1. ¿Kasa maʼin nüküjaka achiki Jesuu wanee ai süpülapünaa outuin nia?

WANEE ai süpülapünaa outuin Jesuu, eesü maʼaka apünüintua shikii nümüin namüin na nikirajüinkana aipüraliinjanain naya wayuu otta aijiraainjanain naya (Juan 15:12, 17). Aijiraale naya naashin Jesuu, ayaawatüneena sutuma wayuu sünain nikirajüin naya (Juan 13:34, 35). Aijiraainjana naya waneepia naashin Jesuu, nachajaainjatü sukuwaʼipa süpüla nakaalinjain wayuu jaʼitasü meʼirakain shia namüin. Otta nnojotsü aiyaainjatüin wayuu motsomüin neʼe napüla. Müshijeseʼe nümüin: «Wane wayuu, aapajiraakai nukuaippa süpüla ouktaa saaʼujee nütünajutüirua, miyoʼushaata maʼi naalin nüpüla. ‹Tatünajüt› meechi taya jümüin müleka joonoole waneepia sümaa tü taluwataakat anain jia» (Juan 15:13, 14).

2. (1) ¿Kasa naataka anainjee nakuwaʼipa na aʼyataakana nümüin Jeʼwaa? (2) ¿Kasa wekirajaainjatka anain sünain ekirajaayakat tüü?

² Naata maʼin nakuwaʼipa na aʼyataakana nümüin Jeʼwaa noulia na wane wayuukana, süka jamüin, aijiraain maʼin naya otta nachajaain sukuwaʼipa süpüla nakaalinjain wayuu jaʼitasü  meʼirakain shia namüin jee paaʼinwajiraashii naya (1 Juan 3:10, 11). Aijiraashii waya, jaʼitasü naatain woumain, weʼiruku, wanüikipala otta wepijia. Eepejeʼe wamawaire: «¿Jamüsü choʼujaaka maʼin aijiraainjanain waya maaʼulu? ¿Kasa nükatchinraka akajee waaʼin Jeʼwaa otta Jesuu? ¿Kasa waaʼinrajatka süpüla washatüin nukuwaʼipa Jesuu sünain akaalinjaa na waneinnua?». Wekirajaajeerü anain tia sünain ekirajaayakat tüü (1 Cor. 8:1).

3. ¿Kasa naaʼinraka noʼutku na wayuukana sünainjee tü kasa alatakat namüin?

³ Maaʼulu yaa, müliainjatü maʼin wayuu otta shapaajeerü maʼin naaʼin süka sülateerüin kasa mojusü (2 Tim. 3:1-5; Sal. 90:10). Wainma na wayuu yüülakana aaʼin sünainjee tü kasa alatakat namüin, shiasaʼa sünainjee tia, outeeshii naya. Watta maʼin naalii na wayuu oʼuniraakana naaʼin juyawai, alatüshii suulia 800.000. Jee soʼu wanee oora, oʼuniraashii naaʼin maʼaka 90 wayuu. Otta eeshii na wawalayuu oʼuniraakana naaʼin sünainjee yüülain naaʼin.

4. Püküja nachiki noʼutku na wayuu aʼyataapuʼukana nümüin Maleiwa outeekana sünainjee tü alatakat namüin.

⁴ Yüülasü maʼin naaʼin noʼutku na wayuu aʼyataakana nümüin Maleiwa sümaiwa paala, shiasaʼa sünainjee tia outeeshii naya. Jamüshijaʼa Job, nnojotsü kateein noʼu naashin sünainjee tü müliaa niʼrakat jee «kasataalejeseʼe outuin taya» müshi nia (Job 7:16; 14:13). Jee majachinka Jonás, müshijeseʼe nümüin: «Puʼuta mmata taaʼin Jeʼwaa, shia anaka aluʼu outule taya suulialeʼeya katüin toʼu» (Jon. 4:3). Akaataajaʼa neʼe Elías, chi nünüikimaajachikai Maleiwa, mojusüinka maʼin naaʼin, nümaka nümüin Jeʼwaa: «Puʼuta mmata taaʼin Jeʼwaa» (1 Rey. 19:4). Kojutupejeʼe maʼin nümüin Jeʼwaa naya wayuukana otta keeʼireesü naaʼin kateein noʼu. Nnojoishi nia aashichijaain namüin sünainjee müin naaʼin, amülialaasü naaʼin naaliijee jee nütütüleʼerüin naaʼin süpüla anainjatüin naaʼin jee süpüla ayatüinjanain naʼyataain nümüin.

