1, 2. (1) ¿Jamüsü shapaaka maʼin saaʼin wayuu nükalioʼu Pablo? (2) ¿Jarai kanainjeejachika tü taashiikat naashin Pablo?

AʼWAATAASHII na wayuu kepiapuʼukana suluʼu tü mmakat Roma saaʼu lotuin maʼin sukuwaʼipa tü pütchi aluwataanakalü anain naya natuma na aluwataashiikana saaʼu Roma. Otta müsia, aʼwaataashii naya saaʼujee taashin maʼin wayuu chayaa naashin. Watta saalii kasa anapüika suluʼu tia mmakat otta washinnuu maʼin na wayuu chajanakana kepiain. Nnojotpejeʼe neʼe akumajaain tia sümüiwaʼa, watta naalii na achepchiee müliakana maʼin sünain aʼyatawaa süpüla anainjatüin maʼin tia mmakat. Jamüsüjaʼa soʼu tia, naʼakajee 100 wayuu kepiakana suluʼu tü mmairua suluwataakalü aaʼu Roma achepchieeshii 30 naʼakajee. Shapaasü maʼin saaʼin wayuu soʼu tia süka achepchieein wayuu atumawaa. Jaʼitakajeʼe neʼe na anoujashiikana shapaasü naaʼin sutuma tia.

² Kojuyatua maʼin nüshajüin chi aluwataaushikai Pablo süchiki tü taashiikat. Nnojotpejeʼe nüchajaain sukuwaʼipa süpüla nunouteʼerüinjatüin tü alatakat suʼunnaa tia maʼaka naaʼinrüin shia na wayuu eejanakana soʼu tia. Shia niʼyataaka maʼin achiirua Pablo otta na wane anoujashiikana naküjain maʼin pütchi süchiki Nuluwataaya  Maleiwa. Otta naküjain jamüin anaka maʼin naapajiraain nikii Jesuu waaʼu. Nüküjain Pablo namüin na anoujashiikana süchiki jaralin kanainjeejachin tü taashiikat. Jamüsüjaʼa suluʼu tü chiiruaajatkat karaloʼuta Corinto, müshi nia namüin na anoujashii chajanakana chayaa: «Nia chi Naaʼinkai Maleiwa aapakai wamüin taashii suulia kaainjalaa» (2 Cor. 3:17).

3, 4. (1) ¿Kasa naashajaaka achiki Pablo süpülapünaa nüshajüin tü sümakat 2 Corinto 3:17? (2) ¿Kasa waaʼinrajatka taasheere waya nutuma Jeʼwaa?

³ Suluʼuya tia karaloʼuta nüshajalakat Pablo, aashajaashi nia süchiki tü alatakat nümüin Moisés soʼu chajachin nia saaʼu tü uuchikat Sinaí wanaa sümaa nüntüin chi aapiee nümaʼanajeejachikai Maleiwa nünainmüin. Warattüsü maʼin nuʼupünaa Moisés jee sükajee müin nia, mmotshii na israeliitakana neema, müsüjeseʼe niʼitaain kuluulu nuʼupünaanain suulia neʼrajüin nia (Éx. 34:29, 30, 33; 2 Cor. 3:7, 8, 13). Naashin Pablo, müsü naakatakai saaʼin wanee kuluulu suulia nuʼupünaa wanee wayuu niitaale nünainmüin Jeʼwaa (2 Cor. 3:16). ¿Jamaluʼulu nünüiki Pablo?

⁴ Maʼaka wekirajaain suluʼu tü wanee ekirajaayakat, nia neʼe Jeʼwaa chi Kakumalakai kasa süpüshuaʼa. Nia aneekakai nümüiwaʼa tü anakat süpüla aaʼinnaa otta nnojotsü jaralüin laülaain naaʼu. Müsüjeseʼe eein taashii eere eein Maleiwa otta eere eein chi naaʼinkai. Maʼaka taasheere waya naashin Pablo, choʼujaasü weitaainjanain nünainmüin Jeʼwaa. Choʼujaasüjeseʼe maʼin aleewainjanain waya nümaa. Jamüshiijaʼa na israeliitakana wanaa sümaa chajanain naya isashiipaʼa, shia neʼe jülüjaka naaʼin tü keeʼireekat naaʼin namüiwaʼa suulialeʼeya tü nümakat Jeʼwaa. Müsü neʼitaakai saaʼin kuluulu noʼupünaanain süka süttüin nekii jee macheʼein naya suulia tü nümakat Jeʼwaa. Shia neʼe naaʼinreeka tü suchuntaakat naaʼin namüiwaʼa (Heb. 3:8-11).

