Anuu sünüiki Alona: «Tüntüsü taaʼin taapaiwaʼaya tü shiʼirakat sirena, awataa müsüjaʼa taya sünain ounjulawaa süpüleerua tü wonpa ojutünakat suluʼujee katünasü. Ayatüsüjaʼa neʼe taya mmoluin chaa eere tounjulaain. Yaaʼaleekajaʼa nnojorüle taya tepialuʼu suʼunnaa tia makat, mmoruleesia maʼin taya süka nnojoluin tatüjaain saaʼu jalainjatüin taya ounjulaain. Majatüinka taya soʼu wanee kaʼi, taapüin tü shiʼirakat sirena, aʼyalajüsü taya otta amotsojaasü taaʼin. Alatüsü tia toulia kamaʼa süchikijee tia. Taapataaka süchikuaʼa tü shiʼirakat sirena.»

Shapaasü saaʼin wayuu süpüshuaʼa, nnojoishii nayain neʼe na kepiakana eere eein kasachiki. Jamüsüjaʼa süküjünüle wamüin mayeinshaatain wanee wapüshi jee niale wanee waʼaleewain, shapaajeerü maʼin waaʼin. Eeshii na shapaakana aaʼin sutuma nnojoluin natüjaain saaʼu kaseerüin alatüin mapeena. Eeshiijaʼa süpüla namüin: «¿Jameetche nakuwaʼipa na wachonniikana jee na waikeyuukana watta kaʼi? ¿Ayateetche eein atkawaa, yarüttüin tü mmakat sümaa jouluin tü ayuuliikat?». ¿Kasa anaka süpüla waaʼinrüin shapaale waaʼin sutuma tia kasakalüirua?

Saashin tü Wiwüliakat, chi wayuu eekai kekiin maʼin aaʼinmajiraashi suulia tü eekat süpüla mojuin atuma nukuwaʼipa (Proverbios 27:12). Anashaatasü maʼin tia sümakat tü Wiwüliakat süka mojuin maʼin tü mmapaʼakat maaʼulu. Anashii waaʼinmajiraale suulia jülüjüin waaʼin kasa mojusü jee suulia shapaakuʼu müin waaʼin. Wanajüle peliikula eere sütkaajiraain wayuu jee wanajüle shiyaakua kasa kashüülasü suluʼu noticiero, shapaaleejeeria maʼin waaʼin jee shapaajeerü naaʼin na wachonniikana sutuma tia. Anaka nnojorüle wanajüin saaʼu tia suulia mojujain tü wekiiruʼujutkat. Keeʼireesüleʼe naaʼin Maleiwa shiainjatüin jülüjüin waaʼin kasa anasü maʼaka tü shiimüinkat, «maa aka tü lotokat atüma wakuaippa, maa aka tü wulekat atüma waaʼin, maa aka tü kasa anasü kamalainkat wamüin». Waaʼinrüle tia, aneerü waaʼin nutuma Maleiwa (Filipos 4:8, 9).

Wekirajaa anainrü nnojoleerüin shapaain maʼin naaʼin wanee wayuu müleka kanourale nia nünain Maleiwa. Saashin tü Wiwüliakat, weʼrüle wamüliala, eeinjatü waaʼin «sünain achuntaa nümüin Maleiwa» (1 Pedro 4:7). Eeshii süpüla wachuntüin kaaliinwaa nümüin Maleiwa, wachuntüin kekiinjanain waya nutuma otta yalayalainjatüin waaʼin süpüla waaʼinrüinjatüin tü anasükat. Soteesü waaʼin naapüin Maleiwa wanüiki «jaʼitairü wachuntüin kasa eekai eein» (1 Juan 5:14, 15).

Saashin tü Wiwüliakat, nia Satanaa aluwataakai saaʼu wayuu sainküin mmakat, nnojoishi niain Maleiwa (Juan 12:31; 1 Juan 5:19). Müsüjeseʼe müinjatüin wanüiki sünain achuntaa nümüin Maleiwa naashin Jesuu: «Anasüje müleka puʼtteʼerüle waya nuulia chi Kamaʼüraikai» (Mateo 6:13). Müleka woʼuraajawaire, nnojoleerü shapaain maʼin waaʼin. «Tachuntawalin nümüin Maleiwa süpüla nnojoluinjatüin shapaain taaʼin taapüle tü shiʼirakat sirena. Akaʼaya chi taʼwayuusekai, niyamaajawalin taya süpüla nuʼuraajüin tamaa, anasü taaʼin sutuma tü naainjakat», müsü sünüiki Alona. Saashin tü Wiwüliakat, «pejeshi Jeʼwaa nünain chi wayuu achuntakai kaaliinwaa nümüin» (Salmo 145:18, TNM).

