1, 2. ¿Kasapülajatü nüküjaka Jesuu süchiki tü woʼot nneerümaajatkat?

NÜKÜJÜIN Jesuu namüin na chainjanakana aluwataain nümaa süchiki tü woʼot kaluʼukat nneerü. Tia süpülajatü naaʼinrüin na nikirajüinkana Jesuu tü nuluwataanakalü anain naya. Atüjeenapajaʼa waya sünainjee tia jaʼitashii nnojoliinjanain waya aluwataain chaa iipünaa. Wekirajaa palajana sünain jamaluʼuluin tia nikirajakalü anain Jesuu.

² Nüküjüin Jesuu tia namüin na nikirajüinkana wanaa sümaa namüin nümüin: «¿Kasa shiyaawaseetka wamüin süpüla watüjaainjatüin saaʼu sünain sülüʼülüin pükalia süpüla piweetüinjachin, tü sükaliajatkat sajaʼlajaain kasakat süpüshua?» (Mat. 24:3). Ekeraajüsü maaʼulu yaa tü nümakat Jesuu süchiki tü woʼot kaluʼukat nneerü jee shia wanee shiyaawase sünain nuluwataain Jesuu maaʼulu yaa.

3. ¿Kasa wekirajaaka anain suluʼujee Mateo 24 otta 25?

³ Ekirajüshi Jesuu süchiki pienchisü kasa alatajatka sülüʼütpa süpüla sajaʼttüin kasaka süpüshuaʼa. Tia süpülajatü naaʼinrüin na nikirajüinkana tü nuluwataakalü anain naya. Tia pütchikat  suluʼusü Mateo 24:45 sünainmüin 25:46. Tü palajatkat shia nüchiki chi achepchieekai. * Nia eʼitaanaka ajapuluʼu nikirajüinjanain na nuwalayuukana süpüla katsüin nanoula. Nüküjüin Jesuu tia süpüla noonooinjanain sümaa tü aluwataanakalü anain naya jee süpüla kekiinjanain naya. Mapa shia nüküjakalü achiki tü poloosükat majayünnüü. Naapirüin Jesuu na chainjanakana aluwataain iipünaa süpüla yapajüinjanain naya jee eejüinjatüin naaʼin, * süka jamüin, nnojoluin natüjaain aaʼu joujaleechin nüntüin Jesuu. Mapa nüküjüin nachiki na achepchiee aapünakana amüin woʼot kaluʼusü nneerü. Nüküjüin tia süpüla tütüinjanain maʼin na aluwataainjanakana iipünaa. Sajaʼlajaayamüin, nüküjaka süchiki tü kaaʼulakat jee tü anneetkalüirua. Nüküjüin tia süpüla noonooinjanain na wayuu yaainjanakana kepiain mmapaʼa jee müsia nakaaliinjainjanain na chainjanakana aluwataain iipünaa. * Shieerü wekirajaaka anain sünain ekirajaayakat tüü süchiki tü woʼot kaluʼukat nneerü.

4, 5. (1) ¿Jara kayaawaseka na naashajaakana achiki Jesuu? (2) ¿Kasa wayuu tü talentokot? (Paashajeʼera tü noota sünainkat pütchi 5.)

⁴ (Paashajeʼera Mateo 25:14-30.) Wanaa sümaa nüküjüin Jesuu nachiki na achepchiee aapünakana amüin woʼot kaluʼuka nneerü, chi aapakai tü woʼotkat nia chi nalaamainkai, naapüin shia süka nuʼunajachin wattamüin. Mapa aashajaashi Jesuu nüchiki wanee wayuu oʼunakai wattamüin süpüla niʼitaanajachin sünain aluwatawaa (Luc. 19:12). * Naya piamashii wayuu naashajaaka achiki Jesuu, niaʼaya neʼe niakai jee oʼunüshi nia chaa iipünaamüin soʼu tü juyakat 33. Nnojoipejeʼe eʼitaanüin Jesuu sünain aluwatawaa soʼu tia juyakat. Eʼitaanaleeshia nia sünain aluwatawaa soʼu tü juyakat 1914 sükanajuupa süpüshuaʼa tü nüʼünüükalüirua nutuma Maleiwa (Heb. 10:12, 13).

