1-3. (1) ¿Jamüsü anaka süpüla washatüin nukuwaʼipa Josué, chi aneekakai tü wopu anasükat? (2) ¿Kasa sotuinjatka waaʼin palajana waneekajatpa wanee kasa?

CHOʼUJAASÜ maʼin anainjatüin sukuwaʼipa tü kasa waneekakat. Chi wayuu eekai nüneeküinjachin wanee kasa, eesü süpüla nüneeküin kasain anain nümüin otta kasainjatüin naainjüin süka nukuwaʼipa. Jülüjataa paaʼin wanee wayuu waraittakai suluʼu wanee wopu jee niʼraka süpaajaain tü wopukot. ¿Jaraleerü nuʼunaka aluʼu? Nütüjaale saaʼu jalawalinjachin nia, shieerü nüneekaka tü wopu nüsitujainjatkalü atuma suulia tü wopu wattakualeechikalü atuma nia.

² Süküjüin tü Wiwüliakat nachiki waneeinnua wayuu alatakana amüin tia. Nüneeküinjatü Caín ayatüinjachire nia üttüin aaʼin jee shiale nuuʼulaain suulia (Gén. 4:6, 7). Nüneeküinjatü Josué müleka niʼyataainjachire nümüin chi Maleiwakai jee shiale nuʼwaajüinjatüin tü maleiwayaasükalüirua (Jos. 24:15). Tü keeʼireekat naaʼin Josué shia pejein nia nünain Jeʼwaa makalaka nüneeküin tü «wopu» kanainmüinkat Maleiwa. Süka nnojoluin keeʼireein naaʼin Caín tia, shia nüneekaka tü «wopu» wattakuaikalü atuma nia nuulia Maleiwa.

³ Eesü nnojorüle watüjaain saaʼu tü waneeküinjatkat. Müle shia, soto waaʼin tü keeʼireekat waaʼin: kojutüinjachin Jeʼwaa sutuma tü kasa waainjakat otta nnojoluinjatüin waainjüin wanee kasa akayaleʼeraka waya nuulia (paashajeʼera Hebreokana 3:12). Wekirajaainjatü anain sünain ekirajaayakat tüü otta tü wanee, akaratshisü kasa eeka süpüla akayaleʼerüin waya nuulia Jeʼwaa.

4. ¿Jamüsü choʼujaaka maʼin waʼyataainjanain?

⁴ Aʼyataainjana na anoujüshiikana nayaaluʼu nayakana otta shiyaaluʼu nachonnii sümaa naʼwayuuse. Saashin tü Wiwüliakat, «nnojorule naaʼinmajüin na  nüpüshikana, [...] mojuleesia maʼi tü naaʼinrakat nuulia wane manoulasai» (1 Tim. 5:8; 2 Tes. 3:10). Choʼujaasü maʼin waʼyataainjanain, akatsaʼa eein süpüla sükayaleʼerüin waya nuulia Jeʼwaa nnojorüle jülüjüin waaʼin tü wakuwaʼipakat. ¿Jamüsü sülataka tia?

5. ¿Kasa watüjaainjatka aaʼu süpülapünaa waneeküin wanee aʼyatawaa?

⁵ Jülüjataa paaʼin püchajaale aʼyatawaa. Suluʼule pia wanee mma eere alin shiiʼiree aʼyatawaa, eeshi piʼyataweere sünain tü püntakalü anain palajana; jaʼitairü jamüin sukuwaʼipa. ¿Jama nnojorüle pansaain shia sümaa tü sümakat tü Wiwüliakat? ¿Jama puʼunüinjachire wattamüin sutuma? ¿Sumojujeʼerüle piʼyataain nümüin Maleiwa? ¿Nnojoire pia kottiraain sümaa püpüshi sutuma? Mayaapejeʼe nnojoluin müin anakai saaʼin, ¿paapaajeerü shia süka alin shiiʼiree aʼyatawaa? Soto paaʼin: püneeküle wanee wopu naata, sükayaleʼereechi pia nuulia Jeʼwaa (Heb. 2:1, NM). Püchajaale aʼyatawaa maaʼulu jee puuʼulaweere tü piʼyataakalü anain, ¿kasa akaaliinjeechika pia süpüla püneeküin kasa anasü?

