1. ¿Jamüsü watüjaaka saaʼu pülain maʼin Nünüiki Maleiwa? (Piirakaa sümüin tü ayaakuaakat).

WATÜJAA aaʼu wayakana anoujashiikana nünain Jeʼwaa shiimain sunoutaain sukuwaʼipa wayuu sutuma pülain Nünüiki Maleiwa (Heb. 4:12, TNM). Anoutaasüjeseʼe wakuwaʼipa otta sukuwaʼipa wayuu sutuma tü sümakat tü Wiwüliakat. Eeshii na kaʼruwaraliipuʼukana, na akaijüliipuʼukana yüi otta na aʼluwajiraapuʼukana nakuwaʼipa. Eeshii na mojupuʼukana aaʼin mayaainjeʼe washirüin naya (Ecl. 2:3-11). Wainmainna na wayuu anoutaainakana akuwaʼipa sutuma Nünüiki Maleiwa sümaa kaʼatapalain naya sutuma. Eesüjaʼa waashajeʼerüirüle süchiki nakuwaʼipa naya wawalayuukana suluʼu tü pütchikat «Sunouteʼerüin nakuwaʼipa tü Wiwüliakat», ojuʼitawaisü suluʼu Aapiria Wayuu. Jaʼitainna kakaliainnain waya sünain anoujaa, choʼujaasia waashajeʼerüin tü Wiwüliakat süpüla aleewainjanain maʼin waya nümaa Jeʼwaa.

2. ¿Kasa nanouteʼeraka sünainjee nakuwaʼipa waneinnua anoujashii namaiwajana sutuma Nünüiki Maleiwa?

² Watta naalii wayuu eeʼiranajaaka akuwaʼipa maaʼulu yaa  sutuma nekirajaain sünain tü Wiwüliakat. Nnojotpejeʼe jeketüin müin sukuwaʼipa wayuu, majanainka na anoujashii eejanakana nakalioʼu na nikirajüinkana Jesuu, neeʼiratüin nakuwaʼipa (paashajeʼera 1 Corinto 6:9-11). Süchikijee nüküjain Pablo süchiki nakuwaʼipa na wayuu nnojoliinjanakana suluʼuin Nuluwataaya Maleiwa, müshi nia namüin anoujashiikana: «Shia tü naaʼinrapüʼükat waneeirua jaʼaka paalainka». Neeʼiratüin nakuwaʼipa naya anoujashiikana sutuma Nünüiki Maleiwa jee nutuma chi naaʼinkai Maleiwa. Ayatapajaʼa eein na aaʼinrakana kasa mojusü süchikijee nekeroluin sünain anoujaa. Saashin tü Wiwüliakat, eejachi wanee anoujashii chainjachikai chaa iipünaa ojuʼitinnaka naʼakajee na wane anoujashiikana sutuma kaainjalain nia. Shiasaʼa niyaawajaapa suulia naainjala, ekerotushi nüchikuaʼa sünain anoujaa (1 Cor. 5:1-5; 2 Cor. 2:5-8). Talatüsü waaʼin sutuma wainmain na wawalayuu anouteʼerakana nakuwaʼipa sutuma tü Nünüikikat Maleiwa.

3. ¿Kasa wekirajaainjatka anain sünain ekirajaayakat tüü?

³ Pülashaatasü tü Nünüikikat Maleiwa. Sutuma naapüin shia wamüin, atüjainjana waya ekirajaa tü shiimainkat süka (2 Tim. 2: 15). Müshiijeseʼe wekirajaainjanain jooluʼu sünain tü waaʼinrajatkat süpüla sükaaliinjain waya süpülain tü Nünüikikat Maleiwa sünain 1) wakuwaʼipa, 2) waküjapa pütchi otta 3) wekirajapa sünain wanee outkajawaa. Sükajee tü wekirajaainjatkalü anain, atüjeena waya eeʼiyataa tü naalinkat Maleiwa wapüla otta aapaa analuʼut nümüin saaʼu nikirajüin waya süpüla anain wakuwaʼipa (Isa. 48:17).

4. (1) ¿Kasa waaʼinrajatka süpüla sunoutaain wakuwaʼipa sutuma Nünüiki Maleiwa? (2) ¿Jamüsü putuma süpüla paashajeʼerüin tü Wiwüliakat waneepia?

