¿Jamüsü sünüiki tü Bibliakat süchiki nütapaʼa Jesús?
Tü sümakat tü Bibliakat
Nnojotsü jaralüin atüjaain saaʼu jamapuʼuin nütapaʼa Jesús, süka jamüin, nnojoluin süküjain shia tü Bibliakat. Nnojotsü choʼujaain maʼin watüjaain saaʼu tia. Süküjapejeʼe tü Bibliakat süchiki waneirua kasa wayaawataka aaʼujee jamapuʼuin nukuwaʼipa Jesús.
Nuʼupunaa: Wayuu judío Jesús. Eesüjaʼa tü kasa ayataka atuma nia sünainjee tü niikat, jama nuuʼuliwoʼuin Sem tü niikat (Hebreokana 7:13, 14). Nnojoishi jaralin ayatüin maʼin atuma Jesús. Wanaa sümaa chajachin nia Jerusalén, nnojoishi jaralin ayaawatüin nia (Juan 7:10, 11). Nnojoishi joo nia naatajachin maʼin noulia na nikirajüinkana. Jamüsüjaʼa wanaa sümaa nütaʼünajachin natuma na mojulaashiikana, niiʼiyatüin nia Judas namüin süpüla nayaawatüin nia (Mateo 26:47-49).
Nuʼwala: Eeshijaʼa nnojoire kaʼwaloulein Jesús, süka sümüin tü Bibliakat mayaa: «Wane wayuu toolo, müleka kaʼwaloulere, mojutsai nia sütüma wayuu» (1 Corinto 11:14).
Nüliima: Kaliimapüʼüshi Jesús. Oonoopuʼushi nia sümüin tü pütchi aapünakat nümüin Moisés süchiki nnojoluinjachin nüüjirüin nüliima wanee wayuu (Levítico 19:27; Galacia 4:4). Sünain wanee pütchi aküjünatüjütkalia süchiki müliainjachin Jesús, aküjünüsü süchiki tü nüliimakaʼaya (Isaías 50:6).
Nütapaʼa: Jesús nia wanee wayuu katchinkai maʼin. Wattakuwaipuʼushi nia sünain aküjaa pütchi (Mateo 9:35). Nujuʼitirüin Jesús piantua na oikaaliikana suluʼujee tü aʼwaajüleekat Maleiwa, nujunaain tü nemeesainkat otta niipiijaain tü mürütkalüirua süka jiiku (Lucas 19:45, 46; Juan 2:14, 15). Anuu sünüiki wanee karaloʼuta süchiki tia: «Aküjünüsü suluʼu tü karaloʼutairua ashajünakat nüchiki Jesús, anapuʼuin maʼin nütapaʼa otta nnojoluin ayuulin nia» (Cyclopedia nümüinka MʼClintock otta Strong, volumen IV, süpana 884).
Nukuwaʼipa: Kamaneepuʼushi maʼin Jesús, amüliajüi nia saaʼin wayuu jee jaʼyasü maʼin naaʼu tia (Mateo 11:28-30). Antüsü wayuu maʼleekalia nünainmüin Jesús süpüla nümüliajüin saaʼin jee nükaalinjain naya (Lucas 5:12, 13; 7:37, 38). Anasü naaʼin na tepichikana nümaa (Mateo 19:13-15; Marcos 9:35-37).
Pütchi nnojotka shiimain süchiki tü sümakat wayuu nüchiki Jesús
Nanoujaka anain waneinnua wayuu: Saashin soutkuʼu wayuu, mütsiia atachi Jesús süka müin aka saaʼin laana nuʼwala jee müin aka saaʼin sünoʼu paliʼi tü nuitkat saashin Alateetkat Mapeena (Alateetkat Mapeena 1:14, 15, Biblia del Peregrino).
