Kepiashi John sümaa Mary a suluʼu wanee mma eere nakolojooin na wayuu filipinajeʼewaliikana süpüla aʼyatawaa jee najayatüin maʼin süpüla naküjain pütchi namüin. Ekirajüsü Mary wayuu suluʼujeejanakana wanee mma naata otta wane suluʼujeejanakana suumain soʼutpünaa tü ayuuliikat COVID-19. ¿Kasa saaʼinraka süpüla suuntuin tia?

Süsakirawalin Mary na shikirajüinkana: «¿Piʼraajüin wayuu eekai shikirajaweein tamaa sünain tü Bibliakat?». Aa namüle sümüin, pümaa namüin tekirajeenain naya. Sünainjee süsakirüin na shikirajüinkana sünain tia, kojuya na wayuu ekirajaakana mapa sümaa. Suuntuin tia sükajee eein wayuu kojutuka amüin Nünüiki Maleiwa, müsüjeseʼe naküjeein shia sümüin napüshi jee sümüin naʼaleewainyuu. Jülüjaa waaʼin jamüin sukuwaʼipa sutuma Mary.

Eesü wanee shikirajüin Mary kanüliasü Jasmin. Süküjain achiki ekirajaweein pienchisü wayuu sünain tü Bibliakat. Eejatü wanee Kristine sünülia, kamalainsü sümüin shikirajaain sünain tü Bibliakat. Suchuntakat sümüin Mary shikirajüinjatüin shia piantua soʼu semaanakat. Süsakiraka shia Mary: «¿Pütüjaa aaʼu jaralin ekirajaweein tamaa sünain tü Bibliakat?». «Aa», sümaka. «Ekirajaweeshii na taʼaleewainkana». Müsüjeseʼe soʼu jeʼra semaana süchikijee, shikirajaka Mary pienchisü saʼaleewainyuu Kristine. Shiasaʼa mapa süküjain Kristine sümüin Mary nachiki waneinnua wayuu ekirajaweekana sünain tü Bibliakat. Nayasaʼa nayainnua naküjaka nachiki ekirajaweein waneinnua.

Nnojoishii neʼe nayain süküjain achiki nekirajaweein na saʼaleewainyuukana Kristine. Süküjaka achiki nekirajaweein na süpüshikana chakana Filipinas sünain tü Bibliakat. Saashajaaka sümaa tü süchon kanüliakat Andrea süpüla shikirajaainjatüin sünain tü Bibliakat. Wainmajüsü saaʼin Andrea süpüla shikirajaain sünain tü Bibliakat namaa na Aküjaliikana pütchi sutuma saapüin pütchi mojuluʼut nachiki, nnojoishii anoujain naya nünain Jesús otta shia neʼe nekirajaka sünain tü Antiguo Testamentokot saaʼin sümüin. Shiasaʼa mapa shikirajaapa sünain tü Bibliakat shiyaawata aaʼu alawaain neʼe tü aküjünakat paala sümüin. Müsüjeseʼe sümakat: «Suluʼujeejatüle shia tü Bibliakat shiimainjaʼa mata shia».

Shiasaʼa mapa süküjaka Andrea sümüin Mary ekirajaweein piamasü saʼaleewain otta wanee aʼyataajiraaka sümaa sünain tü Bibliakat. Eejatü wanee süʼirü Andrea kanüliasü Angela, moʼupaʼasat shia. Shiasaʼa soʼu wanee kaʼi shikirajaapa Andrea sümaa Mary eejatü shia yala sünain aapajaa tü pütchikat sümaa nnojoluin natüjaain aaʼu nayakana. Sümaka Angela sümüin Andrea: «Ekirajaweesü taya sümaa Mary sünain tü Bibliakat». Kamalainsü maʼin sümüin Angela tü shikirajakalü  anain. Atüjamaatüsü maʼin shia süpüleerua pütchi suluʼujeejatkat tü Bibliakat. Süküjaka sümüin Mary shikirajaweein pienchitua soʼu semaanakat. Sükaalinjain shia Andrea süpüla saapajawalin tü outkajawaakat suluʼupünaa internet.

Wanaa sümaa shikirajaain Mary sümaa Kristine eepuʼushi arütkaain Joshua, chi suʼwayuusekai Kristine, sünain aapajaa. Sütüjaapa aaʼu Mary naapajawalin tü pütchikat süsakaka nia nikirajaweere sünain tü Bibliakat sümaa. Nümaka: «Anakajaʼa, taapajeerü neʼe shia. Nnojolinjachipejeʼe püsakiijüin taya oʼuneeisa taya». Shiasaʼa wanaa sümaa yalain nia aapajüin tü pütchikat, nia asakiraka maʼin suulia Kristine jee nüküjaka nikirajaweein sünain tü Bibliakat.

Sünainjee tü süsakirakat anain Mary kojuyashii na wayuu ekirajaakana sümaa sünain tü Bibliakat. Sülatiraka naya namüin waneinnua wawalayuu süpüla nekirajüin naya. Suluʼujee pienchisü mma eeshii maʼaka 28 wayuu ekirajaakana sünain tü Bibliakat sümaa Mary.

Woutiisasü Jasmin tü shikirajüinkat Mary, aaʼuriiroʼu soʼu 2021. Otta Kristine woutiisasü shia maayoʼu soʼu 2022. Kepiasü shia maaʼulu chaa Filipinas namaa na süpüshikana. Otta müsia woutiisashii na wayuu shiʼraajiraakana Kristine sümüin Mary, maʼaka jeʼra kashi süchikijee tia woutiisaka Angela otta pürekutsootka rekulaat maaʼulu. Otta Joshua, chi suʼwayuusekai Kristine sümaa Andrea tü nachonkot otta na wane ekirajaakana sünain tü Bibliakat, ayatüshii naya sünain ekirajawaa.

Soʼutpünaa nakalia na anoujashii namaiwajanakana kojuya na wayuu anoujakana, anoujasü napüshi jee naʼaleewainyuu (Juan 1:41, 42₁; Aluw. 10:24, 27, 48; 16:25-33). Anashi püsakirüle na pikirajüinkana neʼraajüle wayuu eekai shikirajaweein sünain tü Bibliakat. Müleka wasakirüle wayuu sünain tia eesüjaʼa süpüla wousütüin wayuu eekai shikirajaweein sünain tü Bibliakat.