1. (1) ¿Kasa naaʼinraka wanee wayuu nuluwataanüle sünain wanee kasa? ¿Jamüsü naaʼinraka tia? (2) ¿Kasa naaʼinraka wanee wayuu yaletayaale naaʼin wanaa sümaa nüchiaanüin?

NAATAWAI tü naainjakat wanee wayuu nuluwataanüle sünain aainjaa wanee kasa. Jamüshijaʼa nuluwataanüle nutuma nülaamain, jaa mamaatüshi, akaisaʼa nnojolin jaa nümüin nuluwataanüle nutuma wanee wayuu aʼyataajiraakai nümaa. Eeshi eekai mojuin naaʼin otta japülin. ¿Jamüsü makaʼa nakuwaʼipa? Süka yaletayaain naaʼin. Yaletayaale naaʼin wanee wayuu wanaa sümaa nüchiaanüin, nnojotsü niyaawatüin saaʼu tü münakat nümüin, niyouktüin tü aluwataanakalü anain nia otta mojusü nukuwaʼipa sutuma (Prov. 16:18).

2. ¿Jamüsü kojutüka namüin na anoujüshii shiimainshiikana nachiaanüle sükajee tü sümakat tü Wiwüliakat?

² Kojutüsü maʼin wamüin wachiaanüle sükajee tü sümakat tü Wiwüliakat. Sutuma tia pütchikat, kekiishii maʼin waya, nnojotsü kachiiruain waaʼin wainma kasa, nnojoishii waya amaʼüjiraain wakuwaʼipa, nnojoishii waya asüliin otta nnojoishii waya akaijüliin (Prov. 20:1; 2 Cor. 7:1; 1 Tes. 4:3-5; 1 Tim. 6:6-11). Talatüsü maʼin waaʼin sutuma woonooin sümaa tü nuluwataakalü anain waya Jeʼwaa (Is. 65:14).

3. ¿Kasa washatüinjatka nünainjee chi eeʼiraikai nümüin Jeʼwaa?

³ Waaʼinrüinjatü tü nuluwataakalü anain waya Jeʼwaa süpüla ayatüin aleewain waya nümaa. Washatüinjatü nukuwaʼipa chi eeʼiraikai nümüin Jeʼwaa, müshi nia: «Jaa meechi taya sümüin tü pusoʼirakalü anain taaʼin süpüla kaʼikat süpüshuaʼa. Süka jamüin, talatüsü taaʼin sutuma» (Sal. 119:111, NM). Talatüsü naaʼin sünain oonoowaa nümaa Jeʼwaa. Müinjana waya, talatüinjatü waaʼin sünain oonowaa nümaa Jeʼwaa. Nnojotsü mojuinjatüin waaʼin müleka kapüleere wamüin  oonowaa. Weʼitaa maʼin waaʼin sünain aneerüin wakuwaʼipa sutuma tü nümakat wamüin Jeʼwaa. Wekirajaa jooluʼu sünain apünüinsü kasa waaʼinrajatka.

4. ¿Kasa naainjaka maʼin David waneepia?

⁴ Alatawaisü kasa mojusü nümüin chi aluwataaikai David. ¿Kasakaʼa naainjüin maʼin waneepia? Niʼitaain maʼin naaʼin nünain chi Maleiwakai. Müshi nia: «Jeʼwaakalee, anii taya achuntüin pümüin süka süpüshuaʼa taaʼin. Maleiwakalee, teʼitaain maʼin taaʼin pünain» (Sal. 25:1, 2, NM). ¿Kasa akaaliinjaka David süpüla niʼitaainjatüin maʼin naaʼin nünain Jeʼwaa?

5, 6. ¿Jamüsü nünüiki David süka aleewain maʼin nia nümaa Jeʼwaa?

⁵ Wainma na wayuu oʼuraajakana neʼe sülatüle kasa mojusü namüin. Jülüjataa paaʼin kaʼaleewainre pia wanee wayuu. Müleka nüchajaale neʼe pia wanaa sümaa sülatüin kasa mojusü nümüin, ¿shiimainchejeʼe aleewain nia pümaa? Nnojottaa. Nnojotsü naainjüin tia chi aluwataaikai David. Jaʼitairü anain jee mojuin nukuwaʼipa, niiʼiyatüin süka nukuwaʼipa alin maʼin Jeʼwaa nüpüla otta niʼitaain maʼin naaʼin nünain (Sal. 40:8).

