Anuu sünüiki Rosi: «Jülüjasü taaʼin waneepia tü kasa alatakat tamüin otta müsia jülüjasü taaʼin mojuleejeerüin maʼin shia». ¿Jarat tü pütchi suluʼujeejatkat tü Wiwüliakat akaaliinjaka shia? Wanee shia Mateo 6:34 (TNM): «Nnojo jüshapataain aaʼin saaʼu tü alateetkat wattaʼa. Süka jamüin, eejeerüin tü kasa shapaakalü atuma jaaʼin soʼu kaʼikat tia». Saashin Rosi, sükaaliinjain shia tia pütchikat süpüla nnojoluin shapaain maʼin saaʼin saaʼu tü kasa eekat süpüla sülatüin sümüin, müsü shia: «Watta maʼin saaliin tü kasa alatakat tamüin süpüla jülüjakuʼu müinjatüin taaʼin wanee kasa nnojoliyütka alatüin».

Müsia neʼe Yasmín shapaasü maʼin saaʼin waneepia sutuma tü alatakat sümüin, müsü shia: «Aʼyalajawaisü taya waneepia otta eesü nnojorüle tatunkeein saʼwai. Mojusü maʼin taaʼin sutuma jülüjain taaʼin waneepia kasa nnojotkalü anain». ¿Jarat tü pütchi akaaliinjakat shia? Tü sümakat 1 Pedro 5:7 (TNM): «Juuʼulaainjatü nüpüla Maleiwa süpüshuaʼa tü kasa shapaakalü atuma jaaʼin. Süka jamüin, naaʼinmajüin jia». Anuu sooʼomüin sünüiki Yasmín: «Oʼuraajüsü taya waneepia nümüin Jeʼwaa, mapa asoutushi nia shiʼipajee tü tachuntakat nümüin, anasü maʼin taaʼin nutuma. Eepejeʼe kaʼi eere jülüjajaain taaʼin kasa nnojotka anain, akatsaʼa tatüjaaitpain saaʼu tü taaʼinrajatkat süpüla eejiraain taya sümaa tia».

Anuu sünüiki Isabella: «Eesü nnojorüle waainjamaatüin wanee kasa otta wooʼulaain shia süpüla waaʼinrüin  waneemüin kaʼi. Müsia shia nutuma chi tashikai jee maʼwaisia shia tatumaya. Saaʼin tamüin, jemeijiraasü taya sümaa müin takuwaʼipa maʼaka naaʼin chi tashikai. Eesü nnojorüle taaʼinrüin wanee kasa choʼujaaka maʼin, nnojotsü taaʼinrüin süpüleerua waneirua kasa maʼaka saaʼin anaajaa telewisoot jee shiale neʼe süpüleerua eemerawaa. Tia shia wanee kasa nnojotka anain süka shapaain saaʼin wayuu sutuma jee nnojotsü anain tü shiʼyataainkat». Sükaaliinjain shia tü sümakat 2 Timoteo 2:15: «Anakaja müleka ayatüle pia sünain piʼyataain nümüin Maleiwa süka süpüshua paaʼin [...]. Nnojoleechi pia japülin nuʼupala müleka lotüle pukuaippa sünain ekirajaa tü shiimüinkat». Müsü Isabella süchiki tia: «Nnojotsü mojeein naaʼin Jeʼwaa tatuma sükajee tooʼulaawalin tü taaʼinrajatkat soʼukai süpüla taaʼinrüin shia wattaʼa». Sunouteʼerüin Isabella tü sukuwaʼipakat.

Saashin Kelly, shiʼitaanüle wanee aʼyatawaa süpüleerua saaʼinraleein shia soʼu tü kaʼi saapajatkalü oʼu shia. Sutuma tia shapaasü saaʼin, ayaʼlajüsü otta nnojorüleesia atunkeein. Mojusü neʼe sukuwaʼipa. Sükaaliinjain shia tü sümakat Proverbios 13:16 (TNM): «Chi wayuu ayaawatakai nukuwaʼipa jaʼyeerü naaʼu sünain kekiin maʼin nia, akaisaʼa chi nnojoika kasain anain apüla mojusü tü naaʼinrakat waneepia». Anuu sünüiki Kelly süchikijee süsakireʼerüin saaʼin sünain pütchikat tia: «Anasü maʼin pansaale watuma tü waaʼinrajatkat sümaa keisalain waya sümüin wakuwaʼipa. Maaʼutpünaa tashajawalüin sünain wanee karaloʼuta tü kasa taaʼinrajatkat, sükajee müin shia tatuma, taaʼinramaatüin shia, nnojotsü tooʼulaain sülatüin kojuya kaʼi».