5. (1) ¿Kasa taashika oulia waya nutuma chi naaʼinkai Maleiwa? (2) ¿Jamüsü watüjaaka saaʼu eein süpüla müin taashikai nakuwaʼipa na achepchieekana jee na püreesashiikana? (3) ¿Kasa wekirajaainjatka anain?

⁵ Alanaʼaleesia maʼin tü taashii eekat nutuma chi naaʼinkai Jeʼwaa suulialeʼeya nukuwaʼipa wanee achepchiee taashikai atumawaa. Taashishii waya nutuma Jeʼwaa suulia tü kaainjalaakat, suulia outaa, suulia tü alawaa shikirajakalü anain tü iküleesia nnojotkat shiimain jee suulia nakuwaʼipa na manoujainsaliikana (Roma 6:23, TNM; 8:2). Anashaatasü maʼin tü taashii naapakat Jeʼwaa wamüin. Jaʼitakajeʼe na achepchieekana jee na püreesashiikana, eesü süpüla taashin nakuwaʼipa nutuma Jeʼwaa (Gén. 39:20-23). Majatüinka tü wawalakat Nancy Yuen otta chi wawalakai Harold King. Kakalia naya püresaain saaʼujee nanoula. Eesü süpüla pünajüin tü videokalüirua nachikimaajatkat suluʼu JW Broadcasting (suluʼusü shia VIDEOS > ENTREVISTAS Y EXPERIENCIAS > SE ENFRENTAN A PRUEBAS). Wekirajaa sünain piamasü kasa: ¿Kasa waaʼinrajatka sutuma kojutuin wamüin taashin wakuwaʼipa nutuma Jeʼwaa? ¿Kasa waaʼinrajatka süpüla anain watuma sukuwaʼipa tü taashii naapakat Jeʼwaa wamüin?

6. ¿Kasa naaʼinraka na israeliitakana saaʼu mojutuin namüin taashin naya nutuma Jeʼwaa?

⁶ Kojutusü maʼin wamüin wanee kasa eekai süsülajuushin wamüin otta waapüin tü analuʼutkat nümüin chi asülajakai shia wamüin. Taashishii  na israeliitakana nutuma Jeʼwaa soʼu chajanain naya achepchieein Egipto. Shiasaʼa maʼaka jeʼra kashi süchikijee taashin naya nutuma Jeʼwaa, suchuntaain maʼin naaʼin tü eküülü nekapuʼukat chaa Egipto otta mojusü nanüiki süchiki tü naapakat Jeʼwaa namüin. Aleʼejaweeshii neʼe naya Egiptomüin. Shia kojutuleeka namüin ekaa jime, pepino, kalapaasü, puerro, sewooya jee aajo suulialeʼeya taashin naya süpüla aʼwaajaa Jeʼwaa. Müshijeseʼe jashichin nia namüin (Núm. 11:5, 6, 10; 14:3, 4). Eesü wanee kasa watüjaka sünainjee tia.

7. (1) ¿Kasa naaʼinraka Pablo süpüla niʼitaainjatüin suluʼu nukuwaʼipa tü nümakat suluʼu 2 Corinto 6:1? (2) ¿Kasa waaʼinrajatka süpüla washatüin tü naaʼinrakat Pablo?

⁷ Nuchuntuin Pablo namüin na anoujashiikana nnojoluinjatüin motuin naaʼin taashin waya nutuma Jeʼwaa nükajee Jesuu, chi Nüchonkai (paashajeʼera 2 Corinto 6:1, TNM). Mojushaatasü naaʼin Pablo sutuma süchepchiain nia tü kaainjalaakat jee tü outaakat. Shiapejeʼe naaʼinrüin tü nümakat namüin na anoujashiikana, müshi nia: «Tatüjaa aaʼulu sünain tajuittinneechin maalü nütüma chi Wasenyotsekai Jesucristo. Taapakalaka maʼi joo müleʼoshaata analuʼut saaʼu tia [...]. Chi wayuu eekai jüüjüüin waneepia nümüin chi Naaʼinkai Maleiwa, taashishi suulia süchepchiaa naainjala [...]. Otta müsia jooluʼu, sünainjee tü naaʼinrakat Cristo Jesús, taashishii waya suulia süchepchiaa kaainjalaa je suulia tü ouktaakat, süka pülashin maʼi chi Naaʼinkai Maleiwa aapakai wamüin kataa oʼu» (Roma 7:24, 25; 8:2). Washateein nukuwaʼipa Pablo, nnojotsü motuinjatüin waaʼin taashin waya nutuma Jeʼwaa suulia kaainjalaa jee suulia outaa. Akaʼaya waya, eeshii süpüla waʼyataain nümüin Jeʼwaa sümaa wulein waaʼin süka naapajiraain nikii Jesuu waaʼu (Sal. 40:8).

