CHOʼUJAASÜ WAMÜIN WAPÜSHUAʼA ALIN WAYA APÜLAWAA. Nnojotsüjeʼe anain nakuwaʼipa na wayuukana sümaa naʼwayuuse, napüshi jee naʼaleewainyuu maalinjiraale naya. Aijiraainjana waya süpüla anainjatüin otta talatüinjatüin waaʼin. ¿Jamüinjatka sukuwaʼipa saalin wayuu wapüla?

Naata sukuwaʼipa tia suulia saalin wanee jierü nüpüla wanee toolo eekai müliain shiiʼiree. Alanaʼaleesia suluʼu anain tü sukuwaʼipainjatkat saalin wayuu wapüla, süka jamüin, weʼreein anain nakuwaʼipa otta eeshii süpüla waapajiraain wekii naaʼu. Oʼunusü tia süchiirua tü sümakat tü Wiwüliakat otta weeʼiyatüin shiimain saalin wayuu wapüla.

Anuu tü sukuwaʼipainjatkat saalin wayuu wapüla: «Shiimüinre sünain alin tapüla wayuu, nnojoleerü akulajaain taaʼin sünain kamanewaa namüin, je nnojoleerü achunjain taaʼin sümaa taʼwaataain suluʼu takuaippa noʼupala sünain pülayaain taaʼin noulia. Nnojoleechi jiʼiyein taya noulia, je nnojoleechi eʼrülin wayumüin namüin. Nnojoleechi taya aashichijaain maalü namüin sümaa nnojolüin motüin taaʼin süpüshua tü kasa mojusü naaʼinrakat paala tamüin. Müleka shiimüinre sünain alin tapüla wayuu, talateerü taaʼin taapapa nachiki sünain ayatüin naya sünain tü shiimüinkat, akaajasa mojule nachiki, mojeerü taaʼin. Chi wayuu eekai alin tapüla, ayateechia taaʼinmajüin [...]. Jaʼitashi kaainjalain nia, nnojoleechi taleejüin, süka keeʼireein maʼi taaʼin naaʼinrüinjatüin tü anasükat nüchikua. [Ayateerü eein waneepia tü aijirawaakat, TNM]» (1 Corinto 13:4-8).

«Ayateerü eein waneepia tü aijirawaakat» otta eesü süpüla sükooʼomüinraain shiʼipaʼaya. Na aipüraliikana wayuu, nnojotsü akulajaain naaʼin sünain kamanewaa otta motusü naaʼin saainjala wayuu namüin, shiasaʼa sutuma tia, paaʼinwajiraashii naya namaa na waneinnua (Colosas 3:14). Na aikana apüla  wayuu maʼaka sümüin tü Wiwüliakat, nnojotsü wainmajüin naaʼin otta talatüsü naaʼin mayaapejeʼe nnojoluin lotuin nakuwaʼipa. Wekirajaa motsomüin sünain nukuwaʼipa wanee wayuu sümaa nuʼwayuuse.

Anuu tü nakuwaʼipainjatkat na wayuu kasaatkana naashin Jesuu: «‹Anashi nujuittüle chi wayuukai nuulia chi nüshikai je suulia tü niikat süpüla kaʼwayuusein nia je süpüla kepiainjachin nia sümaa tü nuʼwayuusekat saaʼu saʼaniraaitpain nukuaippa sümaa› [...]. Saʼaniraapa nukuaippa wane wayuu toolo sümaa wane jierü nütüma Maleiwa, nnojotsü anain süpüla sükatajiraanüin sütüma wayuu» (Mateo 19:5, 6). Eesü piamasü kasa watüjaka sünainjee pütchikat tüü.

«SAʼANIRAAITPAIN NUKUAIPPA SÜMAA». Niʼraajüin maʼin sukuwaʼipa nuʼwayuuse wanee wayuu, akaataajaʼa neʼe tü jietkat, shiʼraajüin maʼin nukuwaʼipa suʼwayuuse. Aijiraainjana naya süpüla nnojoluin kawalaʼatain tü jietkat nutuma chi toolokoi jee niale chi toolokoi sutuma tü jietkat (1 Corinto 6:16; Hebreokana 13:4). Amojujaajeerü neʼe nukuwaʼipa wanee wayuu sümaa nuʼwayuuse kawalaʼatale shia nutuma otta nnojoleerü shiʼitaain maʼin saaʼin sünain tü nümakat. Jee kachonniire naya, mülieerü maʼin naaʼin nachonnii süka nnojoleerüin natüjaain saaʼu aire naya apülawaa, shapaajeerü naaʼin otta ütteerü naaʼin.

«SAʼANIRAAPA NUKUAIPPA WANE WAYUU TOOLO SUMAA WANE JIERÜ NÜTÜMA MALEIWA». Kojutusü noʼuluʼu Maleiwa nakuwaʼipa na kasaatshiikana. Na wayuu ayaawatakana saaʼu tia, nachajaain maʼin sukuwaʼipa süpüla aijiraain maʼin naya. Nnojotsü jülüjain naaʼin nooʼulaajiraainjanain mojujiraale naya. Sutuma aijiraain maʼin naya, eejiraashii sümaa tü alatakat namüin, paaʼinwajiraashii naya jee anajiraashii naya.

Aijiraale wanee wayuu sümaa nuʼwayuuse, aneerü maʼin nakuwaʼipa nachonnii. Anuu sünüiki wanee majayüt Jessica sünülia: «Aijiraashi maʼin chi tashikai sümaa tü teikat otta kojutujiraashii naya. Sutuma teʼrüin kojutuin sümüin tü teikat tü nümakat chi tashikai, tashateein sukuwaʼipa».

Tü nukuwaʼipakat maʼin Maleiwa shia aipüralin maʼin nia wayuu. «Aipürai maʼin wayuu Maleiwa», müsü tü Wiwüliakat nüchiki (1 Juan 4:8, TNM). Müshijeseʼe «chi Maleiwa talatakai aaʼin waneepia» nümünüin Jeʼwaa (1 Timoteo 1:11, TNM). Talateena maʼin waya waneepia washatüle nukuwaʼipa Maleiwa, shiapejeʼe washatüinjatüin maʼin tü sukuwaʼipakat saalin wayuu nüpüla. Anuu sünüiki Éfeso 5:1, 2: «Anakaja müleka jüshatüle nukuaippa chi Maleiwakai, süka nüchooinapain jia je süka alin maʼi jia nüpüla. Anakaja müleka aijiraale jia jüpüla jüpüshua».