Saashin Cristina, nuuʼulaain shia chi suʼwayuusekai otta nüpütüin shia namaa na pienchishiikana süchonnii. ¿Jarat pütchi suluʼujeejatka tü Wiwüliakat akaaliinjaka shia? Tü sümakat Proverbios 17:17 (TNM): «Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin». Achuntusü shia kaaliinwaa namüin na suwalayuukana sünain anoujaa. ¿Kasaka naaʼinrüin süpüleerua? «Antawaishii na taʼaleewainyuukana süpüla nakaaliinjain taya, eeshii eekai nantirüin eküülü wamüin jee waneirua kasa. Apünüintua maʼin wakolojooin otta watta maʼin naalii na tawalayuu antakana sünain akaaliinjaa waya. Eeshi waneʼeya achajaakai aʼyatawaa tapüleerua, waneepiashii na taʼaleewainkana tamaa».

Diana tü wayuu waküjayütkalia achiki, müliasü maʼin shia saashin sutuma sümüiwaʼain shia otta eejiraain sümaa tü kasa alatakat sümüin, anuu sünüiki: «Müsü eeʼeraakai taaʼin naʼaka na wayuukana sümaa nnojoluin süpüla talatüin taaʼin, maaʼatsü tamüiwaʼakaija taaʼin». Wanee pütchi akaaliinjaka shia, suluʼusü Salmos 68:6 (TNM): «Anasü naaʼin nutuma Maleiwa na wayuu namüiwaʼakana, müshii nepialuʼukai aaʼin nutuma». Sümaka Diana: «Tayaawata aaʼu nnojoluin piichin neʼe tü süküjeekalü achiki tia wetsiikulokot, shia süküjeeka achiki tü wakuwaʼipakat nutuma Jeʼwaa maʼaka saaʼin anain maʼin waaʼin otta paaʼinwaain waya namaa na aikana apüla nia. Tatüjaapejeʼe saaʼu choʼujaain tarütkaainjatüin nünainmüin Jeʼwaa süpüla paaʼinwain taya namaa na waneinnua. Sükaaliinjain taya tü sümakat Salmos 37:4 (TNM), müsü mayaa: ‹Talata paaʼin sünain aʼyatawaa nümüin Jeʼwaa, naapeetkalaka pümüin tü suchuntakat paaʼin›».

Sümaka Diana mapa: «Tatüjaaitpa aaʼu choʼujaain maʼin teʼitaainjatüin taaʼin nünain Jeʼwaa; nnojoishi eein eekai müin aka naaʼin. Süpüla aleewainjatüin taya namaa na wayuu aʼyataakana nümüin Jeʼwaa, tashajüin sünain wanee karaloʼuta tü kasa eekat süpüla taaʼinrüin namaa. Maaʼutpünaa jülüjasü neʼe taaʼin tü kasa anasü eekat nanain na waneinnua, nnojotsü jülüjain taaʼin tü nnojotkalü anain sünain nakuwaʼipa».

Na aküjaliikana pütchi nüchiki Jeʼwaa, wayuu neʼe maʼaka paaʼin piakai. Watta saalii tü kasa mojusü eejiraakalü amaa naya. Shiasaʼa sutuma nekirajaain sünain tü Wiwüliakat, nnojotsü jülüjain naaʼin nakuwaʼipa neʼe namüiwaʼa nachajaain sukuwaʼipa süpüla nakaaliinjain na waneinnua. Anataʼaleesüjaʼa aʼaleewajawaa namaa. Mepire tü ayuulii wanainkat jee niale outuin wanee wapüshi, ¿sükaaliinjeenache waya tü sümakat tü Wiwüliakat süpüla eejiraain waya sümaa tia?