5. ¿Jamüsü choʼujaaka alinjanain wapüla na wawalayuukana?

⁵ Watta maʼin naalii na wawalayuu eejiraakana sümaa tü alatakat namüin, müsüjeseʼe choʼujaain maʼin alin naya wapüla. Eeshii na apüleeruanakana aaʼin saaʼujee nanoula jee na meeʼerapalakana atumawaa. Eeshii na meeʼerapalakana chaa naʼyataaleruʼu. Eeshii na mapüsakana sünainjee naʼyataain maʼin jee shiale sünainjee kapüleein maʼin tü naʼyataakalü anain. Eetaashii na wawalayuu manoujainkana aʼwayuuse jee müliakana maʼin aaʼin sünainjee mojuwalin sünüiki naʼwayuuse namüin. Sünainjee tia, watta maʼin naalii na wawalayuu yüülakana aaʼin. ¿Jaraiche akaalinjeenaka naya?

6. ¿Kasa nükatsüinraka akajee Jeʼwaa naaʼin na aʼyataakana nümüin?

⁶ Katsüinsü waaʼin sutuma watüjaain saaʼu alin waya waneepia nüpüla Jeʼwaa. Atütülaakajasaʼa maʼin naaʼin na israeliitakana naapapa tü nümakat Jeʼwaa wanaa sümaa nümüin: «Anasü maʼin pukuwaʼipa toʼuluʼu, kojutushi pia tamüin otta aishi maʼin pia tapüla [...]. Nnojo mmoluin pia, eeshi taya pümaa» (Isa. 43:4, 5). Weʼitaweein maʼin waaʼin sünain alin jee kojutuin waya nümüin Jeʼwaa waneʼewai wakua. * Müshi nia wamüin: «Oʼttaajeena jia süka  pülashin maʼin nia, talateerü maʼin naaʼin jümaa» (Sof. 3:16, 17).

7. ¿Kasa meemataka aluʼu waalin nüpüla Jeʼwaa sümaa naalin süchon wanee wayuu süpüla? (Piirakaa sümüin tü ayaakuaa suluʼukat süpana 8).

⁷ Naashin Jeʼwaa, nütütüleʼereerü waaʼin jee nümülialeena waya jaʼitasü kasain alatüin wamüin. Müshi nia: «Meena jutujaajeenakai aaʼin sutuma jii, sümaa sülüʼüjain jia otta sutuʼujeena jia sümaa süsepajeenain jia. Maʼaka naaʼin wanee wayuu ayataka amüliajünüin sutuma nii, meechia taya sünain amüliajaa jia waneepia» (Isa. 66:12, 13). Tü nümakat Jeʼwaa yaʼayaa, meematüsü aka saaʼin sukuwaʼipa wanee wayuu wanaa sümaa sutuʼuin süchon jee süsepajüin nia. Sükajee tia, atüjaana aaʼu alin maʼin nüpüla Jeʼwaa na aʼyataakana nümüin. Kojutushii maʼin naya nümüin (Jer. 31:3).

8, 9. ¿Jamüsü sütütülaajeetka waaʼin sutuma alin waya nüpüla Kürisüto?

