1, 2. (1) ¿Kasa shapaaka atuma waaʼin? (Piirakaa sümüin tü ayaakuaakat). (2) ¿Kasa wekirajaainjatka anain sünain ekirajaayakat tüü?

SAASHIN tü Wiwüliakat, Satanaa müshi aka naaʼin wanee «wasashi jashichikai maʼin, nüchajaain chi nikeekai amüin» (1 Ped. 5:8, TNM; Alat. Map. 12:17). Suluʼujee tia, shapaasü saaʼin wayuu, akaʼaya na aʼyataaliikana nümüin Maleiwa, shapaasü naaʼinya. Na aʼyataapuʼukana nümüin Maleiwa sümaiwa, shapaapuʼusü naaʼin. Saashin tü Wiwüliakat, shapaasü naaʼin David saaʼujee tü alatakat nümüin (Sal. 13:2). Jee müshia Pablo, shapaasü naaʼin naaʼu napüshuaʼa na anoujashiikana (2 Cor. 11:28, TNM). ¿Kasa waaʼinrajatka shapaale maʼin waaʼin?

² Chi Washi aipüraikai maʼin wayuu nükaaliinjain na aʼyataapuʼukana nümüin sümaiwa suulia shapaain maʼin naaʼin, akaʼaya maaʼulu, keeʼireesü naaʼin naaʼinrüin tia wapüleerua. Müsü tü Wiwüliakat: «Saaʼu jütüjaaichipain naaʼu Maleiwa sünain nuuntüin naaʼinmajüin jia, jüküja jümaala nümüin süpüshualeʼeya tü ashapataakat atüma jaaʼin» (1 Ped. 5:7). ¿Kasa paaʼinrajatka  süpüla puuntüin tia? Wekirajaajeerü anain pienchisü kasa paaʼinrajatka süpüla puuntüin tia. Palajana, oʼuraajüinjachi pia; piama, paashajeʼera tü Nünüikikat Maleiwa sümaa püsakireʼerüin paaʼin sünain. Apünüin, puuʼulaa nükaaliinjaiwa pia Jeʼwaa nükajee chi naaʼinkai; müsia pienchi, paashajaa nümaa wanee paʼaleewainkai maʼin. Suʼunnaa wekirajaain sünain tia, anasü jülüjale paaʼin kasain choʼujaain maʼin süpüla paaʼinrüin.

3. ¿Kasa paaʼinrajatka süpüla piʼitaain naaʼu «Jeʼwaa tü kasa jawatakat pümüin»?

³ Tü palajatkat kasa waaʼinrüinjatka suulia shapaain waaʼin, shia oʼuraajaa. Wanaa sümaa shapaain maʼin paaʼin, püküja nümüin Jeʼwaa süpüshuaʼa tü suluʼukat paaʼin, naapajeein maʼin pünüiki. Müshi David nümüin Jeʼwaa soʼu nuchuntashaatain nümüin: «Maleiwakalee, paapaja maa tanüiki». Nümaka süchikijee: «Piʼitaa naaʼu Jeʼwaa tü kasa jawatakat pümüin süpüla nükaaliinjüinjachin pia» (Sal. 55:1, 22, TNM). Isale püchiki punoukteʼerüin tü alatakat pümüin, shia anaka puʼuraajüle maʼin nümüin Jeʼwaa suulialeʼeya shapaakuʼu müin paaʼin. ¿Jamüsü anaka woʼuraajüle? ¿Jamüsü jutateetka waaʼin suulia shapawaa aaʼin woʼuraajüle? (Sal. 94:18, 19).

4. ¿Jamüsü anaka woʼuraajüle wanaa sümaa shapaain maʼin waaʼin?

⁴ (Paashajeʼera Filipos 4:6, 7). ¿Jamüsü watüjaaka saaʼu naapajüin wanüiki Jeʼwaa wanaa sümaa woʼuraajashaatain nümüin? Keeʼireesü naaʼin jutatüin waaʼin, nnojoluin jülüjain waaʼin kasa mojusü otta nnojoluin mojuin waaʼin. Nükaaliinjeena waya Jeʼwaa süpüla jutatüin waya suulia shapawaa aaʼin jee suulia mmoluwaain waya. Wattainna naalii wawalayuu nükaaliinjaka Jeʼwaa. Akaʼaya wayakana, eeshii süpüla müin waya maʼaka naaʼin nayakana. Tü anaa naapakat Maleiwa, sükaaliinjeechi pia süpüla eejiraain pia sümaa tü alatakat pümüin. Piʼitaa maʼin paaʼin sünain tü nümakat Jeʼwaa: «Nnojo shapaain paaʼin, taya chi Pümaleiwasekai. Shiimain katsüinjeerüin paaʼin tatuma. Shiimainshaata maʼin takaaliinjeechin pia» (Is. 41:10, TNM).

