Süpülapünaa nuʼunüin Jesukürisüto chaa iipünaa soʼu juyaka 33, nüküjüin nüleʼejüinjachin nüchikuaʼa. Naashin Jesuu müshi nia maʼaka naaʼin nülüin wanee wayuu sülaülakai mma, oʼunaka suluʼumüin wanee mma wattasü. Shiasaʼa süchikijee tia, aleʼejüshi nüchikuaʼa süpüla nuluwataainjachin. Aleʼejüinjachi Kürisüto nüchikuaʼa süpüla nuluwataainjachin naaʼu na wayuukana. (Paashajeʼera Lucas 19:11, 12.)

¿Eʼnneiche Kürisüto nüleʼejapa? Meʼrujusai nia süchikijee süsoʼiraain naaʼin (1 Pedro 3:18, NM). Oʼunüshi chaa sirumatuʼumüin jee nüikkalaaka nikialuʼujee Jeʼwaa (Salmo 110:1). Shiasaʼa mapa, naapaka Jeʼwaa laülawaa nümüin süpüla nuluwataainjachin naaʼu na wayuukana. Nnojoleechi eʼnnüin Jesuu nüleʼejapa süka meʼrujuin nia maʼaka naaʼin na aapieekana. (Paashajeʼera Daniel 7:13, 14.)

Aleʼejeechi Jesuu namaa na aapiee nümaajanakana süpüla süsalainjatüin saainjala wayuu nutuma. Najaʼttirajana na mojulaashiikana. Akanasaʼa na achekakana tü nuluwataayakat, kateena oʼu nutuma süpüla kaʼika süpüshuaʼa. (Paashajeʼera Mateo 25:31-33, 46.)

Paʼaraiiseerü tü Mmakat nutuma. Otta nüsoʼireʼereerü naaʼin na ouktüshiikana süpüla kepiainjanain naya suluʼu tia mmakat. (Paashajeʼera Lucas 23:42, 43.)