⁸ Wanee kasa watüjaka anainjee alin waya nüpüla Jeʼwaa shia sünainjee tü münakat suluʼu Juan 3:16, (TNM): «Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain outuin na eʼitaakana naaʼin nünain otta süpüla katüinjatüin noʼu waneepia». Aishii maʼin waya nüpüla Jesuu, müshijeseʼe outuin nia saaʼu waainjala. Saashin tü Wiwüliakat, nnojotsü kasain «ooʼuleʼereechin Cristo suulia alin waya nüpüla» (Roma 8:35, 38, 39).

⁹ Eejiraale waya sümaa wanee kasa eekai sümatsüinjaain atuma wanoula, mojuka atuma waaʼin otta ajaʼlajaka atuma waaʼin, soteesü waaʼin alin waya nüpüla Kürisüto, atütülaajeerü waaʼin sutuma tia (paashajeʼera 2 Corinto 5:14, 15). Sutuma alin waya nüpüla Jesuu, keeʼireejeerü waaʼin katüin woʼu jee ayatüin waʼyataain nümüin Jeʼwaa. Nnojoleerü yüülain waaʼin sülatapa kasa mojusü wamüin. Maʼaka saaʼin sukutkujaale mma, süsetüle wüin, müliale waya atumawaa saaʼujee wanoula,  mojule waaʼin sünainjee nnojoluin shikeraajüin wanee kasa waʼatapajaka jee shapaale waaʼin.

10, 11. ¿Jaraliinjana na atütüleʼerakana naaʼin na wawalayuukana?

¹⁰ Wanee kasa nükatsüinraka akajee waaʼin Jeʼwaa, shia sükajee tü nupueulosekat. Aire wapüla na wawalayuukana, aishi wapüla Jeʼwaa sükajee tia. Müshiijeseʼe wachajaainjanain maʼin sukuwaʼipa süpüla natüjaain saaʼu na wawalayuukana alin jee kojutuin naya nümüin Jeʼwaa (1 Juan 4:19-21). Müshi chi aluwataaushikai Pablo: «Anakaja müleka ayatüle jütütüjüin na juwalayuukana sünain anoujaa süpüla laülaajiraainjatüin jaaʼin sünain anoujaa jüpüshua» (1 Tes. 5:11). Nnojoishii nayainjanain neʼe na laülaashiikana suluʼu tü outkajaaleekat atütüleʼerüin naaʼin na wawalayuukana, watütüleʼerüinjana aaʼin wayakanaya wapüshuaʼa maʼaka naaʼinrüin shia Jeʼwaa otta Jesuu (paashajeʼera Roma 15:1, 2).

¹¹ Eeshii na wawalayuu mojuwaikana aaʼin waneepia sümaa shapaain naaʼin, müsüjeseʼe choʼujaain nanaʼnnüinjanain nutuma wanee tottoolu süpüla saapünajatüin nepinase namüin (Luc. 5:31). Na laülaashiikana jee na wawalayuukana nnojoishii tottooluin naya, natüjaapejeʼe saaʼu noonooinjanain sümaa tü sümakat pütchikat tüü: «Jütütüleʼera naaʼin na wayuu mojukana aaʼin, jükaalinja na matsüinkana anoula, nnojo jaashichijaain namüin na juwalayuukana» (1 Tes. 5:14). Choʼujaasü maʼin alinjanain wapüla na wawalayuukana, kapülainjatü waaʼin tü alatakat namüin. Nnojoishii waya jashichijaainjanain namüin na mojukana aaʼin, anainjatü wanüiki namüin süpüla watütüleʼerüin naaʼin. Wasakireʼera waaʼin sünain tüü: «¿Tamülialüinche jee tatütüleʼerüinche naaʼin na tawalayuukana? ¿Kasa  taaʼinrajatka süpüla takaalinjain maʼin na tawalayuukana?».