5. ¿Jamüshii sükaaliinjeenaka waya tü Wiwüliakat suulia shapawaa aaʼin?

⁵ Tü piamakat kasa waaʼinrajatka süpüla jutatüin waaʼin suulia shapawaa aaʼin, shia aashajeʼeraa tü Wiwüliakat sümaa wasakireʼerüin waaʼin sünain. ¿Jamüsü choʼujaaka waaʼinrüin tia? Shia süka nünüikin shia Maleiwa. Nia Kakumainka waya, müsüjeseʼe anashaatain tü nümakat wamüin suluʼu tü Wiwüliakat. Suʼunnaa shapaain maʼin paaʼin, eesü süpüla jülüjain paaʼin tü nümakat Maleiwa sümaa püsakireʼerüin paaʼin sünain tü paaʼinrajatkat süpüla katchin paaʼin sutuma. Paaʼinrüle tia, jütateerü paaʼin suulia shapawaa aaʼin. Waashajeʼerüle nünüiki Jeʼwaa, yalayaleerü waaʼin, katsüinjeerü waaʼin jee nnojoleena mmoluin waya sümaa shiyoʼujaain waaʼin sutuma wanee kasa alataka wamüin (Jos. 1:7-9).

6. ¿Jamüsü aneetka pukuwaʼipa sutuma tü nümakat Jesuu?

 ⁶ Wanaa sümaa waashajeʼerüin tü Wiwüliakat, wayaawata aaʼulu kamaneein Jesuu sümüin wayuu. Jee kamalainsü namüin na wayuukana naapajüin nünüiki Jesuu süka sütütülaain naaʼin nutuma, nayaleekajaʼa na matsüinkana aaʼin jee na mojukana aaʼin (paashajeʼera Mateo 11:28-30, TNM). Jülüjasü naaʼin Jesuu anale jee mojule saaʼin wayuu (Mar. 6:30-32). Nüküjüin Jesuu namüin na aluwataaushiikana nükaaliinjeenain naya, akaʼaya waya maaʼulu, nükaaliinjeena wayaʼaya. Nnojoipejeʼe choʼujaain weʼrüinjachin nia süpüla nükaaliinjain waya. Süka Nuluwataaichipain Jesuu chaa iipünaa, ayatüsia niiʼiyatüin wamüin sünain alin waya nüpüla. Shapaale maʼin paaʼin, eejeechi nia pümaa otta nükaaliinjeechi pia. Kaʼatapalashii waya nutuma Jesuu jee nükatchinrüin waaʼin. Sutuma tia, jutatüsü waaʼin suulia shapawaa aaʼin (Heb. 2:17, 18; 4:16).

7. ¿Jamüsü süpüla anain wakuwaʼipa nükajee chi naaʼinkai Maleiwa?

⁷ Naashin Jesuu, wachuntüle nümüin Jeʼwaa chi naaʼinkai, naapeechi nia wamüin (Luc. 11:10-13). ¿Jamüsü nnojoleetka shapaain waaʼin eere waaʼu chi naaʼinkai Maleiwa? Nükaaliinjain waya Jeʼwaa nükajee chi naaʼinkai süpüla washatüinjatüin nukuwaʼipa (Col. 3:10). Jee süküjüin tü Wiwüliakat tü akuwaʼipaa eekat nutuma chi naaʼinkai (paashajeʼera Galacia 5:22, 23, TNM). Eere wanain tü akuwaʼipaa eekat nutuma chi naaʼinkai Maleiwa, anajiraweena waya sümaa wayuu jee nnojoleerü waaʼinrüin wanee kasa shapaajeetka atuma waaʼin. Wekirajaa sünain tü akuwaʼipaa eekat nutuma chi naaʼinkai Maleiwa jee weʼreerü anain maʼin wanainre tia akuwaʼipaakalüirua.

8-12. ¿Kaseerü paaʼinraka eere pünain tü akuwaʼipairua eekat nutuma chi naaʼinkai Maleiwa?

