepiainjanakana yaa mmapaʼa, aijeechi Maleiwa napüla jee aijiraajeena naya. Paaʼinwajiraweena waya wapüshuaʼa süpüla wekeraajüin tü keeʼireetüjütkalia naaʼin Maleiwa süpüleerua tü Mmakat, waaʼinmajeerü shia (Salmo 115:16).
Aneerü wayuu, aneerü mürüt otta aneerü sukuwaʼipa Mmakat
Nuluwataapeena Jesuu yaa mmapaʼa nutuma Maleiwa, nnojoleerü eein wawai, nnojoleerü akutkujaain mma, nnojoleerü asetüin wüin jee waneirua kasa (Salmo 24:1, 2). Saaʼujee tü naaʼinrakat Jesuu wanaa sümaa yaajachin nia mmapaʼa jee nüchiaain wanee wawai, jaʼyasü saaʼu wainmeerüin tü kasa naaʼinreetkat sükajee tü nüpülainkat Maleiwa (Marcos 4:39, 41). Nuluwataapeena Kürisüto waaʼu nnojoleena waya mmoluin saaʼu wanee kasa eekai sülateerüin. Soʼunnaa tia, kottiraajeerü wayuu sümaa mürüt jee nnojoleerü jaralüin amojujain tü Mmakat (Oseas 2:18).
Müiria nnojoluin eein ayuulii otta joouleerü eküülü
Anainjana waya wapüshuaʼa, nnojoleerü jaralüin ayuulin, laülaain jee outuin (Isaías 35:5, 6). Kepieena waya suluʼu wanee mma wulesü sümaa anain maʼin shia maʼaka tü mma naapakat Jeʼwaa nümüin Adán sümaa Eva. Joouleerü eküülü suluʼu tü mma jeketkat maʼaka jooutpuʼuin eküülü suluʼu tü apainkat Edén jee nnojoleerü jaralüin alatirüin jamü (Génesis 2:9). Paʼaraiisüpa tü Mmakat, nikeraajeerü Maleiwa tü nümatüjütkalia namüin na israeliitakana sümaiwa paala, tü makat: «Ekeena naya pan emiraleepa naya» (Levítico 26:4, 5).
Eejeerü anaa akuwaʼipa jee jimataa aaʼin
Nuluwataapeena Maleiwa saaʼu Mmakat süpüshuaʼa, eejeerü wanee anaa akuwaʼipa. Nnojoleerü jaralüin aainjünüin amüin kasa mojusü otta aijiraajeerü wayuu. Nnojoleerü atkawaa, nnojoleerü jaralüin alaülaajaain saaʼu wayuu otta eejeerü tü kasa choʼujaakat wamüin. Anuu sünüiki tü Bibliakat: «Shiimain maʼin nojoyoloweenain suupünaa suuʼulia uuwa otta higuera, nnojoleena eimmolojünüin» (Miqueas 4:3, 4).
Kepieerü wayuu süpüshuaʼa jee talateerü saaʼin sünain aʼyatawaa
Eejeerü piichi sümüin wayuu süpüshuaʼa jee nnojoleena mmoluin naya seema süsütünüin noulia. Talateena waya wapüshuaʼa sümaa tü waaʼinrakat, müsüjeseʼe süküjain tü Bibliakat nnojoleerüin amülain neʼe tü kasa naaʼinrajatkat na kepiainjanakana suluʼu tü mma jeketkat (Isaías 65:21-23).
Ekirajüneena waya
Eʼraajüneechi maʼin Jeʼwaa «sainküin mmakat» saashin tü Bibliakat (Isaías 11:9). Watüjaweerü aaʼu süchiki nukuwaʼipa Jeʼwaa chi Kakumalakai waya otta süchiki tü kasa nukumalakat. Tü watüjaweetkalü aaʼu süpülajatü eeinjatüin wanee anaa akuwaʼipa otta süpüla waaʼinmajüin tü Mmakat, nnojotsü süpülajatüin wakumajüin waʼapüla jee waainjain kasa mojusü sümüin wayuu (Salmo 37:11; Isaías 2:4).
Kateerü soʼu wayuu süpüla kaʼikat süpüshuaʼa
Anasü sukumajia tü Mmakat nutuma Maleiwa süpüla kepiainjanain waya waneepia suluʼu sümaa talatüinjatüin waaʼin (Salmo 37:29; Isaías 45:18). Süpüla eeinjatüin tia nutuma Maleiwa najaʼttirüinjatü tü outaakat (Isaías 25:8). Saashin tü Bibliakat «müiria nnojolüin ouktaa, mojuu aaʼin, aʼyalajaa, je saalii ayuulii» (Alateetkat Mapeena 21:4). Na wayuu oʼttaajeenakana nutuma Maleiwa süchikijee najaʼttirüin tü kasakat süpüshuaʼa, kateerü noʼu waneepia nutuma jee müshiʼiya na wayuu asoʼiraainjanakana aaʼin nutuma (Juan 5:28, 29; Aluwataaushikana [Hechos] 24:15).
Watta naalii na wayuu yapakana maaʼulu süpüla kepiainjanain naya suluʼu tü mma jeketkat nuluwataapeena Maleiwa saaʼu. Mayaainjeʼe nnojoluin lotuin nakuwaʼipa, nachajaain sukuwaʼipa süpüla pansaainjatüin nakuwaʼipa nuʼupala Maleiwa. Nountuin tia süka nekirajaain nüchiki Jeʼwaa chi Maleiwakai jee nüchiki Jesukürisüto, chi nüjünalakai (Juan 17:3, TNM).
Alüʼülaasü maʼin tü kaʼi sajaʼttinnajatkalü oʼu kasa süpüshuaʼa. Pütüjaweere saaʼu tü paaʼinrajatkat süpüla puʼttaainjachin soʼunnaa tia otta süpüla suluʼuinjachin pia tü mma jeketkat, puchunta nümüin wanee aküjai pütchi nüchiki Jehová nikirajaiwa pia sünain tü Bibliakat sükajee tü karaloʼutakat Anainjatka atuma pukuwaʼipa waneepia.
Eesüjaʼa kamalainjeerüle pümüin aashajeʼeraa tüü
AAPIRIA WAYUU
¿Jameerü sukuwaʼipa wayuu nuluwataapeena Maleiwa saaʼu tü Mmakat?
Nütüjaa aaʼu Jesuu niain neʼe Maleiwa eeka süpüla najaʼttirüin tü kasa mojusü müliakalü atuma wayuu. Naaʼinreerü Maleiwa tia sükajee tü Nuluwataayakat. ¿Kasa naaʼinrüitpaka Maleiwa sükajee tü Nuluwatayaakat?
AAPIRIA WAYUU
Anashaatasü maʼin tü Nuluwataayakat Maleiwa
Pikirajaa sünain aipiruasü kasa wanoujainjatka atuma nnojoleenain na keejiakana amüin aapawaa nneerü nnojotka namüinjatüin süntapa Nuluwataaya Maleiwa.
