NAMÜINJATÜ NA KAʼWAYUUSESHIIKANA
2: Paaʼinwajiraa jia
¿KASA SÜNAINPÜNAAKA?
Chi wayuu paaʼinwajiraakai sümaa nuʼwayuuse müshi aka naaʼin wanee suchupeetse katünasü nümaa chi niʼipajanakai, nnojotsü naatawalin tü mma noʼunuinjatkalü aluʼumüin. Jaʼitasü alatüin kasa mojusü namüin, nnojotsü kapülain naaʼin nakuwaʼipa neʼe namüiwaʼa, jülüjasü naaʼin kasain anainjatüin namüin piamaleʼeya.
TÜ SÜMAKAT TÜ WIWÜLIAKAT: «Waneeinapa wayuu naya, nnojoliinapa katataʼawain» (Mateo 19:6).
«Na kaʼwayuuseshiikana aʼyanaajiraainjana süpüla anainjatüin nakuwaʼipa sümaa naʼwayuuse» (Christopher).
¿JAMÜSÜ CHOʼUJAAKA JAAʼINRÜIN TIA?
Nnojorüle paaʼinwajiraain na kaʼwayuuseshiikana, atkaajiraajeena neʼe naya sülatapa kasa mojusü namüin otta nnojoleerü nanoutuin sukuwaʼipa tü alatakat namüin. Mojujiraajeena neʼe naya jaʼitasü nnojoluin shiain sünainjee wanee kasa nnojotka mojuin maʼin.
«Choʼujaasü maʼin paaʼinwain wanee wayuu sümaa nuʼwayuuse. Jamüsüjaʼa nnojorüle paaʼinwajiraain taya nümaa chi taʼwayuusekai, müshiijeʼe neʼe kepiajiraakai waaʼin sümaa wayuu naatajatü» (Alexandra).
¿KASA EEKA SÜPÜLA PAAʼINRÜIN?
PÜSAKIREʼERA PAAʼIN
-
¿Tamüinjatche neʼe tamüiwaʼa tü nneerü takanajakat?
-
¿Nnojoluinjatche tamaain tü taʼwayuusekat süpüla jimatüinjatüin taaʼin?
-
¿Nnojoishiche taya nanainpünaweein süpüshi tü taʼwayuusekat sümaa tatüjaain saaʼu alin maʼin naya süpüla?
YOOTO JIA SÜCHIKI TÜÜ
-
¿Kasa paaʼinwajiraaka maʼin anain waya?
-
¿Kasa nnojotka paaʼinwain anain waya?
-
¿Kasa waaʼinrajatka süpüla paaʼinwajiraain maʼin waya?
PUUʼULAKA PAAʼINRÜIN TÜÜ
-
Jülüjataa paaʼin müin pukuwaʼipa sümaa puʼwayuuse maka saaʼin nakuwaʼipa na wayuu ashaitakana dominó sümaa peʼipoloojiraain pia sümaa puʼwayuuse. ¿Kasa jaaʼinrajatka süpüla nnojoluin peʼipoloojiraain jia sünain ashaitaa?
-
Nnojo jülüjain paaʼin kasainjatüin paaʼinrüin süpüla pükanajüin pümüiwaʼa, jülüja paaʼin kasainjatüin paaʼinrüin süpüla jükanajüin piamaleʼeya.
«Nnojo jülüjain paaʼin jaralin pansaain anüiki otta jaralin oʼtchejaain. Tü kojutukat maʼin shia anajiraain jee paaʼinwajiraain jia» (Ethan).
TÜ SÜMAKAT TÜ WIWÜLIAKAT: «[Kapüla] jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa» (Filipos 2:3, 4).