8, 9. (1) ¿Jamüsü nünüiki Pedro süchiki tü waaʼinrajatkat saaʼu taashinnapain waya nutuma Jeʼwaa? (2) ¿Kasa waaʼinmajüinjatka oulia wakuwaʼipa saaʼu taashin waya nutuma Jeʼwaa?

⁸ Nnojotsü waapüinjatüin neʼe analuʼut nümüin Jeʼwaa saaʼu taashinnapain waya nutuma,  jülüjainjatü waaʼin tü wakuwaʼipakat suulia waaʼinrajüin kasa mojusü saaʼu taashin wakuwaʼipa nutuma Jeʼwaa. Naashin chi aluwataaushikai Pedro, nnojoishii waya aaʼinrüinjanain kasa mojusü saaʼu taashin wakuwaʼipa nutuma Jeʼwaa (paashajeʼera 1 Pedro 2:16, TNM). Sutuma tia nümakat Pedro, sotusü waaʼin tü naaʼinrakat na israeliitakana chaa isashiipaʼa. Maaʼulu yaa, jalouireesia maʼin wamüin tü nümakat Pedro, süka jamüin, nüchajaain maʼin sukuwaʼipa Satanaa otta na manoujainsaliikana süpüla kamalainjatüin maʼin sümüin wayuu tü kuluutkat, tü eküütkat, tü asüüshikat, tü emiʼijünakat maʼin sutuma wayuu jee waneirua kasa. Anayaasü maʼin shiyolojo tia suluʼu telewisoot jee karaloʼuta süpüla keejiain sümüin wayuu otta shiyaʼlajüin shia jaʼitairü nnojoluin choʼujaain sümüin. Jalia waya suulia tia, suulia mojujain watuma sukuwaʼipa tü taashii naapakat Jeʼwaa wamüin.

⁹ Anasü maʼin tü nümakat Pedro waneeküinjatpa tü wekirajaainjatkalü anain otta tü waʼyataainjatkalü anain. Suluʼu tü koleejiakat, apüleeruaana aaʼinchii na tepichikana süpüla nekerotüin suluʼu wanee eʼikülee miyoʼu eekai shiʼnnaajünüin maʼin. Jee aküjünüsü namüin aneerüin naʼyataain nekirajaale suluʼu wanee eʼikülee miyoʼu. Eesü shiiʼiyatünüle namüin wainmaleein nükanain chi eekai nikirajaain suluʼu wanee eʼikülee miyoʼu eʼnnaajünaka maʼin nuulialeʼeya chi eekai nikirajaain suluʼu wanee naatajatü. Eesü kamalainre tia namüin na jimaʼaliikana jee na majayünnüükana naneeküinjatpa tü nakuwaʼipainjatkat. ¿Kasa sotuinjatka naaʼin naya tepichikana otta na kachoinkana naya?

10. ¿Kasa sotuinjatka waaʼin waneeküinjatpa wanee kasa waaʼinrajatka?

¹⁰ Naashin waneinnua wayuu, taashishii naya süpüla aneekaa süka naaʼin namüiwaʼa tü naaʼinrajatkat. Naneeküinjatü tia naashin nnojorüle mojuin naaʼin sutuma. Eesüjaʼa shiale jülüjain naaʼin tü nümakat Pablo namüin na anoujashii Corintojeʼewaliikana, müshi nia namüin: «¿Jamüshi süsalainjachika taya sünainjee mojushiin sümüin wayuu tü taaʼinrakat?» (1 Cor. 10:29, TNM). Shiimainsaʼaya taashin wakuwaʼipa süpüla aneekaa tü wekirajaainjatkalü anain otta kasain waʼyataainjatüin anain. Sotuinjatpejeʼe waaʼin nnojoluin taashin wakuwaʼipa süpüla aaʼinraa kasa süpüshuaʼa otta eein tü kasa weʼrakat sünainjee tü waneekakat. Anuujeseʼe nünüiki Pablo: «Müshii jia: ‹Laülaa waya wamüiwa süpüla waaʼinrüin kasa eekai eein neʼe›. Anuu tanüiki shiʼipajee tü jümakat: Müleka nnojorule kasain saamüin tü jaaʼinrakat namüin na juwalayuukana, anakaja müleka nnojorule jaaʼinrüin tia» (1 Cor. 10:23). Sutuma pütchikat tüü, wayaawata aaʼu nnojoluinjatüin shiain jülüjain waaʼin tü keeʼireekat waaʼin wamüiwaʼa waneeküinjatpa wanee kasa waaʼinrajatka.

