Aire wapüla wanee wayuu, nnojotsü jameein watuma. Weeʼiyatüin sükajee wakuwaʼipa otta wanüiki, aipüraliin waya. Jaʼitairü kasainjatüin waainjüin süpüla weeʼiyatüin tia.

Niiʼiyatüin Moisés alin Maleiwa nüpüla wanaa sümaa noonooin waneepia nümaa. Müsü tü Wiwüliakat suluʼu 1 Juan 5:3: «Waaʼinrüle tü nuluwataakat anain waya chi Maleiwakai, shiimüin alin nia wapüla». Jüüjüüshi Moisés nümüin Jeʼwaa sünain süpüshuaʼa tü nuluwataakalü anain. Jaʼitairü kapüleein jee mapüleein shia nümüin (Éxodo 40:16).

Niiʼiyatüin Moisés alin nüpüla na israeliitakana. Natüjaa aaʼu nüneekuushin nutuma Jeʼwaa müshiijeseʼe nachuntüin kaaliinwaa sülatüle kasa mojusü namüin. Saashin tü Wiwüliakat «antüshii naya wattaʼajee maalü nümaʼanamüin Moisés, waneʼereʼeya noʼunüin aliika» (Éxodo 18:13-16). Kojutüinsü sirawaa aaʼu kaʼi sünain aapajaa tü alatakat sümüin wayuu. Nnojotpejeʼe naainjüin shia Moisés mojusheʼeka. Talatsü naaʼin süka alin naya nüpüla.

Nnojotpejeʼe yalain neʼe Moisés sünain aapajaa tü alatakat namüin na israeliitakana, oʼuraajawaishi nia napüleerua. Jaʼitairü eein wayuu mojuka anüiki nümüin, nuʼuraaja aaʼulu. Wekirajaa sünain tü naainjakat wanaa sümaa ittajaain süta Míriam nutuma Jeʼwaa saalii shiyounalaain nia. Nnojoishi talatüin nia sutuma müin sukuwaʼipa, achuntamaatüshi nümüin Maleiwa: «¡Maleiwakalee, tachuntüin maʼin pümüin paawaleʼerüin shia!» (Números 12:13, NM). Niajaʼa neʼe maka anüiki wanee wayuu eekai aipüralin.

Süpüla woonooin nümaa Maleiwa ‹süka süpüshua waaʼin›, alinjachi maʼin nia wapüla palajana (Roma 6:17). Talatsü naaʼin Jeʼwaa woonoole nümaa (Proverbios 27:11). Waʼyataale nümüin Maleiwa süka alin nia wapüla, anasü wakuwaʼipa sutuma. Talatsü waaʼin sutuma woonooin nümaa (Salmo 100:2).

Alinjana maʼin wapüla na waneeinnua. Nüküjüle wamüin wanee waʼaleewain jee niale wanee wapüshi tü alatakat nümüin, waainjeerü apünüinsü kasa aipüraliire waya: 1) Jülüjeerü waaʼin tü nümakat wamüin, 2) wayaawateerü aaʼu tü alatakat nümüin otta 3) wakaaliinjeechi nia.

Washata nukuwaʼipa Moisés: woʼuraaja naaʼu na wayuu aikana wapüla. «Aishaʼajaa, shia neʼe eeka süpüla tachuntüin nümüin Maleiwa paaʼu», eeshii wamüle namüin süka isain wachiki tü waainjüinjatkat süpüla wakaaliinjüin naya. Soto paaʼin wanee kasa: «Naapeerü [...] chi Maleiwakai nanüiki na wayuu anajiraakana nümaa» (Santiago 5:16). Wachuntüle nümüin Jeʼwaa, akaaliinjüneena nutuma mayaapejeʼe nnojoluinjatüin paala naainjüin tia. Nnojotsü eein wanee kasa analeeka suulia oʼuraajaa naaʼu na wayuu aikana wapüla. *

Wainma tü kasa watüjakat nünainjee Moisés, ¿aashimüin? Mayaapejeʼe nnojoluin lotuin maʼin nukuwaʼipa, kanoulashi maʼin, nnojotsü yaletüin naaʼin otta aipürai maʼin. Waʼyataale süchiirua washatüin nukuwaʼipa Moisés, aneerü maʼin wakuwaʼipa otta aneerü maʼin nakuwaʼipa na waneeinnua (Roma 15:4).