6, 7. (1) ¿Kasa eeka süpüla keeʼireein naaʼin wanee wayuu eekai niʼyataain? (2) ¿Jarat tü aʼyatawaa nüneeküinjatkat süpüla pejein nia nünain Jeʼwaa otta jamüshi pejeechika nia sutuma?

⁶ Jülüjeesü waaʼin kasain keeʼireein waaʼin. Jülüja waaʼin pütchikat tüü: «¿Jalakualeeshi taya sutuma tü aʼyatawaakat?». Piʼyataale neʼe süpüla anain pukuwaʼipa jee anain sukuwaʼipa püpüshi sünain aʼyatawaa nümüin Jeʼwaa, nükaaliinjeechi pia (Mat. 6:33, NM). Nnojoleechi motuin pia naaʼin Jeʼwaa pujutünüle suluʼujee piʼyataain jee aijaale shiiʼiree nneerü pümüin (Is. 59:1). ‹Shiimüin sünain nuuntüin Maleiwa niyuʼlüin wayuu saʼakajee ooʼulakünaa aaʼin, na aaʼinrakana tü anasükat› (2 Ped. 2:9).

⁷ ¿Jama shiale neʼe keeʼireein paaʼin washirüü? Eesüjaʼa süpüla püinküin shia, akatsaʼa eein tü kasa püpütüinjatkat süpüleerua (paashajeʼera 1 Timoteo 6:9, 10). Waaʼinmaale maʼin tü aʼyatawaakat otta tü washirüükat, sükayaleʼereena waya nuulia Jeʼwaa.

8, 9. ¿Kasa jülüjüinjatka naaʼin na kachonshiikana süchiki tü sünainpünaakat tü aʼyatawaakat?

⁸ Jiakana tooloyuukana, jülüja jaaʼin jameerüin nakuwaʼipa jüchonnii sutuma tü jaainjakat. ¿Kasa paaʼinmaaka maʼin noʼupala püchonnii? ¿Tü aʼyatawaakat shiataapa aleewain pia nümaa Jeʼwaa? Neʼrüle paaʼinmaain tü washirüükat otta piʼraajünüin maʼin, eeshii süpüla noʼunüin süchiirua pukuwaʼipa. Eeshi süpüla mojutüin pia natuma. Jülüja paaʼin tü sümakat wanee wawala majayülü: «Shia neʼe teʼraka naaʼinmaain chi tashikai tü aʼyatawaakat. Aʼyataashi nia paala süpüla nnojoluinjatüin kasain choʼujaain wamüin. Maaʼulu, nnojoluitpa naainjüin tia. Aʼyataaichipa maʼin süpüla niyaʼlajüin tü kasa nnojotkat choʼujaain maʼin. Eetaayaai weʼraajünüin sutuma wakaaliinjüin wayuu süpüla aʼyatawaa nümüin Maleiwa, eʼraajünüshii neʼe sutuma washinnuuin waya. Shia analeeka aluʼu tamüin nükaaliinjüle taya chi tashikai sünain anoujaa suulialeʼeya naapüin wainma nneerü tamüin».

⁹ Jiakana kachonshiikana, nnojo jükayaʼlaain nuulia Jeʼwaa sutuma jaaʼinmaain maʼin tü aʼyatawaakat. Jiiʼiyata süka jukuwaʼipa shiain maʼin kojutüin jümüin tü aʼyatawaakat nümüin Maleiwa suulialeʼeya wainmeein kasa jümaʼana (Mat. 5:3).

10. Jiakana jimaʼaliikana otta majayünnüükana, ¿kasa akaaliinjeenaka jia süpüla anain jutuma süneekia tü kasa jaaʼinrajatkat?

