Peteĩ ermána Colombiapegua hérava Nicole heʼi: “Chéve chegustaiterei che Salón del Reino. Upépe ningo ikatu aĩ che ermáno ha che ermanakuérandi”. ¿Ndépa reñeñandu avei upéicha?

 Ko múndo tuichakuére umi testígo de Jehová oguereko amo 63.000 Salón del Réinorupi. Koʼã Salón ndahaʼéi peteĩ lugár iporãvante ikatuhápe jaha jaadora Ñandejárape. David, peteĩ prekursór rregulár oĩva Colómbiape, heʼi: “Ore Salón del Reino omoporãve la ore mensáhe. Heta persóna orevisitáva oñesorprende ohechávo mbaʼeichaitépa oñemantene porã la Salón”. Péro upéva ndahaʼéi péicha péichante oñekonsegíva, ñande heta ñañehaʼã ikatu hag̃uáicha ñamantene porã ha taipotĩ umi Salón del Reino. ¿Mbaʼéichapa ojehupyty upéva?

 Káda kongregasión oñenkarga ojapo hag̃ua mantenimiénto pe Salón del Reino oipurúvape. Upévare umi ermáno pyʼỹi omopotĩ pe Salón ha ojapo chupe mantenimiénto oñembyai mboyve ha omyatyrõ umi mbaʼe oñembyaiʼimíva.

 Ikatu hag̃uáicha umi kongregasión ojapo porãve pe mantenimiénto, pe Departaménto Lokál de Diséño ha Konstruksión térã LDC, oasigna unos kuánto ermánope oho hag̃ua ombokatupyry umi kongregasiónpe. Káda uno koʼã kapasitadór de mantenimiénto oñenkarga 6 térã 10 Salón del Réinore. Haʼekuéra ovisita ha ombokatupyry umi ermánope ikatu hag̃uáicha ojejapo porã pe mantenimiénto. Káda 3 áño haʼekuéra orrevisa porã umi Salón ohecha hag̃ua moõpa ofalta ojejapo porãve la mantenimiénto ha avei isegurove hag̃ua la Salón.

 Entéro umi ermáno ha ermána orresivíva ko kapasitasión oagradeseterei upéva. Peteĩ ermána Indiapegua hérava Indhumathi heʼi: “Chegustaiterei la oremboʼéva hikuái. Avyʼaiterei aikuaávo mbaʼépa che ikatu ajapo oñemantene porãve hag̃ua la Salón”. Peteĩ ermáno Keniapegua hérava Evans heʼi avei: “Rohechakuaa iñimportanteha roarregla peteĩ provléma michĩ reheve, ántes ke oñembyaipave. Péicha saʼive ojegasta”.

 Heta ningo ojegasta ojepuru ha oñemantene porã hag̃ua peteĩ Salón del Reino, ojegasta voi cientos térã miles de dólar. a La pláta ojepurúva odepende moõpa oĩ upe Salón, mboy áñomapa ojapo oñekonstrui hague ha mboy kongregasiónpa oipuru. ¿Moõguipa oñeguenohẽ la pláta ojepaga hag̃ua koʼã mbaʼe?

 Entéro umi gásto oĩva oñemantene porã hag̃ua umi Salón ojekuvri umi kontrivusión voluntária rupive. Peteĩ ermáno Kazajistanpegua hérava Alexander heʼi: “Pe pláta ojepuru jepi ojepaga hag̃ua Internet, y ha lus, péro avei ojejogua hag̃ua prodúkto de limpiésa, kuatia, guánte, pintúra ha umícha”. Umi kontrivusión hembýva oñemoĩ pe káha óvra mundiálpe g̃uarãme, ikatu hag̃uáicha ojepuru pe pláta umi projékto de mantenimiénto hepyvéva ha tuichavévape ojejapóva ko múndo tuichakuére.

