2 ¿Wayache kasitka müliain waya?
¿Jamüsü watüjaainjatka saaʼu tia?
Wayaleje kasirüin tia, wountuinjeʼe wajaʼttirüin tü wamülialakat.
Jülüjataa paaʼin tüü
Aküjünüsü wünaapünaa waneirua kasa weʼraka anainjee wamüliala. ¿Wayache kasitka süpüshuaʼa tü kasa weʼrakalü anainjee müliaa?
-
Müliaa atumawaa jee ataüjaanaa
Saashin Organización Mundial de la Salud (OMS) nanainjee pienchishii wayuu miyoʼuyuu, waneeshia chi müliakai atumawaa jintüliiwaʼaya nia otta sünainjee apünüinsü jieyuu, waneesia tü müliakalü atumawaa sümaa sütaüjaanaleeinyain.
-
Outakana sümaa nnojoliin nataralaain
Sünain Estadísticas sanitarias mundiales 2018 (suluʼusü inglés), ashajünaka sutuma OMS, aküjünüsü eein maʼaka 477.000 na wayuu oʼutunakana aaʼin sainküin Mmakat soʼu 2016. Eepejeʼe 180.000 wayuu outakana soʼuleʼeya juyakat tia sünain atkawaa jee waneirua mojujirawaa.
-
Ayuulii
Anuu tü süshajakat Fran Smith suluʼu tü rewiisütakat National Geographic: «Sainküin mmaka alatüshii suulia miit miyoone na wayuu akamüjaliikana. Outusü maʼin wayuu sutuma tü akamüjaakat, süka jamüin, ayuulin tü naaʼinkat, amülasü isha nekiiruʼu otta ayuuisü tü nasosokot sutuma».
-
Nnojotsü wanaawain sujutu wayuu atumawaa
Anuu sünüiki wanee psicóloga, Jay Watts sünülia: «Shapaasü maʼin saaʼin wayuu sümaa mojuin saaʼin sutuma tü maʼletseekat, mojutaʼatüin naya atumawaa, mojutuin neʼiruku sümüin wayuu, nalerajünüin, nayeein alanaʼaleein suulia wayuu süpüshuaʼa otta napütüin noumain süpüleerua kasachiki».
PÜTÜJEERE SOOʼOMÜIN
Pünaja suluʼu jw.org tü videokot ¿Kasache nukumajaka apüla Maleiwa tü Mmakat?
Tü sümakat tü Wiwüliakat
Wainma tü kasa naaʼinrakat na wayuukana müliaka anainjee naya
Müliashii wayaʼaya natuma na sülaülashii mma mojulaakana, eerejeʼe neʼitaaushin naashin süpüla akaalinjaa wayuu.
«Chi wayuukai aluwataashi naaʼu na wayuukana süpüla numojujain nakuwaʼipa» (ECLESIASTÉS 8:9).
Tü waaʼinrajatkat suulia mülialeein waya
Nnojoleena ayuulin maʼin waya waaʼinrüle tü sümakat tü Wiwüliakat otta anajiraweena waya sümaa wayuu.
«Jimatüle naaʼin wanee wayuu, nnojoleechi ayuulin, akaajasaʼa suchunjale naaʼin, ajaʼlajaajeerü niipüse nüleʼeruʼu» (PROVERBIOS 14:30).
«Juuʼulaa suulia ülüʼüttaa aaʼin sümüin wayuu je suulia kanain jaaʼin eekai jüʼülüjaain sümaa. Nnojo juwoorolooin sümüin wayuu süka pütchi mojuluʼut» (ÉFESO 4:31).