¹⁰ Jiakana jimaʼaliikana otta majayünnüükana, ¿kasa akaaliinjeenaka jia süpüla anain jutuma süneekia tü kasa jaaʼinrajatkat? Jütüjaainjatü aaʼu kasain keeʼireein jaaʼin. Jikirajaainjanale sünain wanee kasa  jiʼyataainjatkalü anain, ¿jaaʼinmaajeerü tü aʼyatawaakat nümüin Maleiwa? ¿Sükayaleʼerataajeenapa jia nuulia? (2 Tim. 4:10.) ¿Nayeena jüshataka akuwaʼipa na wayuu talatakana maʼin aaʼin sutuma wainmain nanneetse suluʼu wanku? ¿Kanoulataajeenapa jia nünain Jeʼwaa maʼaka naaʼin David? Müshi nia: «Jintüitpuʼushi taya tamaiwa, akaisaʼa laülaaichipain joo taya. Nnojoiyüiya teʼrüin wanee wayuu lotokai akuwaʼipa müliain maʼin; nnojoyülia teʼrüin nüchonnii sünain ojulijakuʼu maa» (Sal. 37:25, NM). Soto jaaʼin eein tü wopu akayaleʼereetkat jia nuulia Jeʼwaa otta eein tü aneetkalü atuma jukuwaʼipa (paashajeʼera Proverbios 10:22; Malaquías 3:10). ¿Jaraleerü tü wopu jüneekakat? *

11. ¿Kasa süküjaka tü Wiwüliakat süchiki tü ashaittaakat? ¿Kasa jülüjüinjatka waaʼin waaʼinrapa tia?

¹¹ Nnojotsü mojuin jee malaain tü ashaittaakat saashin tü Wiwüliakat. Müshi Pablo nümüin Timoteo: «Tü ekirajaakat atapaʼa sünain wanee kasa, eesü tü anakat apüla shia» (1 Tim. 4:8, NM). Saashin tü Wiwüliakat «eesü kaʼi süpüla asirajaa [...] otta kaʼi süpüla wonnataa» jee süküjüin wamüin weemeraainjanain (Ecl. 3:4, NM; 4:6). Nnojorüle laülaain waaʼin sünain tia, eeshii süpüla sükayaleʼerüin waya nuulia Jeʼwaa. Süpüla nnojoluin sülatüin wamüin tia jülüjüinjatü waaʼin piamasü kasa: jaralüin tü kasa washaittakat otta jeʼrain tü kaʼi walatirakat sünain.

12. ¿Kasa jülüjüinjatka waaʼin waneekajatpa tü washaittüinjatkat, tü wanajüinjatkat otta tü waapajüinjatkat?

¹² Waashajaa palajana süchiki tü ashaittünakat, tü anajünakat otta tü aapajünakat. Eesü tü anakat süpüla washaittüin. Akatsaʼa jouluin maaʼulu tü eeʼiyatakat tü kasa nülerajakat Maleiwa maʼaka saaʼin atkawaa, tü naaʼinrakat na outshiikana otta amaʼüjirawaa akuwaʼipaa. Müsüjeseʼe waneeküinjatüin tü washaittakat, tü wanajakat otta tü waapajakat. Jülüja waaʼin tüü: «¿Jamüsü takuwaʼipa sutuma? ¿Atkaweeshi taya sutuma, ayoujiraweeshi taya jee yaleteesü taaʼin noulia na waneeinnua?» (Prov. 3:31). «¿Manneetsewaishi taya sutuma? ¿Sümalajeʼereerü nanoula na waneeinnua?» (Roma 14:21, NM.) «¿Jamüsü  nakuwaʼipa na wayuu tamaakana sünain?» (Prov. 13:20.) «¿Saainjireein taya kasa mojusü?» (Sant. 1:14, 15).

13, 14. ¿Jamüsü jülüjüinjatka waaʼin jeʼrain tü kaʼi walatirakat sünain ashaittaa?

¹³ Waashajaa jooluʼu süchiki tü kaʼi walatirakat sünain ashaittaa, anajaa otta aapajaa wanee kasa. Jülüja waaʼin tüü: «¿Talatirüin wainma kaʼi sünain suulia aküjaa pütchi otta outkajawaa?». Walatirüle wainma kaʼi sünain ashaittaa, weʼreerü nnojoluin talatüin waaʼin sutuma. Anale sukuwaʼipa watuma tü ashaittaakat, talateerü maʼin waaʼin. ¿Jamüsü? Shia süka waainjüin palajana tü kasa anakat maʼin (paashajeʼera Filipos 1:10, 11).