⁵ Chia wayuu naashajaakai achiki Jesuu, neenajüin na nüchepchiakana. Naapakalaka mekiisat talento namüin. Watta saalin nneerü tia. * Naʼyateʼerüinjatü tia nneetkat süpüla kooʼomüinjatüin shia. Kojutüsü maʼin tia nneetkat nümüin chi nalaamainkai. Jaʼitakajeʼe Jesuu eesü tü kojutükat nümüin. ¿Kasa wayuu tia? Shia tü niʼyataakalü anain yaaiwaʼa nia yaa Mmapaʼa.

6, 7. ¿Kasa kayaakuayaaka tü nneerü eʼitaanakat najapuluʼu na achepchieekana?

⁶ Kojutüshaatasü maʼin nümüin Jesuu tü aküjaakat pütchi, müsüjeseʼe wainmain wayuu anoujaka sutuma nüküjüin pütchi namüin (paashajeʼera Lucas 4:43). Nütüjaa aaʼu süküjünüinjatüin maʼin tü pütchikat, müshijeseʼe nümüin namüin na nikirajüinkana: «Jiirakaa namüin na wayuu antakana jooluʼu. Müshii aka naya saaʼin wane aʼttiee eekai yapain süpüla asüʼüjünaa» (Juan 4:35-38). Naashin Jesuu müsü aka saaʼin wanee aʼttiee tü aküjaakat pütchi otta niakai müshi aka saaʼin wanee apünajüi achajaaka wayuu süpüla asüʼüjaa tü aʼttieekat. Süpülapünaa nuʼunüin iipünaamüin nüküjüin namüin na nikirajüinkana tütüinjanain  maʼin naya sünain aküjaa pütchi (2 Cor. 4:7, TNM). «Juʼuna jumaala sainküin mmakat süpüshua [...]. Jikirajeena [na wayuukana] süpüla nayainjanain na tekirajüinkana maa aka jiakana», müshi nia namüin (Mat. 28:18-20).

⁷ Niʼitaain Jesuu najapuluʼu na chainjanakana aluwataain iipünaa tü aküjaakat pütchi maʼaka saaʼin niʼitaain nneerü chi laamakai najapuluʼu na nüchepchiakana (Mat. 25:14). Tü nneerü eʼitaanakat najapuluʼu na achepchieekana shiyaakuayaasü tü aküjaakat pütchi otta tü ekirajaakat wayuu.

8. ¿Jamüshii kamüinyaa namaka nneerü na apünüinshiikana achepchiee?

⁸ Chi laamakai naapüin jaʼraisü woʼot nneerü nümüin chi palajaikai, jee najapuluʼu wanee piama woʼot nneerü ooʼulaka najapuluʼu chi wanee niʼitaain wanee woʼot nneerü (Mat. 25:15). Kamüinyaa müshii nneerü atumawaa apünüinruʼu süpüla naʼyateʼerüinjatüin shia shiiʼiree kachoinjatüin shia namüin. Akaʼaya na wawalayuu aluwataainjanakana chaa iipünaa, müinjatia nakuwaʼipa sünain aküjaa pütchi (Mat. 22:37; Col. 3:23). Aküjüshii maʼin pütchi naya wawalayuukana soʼu tü juyakat 33 sümüin wayuu naatayaa makalü oumain. Shiimain sünain müin tia müsüjeseʼe süküjünüin suluʼu tü karalouktakat Aluwataaushikana (Aluw. 6:7; 12:24; 19:20). *

9. (1) ¿Kasa naainjaka na piamashiikana achepchiee? (2) ¿Kasa shikirajaka anain waya tia naainjakat? (3) ¿Kasa naainjüinjatka na yaainjanakana kepiain Mmapaʼa?

⁹ Na piamashiikana achepchiee tütüshii maʼin sünain tü naʼyataainkat, müshiʼiya na wawalayuu chainjanakana iipünaa aʼyataashii maʼin naya soʼujee tü juyakat 1919. Kamüinyaa müshii atumawaa nneerü na piamashiikana achepchiee nüküjaka achiki Jesuu. Aʼyataashii maʼin naya müsüjeseʼe wainma süchon tü nneetkat natuma neiteʼetpa shia. ¿Nayainjana neʼe aküjaka pütchi namüiwaʼa na chainjanakana iipünaa? Nnojo, aküjüinjana pütchi na kepiainjanakana yaa Mmapaʼa. Tia nüküjüin Jesuu soʼu naashajaain süchiki nükatajüinjanain na wayuukana maʼaka nutuma wanee anneetpüʼü sünain nükatajüin tü anneetkalüirua suulia tü kaaʼulakalüirua (Juan 10:16).