⁴ Süpüla sunoutaain wakuwaʼipa sutuma Nünüiki Maleiwa, waashajeʼerüinjatü shia waneepia. Wooʼulaküinjatü waashajeʼerüin kaʼiwai (Jos. 1:8). Shiimainya eein kaʼi kapüleekalü oʼu shia wamüin süka wainmain kasa waaʼinraka. Ayatüinjatpejeʼe waashajeʼerüin tü Wiwüliakat jaʼitairü kasain waaʼinrüinjatüin (paashajeʼera Éfeso 5:15, 16, TNM). Eesü süpüla waashajeʼerüin shia watta maalü, kaleʼu jee aipaʼa shiale. Meerü wanüiki maʼaka naaʼin chi salmistakai, müshi nia: «Kojutushaatasü tamüin tü Pünüikikat. Jülüjasü maʼin taaʼin waneepia» (Sal. 119:97, TNM)

5, 6. (1) ¿Jamüsü choʼujaaka wasakireʼerüin waaʼin sünain tü waashajeʼerakat suluʼu Nünüiki Maleiwa? (2) ¿Jamüinjatü sukuwaʼipa watuma wasakireʼerapa waaʼin? (3) Püküja kasain anaka aluʼu pukuwaʼipa sutuma paashajeʼerüin Nünüiki Maleiwa sümaa püsakireʼerüin paaʼin sünain.

⁵ Nnojotpejeʼe waashajeʼerüinjatüin neʼe tü Wiwüliakat, choʼujaasü wasakireʼerüinjatüin waaʼin sünain tü waashajeʼerakat (Sal. 1:1-3). Sükajee tia, wounteerü waaʼinrüin tü sümakat tü Nünüikikat Maleiwa. Jaʼitairü waashajeʼerüin shia suluʼu tablet jee serulaat, wachajaainjatü sukuwaʼipa süpüla sütanalüin waaʼin tü pütchi waashajeʼerakat.

⁶ ¿Jamüinjatü sukuwaʼipa watuma wasakireʼerapa waaʼin? Waashajeʼerapa tü Wiwüliakat, eeshii süpüla wooʼulaapünaain suulia aashajeʼeraa motsomüin süpüla wasakireʼerüin waaʼin sünain tüü: «¿Kasa tatüjaka nüchiki  Jeʼwaa sutuma pütchikat tüü? ¿Taaʼinrüinche tü sümakat pütchikat tüü? ¿Eeyütche wanee kasa tanouteʼerüinjatka sünain takuwaʼipa?». Wasakireʼerüle waaʼin sünain tü waashajeʼerakat suluʼu Nünüiki Maleiwa sümaa woʼuraajüin nümüin, keeʼireejeerü waaʼin waaʼinrüin tü nümakat. Weʼreetka pülain maʼin tü Nünüikikat Maleiwa (2 Cor. 10:4, 5).

7. ¿Kasa paaʼinrajatka süka Nünüiki Maleiwa püküjapa pütchi?

⁷ Waküjapa pütchi jee wekirajapa wayuu, waashajeʼerüinjatü tü Nünüikikat Maleiwa. Anuu nünüiki wanee wawala: «Püküjale pütchi sainküin piichi nümaa Jeʼwaa, ¿pieechi yootoko sümaa wayuu pümüiwaʼa, puuʼulaajeeitaapa niain aashajaain Jeʼwaa?». ¿Jamaluʼutche nünüiki chia wawalakai? Wanaa sümaa waashajeʼerüin tü Wiwüliakat nümüin wanee wayuu, müshi niakai wooʼulaain yootuin Jeʼwaa nümaa. Anaʼleesia sümüin wayuu waashajeʼerüle wanee wetsiikulo suluʼujee tü Wiwüliakat suulialeʼeya wayain aashajaain (1 Tes. 2:13). ¿Eesia paashajeʼerüin tü Wiwüliakat sümüin wayuu püküjapa pütchi?

8. ¿Jamüsü nnojoluinjatka waashajeʼerüin neʼe tü Wiwüliakat sümüin wayuu waküjapa pütchi?