¹⁴ Mayaapejeʼe müin anakai saaʼin wamüin walatirüin wainma kaʼi sünain ashaittaa, eeshii süpüla sükayaleʼerüin waya nuulia Jeʼwaa. Alatsü tia sümüin Kim, wanee wawala piamairü shikii suuyase. Müsü shia: «Matüjüinsat makataa taya suulia wanee miʼiraa, oʼunawaisü taya piennoʼu, saawanoʼu otta rimiinkoʼu. Aluʼusaʼa jooluʼu, teʼrüin eein kasa analeeka süpüla taainjüin. Süka pürekutsoolüin taya, atamaʼawaisü taya laseei süpüla aküjaa pütchi. Makalaka nnojoluin süpüla makatüin taya sünain wanee miʼiraa kaʼlepa aika. Tatüjaa aaʼu nnojoluin mojuin tü miʼiraakat, akatsaʼa eein süpüla nnojoluin waaʼinmaain waneeirua kasa sutuma. Anainjatü sukuwaʼipa watuma maʼaka saaʼin süpüshuaʼa tü kasakalüirua».

15. ¿Kasa naaʼinrajatka na kachonshiikana süpüla naneeküin tü kasa talatüinjatkalü atuma naaʼin nachonnii?

¹⁵ Na kachonshiikana aʼyataainjana nayaaluʼu nayakana jee shiyaaluʼu nachonnii, jülüjüinjatü naaʼin nanoula sümaa nanoula nachonnii, talatüinjana sümaa nachonnii. Tia, sünainpünaasü nakatalüinjanain kaʼi süpüla ashaittaa namaa. Müleka kachonle pia, nnojoluinjatü jülüjüin paaʼin mojuin ashaittaa, anajaa otta aapajaa wanee kasa. Eeinjatü neʼe paaʼin suulia wanee kasa eekai sumojujeʼereein nakuwaʼipa (1 Cor. 5:6, NM). Müle shia putuma, püneekeerü tü kasa talateetkalü atuma saaʼin püpüshi. * Paainjüle tia, suluʼujeena jia tü wopu arütkeʼereenakat jia nünainmüin Jeʼwaa.

16, 17. ¿Kasa mojuka maʼin atuma naaʼin na kachonshiikana otta jamüsü watüjaaka saaʼu nütüjaain aaʼu Jeʼwaa tü alatakat namüin?

¹⁶ Aishii maʼin napüla nachonnii na wayuukana makalaka naashajaain Jeʼwaa süchiki tia süpüla niiʼiyatüin alin maʼin nüpüla tü nupueulosekat (Is. 49:15). Müsüjeseʼe mojuin waaʼin nuuʼulaale suulia anoujaa wanee wapüshi. Müsü sünüiki wanee wawala ojuʼitinnaka achon: «Mojusü maʼin taaʼin sutuma tia jee maʼwaisü taya: ‹¿Jamüsüche suuʼulaaka suulia anoujaa?›, müsü tasitkai saaʼin tü alatakat sümüin».

¹⁷ Sülatüle pümüin tia nütüjaa aaʼu Jeʼwaa mojuin maʼin paaʼin. ‹Mojusü maʼi naaʼin› wanaa sümaa niʼrüin wayumüin Adán otta na wayuu eejanakana süpülapünaa tü juya Miyoʼushaatakat (Gén. 6:5, 6). Na nnojoyüliikana alatüin amüin tia, nnojotsü nayaawatüin saaʼu mojuin maʼin saaʼin wayuu sutuma. Akatsaʼa nnojoluin anain sükayaleʼerüle pia nuulia Jeʼwaa tü kasa naainjakat wanee püpüshi eekai nujuʼitinnüin. ¿Kasa paaʼinrajatka süpüla eejiraain pia sümaa tü alatakat pümüin sutuma nuuʼulaain suulia anoujaa wanee püpüshi?

18. ¿Jamüshii nnojoliika nayain kasirüin na kachonshiikana tü alatakat nuuʼulaale wanee nachon suulia anoujaa?