 Ojejapo porãve hag̃ua la mantenimiénto peteĩ Salón del Réinope, umi kongregasión orekóma voi peteĩ kantida de pláta oipurútava káda mes. Péro oiméramo peteĩ projéktope g̃uarã ojepurúta 2 o 3 vése mas upévagui, upéicharõ umi ansiáno oporandu pe kapasitadór de mantenimiéntope ikatútapa ojejapo. Upéi, pe LDC oaprováramo pe projékto, upéicharõ oñeguenohẽ la pláta pe kontrivusión oñemoĩva pe óvra mundiálpe g̃uarãgui oñekompleta hag̃ua pe projékto. Pe áño de servísio 2023-pe ojejapo 8.793 projékto koichagua, ha upéva ohupyty kuri 76,6 millón de dólar. Jahechamína mokõi ehémplo koʼã projéktogui.

 Angólape, peteĩ Salón del Reino ojapóva 15 áño oñekonstrui hague, orekóma kuri heta provléma. Tekotevẽ kuri oñembopyahu pe párte eléktrika, umi pare otiripa ha umi vesíno omombeʼu ke oky jave pe y oikepaha hogapekuéra pe Salóngui. Oñesolusiona hag̃ua entéro koʼã provléma pe LDC oorganisa peteĩ projékto ohupytýva 9.285 dólar. Umi vesíno oñesorprende ohechávo mbaʼéichapa ojejapo ko traváho ha oagradeseterei avei.

 Polóniape, peteĩ Salón del Reino técho ikuapáma hína kuri ha la alfómbra katu oñembyaipáma. Pe LDC oaprova oñemyatyrõ hag̃ua pe técho, oñemoĩ hag̃ua hese álgo pono otykypa jey upéi ha okambiaite hag̃ua la alfómbra. Entéro umi mbaʼe ohupyty kuri 9.757 dólar. Ojejapo rupi peichagua rrenovasión, pe Salón ikatútaiti ojepuru heta áñore.

 Ñande javaloraiterei umi kontrivusión ojejapóva, upévare ñañehaʼã ñamantene porã umi Salón del Reino ha umichagua tembiapo omombaʼeguasu avei Jehovápe. Peteĩ ermáno Tongapegua hérava Shaun heʼi: “Ojejapo porã rupi pe mantenimiénto ikatu ñamombaʼeguasu Jehovápe peteĩ lugár ipotĩvape, oĩva vién ordenádo ha oiko porãvape. Ojereko rupi peichagua lugár umi hénte oñeʼẽ porã Jehováre, ha vyʼápe voi roinvita enterovépe ou hag̃ua ore Salónpe”.

 Enterovévante ikatu ñaipytyvõ ñamopotĩvo ha jajapóvo mantenimiénto umi lugár jaadorahápe Ñandejárape. Peteĩ kapasitadór de mantenimiénto Australiapegua hérava Marino heʼi: “Peteĩ priviléhio tuichaitereíva ningo la ñañatende ñane Salón del Réinore, ha enterovetéva ikatu hína ñaipytyvõ upearã. Jajapo jave upéva, jaaorra hína heta pláta oñemeʼẽva umi kontrivusióngui ha péicha ikatu ojepuru porãve umíva umi lugár oñekotevẽvehápe”.

 Peteĩ ermáno Indiapegua hérava Joel ovyʼa ikatu haguére ojapo mantenimiénto isalónpe, haʼe heʼi: “Ambaʼapo jave ermanokuérandi, michĩmi jepe ohechauka chéve mbaʼeichaitépa avyʼáta ág̃a ajapo vove upéva pe múndo pyahúpe”. Nicole, pe ermána ñamensiona vaʼekue ajeʼi, heʼive: “Ramoite umi ermáno omyatyrõ pe técho pórke otykypa hína kuri. Che katu amokã la píso otykypa haguépe la y. Ndahaʼéiramo jepe che la asolusionáva la provléma, si aipytyvõ ani hag̃ua oiko peteĩ aksidénte”.

 Oiméramo nde eipytyvõse ojejapo hag̃ua mantenimiénto ne Salón del Réinope, eñemongetána peteĩ ansiáno ne kongregasionpeguándi. Avei nemanduʼa vaʼerã umi kontrivusión remeʼẽva oipytyvõha ojejapo hag̃ua mantenimiénto ne Salónpe, ha avei umi Salón del Réinope oĩva ko múndo tuichakuére. Koʼã donasión ikatu oñemoĩ umi káha oĩva pe Salón del Réinope voi, térã Internet rupive donate.dan124.com. ¡Roagradeseterei enterovévape péicha pendepojera haguére!