EESHII EEKAI «NNOJO» NAMÜIN. Naashin wanee tottoot, wekirajaale sünain tü Wiwüliakat süpüla waaʼinrüin tü sümakat müsü aka saaʼin ekirajaa tepichi maaʼulu sünain Química sükajee wanee karaloʼuta ashajuushika soʼu 1920. Eeshijaʼa nüsakireechire pia wanee wayuu mojutkai amüin tü Wiwüliakat müleka pikirajaweechire sünain sükaraloʼutse wanee computador eeka laülaairüin süpüla pütüjain saaʼu jamüinjatüin sukuwaʼipa wanee jeketü putuma. Naashin wayuukana naainnua, nnojotsü kasain anain apüla tü Wiwüliakat.

¿Choʼujaasüche shikirajaanüin anain tü Wiwüliakat sümaa kakaliairüin süshajuushin otta eeitpain maaʼulu tü tecnología münakat? Maaʼulu, wainma pütchi eʼitaanaka suluʼu Internet otta blog eere süküjünüin sümüin wayuu tü saaʼinrajatkat. Otta eeshii na psicólogo, gurú otta ashajülii karaloʼuta ojuʼitawaikana suluʼu telewisoot. Jee wainma karaloʼuta aashajaaka süchiki tü saaʼinrajatkat wayuu, oikaanüsü tia karaloʼutakalüirua otta kooʼomüinsü nawashirüin na akumajakana shia.

Mapüleeitpa maaʼulu achajawaa pütchi süchiki wanee kasa watüjaweeka aaʼu. ¿Kasapülajatka maʼin waashajeʼerajatka wanee karaloʼuta alüʼütka süpüla 2.000 juya süchikijee süshajünüin? ¿Shiimainche tü namakat na mojutkana amüin tü Wiwüliakat? Naashin nayakana, tü Wiwüliakat müsü aka saaʼin wanee karaloʼuta laülaa süchikimaajatka Química otta maʼaka saaʼin sükaraloʼutse wanee computador laülaa. Nnojotpejeʼe pansaain tü namakat. Aʼwanajaamaatüsü tü kanüliakat ciencia otta tecnología, shia matüjainka aʼwanajawaa tü choʼujaakat sümüin wayuu. Choʼujaasü namüin na wayuukana talatüin otta jimatüin naaʼin, choʼujaasü namüin aaʼinraa kasa talateetka atuma naaʼin, anain naya sümaa napüshi otta kaʼaleewain naya.

Mayaapejeʼe kakaliairüin tü Wiwüliakat, aashajaasü süchiki tü wamayütkat otta waneirua kasa choʼujaaka sümüin wayuu. Süküjainya nünüikin shia chi Kakumalakai waya. Aashajaasü süchiki tü anakat süpüla waaʼinrüin otta tü waaʼinrajatkat sülatüle wanee kasa wamüin (2 Timoteo 3:16, 17). Süpülajatüin kaʼikat süpüshuaʼa tü pütchi suluʼukat otta jalouijeerü shia sümüin wayuu waneepia. Anuu sünüiki tü Wiwüliakat: «Anasü sukuwaʼipa wayuu sutuma tü süpülainkat Nünüiki Maleiwa» (Hebreokana 4:12, TNM).

¿Nnojoluitpache kasain anain apüla tü sümakat tü Wiwüliakat süka kakaliairüin shia? ¿Anataapa sukuwaʼipa wayuu sutuma? Pütüjaajeerü aaʼu tia sutuma rewiisütakat tüü. Mapa, eejeerü waneirua rewiisüta aashajaaka süchiki wanee kasa anashaataka maʼin maʼaka saaʼin tüü.