Oʼunushii sünain paseo waneinnua tepichi koleejiashii, shiasaʼa sünain tia, ataüjaanüshi wanee jintüi natuma na koleejiajiraakana nümaa. Chajana naya koleejiain suluʼu wanee koleejia awalaajuushi chaa Canadá. Anuu tü nüshajakat Leonard Stern suluʼu tü periódicokat Ottawa Citizen süchiki tü alatakat: «Jaʼitashii natüjain karaloʼuta na tepichikana, kekiire maʼin naya jee washinnuule naya, ayateenaʼaya aaʼinrüin kasa mojusü».

Anuu sooʼomüin tü nümakat Leonard Stern: «Ekirajünüinjana na tepichikana natuma na kachonniikana naya süpüla nayaawatüin saaʼu kasain mojuin jee kasain anain. Eepejeʼe na nnojoliikana aaʼinrüin tia, shia kachiiruaka neʼe naaʼin nakanajüin juya nachonnii süpüla walaainjatüin naʼyataain».

Jalouisü wamüin koleejiaa, nnojoliipejeʼe waya ooʼulaain suulia tü kasa mojusü suchuntaakat waaʼin sünainjee watüjain karaloʼuta. ¿Kasaka wekirajaainjatüin anain süpüla anainjatüin maʼin wakuwaʼipa?

Tü Wiwüliakat, müsü aka saaʼin wanee rouya. Waashajeʼerüle shia wayaawata aaʼu tü kasa mojusü eekat sünain wakuwaʼipa otta tü kasa isakat wachiki (Santiago 1:23-25). Sükaalinjain waya tü sümakat tü Wiwüliakat süpüla weeʼiratüin wakuwaʼipa otta süpüla jaʼyain suluʼu wakuwaʼipa jimatüin waaʼin, paaʼinwain waya, alin wapüla wayuu, kamaneein waya, nnojoliin kashaparaliin waya jee süpüla wachecherüin waaʼin. Otta saashin tü Wiwüliakat paaʼinwajiraajeena waya sünain anoujaa aire wapüla wayuu (Colosas 3:14). ¿Jamüsü anaka aipüraliire waya wayuu? Jülüjaa paaʼin tü sümakat tü Wiwüliakat süchiki tia.

• Aire tapüla wayuu, nnojoleerü akulajaain taaʼin sünain kamanewaa namüin, nnojoleerü achunjain taaʼin sümaa taʼwaataain suluʼu takuwaʼipa noʼupala sünain pülayaain taaʼin noulia. Nnojoleechi jiʼiyein taya noulia, nnojoleechi eʼrülin wayumüin namüin. Nnojoleechi taya aashichijaain maalü namüin sümaa nnojoluin motuin taaʼin süpüshuaʼa tü kasa mojusü naaʼinrakat tamüin. Aire tapüla wayuu, talateerü taaʼin taapapa nachiki ayatüin naya sünain tü shiimüinkat, akaajasaʼa mojule nachiki, mojeerü taaʼin. Chi wayuu aikai tapüla, tanoujeerü waneepia tü nüküjakat tamüin. Jaʼitashi kaainjalain nia, nnojoleechi taʼleejüin. Tü aliikalü apüla wayuu, ayateerü choʼujaain waneepia (1 Corinto 13:4-8).

• «Müleka aire wapüla wane wayuu, nnojoleena waya eʼrüliin wayumüin nümüin» (Roma 13:10).

• «Müleka aire na juwalayuukana jüpüla, moteerü jaaʼin müleka kaainjarale naya juulia» (1 Pedro 4:8).

¿Aashin anain waaʼin kottüle waya namaa na wapüshikana? Anasü waaʼin namaa süka watüjaain saaʼu aneein wakuwaʼipa natuma otta nnojoliin naaʼinreein kasa mojusü wamüin.

Eesü süpüla weeʼiratüin wakuwaʼipa jee wooʼulaain suulia wanee kasa mojusü müleka aire wayuu wapüla. Shia naaʼinraka George tia. Ayuujeeshi nia nülüin, niyoutapejeʼe tia chi nüshimiakai süka nükaijülin maʼin George. ¿Kasaka naaʼinrüin süpüla niyuujainjachin chi nülüinkai? Ooʼulaashi nia suulia  akamüjaa, mayaainjeʼe 50 juya nia sünain naaʼinrüin tia. Eesü süpüla niiʼiratüin nukuwaʼipa wanee wayuu müleka aire wayuu nüpüla.

Nnojoishii waya joʼuujiraain sümaa alin wapüla wayuu. Müshiijeseʼe nekirajünüinjanain na tepichikana süpüla alinjatüin wayuu napüla. Na wayuu aikana apüla nachonnii naapüin tü nayaalujutkat, naaʼinmajüin naya, namüliajüin neewaale jee ayuuire naya. Yootushii namaa nachonnii otta nekirajüin naya. Nachiaain naya jee naküjain namüin mojule jee anale wanee kasa süpüla nayaawatüinjatüin saaʼu. Otta anasü nakuwaʼipa napüleerua.

Eepejeʼe na wayuu nnojoliikana aaʼinrüin tia napüleerua nachonnii. ¿Mepisaiche wanee jintüi nnojorüle anain nipijia? Kepishi nia, eesü süpüla niiʼiratüin nukuwaʼipa. Eeshii na wayuu mojukana epijia joʼuuiwaʼaya naya, neeʼiratapejeʼe nakuwaʼipa otta aisü wayuu napüla mayaainjeʼe maalin naya apülawaa joʼuuiwaʼaya naya. Jaʼitasü müin mepikai saaʼin nukuwaʼipa wanee wayuu, eeshi süpüla niiʼiratüin nukuwaʼipa. Aküjüneerü tia, sünain tü wanee pütchikat.