⁶ Wanaa sümaa naapüin David tü analuʼutkat nümüin Jeʼwaa otta nuʼwaajüin nia, müshi nia: «Senyotkalee Jeʼwaa, yaletüsü maʼin pünülia sainküin tü mmakat, jaʼyasü chaa iipünaa kojutüshaatain maʼin pia» (Sal. 8:1, NM). Aleewashi maʼin David nümaa chi Nüshikai. Nuʼwaajüin waneepia Jeʼwaa saaʼu miyoʼuin otta kojutüin maʼin nia (Sal. 35:28).

7. ¿Kasa anasü eeka sutuma woʼuraajüin nümüin Maleiwa?

⁷ Süpüla weʼitaainjatüin maʼin waaʼin nünain Jeʼwaa, oʼuraajüinjana waya waneepia maʼaka naainjüin shia David. Müsü tü Wiwüliakat: «Müleka jürütkaale nünainmüin Maleiwa, arütkaajeechi nia jünainmüin» (Sant. 4:8). Woʼuraajüle nümüin Jeʼwaa, aleeweena waya nümaa otta eejeechi chi naaʼinkai waaʼu (paashajeʼera 1 Juan 3:22).

8. ¿Jamüsü nnojoluinjatka weitirakuu wamüinjatüin wanüiki woʼuraajapa?

⁸ Müleka piiteʼerakuʼu pümüle pünüiki wanaa sümaa puʼuraajüin, ¿kasa paaʼinrajatka? Jülüjüinjatü paaʼin palajana tü pünüikinjatkat. Jamüsüjaʼa piiteʼerakuʼu pümüle pünüiki nümüin wanee paʼaleewain jee niale wanee püpüshi, nnojoleerü kachipünaain naaʼin pünüiki. Mayaapejeʼe nnojoluin niyouktüin Jeʼwaa nünüiki wanee wayuu aʼyataakai nümüin, choʼujaasü maʼin nnojoluinjatüin weitirakuu wamüin wanüiki woʼuraajapa.

9, 10. (1) ¿Kasa eeka süpüla wachuntüin nümüin Jeʼwaa? (2) ¿Kasa waaʼinrajatka süpüla watüjüinjanain süpüleerua tü wanüikinjatkat nümüin Jeʼwaa?

⁹ Tü keeʼireekat waaʼin shia warütkaain nünainmüin Jeʼwaa, makalaka waküjüinjatüin nümüin tü suluʼukat waaʼin. Waküjüle nümüin süpüshuaʼa tü suluʼukat waaʼin, aleeweena waya nümaa otta weʼitaajeerü maʼin waaʼin nünain. ¿Kasa eeka süpüla wachuntüin nümüin Jeʼwaa? Müsü tü Wiwüliakat: «Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin» (Filip. 4:6). Eesü süpüla wachuntüin nümüin Jeʼwaa tü kasa sünainpünaakat wakuwaʼipa jee wachuntüin nümüin tü kasa anainjatkalü atuma wakuwaʼipa nümaa.

¹⁰ Wekirajaale sünain tü kasa nachuntapuʼukat na anoujüshii namaiwajanakana, atüjeena waya oʼuraajaa (1 Sam. 1:10, 11; Aluw. 4:24-31). Suluʼu tü karalouktakat Salmo, ashajünüsü süchiki tü kasa nachuntapuʼukat na wayuu aʼyataakana nümüin  Jeʼwaa otta tü neeʼirajapuʼukat achiki nümüin. Ashajünüsü yala tü nanüikikat wanaa sümaa mojuin naaʼin, talatüin naaʼin otta waneeirua. Wekirajaale sünain tia, atüjeena maʼin waya süpüleerua tü wanüikinjatkat nümüin Jeʼwaa.

11. ¿Jamüsü jülüjüinjatka waaʼin tü nümakat Maleiwa süpülapünaa waneeküin tü waaʼinrajatkat?