⁸ Aijiraajeena jia jüpüla, talateerü jaaʼin otta eimalaajeerü jaaʼin. Müleka piiʼiyatüle sujutü wayuu sümüin, nnojoleerü shapaain maʼin paaʼin. ¿Suluʼu jamüin? Müleka aire püpüla na wawalayuukana sümaa kojutüin naya pümüin, nnojoleerü paaʼinrüin wanee kasa jashicheechika atuma pia, mojeetka atuma paaʼin jee shapaajeetka atuma paaʼin. Müle pukuwaʼipa, nnojoleechi pia mojujiraain namaa na wawalayuukana (Roma 12:10).

⁹ Atüjeena jia aʼatapajaa, kamaneejeena jia otta aaʼinreena jia tü kasa anasükat waneepia. Müsü tü Wiwüliakat: «Shia anakaja aluʼu müleka anamiajiraale jia jümüin jüpüshua sümaa aijiraain jia jüpüla. Anakaja müleka motüle jaaʼin naainjala wane juwala» (Éf. 4:32). Waaʼinrüle tia, anajiraajeena waya namaa na wawalayuukana jee nnojoleerü waaʼinrüin wanee kasa shapaajeetka atuma waaʼin. Otta müsia eere wanee mojujirawaa sutuma waleʼeruʼuin tü kaainjalaakat, mapüleejeerü wamüin wanoukteʼerüin tia.

¹⁰ Kanouleena jia. Maaʼulu yaa, shapaasü maʼin waaʼin saaʼu tü nneetkat jee tü kasa choʼujaakat wamüin (Prov. 18:11). ¿Kasa waaʼinrajatka süpüla nnojoluin shapaain  waaʼin saaʼu tia? Waaʼinra tü nümakat Pablo: «Shia anaka aluʼu müleka talatüle neʼe jaaʼin waneʼewai jukua sümaa tü eekai eein jümaʼana». Ichere wanoula nünain Jeʼwaa, weʼitaajeerü waaʼin sünain naapeerüin wamüin tü choʼujaakat wamüin. Müshi Jeʼwaa wamüin: «Nnojoleechi taya oʼunüin jümaʼanajee. Nnojoleena tapütüin jia jümüiwa». Meerü wanüiki maʼaka nünüiki Pablo: «Nia teenakaka [Jeʼwaa] süpüla nükaalinjain taya. Nnojoleechi taya mmolüin seema tü saaʼinreetkat tü taʼünüükolüirua» (Heb. 13:5, 6).

¹¹ Anamieena jia jee jüchechereerü jaaʼin suulia aaʼinraa kasa mojusü. Aneerü maʼin pukuwaʼipa müleka anamiale pia jee püchecherüle paaʼin suulia aaʼinraa kasa mojusü. Müle pukuwaʼipa, nnojoleerü paaʼinrüin jee püküjüin wanee kasa shapaajeetka atuma paaʼin mapa. Jee müsia, nnojoleerü ülüʼüttüin paaʼin sümüin wayuu, kanain paaʼin eekai jüʼülüjaain pümaa jee nnojoleechi owoorolooin pia sümüin wayuu süka pütchi mojuluʼut (Éf 4:31).

¹² Choʼujaasü nnojoluin yaletüin paaʼin süpüla piʼitaain paaʼin nünain Jeʼwaa otta süpüla püküjüin nümüin süpüshuaʼa tü shapaakalü atuma paaʼin (1 Ped. 5:6, 7). Nnojorüle yaletüin paaʼin, nükaaliinjeechi pia Jeʼwaa jee naaʼinmajeechi pia. Wanaa sümaa piyaawatüin saaʼu tü eekat süpüla paaʼinrüin jee tü isakat püchiki, nnojoleerü piʼitaain paaʼin pünain sutuma. Jee nnojoleerü shapaain maʼin paaʼin saaʼujee piʼitaain paaʼin nünain Maleiwa (Miq. 6:8).

13. ¿Kasa nüküjeeka Jesuu wanaa sümaa «nnojo jüshapajaain aaʼin» nümüin?

