Süküjain wamüin tü Bibliakat sünain eein chi Maleiwakai. Wayaawatüinjatü saaʼu tü sümakat tü Bibliakat süpüla aleewainjanain waya nümaa suulia neʼe wanoujaʼalüin tü nekiiruʼujeejatkat na shikiipüʼükana tü iküleesiakalüirua (1 Juan 5:20; Roma 12:1, TNM). Wekirajaa sünain waneirua pütchi sümaka tü Bibliakat wayaawataka anainjee eein chi Maleiwakai.

•   Sünainjee pansaain maʼin sukuwaʼipa tü kasakalüirua, wayaawata aaʼulu nnojoluin eejaʼalaain shia, eeshi chi Kakumajalakai shia. Müsü sünüiki tü Bibliakat mayaa: «Süpüla eeinjatüin wanee piichi, eeshi chi kakumalakai shia. Jee chi kakumalakai tü kasakalüirua süpüshuaʼa nia Maleiwa» (Hebreokana 3:3, 4, TNM). Mapüleechonsat ayaawataa tia pütchikat jaʼitakajeʼe na ekirajaakana suluʼu eʼikülee miyoʼu, nayaawata aaʼu shiimain tia. a

•   Wayakana na wayuukana, watüjaweerü aaʼu kasapülajanain eeka waya. Nnojorüle wayaawatüin saaʼu tia, nnojoleena talatüin waya. Maka waya saashin tü Bibliakat, shia süka weʼrüin choʼujaain chi Maleiwakai wamüin. Müsüjeseʼe choʼujaain weʼraajeein nukuwaʼipa Maleiwa jee waʼwaajüin nia (Mateo 5:3; Alateetkat Mapeena [Apocalipsis] 4:11). Sükajee choʼujaain wamüin chi Maleiwakai, wayaawata aaʼu eein nia otta alin waya nüpüla. Wayaawatüle saaʼu choʼujaain nia wamüin, talateena waya süka aletüjülüin müin wakuwaʼipa nutuma (Mateo 4:4).

•   Tü pütchi süküjatüjütkalia tü Bibliakat süchiki tü alatajatkat, ekeraajüsü shia kojuya juya süchikijee süshajünüin. Sükajee shikeraajüin tia pütchikat, wayaawata aaʼulu nnojolin sünüikin shia wayuu (2 Pedro 1:20, 21).

•   Wainma tü kasa neʼraajakat jee natüjaakat aaʼu na ashajakana tü Bibliakat wanaapünaa sümaa tü natüjaakalü aaʼu maaʼulu na ekirajaakana sünain jamüin sukuwaʼipa tü kasakalüirua. Jamüshiijaʼa waneinnua wayuu namaiwajannuu, nanoujapuʼu anainrü naaʼuin wanee elepante tü Mmakat. Süküjatüjülia tü Bibliakat nnojoluin kasain aʼalijain tü mmakat (Job 26:7). Jee süküjatüjülia koʼoyooin shia (Isaías 40:22; Martín Nieto). ¿Jamakuwaʼipat süpüla natüjaain saaʼu tia na ashajakana tü Bibliakat? Shia süka niain kaküjalain shia Maleiwa namüin.

•   Süküjain tü Bibliakat süchiki tü kasa natüjaweekalü aaʼu na wayuu manoujainkana nünain Maleiwa. Eesü natüjaweere saaʼu müleka anamiale Maleiwa jee pülashire maʼin nia. ¿Jamakaʼa joutka maʼin kasa mojusü jee müliaka maʼin wayuu? ¿Jamüshii müliaka na wayuukana natuma na anoujakana nünain Maleiwa naashin? (Tito 1:16). Natüjaale saaʼu tü sümakat tü Bibliakat süchiki tia, sükaaliijeena naya süpüla nanoujain nünain Maleiwa.