Ashajünüsü suluʼu tü Bibliakat nnojoluin anain nümüin Maleiwa waʼluwajiraale wakuwaʼipa (1 Tesalónica 4:3). Saashin tü Bibliakat tü «aʼluwajirawaakalü akuwaʼipaa» shialeʼeya süpüshi kawalaʼatale atumawaa wanee wayuu, nakuwaʼipa na jaleetshiikana jee na aʼluwajiraakana nakuwaʼipa sümaa nnojoliin kasaalüin naya.

•  ¿Jamüsü kojutukaʼa nümüin Maleiwa kasaalüin wanee wayuu sümaa nuʼwayuuse?

•  ¿Kepiajiraainjaiche wanee wayuu sümaa wanee wayuu süpülapünaa kasaalüin naya süpüla nayaawatüin saaʼu wanaawale naaʼin?

•  ¿Kasa naaʼinrajatka wanee wayuu sümaa nuʼwayuuse süpüla ayatüin talatüin naaʼin süchikijee kasaalüin naya?

•   Nia Maleiwa shikiishikai tü kasaalüükat. Niʼitaain shikii wanaa sümaa nukumajüin na palajanakana wayuu jee saʼaniraain nakuwaʼipa nutuma (Génesis 2:22-24). Nnojotsü nücheküin Maleiwa kepiain wanee wayuu sümaa wanee jierü sümaa nnojoliin kasaalüin naya.

•   Nütüjaa aaʼulu Maleiwa tü anakat süpüla waaʼinrüin. Nukumajüin Maleiwa sukuwaʼipa kaʼwayuusee süpüla waneepiainjachin wanee wayuu sümaa nuʼwayuuse. Shia nüchekaka anainjatüin nukuwaʼipa wanee wayuu sümaa nuʼwayuuse jee nüchonnii. Jülüjataa paaʼin tüü: süpüla piʼitaain sukorolo wanee kasa sümaa anainjatüin shia putuma, acheküsü jülüjain paaʼin tü nüshajalakat chi akumajakai tia. Müsia neʼe tü waaʼinrüinjatkat, süpüla talatüin waaʼin sümaa wapüshi, oonooinjana waya sümüin tü nümakat Maleiwa. Aneetkalaka wakuwaʼipa waaʼinrüle tia (Isaías 48:17, 18).

•   Mojeerü nukuwaʼipa wanee wayuu nuʼluwajiraale nukuwaʼipa sümaa nnojoluin kasaalüin nia. Wainma neʼe tü kasa alateetkat, maʼaka saaʼin ipuoluin wanee wayuu sümaa nnojoluin sücheküin shia paala, ayuulii sutuma aʼluwajirawaa akuwaʼipaa otta mojuu aaʼin.

•   Anuu tü kasa anasü naapakat Maleiwa namüin na wayuukana: shia kachooinjanain naya. Kojutuinjatü wamüin tia süka kojutuin nümüin Maleiwa tü kataakalü oʼuu. Müsüjeseʼe anainjatüin sukuwaʼipa watuma tia naapakat Maleiwa jee kachooinjana neʼe waya sümaa tü wayuu kasaatkalü amaa waya. Müle shia watuma kojuteerü wamüin sukuwaʼipa kaʼwayuusee (Hebreokana 13:4).

 Süpüla talatüin wanee wayuu sümaa nuʼwayuuse nnojotsü choʼujaain kepiajiraain naya palajana sümaa naʼluwajiraain nakuwaʼipa jee nooʼulaajiraain eepünaale nacheküin shia. Tü naaʼinrajatkat shia naapajiraain nanüiki sümaa paaʼinwajiraain naya süpüla nanoutuin tü alatakat namüin. a Nounteerü tia kasaarüle naya (Mateo 19:6).

 Nnojoleerü anain nukuwaʼipa waneepia wanee wayuu sümaa nuʼwayuuse. Talateetpejeʼe naaʼin naaʼinrüle tü pütchi aküjünakat suluʼu tü Bibliakat. Anuu süpüshi tia pütchikat:

•   Kapüla paaʼin sukuwaʼipa puʼwayuuse suulialeʼeya kapülain paaʼin pukuwaʼipa pümüiwaʼa (1 Corinto 7:3-5; Filipos 2:3, 4).

•   Aijiraainjana maʼin jia otta kojutujiraainjana maʼin jia waneepia (Éfeso 5:25, 33).

•   Piyaawata saaʼu pünüiki süpülapünaa pusoutuin (Proverbios 12:18).

•   Nnojo jaashichijaain otta jülatira sooʼopünaa jaaʼin saainjala juʼwayuuse (Colosas 3:13, 14).