Tü naatakalü atuma pia noulia na waneinnua nnojotsü shiain tü pünüliakat jee tü piyolojokot, tü naatakalü atuma pia shia tü kasa anasü paaʼinrakat, tü punoujakalü anain jee tü pukuwaʼipakat.

Pansaale pukuwaʼipa sümaa tü kasa anasü ekirajünakalü anain pia nutuma püshi jee püi, nnojoleechi pia aaʼinrüin kasa mojusü otta nnojoleechi pia oonooin sümaa tü namakat pümüin na jimaʼaliikana wanaa pümaa.

«Watta naalii na makana aka saaʼin tü mieeka kasheʼinyaakalü atumawaa eere suikaanüin kuluulu, süka jamüin, naatain neʼe aneekaka nooʼopünaa tü nasheʼinjatkat» (Adrian).

«Taaʼinrüin waneepia tü anasükat mayaapejeʼe kapüleein shia. Teʼraajüin na shiimainkana maʼin taʼaleewain sutuma tü nakuwaʼipakat tamüin otta jamawalin takuwaʼipa namaapa taya» (Courtney).

TÜ SÜMAKAT TÜ WIWÜLIAKAT: «Juuʼulaa suulia ashataa nakuaippa na manoujainsaliikana. [...] Müleka juuʼulaale suulia, niiʼirateerü jukuaippa Maleiwa» (Roma 12:2).

Süpüla piyaawatüin saaʼu jaralüin tü pukuwaʼipakat maaʼulu otta jaraleerüin pukuwaʼipa mapeena, pütüjaainjatü aaʼu kasain wayu tü anakat jee tü mojukat sünain pukuwaʼipa otta kasain punoujain anain. Eeshi süpüla püsakireʼerüin paaʼin sünain tüü.

Tü anakat sünain takuwaʼipa: «¿Kasa tatüjaka apüleerua? ¿Kasa anaʼleeka sünain takuwaʼipa? ¿Atüjashiche taya achecheraa taaʼin suulia aaʼinraa kasa mojusü? ¿Taaʼinramaatüinche wanee kasa taaʼinrajatka? ¿Tütüshiche taya sünain aʼyatawaa? ¿Asülajüiche taya? ¿Kasa tü anakat maʼin tatuma?».

PUUʼULAKA PAAʼINRÜIN TÜÜ: ¿Isasü püchiki piyaawatüin saaʼu tü anakat sünain pukuwaʼipa? Müle shia, puchunta nümüin püshi, püi jee niale wanee pütünajut süpüla nüküjain tia pümüin.

TÜ SÜMAKAT TÜ WIWÜLIAKAT: «Anakaja eere jaaʼin sünain tü jaaʼinrakat süpüla jütüjaainjatüin saaʼu müleka anale je müleka mojule. Maa aka analejeʼe tü jaaʼinrakat, talateeshiijaʼa jia sümaa. Je nnojolu jiyoujireerüin tü jaaʼinrakat namaa juwalayuu» (Galacia 6:4).

Tü mojukat sünain pukuwaʼipa: «¿Kasa tanouteʼerajatka sünain takuwaʼipa? ¿Kasa tü taainjeekalü atuma kasa mojusü? ¿Kasa tü tachecherüinjatkalü oulia taaʼin?

TÜ SÜMAKAT TÜ WIWÜLIAKAT: «Müleka ‹Maainjalasalii waya›, wamüle, aküjüshii waya waʼalain, jaʼitairü shiimüinyaain tü wamakat saaʼin wamüin» (1 Juan 1:8).

Tü tanoujakalü anain: «¿Jarat tü pütchi oʼunirakat takuwaʼipa? ¿Jamüsü shiaka oʼunirüin takuwaʼipa tia? ¿Anoujashiche taya nünain Maleiwa? ¿Jamüsü tatüjaaka saaʼu shiimain eein nia? Sünainjee tü saaʼinrakat wayuu maaʼulu, ¿kasa wayu mojushiika tamüin? ¿Jamüsü mojushiika shia tamüin? ¿Jameetche takuwaʼipa watta kaʼi?».

TÜ SÜMAKAT TÜ WIWÜLIAKAT: «Jülüjale maʼin paaʼin tü paaʼinrajatkat otta piyaawatüle saaʼu tü anakat süpüla paaʼinra, aneerü pukuwaʼipa sutuma» (Proverbios 2:11).