Aire waya nüpüla wanee watünajutü, nükaalinjeena waya kasale alatüin wamüin. «Naʼaleewainrejeʼe waya Maleiwa, ¿jamakaʼa nnojoliika nükaalinjain waya?», eeshii na makana. Wainmapejeʼe kasa anasü naaʼinraka Maleiwa wapüleerua otta nunouteerü sukuwaʼipa tü kasa müliakalü atuma waya. ¿Kaseerü naaʼinraka Maleiwa wapüleerua?

Najaʼttireechi Maleiwa chi shikiishikai tü mojulawaakat. Süküjain wamüin tü Wiwüliakat jaralin chia shikiishikai, müsü shia: «Tü wayuu manoujainsatkalüirua suluʼu mmakat süpüshua, nia aluwataaka saaʼu chi Yolujaakai» (1 Juan 5:19). Naashin Jesuu, nia chi Yolujaakai aluwataaka saaʼu wayuu manoujainsat (Juan 12:31). Müliasü maʼin saaʼin wayuu nutuma. ¿Kaseetka naaʼinrüin Maleiwa süpüla nunoutuin tia?

Aluwataaneechi Jesuu nutuma Jehová soʼu palit kaʼi süpüla nuʼutajachin naaʼin «chi Yolujaakai, chi eimolojookai wayuu seema ouktaa» (Hebreokana 2:14; 1 Juan 3:8). Saashin tü Wiwüliakat nütüjaa aaʼu chi Yolujaakai «sülüʼülüin nükalia» süpüla nuʼutunuin aaʼin (Alateetkat Mapeena 12:12). Otta najaʼlajeʼereena Maleiwa na mojulaashiikana (Salmo 37:9; Proverbios 2:22).

Najaʼttirapa Maleiwa tü kasa mojusükat, nikeraajeerü tü keeʼireetüjütkalia naaʼin süpüleerua wayuu jee süpüleerua tü Mmakat. ¿Kasa eejeetka nutuma Maleiwa?

Aneerü otta jimateerü saaʼin wayuu. «Na wayuu anamiakana namüinjeerü tü mmakat otta shiimain talateenain naya süka jimateerüin naaʼin» (Salmo 37:11).

Jouleerü emiraa. «Jouleerü maʼin eküülü saaʼu tü mmakat; otta wainmaleejeeria saaʼupünaa tü uuchikalüirua» (Salmo 72:16).

Aneerü shipia wayuu otta shiʼyataain. «Shiimain nakumajeenain piichi süpüla kepiainjanain naya suluʼu; shiimain napünajeenain süpüla neküinjatüin süchon naʼttia [...] Talateerü naaʼin sünain aʼyatawaa na wayuu taneekajalakana» (Isaías 65:21, 22).

¿Aashin kepieein pia suluʼu wanee mma eekai müin aka saaʼin tia? Meeria sukuwaʼipa tü Mmakat.

Ayuuishii jee outushii waya maaʼulu, anoutaajeetpejeʼe tia soʼu palit kaʼi. Saaʼujee naapajiraain nikii Jesuu, «nnojoliinjana outuin na eʼitaakana naaʼin nünain otta katüinjatü noʼu waneepia» (Juan 3:16, TNM). ¿Kasa anasü eejeetka sutuma tia?

Nnojoleerü ayuulii. «Nnojoleechi eein wanee wayuu eekai ‹ayuuishi taya› nümeechin. Na wayuu kepiainjanakana saaʼu tü mmakat, nayeena na alatinnakana oulia tü naainjalakat» (Isaías 33:24).

Nnojoleerü outaa. «Müiria nnojoluin eein outaa. Müiria nnojoluin eein aʼyalajaa, najaʼttireerü tia Jehová, chi Laülaakai saaʼu kasa süpüshuaʼa» (Isaías 25:8).

Kateerü soʼu wayuu. «Aluʼusaʼa nünainjee chi Wasenyotsekai Jesuu, naapüin Maleiwa wamüin kataa oʼuu» (Roma 6:23, TNM).

Asoʼiraajeerü naaʼin na wayuu outushiikana. Asoʼiraajeerü saaʼin «tü wayuu ouktüsükalüirua, makat aka wayuu eekai saaʼinrüin tü anasükat otta türa eekai saaʼinrüin tü mojusükat» (Aluwataaushikana 24:15). Asoʼiraajeerü naaʼin na outushiikana sünainjee naapajiraain nikii Jesuu.

¿Kaseerü naaʼinraka Maleiwa süpüla nuuntuin tia?

Nikeraajeerü Maleiwa tü keeʼireetüjütkalia naaʼin süpüleerua wayuu jee süpüleerua tü Mmakat. Niʼitaajeechi Jesukürisüto süpüla aluwatawaa iipünaajee (Salmo 110:1, 2). Tia, shiaʼaya neʼe tü nachuntajatkat na nikirajüinkana Jesuu, müinjatü nanüiki naashin: «Taata Maleiwa chakai iipünaa, [...] kasataalejese püntüin maalü waʼakamüin sünain aluwatawaa» (Mateo 6:9, 10).

Aluwataweechi Maleiwa saaʼu tü Mmakat otta najaʼttireerü tü kasa müliakalü atuma wayuu. Aneerü maʼin sukuwaʼipa tia aluwatawaakat. Müsüjeseʼe nüküjain maʼin Jesuu «tü pütchi anasükat sümüin wayuu süchiki nukuaippa Maleiwa sünain aluwatawaa» otta nuluwataain na nikirajüinkana süpüla naaʼinrajatüin tia (Mateo 4:23; 24:14).

Anashaatasü maʼin tü naainjeetkat Jehová wapüleerua saaʼu alin maʼin waya nüpüla. ¿Aashin piʼraajeein Maleiwa jee aleeweein pia nümaa sünainjee pütüjaaitpain saaʼu tia? ¿Kasa anasü piʼreetka paaʼinrüle tia? Paashajeʼera tü wane pütchikat süpüla pütüjaain saaʼu.