Kakalia sünain ouwouluin wayuu wainma sutuma nnojoluin sütüjaanüin aaʼu jamüin sülataaka wanee ayuulii. Shiasaʼa mapa, nayaawatüin saaʼu na cientiificokana jamüin sukuwaʼipa tia. Naküjain ayuulin wayuu sutuma gérmenes otta microorganismos, maʼaka saaʼin bacteria otta virus. Sutuma sütüjaanüitpain saaʼu tia, aaʼinmajiraasü wayuu suulia jee achajaanüsü tü shipinjatkat wanee ayuulii. Otta wainma wayuu nnojotka outamaatüin jee nnojoishii kaʼlechein naya.

Eesia waneirua kasa anaka süpüla sütüjaanüin aaʼu. ¿Aneetche pukuwaʼipa pütüjaale saaʼu susoutia pütchikat tüü?

• ¿Eeshiche süpüla weʼraajüin Maleiwa?

• ¿Eeshiche süpüla weʼraajüin Jesukürisüto?

• ¿Paapüitche süchiki sukuwaʼipa Aluwatawaa nutuma Maleiwa?

• ¿Jameetche wakuwaʼipa mapeena?

Wainma wayuu atüjaainnapakana saaʼu tia jee anasü nakuwaʼipa maaʼulu. Meechi piaya pütüjaale saaʼu tia.

«¿Eeyütchejeʼe aküjünüin tü shiimainkat süchiki wanee kasa?», eeshi pümüle. Kapüleesü maaʼulu ayaawataa saaʼu shiimainre tü aküjünakat süka jouluin maʼin tü alawaakat. ¿Jamüsüche makaʼa sukuwaʼipa tia?

Nnojoluitpa sunoujain wayuu nanüiki na poliitikokana, tü sümakat wanee konpainyiia otta tü namakat na aküjaliikana noticia. Kapüleesü sümüin wayuu sunoujain müleka shiimainre tü aküjünakat, süka eein süpüla nanüikin neʼe tü namakat jee nnojorüle naküjain süpüshuaʼa tü kasa alatakat jee naʼalainre neʼe shia. Süka müin tia, nnojotsü sunoujeein wayuu müleka shiimainre tü aküjünakat süchiki wanee kasa otta natüjaain saaʼu kasain maʼin alatüin.

Mayaainjeʼe müin tia, eesü süpüla pütüjaain saaʼu tü shiimainkat süchiki tü kasa püsakirakat maʼin anain. ¿Kasa sukuwaʼipainjatka putuma? Püchajaainjatü susoutia maʼaka püchajaain susoutia waneirua kasa.

Watüjawee aaʼu waneepia tü shiimainkat süchiki wanee kasa. Jamüsüjaʼa Jessica, sütüjaainjatü aaʼu müleka nnojorüle maní saʼaka tü eküülü shiyaʼlajakat. Müsü sünüiki: «Aishaatasü sümüin tü tachonkat shiküle maní, süka eein süpüla outuin shia sutuma. Taashajeʼerüinjeseʼe palajana kasain ashajünüin sünain süta tü eküülü tayaʼlajakat süpüla tatüjaain saaʼu kasain eʼitaanüin saʼaka. Asakitsü taya sünain tia otta eesü taashajaale sümaa tü konpainyiiakat süpüla tatüjaain saaʼu nnojoluin süpalittünüin tü eküütkat sümaa maní. Otta tasakirüin na eʼraajakana tü konpainyiiakat süpüla naküjain tamüin tü shiimainkat süchiki anale saainjia tü eküütkat natuma».

Eesüjaʼa nnojorüle choʼujaain püchajaain waneepia tü shiimainkat süchiki wanee kasa choʼujaaka maʼin süpüla pütüjaain saaʼu, eepajaʼa süpüla paaʼinrüin tü saainjakat Jessica:

• Ekirajaainjachi pia palajana.

• Püsakirüinjatü achiirua wanee kasa.

• Pütüjaainjatü aaʼu naküjale shiimain na püsakirakana.

Paaʼinrüle tia, pütüjaajeerü aaʼu tü shiimainkat süchiki tü püsakirakat maʼin anain. Anuu tü sukuwaʼipainjatkat.

Süpüla sütüjaainjatüin Jessica saaʼu tü shiimain aküjünakat suluʼu tü Wiwüliakat, saaʼinrüin tü saainjawaikat süpüla sütüjaain saaʼu nnojorüle maní saʼaka tü shiyaʼlajakat. Müsü sünüiki: «Jülüjasü maʼin taaʼin tü taashajeʼerakat otta ekirajaasü maʼin taya süpüla tayaawatüin saaʼu tü shiimain süküjakat tü Wiwüliakat». Wainma wayuu aainjakana tü saaʼinrakat Jessica jee natüjaaitpa aaʼu tü sümakat tü Wiwüliakat süchiki pütchikat tüü:

• ¿Kasapülajanache eeka waya?

• ¿Kasache maʼin alataka nümüin wanee wayuu outapa nia?

• ¿Jamüsüche joutka maʼin müliaa?

• ¿Kasache naaʼinreetka Maleiwa süpüla najaʼlajeʼerüin wamüliala?

• ¿Kasache choʼujaaka wamüin süpüla anain wakuwaʼipa sümaa wapüshi?

Pütüjaajeerü aaʼu tü shiimainkat süchiki tia otta süchiki waneirua kasa, müleka paashajeʼerüle tü Wiwüliakat otta püchajaale pütchi suluʼu www.dan124.com.