12. Püküja süchiki tü naaʼinrakat waneinnua wawalayuu süpüleerua wanee wawala.

¹² Anuu sünüiki wanee wawala chejeʼewatka Europa: «Eesü toʼuniraweere taaʼin. Wattapejeʼe maʼin naalii na akaalinjakana taya jee katüsü toʼu sünainjee alin jee natütüleʼerawalin taaʼin. Nakaalinjain taya napüshuaʼa na tawalayuukana, palitpejeʼe neʼe na atüjaakana saaʼu mojuwalin taaʼin. Eeshi wanee wawala sümaa nuʼwayuuse makana aka saaʼin tei jee tashi tamüin. Nakaalinjain taya waneepia». Naatawaisü tü kasa waaʼinrakat napüleerua na waneinnua, wainmapejeʼe tü kasa eekat süpüla wakaalinjain anain na shapaakana aaʼin jee na mojukana aaʼin waneepia. *

13. ¿Kasa waaʼinrajatka süpüla wamülialüin naaʼin na mojukana aaʼin?

¹³ Jülüja waaʼin tü münakat wamüin (Sant. 1:19). Kapürale waaʼin tü namakat na waneinnua wamüin, weeʼiyateerü sünain alin naya wapüla. Wasakira chia wawalakai süpüla wayaawatüin saaʼu jamüin naaʼin. Yootopa waya nümaa, jaʼyainjatü waaʼu kapülain waaʼin tü nümakat wamüin jee alin nia wapüla. Nüküjeere wamüin chia wawalakai süpüshuaʼa tü alatakat nümüin, waapaja nünüiki sümaa nnojoluin shapaain waaʼin jee nnojo wasoutuin pejeewa shiʼipajee tü nümakat. Müle shia watuma, eeshiijaʼa wayaawateerüle saaʼu jamüin maʼin naaʼin jee niʼitaajeerü naaʼin wanain jee kapüleerü naaʼin tü wamakat nümüin. Kapürale waaʼin nakuwaʼipa na waneinnua, wamülialeerü naaʼin.

14. ¿Jamüsü wayaawatüinjatka saaʼu wanüiki?

¹⁴ Wayaawata saaʼu wanüiki. Mojuleejeeria maʼin naaʼin wanee wayuu, nnojorüle wayaawatüin saaʼu tü wamüinjatkat nümüin. Jaʼitaichi wakaalinjeein maʼin nia, nnojoleerü wainküin tia. Müsü tü Wiwüliakat: «Eeshi chi eekai mayaawajaain saaʼu nünüiki, müshi nusotokai saaʼin wayuu süka shiʼichi chajaruuta, akaajasaʼa nanüiki na kekiikana maʼin aawalaasü saaʼin wayuu sutuma» (Prov. 12:18). Nnojotsü keeʼireein waaʼin mojuinjatüin naaʼin na waneinnua watuma sünainjee mayaawajaain waya saaʼu wanüiki. Wamüliajüinjatüle naaʼin na waneinnua, jülüjeesü waaʼin jamüinjeʼe waaʼin wayayüliire alatüin amüin tü alatakat namüin (Mat. 7:12).

15. ¿Kasa eeka süpüla wamülialüin akajee naaʼin na wawalayuukana?

¹⁵ Waküja tü sümakat tü Wiwüliakat (paashajeʼera Roma 15:4, 5). Wainma pütchi anasü suluʼukat tü Wiwüliakat süpüla wamülialüin naaʼin na müliakana aaʼin, jama nünüikin shia chi Maleiwa «achechetkai waaʼin». Eesü süpüla wachajaain pütchi amülialeetka naaʼin na wawalayuukana suluʼu tü karaloʼutakat Índice de las publicaciones Watch Tower otta Nachajaayainjatü pütchi na aküjaliikana pütchi nüchiki Jeʼwaa.

16. ¿Jamüinjatü wakuwaʼipa süpüla watütüleʼerüin naaʼin na waneinnua?