¹⁸ Nnojotsü püsirüin tü alatakat.  Nüneeküin nümüiwaʼa wanee wayuu tü naainjüinjatkat otta wanee wapüshi eekai woutiisain niainjachi ‹asouktaka saaʼu tü naaʼinrakat› (Gal. 6:5). Naashin Jeʼwaa, nia asouktüinjachika saaʼu naainjala chi aainjakai shia, nnojoishi piainjachin (Ezeq. 18:20). Nnojoishii piʼitaainjanain na waneeinnua sünain tü alatakat otta nnojo piʼrüin wayumüin sümüin tü nümakat Jeʼwaa. Nia püʼleejüinjachika chi Yolujaakai, nnojoishii nayainjanain na laülaashiikana süka neʼitaaushin süpüla aaʼinmajaa na anoujüshiikana (1 Ped. 5:8, 9).

19, 20. (1) ¿Kasa naaʼinrajatka na kachonshiikana mojule maʼin naaʼin sutuma nuuʼulaain wanee nachon suulia anoujaa? (2) ¿Kasa jülüjüinjatka naaʼin na kachonshiikana?

¹⁹ Jashichire pia nümüin Jeʼwaa saaʼujee tü alatakat, akayalaajeechi pia nuulia. Tü niʼrüinjatkat chi ojuʼitinnakai shia alanaleeinya naalin Jeʼwaa püpüla suulialeʼeya naalin na püpüshikana. Choʼujaasü ichein maʼin punoula süpüla eejiraain pia sümaa tia. Nnojo pükatalaain noulia na puwalayuukana sünain anoujaa (Prov. 18:1). Püküja nümüin Jeʼwaa jamüin paaʼin (Sal. 62:7, 8). Nnojo püchajaain sukuwaʼipa süpüla paashajaain suluʼupünaa serulaat jee Internet nümaa chi püpüshi ojuʼitinnakai (1 Cor. 5:11). Shia paaʼinmaa tü aʼyatawaakat nümüin Maleiwa (1 Cor. 15:58). Müsü sünüiki tü wawala ojuʼitinnakalü achon: «Tatüjaa aaʼu shiainjatüin taaʼinmaain tü aʼyatawaakat nümüin Jeʼwaa otta icheinjatüin tanoula süpüla takaaliinjüin tü tachonkat shiitaapa süchikuaʼa».

²⁰ Aipüraliire waya saashin tü Wiwüliakat, nnojoleerü akulajaain waaʼin sünain aʼatapajaa wanee kasa (1 Cor. 13:4, 7, NM). Nnojotsü mojuin jülüjüle waaʼin niitaajeechin nüchikuaʼa wanee wachon. Wainma na wayuu eitaakana nachikuaʼa sünain anoujaa süka nooʼulaain suulia naainjala otta anashiisü tia nümüin Jeʼwaa. Naʼatapajüin naya süpüla ‹motuin naaʼin tü naainjalakat› (Sal. 86:5, NM).

21, 22. ¿Kaseerü püneekaka?

²¹ Nukumajüin Jeʼwaa na wayuukana süpüla naneeküin namüiwaʼa tü anakat namüin (paashajeʼera Deuteronomio 30:19, 20). Walaüleʼerüinjatü waaʼin sünain tia. Müinjana waya waneʼewai wakua: «¿Jarat tü wopu toʼunakalü aluʼu? ¿Sükayaleʼerüin taya nuulia Jeʼwaa tü aʼyatawaakat, tü ashaittaakat jee tü takuwaʼipakat namaa tapüshi?».

²² Nnojoleerü ajaʼttüin saalin nupueulose Jeʼwaa nüpüla. Tü akayaleʼereetkat waya shia waneeküle wanee wopu naatajatü (Roma 8:38, 39). Nnojotsü müinjatüin wakuwaʼipa. Waʼyataa maʼin süchiirua pejein waya nünain Jeʼwaa. Sünain tü wanee ekirajaayakat, wekirajaweerü anain pienchisü kasa weeʼiyatajatka maʼin anain warütkaain nünainmüin Jeʼwaa.