Nnojotsü jaralüin aashajaweein süchiki tü ouktaakat. Süka jamüin, aisü maʼin sümüliala wayuu sutuma. Alateerü tia wamüin soʼu wanee kaʼi.

Eeshi ouktalaa nümüle nüshi wanee wayuu, nüchoin jee shiale nuʼwayuuse. Eeshii kakaliale mayein naya sutuma ayuulii. Makalaka müliain maʼin waaʼin otta mojuin maʼin waaʼin ouktüle wanee wapüshi.

Eeshi wanee wayuu Antonio nünülia, pasiruaashi chi nüshikai sutuma kemion. Müshi nia: «Müliasü naaʼin wanee wayuu ouktüle nüshi, müsü aka saaʼin nümüliala chi wayuu asülajaanakai oulia nipia sümaa sülüʼüjünüin nuulia tü shiyaaweinkat. Nnojoishi süpüla nikerotüin piantua suluʼu. Nnojotsü kasain shipin nutuma. Shiajaʼa neʼe soteerüin naaʼin shia waneepia. Jaʼitairü müin alawaakai saaʼin nümüin, shiimainpajaʼa tia».

Eesü wanee wayuu Dorothy sünülia, anoujapuʼusü shia suluʼu tü iküleesia kanüliakat anglicana otta ekirajapuʼusü shia rimiinkoʼuluwai. Wanaa sümaa pienchin shikii akaratshimüin suuyase, anaajaashi chi suʼwayuusekai. Mayaapejeʼe nnojoluin aleinjatüin sümüin tü ouktaakat, sütüjawee aaʼu kasain alatüin nümüin wanee wayuu ouktüle nia. Müsüjeseʼe sümüin nümüin chi pastorkai: «¿Kasache alataka nümüin wanee wayuu ouktüle nia?». Nusouktakalaka sümüin: «Nnojotsü jaralüin atüjaain saaʼu tia, waʼatapaja neʼe kaseerüin alatüin mapa».

¿Shiimainchejeʼe tia? ¿Waʼatapajüinjatche neʼe süpüla watüjaain saaʼu tü alatakat wamüin ouktapa waya? ¿Eetaapasaʼa süpüla watüjaain saaʼu?