Saashin Diana, tü wayuu waküjakalü achiki suluʼu tü palajatkat ekirajaaya, asüsü maʼin shia yootshi süka shapaain maʼin saaʼin sutuma tü alatakat sümüin. Nnojotsü süküjain tü Wiwüliakat mojuin asaa yootchon yootshi, akatsaʼa sümüin wamüin: «Nnojo namaain pia na asüliikana maʼin wiino» (Proverbios 23:20, TNM). Watta maʼin saalii kasa mojusü eeka sutuma sülanaʼaleein nüsüin wayuu. Eeshii eekai ayuulin sutuma, eeshii eekai nooʼulaajiraain suulia naʼwayuuse otta watta maʼin naalii na wayuu tepichiyüliikana outaka juyawai sutuma tü yootshikat. Noonoole napüshuaʼa na wayuukana sümaa tü sümakat tü Wiwüliakat, nnojotsüje alatüin tia.

Saaʼinrüin Diana tü sümakat tü Wiwüliakat, müsüjeseʼe sümüin: «Tayaawata aaʼulu mapa nnojoluin anoutaain takuwaʼipa sutuma tü asaakat yootshi. Teʼitaain suluʼu takuwaʼipa tü sümakat Filipos 4:6, 7, müsü mayaa: ‹Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa [...] tü shapaakat atüma jaaʼin›. Wanaa sümaa shapaain maʼin taaʼin sutuma tü alatakat tamüin, oʼuraajawaisü taya aipaʼa süpüla taküjain nümüin Jeʼwaa jamüin maʼin taaʼin; taküjain nümüin üttashaatale taaʼin sutuma tü alatakat tamüin otta mojuin taaʼin sutuma. Tachuntuin nümüin Jeʼwaa nükaaliinjaiwa taya. Jaʼipa kaʼi, tachajaain maʼin sukuwaʼipa süpüla nnojoluin mojuin maʼin taaʼin. Sutuma toʼuraajüin nümüin Jeʼwaa shia jülüjaka taaʼin tü kasa anasü eekat tamaʼana,  nnojotsü jülüjain taaʼin tü nnojotkat eein tamaʼana. Ooʼulaaitpa taya suulia asaa süka kojutushaatain tamüin tü anaa naapakat Jeʼwaa tamüin».

Wanee kasa kapüleeka maʼin jee müliaka atuma saaʼin wayuu shia tü amaʼüjirawaakalü akuwaʼipa. Eepejeʼe süpüla sükaaliinjain waya tü Wiwüliakat suulia müliajüin waaʼin. Süküjain süchiki waneirua kasa sünainpünaaka tia maʼaka saaʼin saʼalaajaale wanee jiet nüpaala wanee toolo jee niale chi toolokoi suʼupala wanee jiet otta shiale tü anajaakat shiyaakua wayuu maichesat. Anuu nünüiki wanee jimaʼai Samuel nünülia: «Mapüleepuʼusat tamüin aʼalaajawaa suʼupala wanee jiet, jaʼitashi nnojolin müliain taya shiiʼiree. Tayaawatapa saaʼu müliain shia teeʼiree aʼalajaʼaleeshia maʼin taya suʼupalapünaa». Sutuma «aʼalaajaashi pia waneepia suʼupala wayuu» nümünüin, macheʼereesai nia süchiirua tia. Akatsaʼa mojuin naaʼin mapa sutuma naaʼinrüin tia. Anuuka nünüiki: «Aʼalaajawaa suʼupalapünaa wayuu nnojotsü anain, kapülasü neʼe paaʼin pukuwaʼipa pümüiwaʼa».

Naashajeʼerüin Samuel wanee pütchi napülajatü na jimaʼaliikana suluʼu jw.org otta müsia jülüjasü naaʼin tü sümakat Proverbios 20:11, tü makat mayaa: «Sükajee tü kasa anasü naaʼinrakat wanee jintüi, jaʼyasü naaʼu sünain lotuin nukuwaʼipa». Sükaaliinjain nia tia pütchikat süpüla niyaawatüin saaʼu mojuin tü naainjakat. Anuu sooʼomüin nünüiki: «Tayaawata aaʼu nnojoleerüin anain nukuwaʼipa wanee wayuu kaʼwayuusepa nia naaʼinrüle tü taaʼinrakat. Jülüjasü taaʼin jameerüin saaʼin tü taʼwayuusekat shiʼrüle taya sünain taʼalaajaain suʼupalapünaa wanee jiet». Niiʼiratüin mapa Samuel nukuwaʼipa sutuma niyaawatüin saaʼu nnojoluin anain tü naaʼinrakat otta müsia sükaaliinjain nia tia süpüla nnojoluin sünainpünaain tü amaʼüjirawaakalü akuwaʼipa.

Kamalainpuʼusü maʼin nümüin Antonio anajaa shiyaakua wayuu maichesat. Mayaapejeʼe alin maʼin tü nuʼwayuusekat nüpüla, ayatshia neʼe nia anajüin tia. Sükaaliinjain nia tü sümakat 1 Pedro 5:8 (TNM), müsü mayaa: «Eeja jaaʼin nuulia chi Yolujaakai süka jüʼünüüin nia. Müshi nia aka naaʼin wanee wasashi jashichikai maʼin, nüchajaain chi nikeekai amüin». Anuu nünüiki Antonio: «Wainma maʼin shiyaakua wayuu maichesat maaʼulu, weʼrapa shia, wekiiruʼusü waneepia. Tayaawatapejeʼe saaʼu sutuma tü wetsiikulo taashajeʼerakat, niain Satanaa kanainjeejachin tü ayaakua yarütsü joutkat maʼin. Jülüjasü taaʼin waneepia tia. Nia neʼe Jeʼwaa akaaliinjeechika taya süpüla anainjatüin takuwaʼipa sümaa taʼwayuuse, kekiinjachin maʼin taya otta süpüla eejüinjatüin taaʼin». Akaaliinjünüshi Antonio sükajee tü sümakat tü Wiwüliakat, nuuʼulaaka suulia anajaa shiyaakua wayuu maichesat otta anasü nukuwaʼipa sümaa nuʼwayuuse.

Shiimain eein pütchi suluʼu tü Wiwüliakat akaaliinjeenaka waya suulia mojuin wakuwaʼipa. Wekiraja jooluʼu jamüin wakaaliinjia sutuma tü Wiwüliakat kapüleere tü alatakat wamüin.