10. ¿Jamüsü watüjaaka saaʼu sünain sülüʼülüin maʼin süpüla sajaʼttüinjatüin kasa mojusü?

¹⁰ Shia keeʼireeka naaʼin Jesuu naʼyataainjanain napüshuaʼa na oushikajaakana süchiirua nukuwaʼipa. Majatia sukuwaʼipa natuma na anoujashii namaiwajanakana. ¿Aʼyataashiiche maʼin maaʼulu na anoujashiikana suʼunnaa shikeraajüin tü nümakat Jesuu? Jamüsaʼa, aküjashaatashii pütchi. Sutuma müin tia natuma, watta naalii na woutiisakana juyawai. Aküjüshii pütchi na woutiisakanayaa. Talatashaatashi Jesuu sutuma müin waʼyataain. Talatashaatasü waaʼin sutuma watüjaain saaʼu sülüʼülüin maʼin süpüla sajaʼttüinjatüin kasa mojusü.

11. ¿Jamüsü watüjaaka saaʼu sünain nünteechin Jesuu suʼunnaa tü müliaa miyoʼusükat?

¹¹ «Shiasa mapa kakalia süchikijee, nüleʼejakalaka chi washitshikai nipialuʼumüin süpüla nütüjaainjatüin saaʼu sukuaippa tü neerü niʼitaakat paala najapuluʼu na nüchepchiakana», müshi Jesuu (Mat. 25:19). ¿Joujeechi nüleʼejaka Jesuu? Anteechi nia sajaʼlajaayamüin tü müliaa miyoʼusükat. ¿Jamüsü watüjaaka saaʼu tia? Shia sutuma tü nümakat Jesuu suluʼu Mateo 24 otta 25. «Eʼnneerü chaa sirumatuʼu wane kasa atüjaaneetkat atuma saaʼu sünain tantamaateechin tayakai chi Shipayakai Wayuu», müshi nia soʼu wanee kaʼi. Ekeraajeerü tia suʼunnaa tü müliaa miyoʼusükat wanaa sümaa süsaleerüin saainjala wayuu nutuma. Naapirüin Jesuu na anoujashiikana sünain eejüinjatüin naaʼin suʼunnaa tü kaʼi sajaʼlajaainjatkalü oʼu kasa  mojusü. Müshi Jesuu namüin: «Aleʼejeechi taya tachikua jünainmüin soʼuweena wane kaʼi matüjaajuukat aaʼu jütüma» (Mat. 24:30, 42, 44). Najaʼttireerü Jesuu süpüshuaʼa tü kasa nuluwataakalü aaʼu Satanaa, nüküjüin tia wanaa sümaa naashajaain süchiki tü woʼot nneerümaajatkat. *

12, 13. (1) ¿Jamüsü nünüiki chi laamakai namüin na piamashiikana nüchepchia oonookana nümaa? (2) ¿Jamüsü makaʼa nünüiki? (3) ¿Joujeerü kettaaka nejeetse Maleiwa nanain na chainjanakana chaa iipünaa? (Paashajeʼera tü pütchikat: « Kettaajeerü nejeetse Maleiwa nanain ouktapa naya».) (4) ¿Kaseerü alataka namüin na yaainjanakana Mmapaʼa?

¹² Soʼu nüntüin chi laamakai chejee wattajee müshi nia namüin na piamashiikana achepchiee waneʼewai nakua: «Tachepchiee, wayuujaʼa eera anashi pia, anasü maʼi tü paaʼinrakat. Saaʼu pikeraajüin sümaa tü teʼitaakat püpüleerua, mayaasüje palitchon shia, teʼitaainjachi pia jooluʼu süpüla laülawaa saaʼu kasa wainma» (Mat. 25:21, 23). ¿Jamüsü makaʼa nünüiki? Shia süka nükanajüin jaʼraisü woʼot nneerü sooʼomüin tü jaʼraisü apütünakat najapuluʼu jee chi wanee shia süka nükanajüin piamasü woʼot nneerü. ¿Kaseerü naainjaka Jesuu nüntapeena?

¹³ Süpülapünaachon maʼin tü müliaa miyoʼusükat, kettaajeerü nejeetse Maleiwa nanain na aluwataainjanakana chaa iipünaa, na yaayüliikana kepiain yaa Mmapaʼa (Alat. Map. 7:1-3). Shiasejeʼe süpülapünaa süntüin Armagedón, nümaajeena naya Jesuu chaa iipünaamüin. ¿Kaseetka alatüin namüin na yaainjanakana Mmapaʼa? Kepieena naya nutuma Jesuu suluʼu tü Paʼaraiisükat (Mat. 25:34).