11. ¿Kasapülajana taashika waya nutuma Jeʼwaa?

¹¹ Wanaa sümaa nüküjain Pedro nnojoliinjanain waaʼinrüin kasa mojusü saaʼu taashin waya nutuma Jeʼwaa, nüküjaleein shiain anain nüchepchiale waya Jeʼwaa. Taashishii waya nutuma Jeʼwaa suulia kaainjalaa jee outaa saaʼu naapajiraain nikii Jesuu waaʼu. Müsüjeseʼe keeʼireein naaʼin waʼyataainjanain nümüin süka süpüshuaʼa waaʼin.

12. ¿Kasa watüjaka sünainjee tü nukuwaʼipakat Noé otta nüpüshi?

¹² Tü anakat süpüla waaʼinrüin saaʼu taashinnapain waya nutuma Jeʼwaa, shia jülüjale waaʼin waneepia tü aʼyatawaakat nümüin. Waaʼinrüle tia, nnojoleerü shiain kachiiruain waaʼin tü kachiiruaka naaʼin na manoujainsaliikana otta tü keeʼireekat waaʼin wamüiwaʼa (Gal. 5:16). Jülüjataa waaʼin nukuwaʼipa Noé  sümaa nüpüshi. Kepiapuʼushii naya saʼaka wayuu mojulaasü. Nnojoliipejeʼe naya oʼunuin süchiirua tü kasa nasaʼwateekalü amüin naya wayuukana jee süchiirua tü kasa naaʼinrakat, shia jülüjaka naaʼin waneepia tü aʼyatawaa naapakat Jeʼwaa namüin. Jamüshiijaʼa naya, nakumajüin tü anuwakat, nakotchojüin tü eküülü nepijaayainjatkat otta tü shipijaayainjatkat mürüt jee müsia, naapirüin na wayuukana süchiki tü juya eʼitajatkat. Saashin tü Wiwüliakat, «oonooshi Noé sümaa nünüiki chi Maleiwakai sünain naaʼinrüin süpüshuaʼaya tü nuluwataakat anain» (Gén. 6:22). Sutuma naaʼinrüin tia oʼttaashii naya suulia wüinsiraa soʼu tia (Heb. 11:7).

13. ¿Kasa nuluwataaka anain waya Jeʼwaa?

¹³ ¿Kasa nuluwataaka anain waya Jeʼwaa? Nuluwataain waya sünain aküjaa maʼin pütchi sümüin wayuu (paashajeʼera Lucas 4:18, 19). Maaʼulu yaa, nüsürülüin Satanaa nekii na wayuukana suulia nayaawatüin saaʼu süchepchiain naya tü iküleesia nnojotkat shiimain, tü poliitikakat otta ayaʼlajaa jee oikaa kasa (2 Cor. 4:3, 4). Eesü süpüla washatüin nukuwaʼipa Jesuu, wakaaliinjüinjana na wayuukana süpüla neʼraajüin nukuwaʼipa Jeʼwaa jee naʼyataain nümüin süka niain chi taashikai atuma wayuu (Mat. 28:19, 20). Eesü kapüleere maʼin aküjaa pütchi, süka jamüin, eein waneirua mma eere nnojoluin jamajatüin namüin na wayuukana tü sümakat tü Wiwüliakat otta aashichijaʼawaishii wamüin waküjale pütchi. Mayaapejeʼe müin sukuwaʼipa wayuu maaʼulu, wasakirüinjatü waaʼin sünain tüü: «¿Eesüche süpüla kooʼomüin tatuma tü taʼyataainkat nümüin Jeʼwaa sünain aküjaa pütchi?».

14, 15. ¿Kasa naneekaka süpüla naaʼinrüin wainma wawalayuu? (Piirakaa sümüin tü ayaakuaa suluʼukat süpana 9).