¹¹ Müshi David: «Anasü maʼin tü pütchi nüsoʼirakalü anain waaʼin Jeʼwaa otta kekiishi maʼin wayuu sutuma» (Sal. 19:7, NM). Jaʼitairü nnojoluin kasain watüjaain aaʼu, kekiijeena waya woonoole sümaa tü nuluwataakalü anain waya Jeʼwaa. ¿Jamüsü jülüjüinjatka waaʼin tia süpülapünaa waneeküin tü waaʼinrajatkat? Süpüla anainjatüin sukuwaʼipa tü kasa waneeküinjatkat. Watüjaajeerü aaʼu tü waaʼinrajatkat wanaa sümaa wooʼulakünüin aaʼin. Maʼaka saaʼin tü waaʼinrajatkat süpüla kojutüin wamüin tü ishakat, süpüla nnojoliinjanain waya sünainpünaain poliitika, süpüla wuleinjanain waya, anainjatüin waʼanaaya otta suuʼulakünüle waaʼin eere waʼyataain otta eere koleejiain waya. Wayaawatüle saaʼu tü jülüjakat naaʼin Maleiwa süchiki tia kasakalüirua, watüjaweerü aaʼu tü waaʼinrajatkat. Müle shia watuma, nnojoleerü amojujaain wakuwaʼipa (Prov. 15:28).

12. ¿Kasa jülüjüinjatka waaʼin süpüla jaa wamüin nümüin Jeʼwaa?

¹² Sümaʼinruʼu waʼatapajüin tü naapajatkat wamüin Jeʼwaa, weʼitaainjatü waaʼin nünain otta jülüjüinjatü waaʼin tü wanoulakat. Süpüla waaʼinrüin tia, jülüjeesü waaʼin pütchikat tüü: «¿Shiimainche maʼin wamüin sajaʼttajatüin süpüshuaʼa tü iküleesiairua nnojotka shiimain? ¿Ayatayütche shiimain wamüin kepiainjanain waya suluʼu tü paʼaraiisükat? ¿Ayatüshiiche waya sünain aküjaa pütchi sümaa talatüin waaʼin? ¿Shiache waaʼinmaaka maʼin tü waʼyataainkat nümüin Jeʼwaa? ¿Kojutüsüche wamüin tü wanoujakalü anain süchiki süsoʼiraainjatüin naaʼin na ouktüshiikana? ¿Kojutüsüche wamüin wuleinjatüin nünülia Jeʼwaa otta niainjachin aluwataain nüchikuaʼa?». Jülüjüle waaʼin tia, jaa meena waya waneepia sümüin tü pütchi nüsoʼirakalü anain waaʼin Jeʼwaa (Sal. 119:111).

13. ¿Jamüsü nnojotka nayaawatüin saaʼu waneeirua pütchi na nikirajüinkana Jesuu? Püküja süchiki wanee kasa nnojotka nayaawatüin aaʼu.

¹³ Eesü nnojorüle wayaawatüin saaʼu wanee pütchi suluʼu tü Wiwüliakat süka nnojoyülüin nüpansaajüin shia Jeʼwaa. Kojuyatua nüküjüin Jesuu namüin na nikirajüinkana müliainjachin sümaa ouktajachin nia atumawaa (paashajeʼera Mateo 12:40 otta 16:21). Akatsaʼa nnojoluin nayaawatüin saaʼu jamaluʼuluin tü nüküjeekat namüin. Waneʼereʼeya nayaawatüin saaʼu süsoʼiraapa naaʼin otta niiʼiyataapa namüin (Luc. 24:44-46; Aluw. 1:3). Akaʼaya na nikirajüinjana Jesuu nnojotsü natüjaain saaʼu joujainjatüin süikkalaain Nuluwataaya Maleiwa chaa iipünaa. Waneʼereʼeya natüjaain saaʼu nüntapa chi naaʼinkai Maleiwa naaʼu soʼu tü miʼiraa kanüliakat Pentecostés soʼu juyaka 33 (Aluw. 1:6-8).

14. ¿Kasa anaka süpüla washatüin nanainjee na wawalayuu oʼtchejaakana sümaa tü kasa naʼatapajakat?

