Tü shiimainkat süchiki tü alateetkat mapeena
«¿Jameetche wakuwaʼipa mapeena?», eesü müirüle pünüiki. Saashin tü Wiwüliakat, eesü wainma kasa shiʼreetka wayuu süpüshuaʼa soʼu palit kaʼi.
Nüküjain Jesuu kojuyasü kasa wayaawateetka atuma «sülüʼülüin nükalia Maleiwa süpüla aluwatawaa» (Lucas 21:31). Nüküjain eeinjatüin atkawaa, emetuluinjatüin sukutkujaain tü mmakat, jouleerüin ayuulii otta jamü, eeshaatasü maʼin tia maaʼulu (Lucas 21:10-17).
Süküjatüjülia tü Wiwüliakat, mojushaatainjatüin maʼin nakuwaʼipa na aluwataashiikana saaʼu mma, sülüʼütpa sükalia süpüla «sajaʼttüinjatüin tü kasakat süpüshua». Paashajeʼera süchiki tia suluʼu 2 Timoteo 3:1-5. Piʼreerü shiain naaʼinrüin otta shiain nakuwaʼipain maʼin tia na wayuukana maaʼulu.
Tia makat, shiyaawasesü shiiʼiratünajatüin jee anashaatainjatüin tü kasa shiʼreetkat wayuu soʼu palit kaʼi nuluwataapa Maleiwa (Lucas 21:36). Süküjain tü Wiwüliakat, nunouteerüin Maleiwa tü mmapaʼakat jee aneerüin wayuu nutuma. Wekirajaa sünain tia.
WANEE SUKUWAʼIPA ALUWATAWAA ANAKA MAʼIN
Eʼitaanüsü najapuluʼu Jesuu wanee aluwatawaa «otta kojutuinjachi nia atumawaa süpüla shiʼyataainjatüin wayuu nümüin sainküinjee mmakat otta saʼakajee eʼirukuukat süpüshuaʼa. Waneepieerü tü nuluwataayakat otta nnojoleerü ajaʼttinnüin shia» (DANIEL 7:14).
¿Jamaluʼulu tia? Tia maluʼulu nüikaleʼerüin Maleiwa wanee Aluwatawaa laülaainjatka saaʼu Mmakat süpüshuaʼa, alanaʼaleesia shia suulia suluwataaya wayuu, nia aneekünaka Jesuu süpüla Aluwatawaa. Eʼreena waya anaa süpüla kaʼi süpüshuaʼa sutuma Nuluwataaya Maleiwa.
NNOJOLEERÜ AYUULII
«Nnojoleechi eein wanee wayuu eekai ‹ayuuishi taya› nümeechin» (ISAÍAS 33:24).
¿Jamaluʼulu tia? Tia maluʼulu nnojoleerü eein wanee kasa aika wanain jee ayuuika atuma waya. Eʼreena waya anaa, nnojoleena waya outuin.
JIMATEERÜ WAAʼIN
«Najaʼlajeʼerüin tü atkawaakat sainküin tü mmakat» (SALMO 46:9).
¿Jamaluʼulu tia? Tia maluʼulu nnojoleerüin eein wanee kasa jiwaʼataka atuma saaʼin wayuu jee nnojoleerü müliain waaʼin sutuma tü atkawaakat.
ANAMIEENA NA WAYUU KEPIAKANA SAAʼU TÜ MMAKAT
«Nnojoleechi chi mojulaashikai [...]. Akanasaʼa na wayuu anamiakana namüinjeerü tü mmakat» (SALMO 37:10, 11).
¿Jamaluʼulu tia? Tia maluʼulu nnojoleerüin wayuu mojulaasü, naya eeinjanaka neʼe na wayuu oonoweekana sümaa nünüiki Maleiwa.
PAʼARAIISEERÜ TÜ MMAKAT
Akumajeena «piichi süpüla kepiainjanain naya suluʼu; shiimain napünajeenain süpüla neküinjatüin süchon naʼttia» (ISAÍAS 65:21, 22).
¿Jamaluʼulu tia? Tia maluʼulu meerüin aka wanee apain süpüshuaʼa tü Mmakat. Shieerü naaʼinraka Maleiwa tü wachuntakat nümüin: saainjünüin tü keeʼireekat naaʼin «yaa mmapaʼa» (Mateo 6:10, TNM).
Eesüjaʼa kamalainjeerüle pümüin aashajeʼeraa tüü
SUSOUTAKA EʼIPAJEE TÜ BIBLIAKAT
¿Kaseerü eeka sutuma Nuluwataaya Maleiwa?
Pikirajaa sünain tü naaʼinrajatkat Maleiwa suluwataapa Nuluwataaya yaa mmapaʼa.