¹⁴ Talatüshii maʼin waya süka weʼrüin watta naalii wawalayuu nnojoliikana kachiiruain aaʼin kamaʼanaa wainma korolo süpüla pürekutsooliin naya (1 Cor. 9:19, 23). Eeshii na pürekutsoot eere noutkajaain otta eeshii na akolojookana eere choʼujaain maʼin Aküjalii pütchi. Suʼunnaa tü jaʼrai juya alatüitpakat, alatüshii suulia 250.000 wawalayuu akumajakana nakuwaʼipa süpüla pürekutsooliin naya. Maaʼulu yaa, alatüshii suulia 1.100.000 pürekutsoot rekulaat sainküin mmakat. Anashaatasü maʼin tü naaʼinrakat naya wawalayuukana süka naʼyataain nümüin Jeʼwaa saaʼu taashinnapain naya nutuma (Sal. 110:3).

¹⁵ ¿Kasa akaaliinjaka naya wawalayuukana süpüla müin nakuwaʼipa? Waashajaa nüchiki chi wawalakai John otta Judith, tü nuʼwayuusekat. Suʼunnaa tü 30 juya alatüitpakat aʼyataashii naya nümüin Jeʼwaa suluʼu waneirua mma. Sotusü naaʼin suʼttaiwaʼaya tü Ekirajawaa napülajatkat na Pürekutsootkana soʼujee tü juyakat 1977. Atütüleʼennüsü naaʼin na ekirajaakana süpüla nakolojooin eere choʼujaain maʼin Aküjalii pütchi. Jee nnojotsü jülüjain naaʼin John sümaa Judith kamaʼanaa wainma kasa. Müsüjeseʼe nuʼwanajaain John tü niʼyataainkat. Nuʼunaka mapa sümaa tü nuʼwayuusekat suluʼumüin wanee mma naatajatü. Mayaapejeʼe naatain maʼin sukuwaʼipa wayuu jee naatain nanüiki otta jaʼin maʼin kaʼi chayaa, ayatüsü nachecherüin naaʼin süka noʼuraajüin waneepia  nümüin Jeʼwaa otta neʼitaain naaʼin nünain. ¿Jamüsü nanüiki süchiki tia naaʼinrakat? Anuu tü nümakat John: «Alanaʼaleesia maʼin sünain anain tü aʼyatawaakat nümüin Jeʼwaa suulialeʼeya wane kasa. Sutuma taʼyataain nümüin Jeʼwaa, teʼraajüichipa maʼin nia. Nia chi Tashi aipüraikai maʼin. Tayaawatüitpa aaʼu tü süküjeekat Santiago 4:8 müsü sünüiki: ‹Müleka jürütkaale nünainmüin Maleiwa, arütkaajeechi nia jünainmüin›. Tayaawatüitpa aaʼu tü talatüinjatkalü atumaa taaʼin sümaa tü taaʼinrüinjatkat».

16. ¿Kasa naaʼinraka watta naalii wawalayuu saaʼu kojutuin namüin taashin naya nutuma Jeʼwaa?

¹⁶ Eeshii wawalayuu kakaliainakana pürekutsooliin maʼaka naaʼin John otta Judith. Kapüleepejeʼe süpüla naaʼinrüin tia napüshuaʼa na wawalayuukana. Eeshii na aʼyataakana sünain akumajaa Piichi outkajaalee suluʼu waneirua mma. Jamüsüjaʼa soʼu sukumajünüin tü Weteet chakat Warwick (Nueva York), aʼyataashii maʼaka 27.000 wawalayuu sünain tia. Eeshii na wawalayuu aʼyataakana maʼaka jeʼra kaʼi, kashi, eeshii na aʼyataakana maʼaka wane juya jee na alatakana suulia wane juya. Wainma kasa napütaka naya wawalayuukana süpüleerua tia aʼyatawaakat. Naʼwaajüin Jeʼwaa sükajee tia naaʼinrakat jee neeʼiyatüin sünain kojutuin maʼin namüin taashin naya nutuma.

17. ¿Jameerü nakuwaʼipa na aneekakana aʼyatawaa nümüin Jeʼwaa saaʼu taashin naya nutuma?

¹⁷ Talatüshii maʼin waya saaʼu weʼraajüin nukuwaʼipa Jeʼwaa jee taashin waya nutuma süpüla waʼwaajüin nia. Weeʼiyata sükajee tü waneekakat kojutuin tia wamüin. Wayouta tü kasa mojusükat otta kooʼomüin watuma waʼyataain nümüin Jeʼwaa. Müle shia watuma aneerü maʼin wakuwaʼipa shikeraajapa pütchikat tüü: «Aʼatapüsü maʼi tü akumajuushikalüirua jooluʼu sujuittinnüinjatüin suulia sümüliala soʼu kaʼikat tia. Meeria aka shia [...] nüchooinkana Maleiwa sünain anashaataleein maʼi noʼuluʼu Maleiwa» (Roma 8:21).