⁸ Waküjapa pütchi, nnojotsü waashajeʼerüinjatüin neʼe tü Wiwüliakat sümüin wayuu. Soteesü waaʼin wainmain wayuu nnojotka ayaawatüin saaʼu tü shikirajakalü anain tü Wiwüliakat. Müshii naya maʼaka na wayuu eejanakana nakalioʼu na nikirajüinkana Jesuu (Roma 10:2, TNM). Nnojotsü niyaawatamaatüin wanee wayuu tü pütchi waashajeʼerakat nümüin. Müsüjeseʼe waashajeʼerüinjatüin piantua tü pütchi wekirajeekalü anain nia sümaa waküjain nümüin jamaluʼuluin shia. Waaʼinrüle tia, nnojoleerü motuin naaʼin otta anteerü suluʼumüin naaʼin tü Nünüikikat Maleiwa (paashajeʼera Lucas 24:32).

9. Püküja jamüinjatüin pünüiki sümüin wayuu süpüla kojutuin namüin tü Wiwüliakat.

⁹ Waashajeʼerapa wanee wetsiikulo sümüin wayuu, wachajaainjatü sukuwaʼipa süpüla kojutuin namüin tü Wiwüliakat. Müsüjeseʼe anain müle wanüiki mayaa: «Waashajeʼera tü nümakat Maleiwa süchiki tia». Niale waashajaain amaa wanee wayuu nnojoikai anoujain, eesü süpüla müin wanüiki mayaa: «Anuu wanee pütchi suluʼu tü Nünüikimaajatkat Maleiwa». Waküjale pütchi nümüin wanee wayuu nnojoikai kasajachin amüin tü anoujaakat, wasakireein nia sünain tüü: «¿Eeirü paapüin pütchikat tüü? Kakaliairü maʼin ashajuushin». Naatawalinjatü süküjia tü pütchikat namüin na wayuukana, jama naatawalin tü nakuwaʼipakat (1 Cor. 9:22, 23).

10. (1) ¿Kasa alataka nümüin wanee wawala? (2) Püküja kasain alatüirüin pümüin sünain aküjaa pütchi sutuma pülain tü Nünüikikat Maleiwa.

¹⁰ Watta naalii wawalayuu eʼrakana sünain anain maʼin aashajeʼeraa Nünüiki Maleiwa sümüin wayuu. Eeshi wanee wawala eʼikajaʼawaika tü rewiisütakalüirua nümüin wanee wayuu laülaa, kojuya juya naaʼinrüin tia. Shiasaʼa soʼu wanee kaʼi niʼikajaakalü oʼu tü rewiisütakat nümüin, naashajeʼerüin wanee wetsiikulo sünainjatka tü rewiisütakat. Shia 2 Corinto 1:3, 4, eere sümüin nüchiki Maleiwa: «Nia chi Washi amülialaakai aaʼin waalin  jee nia chi Maleiwa amüliajüikai. Chi amüliajakai waya suʼunnaa müliaa». Sütanalüin naaʼin chi laülaakai pütchikat tüü. Nuchuntuinjeseʼe nümüin chi wawalakai naashajeʼeraiwa süchikuaʼa tü pütchikat nümüin. Jee nüküjaka choʼujaain nümüin jee sümüin nuʼwayuuse namüliajünüin sümaa nekirajaweein sünain tü Wiwüliakat. Shiimainya pülashaatain Nünüiki Maleiwa, müsüjeseʼe waashajeʼerüinjatüin shia waküjapa pütchi (Aluw. 19:20).

11. ¿Kasa naaʼinrajatka na wawalayuu ekirajakana sünain wanee outkajawaa süka nnojoluin shaittaain tia?

¹¹ Kamalainshaatasü wamüin oʼunaa sünain tü outkajawaakat jee sünain tü outkajawaakat miyoʼu. Oʼunushii waya sünain süpüla waʼwaajüinjachin Jeʼwaa jee süpüla watüjain sünainjee tü pütchi ekirajünakalü anain. Mayaapejeʼe anain maʼin ekirajaa na wawalayuukana, nnojotsü shaittaain tia (Sant. 3:1, TNM). Müshiijeseʼe nekirajüinjanain sünain tü sümakat tü Wiwüliakat na wawalayuu ekirajakana sünain wanee outkajawaa. Pikirajüle na wawalayuukana, ¿kasa paaʼinrajatka süpüla süntüin suluʼumüin naaʼin tü Nünüikikat Maleiwa?