¹⁴ Süchikijee tü juyakat 1900, eeshii na wawalayuu oʼtchejaakana sümaa tü alatajatkat sülüʼütpa maʼin süpüla sajaʼttüin kasa süpüshuaʼa (2 Tim. 3:1). Oʼunajanayaa naküjainruʼu iipünaamüin soʼu tü juyakat 1914. Wanaa sümaa nnojoluin shikeraajüin tü naʼatapajakat, ekirajaashii maʼin nachikuaʼa sünain tü Wiwüliakat. Nayaawataka saaʼu shiainjatüin aʼyataanüin maʼin anain tü aküjaakat pütchi süchiki Nuluwataaya Maleiwa (Mar. 13:10). Soʼu tü juyakat  1922 eejatü wanee outkajawaa miyoʼu chaa Cedar Point (Ohio, Estados Unidos). Sünain tia outkajawaakat nüküjüin Joseph F. Rutherford, nuluwataaitchipain Jesuu otta nüküjüin namüin na jutkatüshiikana nayainjanain aküjüin maʼin tü pütchikat nüchiki Jesuu otta süchiki tü nuluwataayakat. Soʼujeʼereʼeya kaʼikat tia ayaawatüna aaʼuchii na aʼyataakana nümüin Jeʼwaa sükajee aküjaa pütchi süchiki tü Nuluwataayakat (Mat. 4:23; 24:14).

15. ¿Jamüsü anaka maʼin jülüjüle waaʼin tü naainjakat Jeʼwaa süpüleerua tü nupueulosekat?

¹⁵ Anasü maʼin jülüjüle waaʼin süpüshuaʼa tü kasa naainjakat Jeʼwaa süpüleerua tü nupueulosekat. ¿Jamüsü anaka tia? Weʼitaajeerü maʼin waaʼin sünain nikeraajeerüin mapeena tü keeʼireekat naaʼin wapüleerua. Akaʼaya sutuma tü pütchi nüsoʼirakalü aka waaʼin Jeʼwaa, keeʼireejeerü waaʼin shikeraajüin tü nüküjakat wamüin otta weʼitaajeerü maʼin waaʼin sünain.

16. ¿Kasa weʼraka sünainjee waʼyataain nümüin Jeʼwaa süka süpüshuaʼa waaʼin?

¹⁶ Jeʼwaa, nia wanee Maleiwa aʼyataakai maʼin waneepia. Müshi chi eeʼiraikai: «Jeʼwaakalee, chi pülashikai maʼin, nnojoishi jaralin müin aka paaʼin». Nümaka nüchikuaʼa: «Katchinshi maʼin pia sümaa pülashin maʼin pia» (Sal. 89:8, 13, NM). Kojutüsü nümüin Jeʼwaa otta nükaaliinjüin waya sünain tü waʼyataainkat nümüin. Süka jamüin, nia wanee Maleiwa aʼyataai maʼin. Nütüjaa aaʼu nnojoliin shokulain na aʼyataashiikana nümüin (Prov. 31:27). Aʼyataashii maʼin naya maʼaka naaʼin Jeʼwaa. Sünainjee naʼyataain süka süpüshuaʼa naaʼin, neʼrüin talataa aaʼin otta anasü sukuwaʼipa tü naʼyataainkat nutuma Jeʼwaa (paashajeʼera Salmo 62:12 *).

17, 18. ¿Kasa waaʼinraka süpüla weeʼiyatüinjatüin weʼitaain maʼin waaʼin nünain Jeʼwaa? Püküja süchiki tü naaʼinrakat na israeliitakana.

¹⁷  ¿Kasa waaʼinraka süpüla weeʼiyatüinjatüin weʼitaain maʼin waaʼin nünain Jeʼwaa? Jülüja waaʼin tü naaʼinrakat na israeliitakana süpüla nantüin suluʼumüin tü Mma Anasükat. Nüküjüin Jeʼwaa namüin na sacerdootekana nalatüinjatüin tü süchikat Jordán sümaa nalüʼüjüin tü jurasükeetkat. Nantapa eemüin tü süchikat, neʼrüin süsetüin tü wüinkat sutuma süʼitüin maʼin tü juyakat. Na israeliitakana nnojoishii aʼatapajüin süshakajüin tü wüinkat. Neʼitaain naaʼin nünain Jeʼwaa otta naaʼinrüin tü nümakat namüin. Saashin tü Wiwüliakat nemetirapa nooʼui na sacerdootekana shiroku tü süchikat, josojoosü tü wüinkat. Nalataka na sacerdootekana sümaa nashaʼwalaain pasanain sünain tü süchikat süpüla nalatüinjanain na israeliitakana (Jos. 3:12-17). ¡Talatakajasaʼa maʼin na israeliitakana süka neʼrüin josojooin tü wüinkat! ¡Kooʼomüinkajasaʼa maʼin nanoula sükajee kacheʼein naya sümüin tü nümakat Jeʼwaa!