Wanaa sümaa niʼiküin Jesuu na nikirajüinkana sünain oʼuraajaa, müinjatü nanüiki nümüin Maleiwa naashin: «Püntira tü puluwataayakat» (Mateo 6:10, TNM). Sajaʼttireerü Nuluwataaya Maleiwa süpüshuaʼa tü kasa shapaakalü atuma saaʼin wayuu. Aneekünüshi Jesukürisüto nutuma Maleiwa süpüla eeinjatüin «jimataa aaʼin» nutuma, niainjachi ajaʼlajeʼeraka «tü atkawaakat sainküinjee tü mmakat» (Isaías 9:6, TNM; Salmo 46:9, TNM). Saashin tü Wiwüliakat, kasalajaneerü nutuma Maleiwa saainjala wayuu sümüin. Napünajieerü na wayuukana tü chajaruuta natkaayakat otta «tü jatü natkaayakat, nnojoleena ayalerüin chajaruuta süpüla atkawaa otta nnojoleena ekirajaain sünain tü atkawaakat». Nnojoleerü jaralin eimolujuin wayuu soʼuweena tia (Miqueas 4:3, 4, TNM). Na wayuukana napüshuaʼa, akumajeena naya «piichi süpüla kepiainjanain naya suluʼu; shiimain napünajeenain süpüla neküinjatüin süchon naʼttia» (Isaías 65:21, TNM). «Nnojoleechi eein wanee wayuu eekai ‹ayuuishi taya› nümeechin.» (Isaías 33:24, TNM).

Eepajaʼa süpüla sülatalaʼa sümüin wanee kasa wamüin, nnojotsü kasakainjatüin watuma (Eclesiastés 9:11). Wainmainna na wayuu ouktakana saaʼujee eein wanee kasachiki, eeshii nayale kasirüin naya na wayuu kaainjarannuukana, eesü shiale sutuma ayuulin naya. Ouktüshii naya wayuukana sümaa nnojoluin kasain naainjalain. Aluʼutaʼaleeshiijaʼa maʼin na wayuu makana akuwaʼipa.

Wattashaata maʼin naalii na wayuu asoʼiraainjanakana aaʼin. Niapajaʼa neʼe Maleiwa atüjaaka saaʼu jeʼrainjanain maʼin naya otta nnojoleena naya motuin naaʼin. Asoʼiraajeerü saaʼin «süpüshua tü wayuu ouktüsükalüirua sümaa sujuitteerüin mmaapüjee» (Juan 5:28, 29). Anuu sünüiki tü Wiwüliakat süchiki tia kasa anasü naainjüinjatkat Maleiwa: «Maa aka tü kachueera ajapuluʼujiakat anua, akaajaa nünüiki Maleiwa sünain sajapuluʼuinjatüin waaʼin» (Hebreokana 6:19, 20). Shiimain nikeraajeerüin Maleiwa tia, «niiʼiyatüin sümüin wayuukat süpüshuaʼa, sükajee nüsoʼireʼerüin naaʼin [Jesuu]» (Aluwataaushikana 17:31).

Jaʼitakajeʼe neʼe na aʼyataakana nümüin Maleiwa maaʼulu yaa, shapaasü naaʼin. Süpüla nnojoluinjatüin shapaain maʼin naaʼin Paul, Janet otta Alona, achuntüshii naya kaaliinwaa nümüin Maleiwa otta neʼitaain naaʼin sünain nikeraajeerüin Maleiwa tü nünüikikat soʼu palit kaʼi. Akaʼaya wayakana, eeshii süpüla nükaaliinjain waya Maleiwa süpüla nnojoluinjatüin shapaain maʼin waaʼin. Saashin tü Wiwüliakat, nia Maleiwa waʼatapajaka atuma kasa anasü, nia talataka atuma waaʼin sümaa naapüin anaa wamüin (Roma 15:13).