¹³ Müshi Jesuu: «Nnojo jüshapajaain aaʼin» (paashajeʼera Mateo 6:34). Eesü kapüleere waaʼinrüin tia nümakat Jesuu. ¿Kasa nüküjeeka Jesuu? Wekirajaaitpa anain shapaapuʼuin naaʼin David otta Pablo. Nnojotsü shiain nüküjeein Jesuu nnojoleerüin shapaain naaʼin wanee aʼyataai nümüin Maleiwa. Tü nüküjeekat shia nnojoleerüin nunoukteʼerüin wanee wayuu tü alatakat nümüin sutuma shapaakuʼu sümüin naaʼin. Eejeerü tü kasa shapajeetkalü atuma waaʼin, müsüjeseʼe nnojoluin anain jülüjale waaʼin tü alatakat wamüin sümaiwa jee tü alateetkat wamüin mapeena. ¿Jamüsü nnojoleetka shapaain maʼin paaʼin paaʼinrüle tü nümakat Jesuu?

14. Shapaale waaʼin, ¿kasa waaʼinrajatka süpüla washatüin nukuwaʼipa David?

¹⁴ Eeshii na shapaakana maʼin aaʼin sutuma jülüjain naaʼin tü kasa mojusü naaʼinrapuʼukat sümaiwa. Eesü mojushaatale naaʼin sutuma tia, jaʼitairü kakaliairüin shia. Shapaapuʼusü maʼin naaʼin David sutuma naainjala. Müshi nia: «Aʼyalajüshi taya sutuma mojushaatain  maʼin taaʼin» (Sal. 38:3, 4, 8, 18). Anashaatasü tü naaʼinrakat David suʼunnaa tia. Niʼitaashaatain naaʼin sünain nümüliajülin wayuu Jeʼwaa sümaa motuin naaʼin saainjala. Jee talatüsü naaʼin David süka nütüjaain saaʼu motuin naaʼin Maleiwa tü naainjalakat (paashajeʼera Salmo 32:1-3, 5).

15. (1) ¿Kasa watüjaka sünainjee tü naaʼinrakat David? (2) ¿Kasa paaʼinrajatka suulia shapaain maʼin paaʼin? (Paashajeʼera « Tü waaʼinrajatkat suulia shapaain maʼin waaʼin»).

¹⁵ Eesü shapaale paaʼin sutuma tü alatakat pümüin maaʼulu. Wanaa sümaa nüshajüin David Salmo 55, mmotshi maʼin nia seema nuʼutünüin aaʼin (Sal. 55:2-5). Nnojoipejeʼe ooʼulaain nia suulia niʼitaain naaʼin nünain Jeʼwaa sutuma shapaain naaʼin. Achuntashaatashi kaaliinwaa David nümüin Jeʼwaa wanaa sümaa sülatüin kasa mojusü nümüin, nnojotpejeʼe shiain neʼe naaʼinrüin tia, nüchajaainya sukuwaʼipa süpüla nunoukteʼerüin tü alatakat nümüin (2 Sam. 15:30-34). ¿Kasa watüjaka sünainjee tü naaʼinrakat David? Nnojo shapaain maʼin waaʼin, shia anaka aluʼu wachajaale sukuwaʼipa süpüla wanoukteʼerüin tü alatakat wamüin jee weʼitaa waaʼin sünain naaʼinmajeenain waya Jeʼwaa.

16. ¿Jamüsü icheetka punoula sutuma pütüjaain saaʼu jamaluʼuluin nünülia Maleiwa?

¹⁶ Eeshii wawalayuu shapaakana maʼin aaʼin saaʼu tü alateetkat namüin mapeena. Nnojotpejeʼe choʼujaain shapaain paaʼin saaʼu tü kasa nnojoyütkalia alatüin pümüin. Süka nnojoluin ee sülatayaain tü shapaakuʼu makalü atuma paaʼin. Otta nnojotsü eein wanee kasa isain nüchiki Maleiwa. Jamüsüjaʼa tü nünüliakat, ‹naainjeerü tü keeʼireekat naaʼin süpüla nikeraajüinjatüin tü nümakat› maluʼulu (Éx. 3:14). Nnojo shapaain waaʼin saaʼu tü alateetkat wamüin mapeena süka nikeraajeerüin Maleiwa tü keeʼireekat naaʼin napüleerua na wayuukana, watüjaa aaʼu tia süka sünainpünaain shia tü nünüliakat. Shiimainshaata sünain anakuwaʼipaleenain nutuma Maleiwa na waneepiakana nümaa jee nükaaliinjeenain naya suulia shapaain maʼin naaʼin saaʼu tü naaʼinrapuʼukat sümaiwa, tü alatakat namüin maaʼulu jee tü alateetkat namüin mapeena.