¹⁶ Kamanee waya otta ai naya wapüla. Anuu tü sümakat tü Wiwüliakat nüchiki Jeʼwaa: «Nia Washikaʼaya, amüliajaka waya. Nia Wamaleiwasekaʼaya, akaaliijaka waya» (paashajeʼera 2 Corinto 1:3-6;  Luc. 1:77, 78; Roma 15:13). Anasü maʼin washatüle nukuwaʼipa Pablo süka nüshatüin nukuwaʼipa Jeʼwaa. Müshi Pablo: «Aluʼujasa waya, kamaneepüʼüshii jümüin maa aka saaʼin wane eyüü wanaa sümaa saaʼinmajüin tü süchooinkalüirua. Süka mapüʼüin aka jia wapüshi sünain aishaatain maʼi jia wapüla, achekapüʼüshii waya kepiaa jaʼaka süpüla aküjaa jümüin tü nüchikikat chi Oʼtteʼerüikai naapakat wamüin Maleiwa» (1 Tes. 2:7, 8). Kamaneere waya sümüin wayuu eekai mojuin saaʼin, eesü süpüla nütütüleʼerüin Jeʼwaa saaʼin sükajee tia.

17. ¿Kasa jülüjainjatka waaʼin nachiki na wawalayuukana süpüla wakaalinjain naya?

¹⁷ Nnojotsü lotuin maʼin nakuwaʼipa na wawalayuukana. Pansaweesü tü kasa jülüjakat waaʼin nachiki. Jülüjale waaʼin nnojoleenain naaʼinrüin kasa mojusü, mojeerü waaʼin mojupa wanee kasa natuma (Ecl. 7:21, 22). Soteesü waaʼin pansaain tü kasa jülüjakat naaʼin Jeʼwaa wachiki otta nütüjaa aaʼu kasain isain wachiki. Washatüle nukuwaʼipa nnojoleena waya aashichijaain sünainjee nnojoluin lotuin maʼin nakuwaʼipa na waneinnua (Éf. 4:2, 32). Nnojo mojutuin wamüin tü kasa naaʼinrakat jee nnojo wayoujireʼerüin nakuwaʼipa namaa na waneinnua, suulia joo mojuin maʼin naaʼin sünainjee tia. Shia anaka aluʼu: «Anasü maʼin putuma» wamüle namüin saaʼu wanee kasa naaʼinraka. Atütülaajeerü naaʼin jee talateerü maʼin naaʼin sünain aʼyatawaa nümüin Jeʼwaa (Gal. 6:4).

18. ¿Jamüsü watütüleʼerüinjatka naaʼin na wawalayuukana?

¹⁸ Kojutushii maʼin nümüin Jeʼwaa na aʼyataakana nümüin jee kojutushii naya nümüin Jesuʼuya (Gal. 2:20). Aishii maʼin wapüla na wawalayuukana, müshiijeseʼe kamaneein waya namüin. Süpüla tia, waaʼinra tü sümakat pütchikat tüü: «Anakaja wakaaliijiraale suulia aʼülüjaajirawaa, süpüla katsüinjatüin waaʼin wapüshua sünain tü wanoulakat» (Roma 14:19). Kasataalejeseʼe paʼaraiisümaatüin tü Mmakat, nnojoluiwa mojuin waaʼin piantua. Süka jamüin, nnojoleerüin ayuulii, atkawaa, outaa, nnojoleena waya müliain atumawaa saaʼujee wanoula, nnojoleena mojujiraain na wapüshikana wamaa, nnojoleerü tü kasa mojuwaikat atuma waaʼin. Sülatapa tü miitkat juya, loteerü nakuwaʼipa napüshuaʼa na wayuukana jee mamojuleena naya. Nüjütünapa Satanaa süpüla niʼikeʼerüin wayuu sajaʼttiamüin tü miitkat juya, nüchoinjeena Jeʼwaa na waneepiakana nümaa, kepieena naya saaʼu tü Mmakat jee taasheena naya suulia outaa jee kaainjalaa (Roma 8:21, TNM). Wakaaliinjiraa jee watütüleʼerajiraa waaʼin süpüla suluʼuin waya tü Paʼaraiisükat yaa saaʼu tü Mmakat maʼaka keeʼireein shia naaʼin Jeʼwaa.