Tü shiimainkat: Tü aküjünakat suluʼu Alateetkat Mapeena kayaawasesü atumawaa (Alateetkat Mapeena 1:1). Wanaa sümaa süküjünüin süchiki nuʼwala jee nüi Jesús shiyaawase neʼe tü nukuwaʼipainjatkat süchikijee nüsoʼiraain aaʼin. Nnojotsü müin nukuwaʼipa wanaa sümaa yaajachin nia saaʼu tü mmakat. Süküjain Alateetkat Mapeena 1:14, TNM kasuushaatain maʼin nuʼwala Jesús maʼaka saaʼin laana jee nieve. Tia, shiiʼiyatüin kekiin maʼin nia sutuma kakaliaichin nia (Alateetkat Mapeena 3:14). Nnojotsü shiain süküjeein achiki wetsiikulokot tüü laanain jee nievein tü nuʼwalakat Jesús.
Niʼrüin Juan müin tü nuitkat Jesús maʼaka saaʼin «paira eekai eerolojuushin» (Alateetkat Mapeena 1:15). «Otta nuʼupünaa, müsü aka nuchuwala chi kaʼikai sütsüinruʼupa» (Alateetkat Mapeena 1:16). Wayaawata aaʼulu ayaawasein neʼe tü nüküjakat Juan süka nnojoluin eein wayuu eekai müin akuwaʼipaa mayaa. Müsüjeseʼe watüjaain saaʼu «kawaralain maʼi nüʼütpünaa» Jesús süchikijee süsoʼiraain naaʼin (1 Timoteo 6:16).
Nanoujaka anain waneinnua wayuu: Matchinsai Jesús.
Tü shiimainkat: Katchinshi Jesús sümaa yalayalain naaʼin. Jamüsüjaʼa wanaa sümaa nüchajaanüin süpüla nütaünnüin, nüküjain jaralin nia (Juan 18:4-8). Süka niʼyataalin Jesús süka taapüla eesüjaʼa süpüla anain maʼin nütapaʼa (Marcos 6:3).
¿Jamaka isaka nüchiki Jesús nülüʼüjain tü wunuʼu nükachennüinjatkalü anain nia? ¿Jamüshi outaka nia palajana noulia na akachennakana wanaa nümaa? (Lucas 23:26; Juan 19:31-33). Matchinsat naaʼin süpülapünaa nükachennüin sünain wanee wunuʼu. Matunküinsai nia wanee ai süpülapünaa nükachennüin sutuma shapaain maʼin naaʼin (Lucas 22:42-44). Wataawasü aikat naaʼu sünain müliain nia natuma na judíokana otta müsia jaitpa kaʼikat müliashi nia natuma na romanokana (Mateo 26:67, 68; Juan 19:1-3). Eesüjaʼa shiale outamaatüin atuma nia sutuma müin nukuwaʼipa.
Nanoujaka anain waneinnua wayuu: Mojupuʼusü naaʼin Jesús waneepia.
Tü shiimainkat: Nüshatüin Jesús nukuwaʼipa Jehová, chi Nüshi chakai iipünaa, chi Maleiwa talakai maʼin aaʼin saashin tü Bibliakat (1 Timoteo 1:11, TNM; Juan 14:9). Nikirajüin Jesús na waneinnua tü naaʼinrüinjatkat süpüla talatüin naaʼin (Mateo 5:3-9; Lucas 11:28). Sünainjee tia, wayaawata aaʼulu jayain naaʼu Jesús talatapuʼuin naaʼin.
Eesüjaʼa kamalainjeerüle pümüin aashajeʼeraa tüü
WATÜJAAINJATKA AAʼU SÜNAINJEE TÜ SÜMAKAT TÜ BIBLIAKAT
¿Jamüsü wanoujüinjatka sünain tü sümakat tü Wiwüliakat?
Nünüikire shia Maleiwa, naatasüje shia suulia tü wanee karalouktakalüirua.
WACHIKI
Puchunta puwaraijaanüin aaʼu
Pikirajaa wanee pütchi sümaka tü Bibliakat jee shiale piʼraajüin nakuwaʼipa na aküjaliikana pütchi nüchiki Jehová.