NATÜJAWEEKA AAʼU JIMAʼALII OTTA MAJAYÜNNÜÜ
¿Mojusüche jaleerüle wanee toolo jee tooleere saaʼin wanee jierü?
«Jintüiwaʼaya taya, müliapuʼushi taya neʼiree na tooloyuukana wanaa tamaa. Tooʼulaainjatia tia mapa taaʼinruʼu, nnojotpejeʼe müin shia» (David, 23 nuuyase).
Anoujashi David otta keeʼireesü naaʼin noonooin sümaa tü nümakat Maleiwa. ¿Nuunteetche noonooin sümaa tü nümakat Maleiwa wanee wayuu eekai müin akuwaʼipa? ¿Mojusüche nümüin Maleiwa jaleerüle wanee toolo jee tooleere saaʼin wanee jierü?
¿Kasa süküjaka tü Bibliakat süchiki tia?
Naatayaa müsü tü jülüjakat saaʼin wayuu süchiki jaleerüle wanee toolo jee tooleere saaʼin wanee jierü. Nnojotpejeʼe wanaawain naaʼin na anoujashiikana namaa. Aküjünüsü suluʼu Éfeso 4:14 nnojoluinjatüin müin «wakuwaʼipa maʼaka sukuwaʼipa wanee anuwa yalejewaain makat sutuma sümüna palaa jee sutuma joutai». Wanaawasü tü jülüjakat waaʼin sümaa tü nümakat Maleiwa suluʼu tü Bibliakat süchiki nakuwaʼipa na jaleetshiikana otta na aaʼinrakana kasa yarüttüsü.
Lotusü maʼin tü sümakat tü Bibliakat süchiki nakuwaʼipa na jaleetshiikana, müsü shia:
«Nnojo püinkaain nümaa wanee toolo maʼaka püinkaain sümaa wanee jierü» (Levítico 18:22).
«Nuuʼulaaka Maleiwa naaʼinrajatüin naya wayuukana tü kasa yarüttüsü suchuntaakat naaʼin [...]. Jamüshiijaʼa na jieyuukana nnojoliinnapa ainkaweein namaa na tooloyuukana, shia neʼe naaʼinreeka amüin wanee kasa naata suulia tü akumajünakalü apüla naya nutuma Maleiwa» (Roma 1:24, 26).
«Nnojo jimeejiraain aaʼin. Na wayuu aʼluwajiraakana nakuwaʼipa, na aʼwaajakana maleiwayaasü, na kawalaʼatakana atuma naʼwayuuse, na jaleetshiikana, na tooloyuu kakuwaʼipajiraakana namaa na tooloyuukana wanaa namaa, na kaʼruwaraliikana, na wayuu achuntaakana aaʼin wanee kasa naata kakorotshi, na epeʼrüliikana, na wayuu airuʼutkana anüiki sümüin wayuu otta na emeejüliikana wayuu, nnojoleerü neʼrüin tü kasa anasü eejeetkat nuluwataapeena Maleiwa» (1 Corinto 6:9, 10).
Waaʼinrajatü wapüshuaʼa tü nümakat Maleiwa jaʼitairü kasain suchuntaain waaʼin, wachecherüinjatü waaʼin suulia waaʼinrüin tia (Colosas 3:5).
¿Shiache süküjeeka . . . ?
¿Shiache süküjeetka achiki tü Bibliakat walerajüinjanain na makana akuwaʼipa?
Nnojo. Aküjünüsü suluʼu tü Bibliakat nnojoluinjatüin waʼürülain wayuu. Wachajaainjatü sukuwaʼipa süpüla anajiraainjanain waya namaa jaʼitairü jamüin maʼin nakuwaʼipa (Hebreokana 12:14). Nnojotkalaka anain wemeʼerainparale, waʼürülale na jaleetshiikana otta na jieyuu tooleekana aaʼin.
¿Shiache süküjeeka achiki wayoutajatüin kasaalüin na makana akuwaʼipa?
Aküjünüsü suluʼu tü Bibliakat shiain anain nümüin Maleiwa kasaalüinjachin wanee toolo sümaa wanee jierü (Mateo 19:4-6). Nnojoishii achottuin na anoujashiikana sünain tü pütchi akumajünakat süchiki kasaalüinjanale na jaleetshiikana otta na jieyuu tooleekana aaʼin. Nnojotsü waaʼinrüin tia süka nnojoliin sünainpünaain waya poliitika maʼaka süküjain shia tü Bibliakat (Juan 18:36).
¿Jama . . . ?
Jama, jaleerüle wanee toolo jee tooleere saaʼin wanee jierü ¿Eesüche süpüla neeʼiratüin nakuwaʼipa?
Nounteerü neeʼiratüin nakuwaʼipa, jamüsüjaʼa saashin tü Bibliakat nakalioʼu na nikirajüinkana Jesús nountuin waneinnua wayuu neeʼiratüin nakuwaʼipa. Nüshajüin Pablo suluʼu tü karaloʼuta namüinjatkat na chejeʼewaliikana Corinto nnojoleerüin neʼrüin tü kasa anasü eejeetkat nuluwataapeena Maleiwa na jaleetshiikana. Nümaka mapa namüin: «Mapuʼusü jukuwaʼipa jümaiwa»(1 Corinto 6:11).
¿Nnojotsüche suchuntuin naaʼin naya wayuukana jaleerüinjanain jee tooleeinjatüin naaʼin nachikuaʼa? Eesü suchuntaale naaʼin tia. Anuujeseʼe tü sümakat tü Bibliakat: «Aluʼu shiainjaʼa anain jeketüle tü jukuwaʼipakat [...]. Tia müsü aka saaʼin nukuwaʼipa Maleiwa, shiʼipaʼaya pansaain tü kasa jütüjakat nüchiki Maleiwa, anakajaʼa junouteʼerüle tü jukuwaʼipakat» (Colosas 3:10). Saashin tia pütchikat wanouteʼerüinjatü wakuwaʼipa shiʼipaʼaya.
¿Jama eere na aaʼinreekana tü nümakat Maleiwa sümaa ayatüinña suchuntaain naaʼin amaʼüjirawaa?
Suchuntaale naaʼin wanee wayuu wanee kasa niainjachi aneekaka nüchecherüinjachire naaʼin suulia. Anuu tü waaʼinrajatkat saashin tü Bibliakat müle wakuwaʼipa: «Juuʼulaainjachi niain Maleiwa oʼunirüin jukuwaʼipa sükajee tü nüpülainkat, nnojoleetka jaainjain tü kasa mojusü suchuntaakat jiʼiruku» (Galacia 5:16).
Saashin tia wetsiikulokot, ayateeria suchuntaain naaʼin wanee wayuu amaʼüjirawaa. Müshiijeseʼe wekirajaainjanain sünain tü Bibliakat otta woʼuraajawalinjanain. Waaʼinrüle tia wachechereerü waaʼin suulia tü kasa mojusü suchuntaakat waaʼin.
David, chi wachuntayüikai anülia paala, nuuntuin nüchecherüin naaʼin süchikijee nüküjain nümüin chi nüshikai jee tü niikat tü alatakat nümüin. «Anasü taaʼin süchikijee taashajaain namaa, anasüje takuwaʼipa jintüiwaʼaya taya, taashajaatüjüire namaa süchikijee tü alatakat tamüin», müshi nia.
Talatüsü waaʼin waaʼinrüle tü nümakat Jehová, jama lotuin sukuwaʼipa süpüshuaʼa tü naaʼinrakat otta eʼreena waya kasa anasü sünainjee (Salmo 19: 8, 11).