17, 18. ¿Jamüsü nnojoleetka shapaain maʼin paaʼin müleka paashajaale nümaa wanee paʼaleewain?

¹⁷ Tü pienchikat kasa paaʼinrajatka süpüla jutatüin paaʼin suulia shapawaa aaʼin, shia aashajawaa nümaa wanee paʼaleewain. Eeshi süpüla sükaaliinjain pia puʼwayuuse, wanee paʼaleewain jee wanee laülaashii suluʼu tü outkajaaleekat süpüla piyaawatüin saaʼu tü paaʼinrajatkat. Müsü Tü Wiwüliakat: «Shapaale maʼin naaʼin wanee wayuu nnojotsü talatüin naaʼin, talateechipajaʼa nia sütütüleʼennüle naaʼin  süka pütchi anasü» (Prov. 12:25, TNM). Müsü tü Wiwüliakat: «Mojeerü sukuwaʼipa wanee kasa nnojorüle süsakinnüin anain, aluʼujasaʼa süsakinnüle wainma wayuu, anakuwaʼipaleerü shia» (Prov. 15:22, TNM).

¹⁸ Woʼunawaire sünain tü outkajawaakat, nnojoleerü shapaain maʼin waaʼin. Sünain tü outkajawaakat namaashii waya na wawalayuukana; nakaaliinjeein waya jee natütüleʼereein waaʼin (Heb. 10:24, 25). Sutuma wakaaliinjiraain wapüshuaʼa sünain achecheraa waaʼin, eesü süpüla wayamülüin tü shapaakalü atuma waaʼin (Roma 1:12).

19. ¿Jamüsü anaka aleewashaatale waya nümaa Maleiwa?

¹⁹ Wanee laülaashi suluʼu tü outkajaaleekat, chejeʼewai Canadá, niyaawata aaʼu anain maʼin nüküjüle nümüin Jeʼwaa tü shapaakalü atuma naaʼin. Shapaʼawaisü naaʼin saaʼu tü niʼyataainkat, ekirajüi nia suluʼu wanee koleejia jee akaaliinjüi nia tepichi. Akaʼaya nia, shapaasü naaʼin saaʼu tü nüʼlechekat. Nnojoishi anain nia. ¿Kasa naaʼinraka süpüla nnojoluin shapaain maʼin naaʼin? Nüchajaain sukuwaʼipa süpüla aleewashaatain nia nümaa Jeʼwaa. Akaaliinjünüshi niaʼaya natuma na naʼaleewainkana, aleewashi maʼin nia sümaa nuʼwayuuse sümaa nüküjüin sümüin jamüin naaʼin. Jee müshiʼiya na wanee laülaashiikana jee chi wawala alapalaaikai naaʼu, nakaaliinjain nia süpüla niyaawatüin saaʼu jamüin nünüiki Jeʼwaa süchiki tü alatakat nümüin. Jee chi tottootkai nüküjüin nümüin tü naaʼinrajatkat süpüla naawalaainjachin, nukumajaka sukuwaʼipa chia wawalakai süpüla süpütaainjatüin kaʼi süpüla neemeraain jee naainjain ejercicio. Mapa, atüjashi chi wawalakai süpüleerua nukuwaʼipa süpüla nnojoluinjatüin shapaain maʼin naaʼin. Isale nüchiki nunoukteʼerüin wanee kasa alataka nümüin, niʼitaain naaʼin sünain nükaaliinjeechin nia Jeʼwaa.

20. (1) ¿Kasa wekirajaaitpaka anain? (2) ¿Kasa wekirajaajeetka anain sünain tü wanee ekirajaayakat?

²⁰ Wekirajaaitpa anain jutateerü waaʼin suulia shapawaa aaʼin woʼuraajüle nümüin Jeʼwaa, waashajeʼerüle tü Wiwüliakat sümaa wasakireʼerüin waaʼin sünain. Jee choʼujaain wooʼulaain nükaaliinjain waya Jeʼwaa nükajee chi naaʼinkai, waashajaain nümaa wanee waʼaleewain otta choʼujaain woʼunawaliin sünain tü outkajawaakat. Sünain tü wanee ekirajaayakat, wekirajaajeerü anain tü naaʼinrakat Jeʼwaa süpüla nükaaliinjain waya sükajee tü waʼatapajakat (Heb. 11:6).