12. ¿Kasa naaʼinrajatka na wawalayuu ekirajakana sünain wanee outkajawaa süpüla shiainjatüin nekirajüin maʼin aka tü Wiwüliakat?

¹² Shiainjatü pikirajaka maʼin aka tü Wiwüliakat (Juan 7:16). Pikirajapa na wawalayuukana,  püchajaweein sukuwaʼipa süpüla shiainjatüin pikirajüin aka tü Wiwüliakat, süpüla nnojoluin motuin naaʼin tü pütchi paashajeʼerakat sutuma wainmain maʼin shiyaawase putuma. Soteesü paaʼin naatain sümüin aashajeʼeraa wanee wetsiikulo suulia ekirajaa shia. Wainmale wetsiikulo paashajeʼeraka, moteerü shia naaʼin na wawalayuukana. Shia anaka aluʼu püneeküle tü wetsiikulo anaka süpüla paashajeʼerüin, püküja jamaluʼuluin shia, piʼitaa wanee shiyaawase otta püküja jümüin aneetka wakuwaʼipa sutuma (Neh. 8:8). Süpülapünaa pikirajüin sünainjee wanee bosquejo pikirajaainjatü anain tü pütchi suluʼukat otta pütüjaainjatü aaʼu jamüin shiʼitaanaka tü wetsiikulo suluʼukat. Süchikijee, püneeka jaralüin tü wetsiikulo anakat süpüla pikirajüin akajee tü pütchi suluʼukat tü bosquejokot (aküjünüsü jamüinjatüin sukuwaʼipa pikirajia suluʼu tü karaloʼutakat Benefíciese de la Escuela del Ministerio Teocrático, ekirajaaya 21 sünainmüin 23). Shiapejeʼe anaʼleein puchuntüle kaaliinwaa nümüin Jeʼwaa süpüla pikirajüin sünain tü Nünüikikat (paashajeʼera Esdras 7:10 otta Proverbios 3:13, 14).

13. (1) Püküja tü alatakat sümüin wanee wawala sutuma wanee wetsiikulo aashajeʼennaka sünain tü outkajawaakat. (2) Püküja tü sükaaliinjaka anain pia tü wetsiikuloirua aashajeʼennaka sünain tü outkajawaakat.

¹³ Eesü wanee wawala chejeʼewat Australia, wainma maʼin kasa alataka sümüin wanaa sümaa jintuluin shia. Sutuma shikirajünüin nüchiki Jeʼwaa, saapüin saaʼin nümüin.  Nnojotpejeʼe sunoujain alin shia nüpüla Jeʼwaa. Shiasaʼa soʼu wanee kaʼi, sütanalüin saaʼin wanee wetsiikulo aashajeʼennaka sünain tü outkajawaakat. Süsakirüin saaʼin sünain tia pütchikat otta saashajeʼerüin waneirua wetsiikulo, shiyaawataka saaʼu shiimain alin shia nüpüla Maleiwa. * ¿Jama pikai? ¿Eeiria sütanalüin paaʼin wanee wetsiikulo aashajeʼennaka sünain wanee outkajawaa jee sünain wanee outkajawaa miyoʼu? (Neh. 8:12).

14. ¿Kasa waaʼinrajatka sutuma kojutuin wamüin tü Wiwüliakat?

¹⁴ Waapüin analuʼut nümüin Jeʼwaa saaʼu naapüin wamüin tü Nünüikikat sümaa eein shia nutuma süpüla kaʼikat süpüshuaʼa maʼaka nümatüjülüin sümaiwa paala (1 Ped. 1:24, 25). Sutuma kojutuin wamüin tü Wiwüliakat, waashajeʼerüinjatü shia waneepia, waaʼinrüinjatü tü sümakat otta wekirajüinjatü wayuu süka. Waaʼinrüle tia, weeʼiyateerü sünain alin maʼin wapüla Jeʼwaa, chi Kanüikikai tü Wiwüliakat.