Jamüsaʼa shia. Süküjain tü Bibliakat nusoutuin Maleiwa shiʼipajee tü suchuntakat wayuu nümüin otta eeshii wayuu eʼrakana sünain shiimain tia. Müsü tü Bibliakat nüchiki Maleiwa: «Nikeraajeerü Maleiwa tü nachuntakat na wayuu kojutukana amüin nia. Naapeerü nanüiki süka nachuntuin kaaliinwaa nümüin otta nuʼtteʼereena naya» (Salmo 145:19, TNM). Süpüla nusoutuin Maleiwa shiʼipajee tü wachuntakat nümüin, eeinjatü waneirua kasa waaʼinrajatka.

Tü nuchuntakat wamüin Maleiwa süpüla naapüin wanüiki

•   Niainjachi woʼuraajaka amüin Maleiwa, nnojoishi niainjachin woʼuraajüin amüin Jesús, María, wanee santo, wanee aapiee otta sümüin wanee ayaakuaa. Saashin tü Bibliakat, nia Jehová «chi Aapajakai sünüiki wayuu» (Salmo 65:2, TNM).

•   Nnojotsü wachuntajatüin wanee kasa nnojotka wanaapünaain sümaa tü nümakat wamüin suluʼu tü Bibliakat (1 Juan 5:14, 15).

•   Oʼuraajüinjana waya sükajee nünülia Jesús. Waaʼinrüin tia süpüla weeʼiyatüin kojutuin nia wamüin süka laülaain nia waaʼu. «Taya chi süntajachikai akajee wayuu nünainmüin Maleiwa», müshi Jesús (Juan 14:6).

•   Kanoulainjana waya. Wachunta nümüin Maleiwa süpüla kooʼomüin sütsüin wanoula (Mateo 21:22; Lucas 17:5).

•   Nnojo yaletüin waaʼin otta waküja tü shiimainkat. Müsü tü Bibliakat: «Mayaainjeʼe miyoʼuin maʼin Jehová, jülüjashi naaʼin chi nnojotkai yaletüin aaʼin» (Salmo 138:6, TNM).

•   Oʼuraajüinjana waya waneepia. Müshi Jesús: «Anakaja müleka jüchuntüle nümüin Maleiwa waneepia süka süpüshua jaaʼin. Maa aka wane wayuu nüchuntüle, aapüna amüinchi» (Lucas 11:9).

Tü nnojotkat jülüjain naaʼin Maleiwa

•   Weʼiruku otta woumain. «Shiimain nojolüin koʼuin nükuaippa Maleiwakai sümüin wayuu. Wayuu eekai eein suluʼu mmakat süpüshua, kojutkat atüma Maleiwakai otta aaʼinrakat tü anasükat, nnojoleerü nüjütaain amaa shia» (Aluwataaushikana 10:34, 35).

•   Wakuwaʼipa sünain oʼuraajaa. Eeshii süpüla joyotuin waya sünain oʼuraajaa, waʼwachiraain mmoluʼu, wasapainkain jee shaʼwatüin waya (1 Crónicas 17:16; Nehemías 8:6; Daniel 6:10; Marcos 11:25).

•   Emeturüle wanüiki jee woʼuraajüle suluʼu waaʼin. Asoutushi Jehová shiʼipajee tü wachuntakat nümüin suluʼujee waaʼin (Nehemías 2:1-6).

•   Wainmale kasa shapaaka atuma waaʼin. Müsü tü Bibliakat: «Saaʼu jütüjaaichipain naaʼu Maleiwa sünain nuuntüin naaʼinmajüin jia, jüküja jümaala nümüin süpüshualeʼeya tü ashapataakat atüma jaaʼin» (1 Pedro 5:7).