¹⁸ Watüjaa aaʼu nnojoluin naainjüin Jeʼwaa maaʼulu wanee kasa eekai müin aka saaʼin tia. Akatsaʼa anain wakuwaʼipa nutuma müleka kacheʼere waya nümüin. Nükajee chi naaʼinkai, nikirajüin waya süpüla waküjüin pütchi süchiki Nuluwataaya sainküin tü mmakat. Jesucristo, chi Aküjakai maʼin pütchi nüchiki Jeʼwaa, nüküjüin nükaaliinjüinjanain na nikirajüinkana sünain tia aʼyatawaakat. Süchikijee süsoʼiraain naaʼin, müshi nia: «Juʼuna jumaala sainküin mmakat süpüshua süpüla jüküjainjatüin tachiki sümüin wayuu süpüla sünoujainjatüin tanain. [...] Shiimüin sünain jümaainjachin taya waneepia waneʼereʼeya süntapa tü kaʼi sajaʼlajaweetkat oʼu kasa süpüshua» (Mat. 28:19, 20). Wainma wawalayuu akaaliinjünaka nutuma chi naaʼinkai Maleiwa. ¿Kasa apüla? Süpüla meimmoluinjanain naya sünain aküjaa pütchi sümüin wayuu (paashajeʼera Salmo 119:46 * otta 2 Corinto 4:7).

19. ¿Kasa sotuinjatka waaʼin ayuuire jee laülaayuule waya?

¹⁹ Eeshii wawalayuu nnojoliikana aʼyataain maʼin nümüin Jeʼwaa sutuma ayuulin jee laülaayuuin naya. Soto jaaʼin nütüjaain aaʼu Jeʼwaa tü kasa alatakat jümüin waneʼewai jukua, makalaka sümüin tü Wiwüliakat nüchiki: «Nia [Jeʼwaa], amüliajaka waya. Nia Wamaleiwasekaʼaya, akaaliijaka waya» (2 Cor. 1:3). Kojutüsü nümüin süpüshuaʼa tü kasa waainjakat süpüleerua waʼyataain nümüin. Nnojotsü motuinjatüin waaʼin woʼttaainjanain sutuma wanoujüin sünain naapajiraain nikii Jesuu waaʼu (Heb. 10:39).

20, 21. ¿Kasa waaʼinrajatka süpüla weʼitaainjatüin waaʼin nünain Jeʼwaa?

²⁰ ¿Kasa sünainpünaaka waʼwaajüin Jeʼwaa? Sünainpünaasü wakatalüin kaʼi, waʼyataain maʼin nümüin otta wasülajüin kasa süpüla waʼwaajüin nia. Aʼyataweeshii maʼin waya nümüin süka süpüshuaʼa waaʼin (2 Tim. 4:5). Talatüsü waaʼin süka wakaaliinjüin wayuu süpüla «sütüjaainjatüin saaʼu tü shiimüinkat» (1 Tim. 2:4). Kooʼomüinsü maʼin wanoula sutuma waʼwaajüin Jeʼwaa (Prov. 10:22). Jee müsia eesü süpüla weʼitaain maʼin waaʼin nünain sutuma waʼwaajüin nia (Roma 8:35-39).

²¹ Aʼyataainjana maʼin waya süchiirua weʼitaain waaʼin nünain Jeʼwaa. Makalaka woʼuraajüinjanain, kacheʼeinjanain waya nümüin, jülüjüinjatüin waaʼin tü naainjakat sümaiwa süpüleerua tü nupueulosekat otta tü naainjüinjatkat mapeena wapüleerua. Müle shia watuma, kateerü woʼu süpüla kaʼika süpüshuaʼa.