14, 15. ¿Jamüsü watüjaaka saaʼu nnojoluin shiain nüküjeein Jesuu mojulaainjanain noʼutku na aluwataainjanakana iipünaa?

¹⁴ Wekirajaa jooluʼu nüchiki wanee achepchiee shukulashi. ¿Kasa alataka nümüin chia achepchieekai? Naashin Jesuu, nnojotsü niʼyateʼerüin tia nneetkat, nojoitüin neʼe. «Piʼrala neʼe wayumüin tamüin tü paaʼinrakat», müshijaʼa nülaamainkai nümüin. Asütünüsüjeseʼe tü nneetkat nuulia sutuma müin nukuwaʼipa. Shiasaʼa mapa nümakat chi nülaamainkai: «Jujuittira chira achepchiee eʼrüikai wayumüin anooipaʼamüin saʼakamüin tü piyuushikat eere shiʼyalajüin maʼi wayuu» (Mat. 25:24-30; Luc. 19:22, 23).

¹⁵ Nüküjüin Jesuu eein wanee achepchiee eʼrüikai wayumüin naʼakajee na apünüinshiikana achepchiee. Sünainjee tia nümakat Jesuu, ¿eejeenache noʼutku na aluwataainjanakana iipünaa eʼrüliijeenaka wayumüin? Nnojo, nnojoleena eein. Wekirajaa sünain tia. Wanaa sümaa naashajaain Jesuu nüchiki chi achepchiee oonookai, nüküjüin eeinjachin wanee achepchiee mojulaajeechikai namüin na wanee achepchieekana. Nnojotpajaʼa nüküjüin Jesuu mojulaainjanain  maaʼulu noʼuluku na aluwataainjanakana iipünaa. Tü nüküjeekat achiki Jesuu namüin shia nnojoluinjanain mojulaain naya maʼaka naaʼin chia achepchieekai. Wanaa sümaa naashajaain Jesuu süchiki jaʼraisü majayünnüü maaʼinkana aaʼin, nnojotsü shiain nüküjeein achiki nnojoliinjanain noonooin maaʼulu noʼutku na chainjanakana iipünaa. Tü nüküjeekat achiki Jesuu shia yapainjanain naya wawalayuukana jee eejüinjatüin naaʼin. * Akaataajaʼa neʼe soʼu naashajaain Jesuu süchiki tü woʼot nneerümaajatkat, nnojotsü shiain nüküjüin achiki mojulaainjanain noʼutku na aluwataainjanakana iipünaa. Nütüjaapejeʼe saaʼu Jesuu sünain eejeenain na nnojoliijeenakana oonooin jee nnojoleenaka aküjüin pütchi mayaapejeʼe «chainjana waya iipünaa» namüin (Mat. 25:16). Makalaka naapirüin Jesuu na chainjanakana iipünaa süpüla tütüinjanain maʼin naya sünain aküjaa pütchi otta nnojoliinjanain müin naya maʼaka naaʼin chi achepchiee eʼrüikai wayumüin jee shukulakai.

 16. (1) ¿Kasa watüjaka sünainjee tü nümakat Jesuu süchiki tü woʼot nneerümaajatkat? (2) Püküja kasain piyaawatüin saaʼu süchiki tü nümakat Jesuu süchiki tü woʼot nneerümaajatkat (Paashajeʼera tü pütchikat: « ¿Kasa nüküjeeka Jesuu süchiki tü woʼot nneerümaajatkat?»)

¹⁶ ¿Kasa watüjaka sünainjee tü nümakat Jesuu süchiki tü woʼot nneerümaajatkat? Atüjüshii waya süchiki piamasü kasa. Tü palajatkat shia niʼitaain Jesuu najapuluʼu na chainjanakana aluwataain iipünaa wanee kasa kojutüsü maʼin: tü aküjaakat pütchi otta ekirajaa wayuu. Tü chiiruaajatkat shia waʼyataainjanain maʼin sünain aküjaa pütchi. Waʼyataale maʼin sünain aküjaa pütchi otta waaʼinrüle waneepia tü nümakat Jesuu, naapeerü kasa anasü wamüin (Mat. 25:21, 23, 34).